ભગવતિ ભવલીલામૌળિમાલે તવાંભઃ
કણમણુપરિમાણં પ્રાણિનો યે સ્પૃશંતિ ।
અમરનગરનારીચામરગ્રાહિણીનાં
વિગતકલિકલંકાતંકમંકે લુઠંતિ ॥ 1 ॥

બ્રહ્માંડં ખંડયંતી હરશિરસિ જટાવલ્લિમુલ્લાસયંતી
સ્વર્લોકાદાપતંતી કનકગિરિગુહાગંડશૈલાત્ સ્ખલંતી ।
ક્ષોણીપૃષ્ટે લુઠંતી દુરિતચયચમૂર્નિર્ભરં ભર્ત્સયંતી
પાથોધિં પૂરયંતી સુરનગરસરિત્પાવની નઃ પુનાતુ ॥ 2 ॥

મજ્જન્માતંગકુંભચ્યુતમદમદિરામોદમત્તાલિજાલં
સ્નાનૈઃ સિદ્ધાંગનાનાં કુચયુગવિગલત્કુંકુમાસંગપિંગમ્ ।
સાયં પ્રાતર્મુનીનાં કુશકુસુમચયૈશ્છિન્નતીરસ્થનીરં
પાયાન્નો ગાંગમંભઃ કરિકરમકરાક્રાંતરહસ્તરંગમ્ ॥ 3 ॥

આદાવાદિપિતામહસ્ય નિયમવ્યાપારપાત્રે જલં
પશ્ચાત્પન્નગશાયિનો ભગવતઃ પાદોદકં પાવનમ્ ।
ભૂયઃ શંભુજટાવિભૂષણમણિર્જહ્નોર્મહર્ષેરિયં
કન્યા કલ્મષનાશિની ભગવતી ભાગીરથી પાતુ મામ્ ॥ 4 ॥

શૈલેંદ્રાદવતારિણી નિજજલે મજ્જજ્જનોત્તારિણી
પારાવારવિહારિણી ભવભયશ્રેણીસમુત્સારિણી ।
શેષાંગૈરનુકારિણી હરશિરોવલ્લીદળાકારિણી
કાશીપ્રાંતવિહારિણી વિજયતે ગંગા મનોહારિણી ॥ 5 ॥

કુતો વીચી વીચિસ્તવ યદિ ગતા લોચનપથં
ત્વમાપીતા પીતાંબરપુરવાસં વિતરસિ ।
ત્વદુત્સંગે ગંગે પતતિ યદિ કાયસ્તનુભૃતાં
તદા માતઃ શાંતક્રતવપદલાભોઽપ્યતિલઘુઃ ॥ 6 ॥

ભગવતિ તવ તીરે નીરમાત્રાશનોઽહં
વિગતવિષયતૃષ્ણઃ કૃષ્ણમારાધયામિ ।
સકલકલુષભંગે સ્વર્ગસોપાનસંગે
તરલતરતરંગે દેવિ ગંગે પ્રસીદ ॥ 7 ॥

માતર્જાહ્નવિ શંભુસંગમિલિતે મૌળૌ નિધાયાંજલિં
ત્વત્તીરે વપુષોઽવસાનસમયે નારાયણાંઘ્રિદ્વયમ્ ।
સાનંદં સ્મરતો ભવિષ્યતિ મમ પ્રાણપ્રયાણોત્સવે
ભૂયાદ્ભક્તિરવિચ્યુતા હરિહરાદ્વૈતાત્મિકા શાશ્વતી ॥ 8 ॥

ગંગાષ્ટકમિદં પુણ્યં યઃ પઠેત્પ્રયતો નરઃ ।
સર્વપાપવિનિર્મુક્તો વિષ્ણુલોકં સ ગચ્છતિ ॥ 9 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ ગંગાષ્ટકં સંપૂર્ણમ્ ।