𑌶𑍍𑌰𑍀𑌮𑌤𑍍𑌪𑌯𑍋𑌨𑌿𑌧𑌿𑌨𑌿𑌕𑍇𑌤𑌨 𑌚𑌕𑍍𑌰𑌪𑌾𑌣𑍇 𑌭𑍋𑌗𑍀𑌂𑌦𑍍𑌰𑌭𑍋𑌗𑌮𑌣𑌿𑌰𑌾𑌜𑌿𑌤 𑌪𑍁𑌣𑍍𑌯𑌮𑍂𑌰𑍍𑌤𑍇 ।
𑌯𑍋𑌗𑍀𑌶 𑌶𑌾𑌶𑍍𑌵𑌤 𑌶𑌰𑌣𑍍𑌯 𑌭𑌵𑌾𑌬𑍍𑌧𑌿𑌪𑍋𑌤 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 1 ॥
𑌬𑍍𑌰𑌹𑍍𑌮𑍇𑌂𑌦𑍍𑌰𑌰𑍁𑌦𑍍𑌰𑌮𑌰𑍁𑌦𑌰𑍍𑌕𑌕𑌿𑌰𑍀𑌟𑌕𑍋𑌟𑌿 𑌸𑌂𑌘𑌟𑍍𑌟𑌿𑌤𑌾𑌂𑌘𑍍𑌰𑌿𑌕𑌮𑌲𑌾𑌮𑌲𑌕𑌾𑌂𑌤𑌿𑌕𑌾𑌂𑌤 ।
𑌲𑌕𑍍𑌷𑍍𑌮𑍀𑌲𑌸𑌤𑍍𑌕𑍁𑌚𑌸𑌰𑍋𑌰𑍁𑌹𑌰𑌾𑌜𑌹𑌂𑌸 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 2 ॥
𑌸𑌂𑌸𑌾𑌰𑌦𑌾𑌵𑌦𑌹𑌨𑌾𑌕𑌰𑌭𑍀𑌕𑌰𑍋𑌰𑍁-𑌜𑍍𑌵𑌾𑌲𑌾𑌵𑌳𑍀𑌭𑌿𑌰𑌤𑌿𑌦𑌗𑍍𑌧𑌤𑌨𑍂𑌰𑍁𑌹𑌸𑍍𑌯 ।
𑌤𑍍𑌵𑌤𑍍𑌪𑌾𑌦𑌪𑌦𑍍𑌮𑌸𑌰𑌸𑍀𑌰𑍁𑌹𑌮𑌾𑌗𑌤𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 3 ॥
𑌸𑌂𑌸𑌾𑌰𑌜𑌾𑌲𑌪𑌤𑌿𑌤𑌤𑌸𑍍𑌯 𑌜𑌗𑌨𑍍𑌨𑌿𑌵𑌾𑌸 𑌸𑌰𑍍𑌵𑍇𑌂𑌦𑍍𑌰𑌿𑌯𑌾𑌰𑍍𑌥 𑌬𑌡𑌿𑌶𑌾𑌗𑍍𑌰 𑌝𑌷𑍋𑌪𑌮𑌸𑍍𑌯 ।
𑌪𑍍𑌰𑍋𑌤𑍍𑌕𑌂𑌪𑌿𑌤 𑌪𑍍𑌰𑌚𑍁𑌰𑌤𑌾𑌲𑍁𑌕 𑌮𑌸𑍍𑌤𑌕𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 4 ॥
𑌸𑌂𑌸𑌾𑌰𑌕𑍂𑌮𑌪𑌤𑌿𑌘𑍋𑌰𑌮𑌗𑌾𑌧𑌮𑍂𑌲𑌂 𑌸𑌂𑌪𑍍𑌰𑌾𑌪𑍍𑌯 𑌦𑍁𑌃𑌖𑌶𑌤𑌸𑌰𑍍𑌪𑌸𑌮𑌾𑌕𑍁𑌲𑌸𑍍𑌯 ।
𑌦𑍀𑌨𑌸𑍍𑌯 𑌦𑍇𑌵 𑌕𑍃𑌪𑌯𑌾 𑌪𑌦𑌮𑌾𑌗𑌤𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 5 ॥
𑌸𑌂𑌸𑌾𑌰𑌭𑍀𑌕𑌰𑌕𑌰𑍀𑌂𑌦𑍍𑌰𑌕𑌰𑌾𑌭𑌿𑌘𑌾𑌤 𑌨𑌿𑌷𑍍𑌪𑍀𑌡𑍍𑌯𑌮𑌾𑌨𑌵𑌪𑍁𑌷𑌃 𑌸𑌕𑌲𑌾𑌰𑍍𑌤𑌿𑌨𑌾𑌶 ।
𑌪𑍍𑌰𑌾𑌣𑌪𑍍𑌰𑌯𑌾𑌣𑌭𑌵𑌭𑍀𑌤𑌿𑌸𑌮𑌾𑌕𑍁𑌲𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 6 ॥
𑌸𑌂𑌸𑌾𑌰𑌸𑌰𑍍𑌪𑌵𑌿𑌷𑌦𑌿𑌗𑍍𑌧𑌮𑌹𑍋𑌗𑍍𑌰𑌤𑍀𑌵𑍍𑌰 𑌦𑌂𑌷𑍍𑌟𑍍𑌰𑌾𑌗𑍍𑌰𑌕𑍋𑌟𑌿𑌪𑌰𑌿𑌦𑌷𑍍𑌟𑌵𑌿𑌨𑌷𑍍𑌟𑌮𑍂𑌰𑍍𑌤𑍇𑌃 ।
𑌨𑌾𑌗𑌾𑌰𑌿𑌵𑌾𑌹𑌨 𑌸𑍁𑌧𑌾𑌬𑍍𑌧𑌿𑌨𑌿𑌵𑌾𑌸 𑌶𑍌𑌰𑍇 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ ॥
𑌸𑌂𑌸𑌾𑌰𑌵𑍃𑌕𑍍𑌷𑌬𑍀𑌜𑌮𑌨𑌂𑌤𑌕𑌰𑍍𑌮-𑌶𑌾𑌖𑌾𑌯𑍁𑌤𑌂 𑌕𑌰𑌣𑌪𑌤𑍍𑌰𑌮𑌨𑌂𑌗𑌪𑍁𑌷𑍍𑌪𑌮𑍍 ।
𑌆𑌰𑍁𑌹𑍍𑌯 𑌦𑍁𑌃𑌖𑌫𑌲𑌿𑌤𑌃 𑌚𑌕𑌿𑌤𑌃 𑌦𑌯𑌾𑌳𑍋 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ ॥
𑌸𑌂𑌸𑌾𑌰𑌸𑌾𑌗𑌰𑌵𑌿𑌶𑌾𑌲𑌕𑌰𑌾𑌳𑌕𑌾𑌳 𑌨𑌕𑍍𑌰𑌗𑍍𑌰𑌹𑌗𑍍𑌰𑌸𑌿𑌤𑌨𑌿𑌗𑍍𑌰𑌹𑌵𑌿𑌗𑍍𑌰𑌹𑌸𑍍𑌯 ।
𑌵𑍍𑌯𑌗𑍍𑌰𑌸𑍍𑌯 𑌰𑌾𑌗𑌨𑌿𑌚𑌯𑍋𑌰𑍍𑌮𑌿𑌨𑌿𑌪𑍀𑌡𑌿𑌤𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ ॥
𑌸𑌂𑌸𑌾𑌰𑌸𑌾𑌗𑌰𑌨𑌿𑌮𑌜𑍍𑌜𑌨𑌮𑍁𑌹𑍍𑌯𑌮𑌾𑌨𑌂 𑌦𑍀𑌨𑌂 𑌵𑌿𑌲𑍋𑌕𑌯 𑌵𑌿𑌭𑍋 𑌕𑌰𑍁𑌣𑌾𑌨𑌿𑌧𑍇 𑌮𑌾𑌮𑍍 ।
𑌪𑍍𑌰𑌹𑍍𑌲𑌾𑌦𑌖𑍇𑌦𑌪𑌰𑌿𑌹𑌾𑌰𑌪𑌰𑌾𑌵𑌤𑌾𑌰 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 10 ॥
𑌸𑌂𑌸𑌾𑌰𑌘𑍋𑌰𑌗𑌹𑌨𑍇 𑌚𑌰𑌤𑍋 𑌮𑍁𑌰𑌾𑌰𑍇 𑌮𑌾𑌰𑍋𑌗𑍍𑌰𑌭𑍀𑌕𑌰𑌮𑍃𑌗𑌪𑍍𑌰𑌚𑍁𑌰𑌾𑌰𑍍𑌦𑌿𑌤𑌸𑍍𑌯 ।
𑌆𑌰𑍍𑌤𑌸𑍍𑌯 𑌮𑌤𑍍𑌸𑌰𑌨𑌿𑌦𑌾𑌘𑌸𑍁𑌦𑍁𑌃𑌖𑌿𑌤𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 11 ॥
𑌬𑌦𑍍𑌧𑍍𑌵𑌾 𑌗𑌲𑍇 𑌯𑌮𑌭𑌟𑌾 𑌬𑌹𑍁 𑌤𑌰𑍍𑌜𑌯𑌂𑌤 𑌕𑌰𑍍𑌷𑌂𑌤𑌿 𑌯𑌤𑍍𑌰 𑌭𑌵𑌪𑌾𑌶𑌶𑌤𑍈𑌰𑍍𑌯𑍁𑌤𑌂 𑌮𑌾𑌮𑍍 ।
𑌏𑌕𑌾𑌕𑌿𑌨𑌂 𑌪𑌰𑌵𑌶𑌂 𑌚𑌕𑌿𑌤𑌂 𑌦𑌯𑌾𑌳𑍋 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 12 ॥
𑌲𑌕𑍍𑌷𑍍𑌮𑍀𑌪𑌤𑍇 𑌕𑌮𑌲𑌨𑌾𑌭 𑌸𑍁𑌰𑍇𑌶 𑌵𑌿𑌷𑍍𑌣𑍋 𑌯𑌜𑍍𑌞𑍇𑌶 𑌯𑌜𑍍𑌞 𑌮𑌧𑍁𑌸𑍂𑌦𑌨 𑌵𑌿𑌶𑍍𑌵𑌰𑍂𑌪 ।
𑌬𑍍𑌰𑌹𑍍𑌮𑌣𑍍𑌯 𑌕𑍇𑌶𑌵 𑌜𑌨𑌾𑌰𑍍𑌦𑌨 𑌵𑌾𑌸𑍁𑌦𑍇𑌵 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 13 ॥
𑌏𑌕𑍇𑌨 𑌚𑌕𑍍𑌰𑌮𑌪𑌰𑍇𑌣 𑌕𑌰𑍇𑌣 𑌶𑌂𑌖-𑌮𑌨𑍍𑌯𑍇𑌨 𑌸𑌿𑌂𑌧𑍁𑌤𑌨𑌯𑌾𑌮𑌵𑌲𑌂𑌬𑍍𑌯 𑌤𑌿𑌷𑍍𑌠𑌨𑍍 ।
𑌵𑌾𑌮𑍇𑌤𑌰𑍇𑌣 𑌵𑌰𑌦𑌾𑌭𑌯𑌪𑌦𑍍𑌮𑌚𑌿𑌹𑍍𑌨𑌂 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 14 ॥
𑌅𑌂𑌧𑌸𑍍𑌯 𑌮𑍇 𑌹𑍃𑌤𑌵𑌿𑌵𑍇𑌕𑌮𑌹𑌾𑌧𑌨𑌸𑍍𑌯 𑌚𑍋𑌰𑍈𑌰𑍍𑌮𑌹𑌾𑌬𑌲𑌿𑌭𑌿𑌰𑌿𑌂𑌦𑍍𑌰𑌿𑌯𑌨𑌾𑌮𑌧𑍇𑌯𑍈𑌃 ।
𑌮𑍋𑌹𑌾𑌂𑌧𑌕𑌾𑌰𑌕𑍁𑌹𑌰𑍇 𑌵𑌿𑌨𑌿𑌪𑌾𑌤𑌿𑌤𑌸𑍍𑌯 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 15 ॥
𑌪𑍍𑌰𑌹𑍍𑌲𑌾𑌦𑌨𑌾𑌰𑌦𑌪𑌰𑌾𑌶𑌰𑌪𑍁𑌂𑌡𑌰𑍀𑌕-𑌵𑍍𑌯𑌾𑌸𑌾𑌦𑌿𑌭𑌾𑌗𑌵𑌤𑌪𑍁𑌂𑌗𑌵𑌹𑍃𑌨𑍍𑌨𑌿𑌵𑌾𑌸 ।
𑌭𑌕𑍍𑌤𑌾𑌨𑍁𑌰𑌕𑍍𑌤𑌪𑌰𑌿𑌪𑌾𑌲𑌨𑌪𑌾𑌰𑌿𑌜𑌾𑌤 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹 𑌮𑌮 𑌦𑍇𑌹𑌿 𑌕𑌰𑌾𑌵𑌲𑌂𑌬𑌮𑍍 ॥ 16 ॥
𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹𑌚𑌰𑌣𑌾𑌬𑍍𑌜𑌮𑌧𑍁𑌵𑍍𑌰𑌤𑍇𑌨 𑌸𑍍𑌤𑍋𑌤𑍍𑌰𑌂 𑌕𑍃𑌤𑌂 𑌶𑍁𑌭𑌕𑌰𑌂 𑌭𑍁𑌵𑌿 𑌶𑌂𑌕𑌰𑍇𑌣 ।
𑌯𑍇 𑌤𑌤𑍍𑌪𑌠𑌂𑌤𑌿 𑌮𑌨𑍁𑌜𑌾 𑌹𑌰𑌿𑌭𑌕𑍍𑌤𑌿𑌯𑍁𑌕𑍍𑌤𑌾-𑌸𑍍𑌤𑍇 𑌯𑌾𑌂𑌤𑌿 𑌤𑌤𑍍𑌪𑌦𑌸𑌰𑍋𑌜𑌮𑌖𑌂𑌡𑌰𑍂𑌪𑌮𑍍 ॥ 1 ॥
