શિષ્ય ઉવાચ
અખંડે સચ્ચિદાનંદે નિર્વિકલ્પૈકરૂપિણિ ।
સ્થિતેઽદ્વિતીયભાવેઽપિ કથં પૂજા વિધીયતે ॥ 1 ॥

પૂર્ણસ્યાવાહનં કુત્ર સર્વાધારસ્ય ચાસનમ્ ।
સ્વચ્છસ્ય પાદ્યમર્ઘ્યં ચ શુદ્ધસ્યાચમનં કુતઃ ॥ 2 ॥

નિર્મલસ્ય કુતઃ સ્નાનં વાસો વિશ્વોદરસ્ય ચ ।
અગોત્રસ્ય ત્વવર્ણસ્ય કુતસ્તસ્યોપવીતકમ્ ॥ 3 ॥

નિર્લેપસ્ય કુતો ગંધઃ પુષ્પં નિર્વાસનસ્ય ચ ।
નિર્વિશેષસ્ય કા ભૂષા કોઽલંકારો નિરાકૃતેઃ ॥ 4 ॥

નિરંજનસ્ય કિં ધૂપૈર્દીપૈર્વા સર્વસાક્ષિણઃ ।
નિજાનંદૈકતૃપ્તસ્ય નૈવેદ્યં કિં ભવેદિહ ॥ 5 ॥

વિશ્વાનંદયિતુસ્તસ્ય કિં તાંબૂલં પ્રકલ્પતે ।
સ્વયંપ્રકાશચિદ્રૂપો યોઽસાવર્કાદિભાસકઃ ॥ 6 ॥

ગીયતે શ્રુતિભિસ્તસ્ય નીરાજનવિધિઃ કુતઃ ।
પ્રદક્ષિણમનંતસ્ય પ્રણામોઽદ્વયવસ્તુનઃ ॥ 7 ॥

વેદવાચામવેદ્યસ્ય કિં વા સ્તોત્રં વિધીયતે ।
અંતર્બહિઃ સંસ્થિતસ્ય ઉદ્વાસનવિધિઃ કુતઃ ॥ 8 ॥

શ્રી ગુરુરુવાચ
આરાધયામિ મણિસંનિભમાત્મલિંગમ્
માયાપુરીહૃદયપંકજસંનિવિષ્ટમ્ ।
શ્રદ્ધાનદીવિમલચિત્તજલાભિષેકૈ-
ર્નિત્યં સમાધિકુસુમૈર્નપુનર્ભવાય ॥ 9 ॥

અયમેકોઽવશિષ્ટોઽસ્મીત્યેવમાવાહયેચ્છિવમ્ ।
આસનં કલ્પયેત્પશ્ચાત્સ્વપ્રતિષ્ઠાત્મચિંતનમ્ ॥ 10 ॥

પુણ્યપાપરજઃસંગો મમ નાસ્તીતિ વેદનમ્ ।
પાદ્યં સમર્પયેદ્વિદ્વન્સર્વકલ્મષનાશનમ્ ॥ 11 ॥

અનાદિકલ્પવિધૃતમૂલાજ્ઞાનજલાંજલિમ્ ।
વિસૃજેદાત્મલિંગસ્ય તદેવાર્ઘ્યસમર્પણમ્ ॥ 12 ॥

બ્રહ્માનંદાબ્ધિકલ્લોલકણકોટ્યંશલેશકમ્ ।
પિબંતીંદ્રાદય ઇતિ ધ્યાનમાચમનં મતમ્ ॥ 13 ॥

બ્રહ્માનંદજલેનૈવ લોકાઃ સર્વે પરિપ્લુતાઃ ।
અચ્છેદ્યોઽયમિતિ ધ્યાનમભિષેચનમાત્મનઃ ॥ 14 ॥

નિરાવરણચૈતન્યં પ્રકાશોઽસ્મીતિ ચિંતનમ્ ।
આત્મલિંગસ્ય સદ્વસ્ત્રમિત્યેવં ચિંતયેન્મુનિઃ ॥ 15 ॥

ત્રિગુણાત્માશેષલોકમાલિકાસૂત્રમસ્મ્યહમ્ ।
ઇતિ નિશ્ચયમેવાત્ર હ્યુપવીતં પરં મતમ્ ॥ 16 ॥

અનેકવાસનામિશ્રપ્રપંચોઽયં ધૃતો મયા ।
નાન્યેનેત્યનુસંધાનમાત્મનશ્ચંદનં ભવેત્ ॥ 17 ॥

રજઃસત્ત્વતમોવૃત્તિત્યાગરૂપૈસ્તિલાક્ષતૈઃ ।
આત્મલિંગં યજેન્નિત્યં જીવન્મુક્તિપ્રસિદ્ધયે ॥ 18 ॥

ઈશ્વરો ગુરુરાત્મેતિ ભેદત્રયવિવર્જિતૈઃ ।
બિલ્વપત્રૈરદ્વિતીયૈરાત્મલિંગં યજેચ્છિવમ્ ॥ 19 ॥

સમસ્તવાસનાત્યાગં ધૂપં તસ્ય વિચિંતયેત્ ।
જ્યોતિર્મયાત્મવિજ્ઞાનં દીપં સંદર્શયેદ્બુધઃ ॥ 20 ॥

નૈવેદ્યમાત્મલિંગસ્ય બ્રહ્માંડાખ્યં મહોદનમ્ ।
પિબાનંદરસં સ્વાદુ મૃત્યુરસ્યોપસેચનમ્ ॥ 21 ॥

અજ્ઞાનોચ્છિષ્ટકરસ્ય ક્ષાલનં જ્ઞાનવારિણા ।
વિશુદ્ધસ્યાત્મલિંગસ્ય હસ્તપ્રક્ષાલનં સ્મરેત્ ॥ 22 ॥

રાગાદિગુણશૂન્યસ્ય શિવસ્ય પરમાત્મનઃ ।
સરાગવિષયાભ્યાસત્યાગસ્તાંબૂલચર્વણમ્ ॥ 23 ॥

અજ્ઞાનધ્વાંતવિધ્વંસપ્રચંડમતિભાસ્કરમ્ ।
આત્મનો બ્રહ્મતાજ્ઞાનં નીરાજનમિહાત્મનઃ ॥ 24 ॥

વિવિધબ્રહ્મસંદૃષ્ટિર્માલિકાભિરલંકૃતમ્ ।
પૂર્ણાનંદાત્મતાદૃષ્ટિં પુષ્પાંજલિમનુસ્મરેત્ ॥ 25 ॥

પરિભ્રમંતિ બ્રહ્માંડસહસ્રાણિ મયીશ્વરે ।
કૂટસ્થાચલરૂપોઽહમિતિ ધ્યાનં પ્રદક્ષિણમ્ ॥ 26 ॥

વિશ્વવંદ્યોઽહમેવાસ્મિ નાસ્તિ વંદ્યો મદન્યતઃ ।
ઇત્યાલોચનમેવાત્ર સ્વાત્મલિંગસ્ય વંદનમ્ ॥ 27 ॥

આત્મનઃ સત્ક્રિયા પ્રોક્તા કર્તવ્યાભાવભાવના ।
નામરૂપવ્યતીતાત્મચિંતનં નામકીર્તનમ્ ॥ 28 ॥

શ્રવણં તસ્ય દેવસ્ય શ્રોતવ્યાભાવચિંતનમ્ ।
મનનં ત્વાત્મલિંગસ્ય મંતવ્યાભાવચિંતનમ્ ॥ 29 ॥

ધ્યાતવ્યાભાવવિજ્ઞાનં નિદિધ્યાસનમાત્મનઃ ।
સમસ્તભ્રાંતિવિક્ષેપરાહિત્યેનાત્મનિષ્ઠતા ॥ 30 ॥

સમાધિરાત્મનો નામ નાન્યચ્ચિત્તસ્ય વિભ્રમઃ ।
તત્રૈવ બહ્મણિ સદા ચિત્તવિશ્રાંતિરિષ્યતે ॥ 31 ॥

એવં વેદાંતકલ્પોક્તસ્વાત્મલિંગપ્રપૂજનમ્ ।
કુર્વન્ના મરણં વાપિ ક્ષણં વા સુસમાહિતઃ ॥ 32 ॥

સર્વદુર્વાસનાજાલં પદપાંસુમિવ ત્યજેત્ ।
વિધૂયાજ્ઞાનદુઃખૌઘં મોક્ષાનંદં સમશ્નુતે ॥ 33 ॥