𑌵𑍍𑌯𑌾𑌸𑌂 𑌵𑌸𑌿𑌷𑍍𑌠𑌨𑌪𑍍𑌤𑌾𑌰𑌂 𑌶𑌕𑍍𑌤𑍇𑌃 𑌪𑍌𑌤𑍍𑌰𑌮𑌕𑌲𑍍𑌮𑌷𑌮𑍍 ।
𑌪𑌰𑌾𑌶𑌰𑌾𑌤𑍍𑌮𑌜𑌂 𑌵𑌂𑌦𑍇 𑌶𑍁𑌕𑌤𑌾𑌤𑌂 𑌤𑌪𑍋𑌨𑌿𑌧𑌿𑌮𑍍 ॥ 1

𑌵𑍍𑌯𑌾𑌸𑌾𑌯 𑌵𑌿𑌷𑍍𑌣𑍁𑌰𑍂𑌪𑌾𑌯 𑌵𑍍𑌯𑌾𑌸𑌰𑍂𑌪𑌾𑌯 𑌵𑌿𑌷𑍍𑌣𑌵𑍇 ।
𑌨𑌮𑍋 𑌵𑍈 𑌬𑍍𑌰𑌹𑍍𑌮𑌨𑌿𑌧𑌯𑍇 𑌵𑌾𑌸𑌿𑌷𑍍𑌠𑌾𑌯 𑌨𑌮𑍋 𑌨𑌮𑌃 ॥ 2

𑌕𑍃𑌷𑍍𑌣𑌦𑍍𑌵𑍈𑌪𑌾𑌯𑌨𑌂 𑌵𑍍𑌯𑌾𑌸𑌂 𑌸𑌰𑍍𑌵𑌲𑍋𑌕𑌹𑌿𑌤𑍇 𑌰𑌤𑌮𑍍 ।
𑌵𑍇𑌦𑌾𑌬𑍍𑌜𑌭𑌾𑌸𑍍𑌕𑌰𑌂 𑌵𑌂𑌦𑍇 𑌶𑌮𑌾𑌦𑌿𑌨𑌿𑌲𑌯𑌂 𑌮𑍁𑌨𑌿𑌮𑍍 ॥ 3

𑌵𑍇𑌦𑌵𑍍𑌯𑌾𑌸𑌂 𑌸𑍍𑌵𑌾𑌤𑍍𑌮𑌰𑍂𑌪𑌂 𑌸𑌤𑍍𑌯𑌸𑌂𑌧𑌂 𑌪𑌰𑌾𑌯𑌣𑌮𑍍 ।
𑌶𑌾𑌂𑌤𑌂 𑌜𑌿𑌤𑍇𑌂𑌦𑍍𑌰𑌿𑌯𑌕𑍍𑌰𑍋𑌧𑌂 𑌸𑌶𑌿𑌷𑍍𑌯𑌂 𑌪𑍍𑌰𑌣𑌮𑌾𑌮𑍍𑌯𑌹𑌮𑍍 ॥ 4

𑌅𑌚𑌤𑍁𑌰𑍍𑌵𑌦𑌨𑍋 𑌬𑍍𑌰𑌹𑍍𑌮𑌾 𑌦𑍍𑌵𑌿𑌬𑌾𑌹𑍁𑌰𑌪𑌰𑍋 𑌹𑌰𑌿𑌃 ।
𑌅𑌫𑌾𑌲𑌲𑍋𑌚𑌨𑌃 𑌶𑌂𑌭𑍁𑌃 𑌭𑌗𑌵𑌾𑌨𑍍 𑌬𑌾𑌦𑌰𑌾𑌯𑌣𑌃 ॥ 5

𑌶𑌂𑌕𑌰𑌂 𑌶𑌂𑌕𑌰𑌾𑌚𑌾𑌰𑍍𑌯𑌂 𑌕𑍇𑌶𑌵𑌂 𑌬𑌾𑌦𑌰𑌾𑌯𑌣𑌮𑍍 ।
𑌸𑍂𑌤𑍍𑌰𑌭𑌾𑌷𑍍𑌯𑌕𑍃𑌤𑍌 𑌵𑌂𑌦𑍇 𑌭𑌗𑌵𑌂𑌤𑍌 𑌪𑍁𑌨𑌃 𑌪𑍁𑌨𑌃 ॥ 6

𑌬𑍍𑌰𑌹𑍍𑌮𑌸𑍂𑌤𑍍𑌰𑌕𑍃𑌤𑍇 𑌤𑌸𑍍𑌮𑍈 𑌵𑍇𑌦𑌵𑍍𑌯𑌾𑌸𑌾𑌯 𑌵𑍇𑌧𑌸𑍇 ।
𑌜𑍍𑌞𑌾𑌨𑌶𑌕𑍍𑌤𑍍𑌯𑌵𑌤𑌾𑌰𑌾𑌯 𑌨𑌮𑍋 𑌭𑌗𑌵𑌤𑍋 𑌹𑌰𑍇𑌃 ॥ 𑍭

𑌵𑍍𑌯𑌾𑌸𑌃 𑌸𑌮𑌸𑍍𑌤𑌧𑌰𑍍𑌮𑌾𑌣𑌾𑌂 𑌵𑌕𑍍𑌤𑌾 𑌮𑍁𑌨𑌿𑌵𑌰𑍇𑌡𑌿𑌤𑌃 ।
𑌚𑌿𑌰𑌂𑌜𑍀𑌵𑍀 𑌦𑍀𑌰𑍍𑌘𑌮𑌾𑌯𑍁𑌰𑍍𑌦𑌦𑌾𑌤𑍁 𑌜𑌟𑌿𑌲𑍋 𑌮𑌮 ॥ 𑍮

𑌪𑍍𑌰𑌜𑍍𑌞𑌾𑌬𑌲𑍇𑌨 𑌤𑌪𑌸𑌾 𑌚𑌤𑍁𑌰𑍍𑌵𑍇𑌦𑌵𑌿𑌭𑌾𑌜𑌕𑌃 ।
𑌕𑍃𑌷𑍍𑌣𑌦𑍍𑌵𑍈𑌪𑌾𑌯𑌨𑍋 𑌯𑌶𑍍𑌚 𑌤𑌸𑍍𑌮𑍈 𑌶𑍍𑌰𑍀𑌗𑍁𑌰𑌵𑍇 𑌨𑌮𑌃 ॥ 𑍯

𑌜𑌟𑌾𑌧𑌰𑌸𑍍𑌤𑌪𑍋𑌨𑌿𑌷𑍍𑌠𑌃 𑌶𑍁𑌦𑍍𑌧𑌯𑍋𑌗𑍋 𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌕𑍃𑌷𑍍𑌣𑌾𑌜𑌿𑌨𑌧𑌰𑌃 𑌕𑍃𑌷𑍍𑌣𑌸𑍍𑌤𑌸𑍍𑌮𑍈 𑌶𑍍𑌰𑍀𑌗𑍁𑌰𑌵𑍇 𑌨𑌮𑌃 ॥ 10

𑌭𑌾𑌰𑌤𑌸𑍍𑌯 𑌵𑌿𑌧𑌾𑌤𑌾 𑌚 𑌦𑍍𑌵𑌿𑌤𑍀𑌯 𑌇𑌵 𑌯𑍋 𑌹𑌰𑌿𑌃 ।
𑌹𑌰𑌿𑌭𑌕𑍍𑌤𑌿𑌪𑌰𑍋 𑌯𑌶𑍍𑌚 𑌤𑌸𑍍𑌮𑍈 𑌶𑍍𑌰𑍀𑌗𑍁𑌰𑌵𑍇 𑌨𑌮𑌃 ॥ 11

𑌜𑌯𑌤𑌿 𑌪𑌰𑌾𑌶𑌰𑌸𑍂𑌨𑍁𑌃 𑌸𑌤𑍍𑌯𑌵𑌤𑍀 𑌹𑍃𑌦𑌯𑌨𑌂𑌦𑌨𑍋 𑌵𑍍𑌯𑌾𑌸𑌃 ।
𑌯𑌸𑍍𑌯𑌾𑌸𑍍𑌯 𑌕𑌮𑌲𑌗𑌲𑌿𑌤𑌂 𑌭𑌾𑌰𑌤𑌮𑌮𑍃𑌤𑌂 𑌜𑌗𑌤𑍍𑌪𑌿𑌬𑌤𑌿 ॥ 12

𑌵𑍇𑌦𑌵𑌿𑌭𑌾𑌗𑌵𑌿𑌧𑌾𑌤𑍍𑌰𑍇 𑌵𑌿𑌮𑌲𑌾𑌯 𑌬𑍍𑌰𑌹𑍍𑌮𑌣𑍇 𑌨𑌮𑍋 𑌵𑌿𑌶𑍍𑌵𑌦𑍃𑌶𑍇 ।
𑌸𑌕𑌲𑌧𑍃𑌤𑌿𑌹𑍇𑌤𑍁𑌸𑌾𑌧𑌨𑌸𑍂𑌤𑍍𑌰𑌸𑍃𑌜𑍇 𑌸𑌤𑍍𑌯𑌵𑌤𑍍𑌯𑌭𑌿𑌵𑍍𑌯𑌕𑍍𑌤𑌿 𑌮𑌤𑍇 ॥ 13

𑌵𑍇𑌦𑌾𑌂𑌤𑌵𑌾𑌕𑍍𑌯𑌕𑍁𑌸𑍁𑌮𑌾𑌨𑌿 𑌸𑌮𑌾𑌨𑌿 𑌚𑌾𑌰𑍁
𑌜𑌗𑍍𑌰𑌂𑌥 𑌸𑍂𑌤𑍍𑌰𑌨𑌿𑌚𑌯𑍇𑌨 𑌮𑌨𑍋𑌹𑌰𑍇𑌣 ।
𑌮𑍋𑌕𑍍𑌷𑌾𑌰𑍍𑌥𑌿𑌲𑍋𑌕𑌹𑌿𑌤𑌕𑌾𑌮𑌨𑌯𑌾 𑌮𑍁𑌨𑌿𑌰𑍍𑌯𑌃
𑌤𑌂 𑌬𑌾𑌦𑌰𑌾𑌯𑌣𑌮𑌹𑌂 𑌪𑍍𑌰𑌣𑌮𑌾𑌮𑌿 𑌭𑌕𑍍𑌤𑍍𑌯𑌾 ॥ 14

𑌇𑌤𑌿 𑌶𑍍𑌰𑍀 𑌵𑍇𑌦𑌵𑍍𑌯𑌾𑌸 𑌸𑍍𑌤𑍁𑌤𑌿𑌃 ।