વિરિંચ્યાદિભિઃ પંચભિર્લોકપાલૈઃ
સમૂઢે મહાનંદપીઠે નિષણ્ણમ્ ।
ધનુર્બાણપાશાંકુશપ્રોતહસ્તં
મહસ્ત્રૈપુરં શંકરાદ્વૈતમવ્યાત્ ॥ 1 ॥
યદન્નાદિભિઃ પંચભિઃ કોશજાલૈઃ
શિરઃપક્ષપુચ્છાત્મકૈરંતરંતઃ ।
નિગૂઢે મહાયોગપીઠે નિષણ્ણં
પુરારેરથાંતઃપુરં નૌમિ નિત્યમ્ ॥ 2 ॥
વિરિંચાદિરૂપૈઃ પ્રપંચે વિહૃત્ય
સ્વતંત્રા યદા સ્વાત્મવિશ્રાંતિરેષા ।
તદા માનમાતૃપ્રમેયાતિરિક્તં
પરાનંદમીડે ભવાનિ ત્વદીયમ્ ॥ 3 ॥
વિનોદાય ચૈતન્યમેકં વિભજ્ય
દ્વિધા દેવિ જીવઃ શિવશ્ચેતિ નામ્ના ।
શિવસ્યાપિ જીવત્વમાપાદયંતી
પુનર્જીવમેનં શિવં વા કરોષિ ॥ 4 ॥
સમાકુંચ્ય મૂલં હૃદિ ન્યસ્ય વાયું
મનો ભ્રૂબિલં પ્રાપયિત્વા નિવૃત્તાઃ ।
તતઃ સચ્ચિદાનંદરૂપે પદે તે
ભવંત્યંબ જીવાઃ શિવત્વેન કેચિત્ ॥ 5 ॥
શરીરેઽતિકષ્ટે રિપૌ પુત્રવર્ગે
સદાભીતિમૂલે કલત્રે ધને વા ।
ન કશ્ચિદ્વિરજ્યત્યહો દેવિ ચિત્રં
કથં ત્વત્કટાક્ષં વિના તત્ત્વબોધઃ ॥ 6 ॥
શરીરે ધનેઽપત્યવર્ગે કલત્રે
વિરક્તસ્ય સદ્દેશિકાદિષ્ટબુદ્ધેઃ ।
યદાકસ્મિકં જ્યોતિરાનંદરૂપં
સમાધૌ ભવેત્તત્ત્વમસ્યંબ સત્યમ્ ॥ 7 ॥
મૃષાન્યો મૃષાન્યઃ પરો મિશ્રમેનં
પરઃ પ્રાકૃતં ચાપરો બુદ્ધિમાત્રમ્ ।
પ્રપંચં મિમીતે મુનીનાં ગણોઽયં
તદેતત્ત્વમેવેતિ ન ત્વાં જહીમઃ ॥ 8 ॥
નિવૃત્તિઃ પ્રતિષ્ઠા ચ વિદ્યા ચ શાંતિ-
સ્તથા શાંત્યતીતેતિ પંચીકૃતાભિઃ ।
કલાભિઃ પરે પંચવિંશાત્મિકાભિ-
સ્ત્વમેકૈવ સેવ્યા શિવાભિન્નરૂપા ॥ 9 ॥
અગાધેઽત્ર સંસારપંકે નિમગ્નં
કલત્રાદિભારેણ ખિન્નં નિતાંતમ્ ।
મહામોહપાશૌઘબદ્ધં ચિરાન્માં
સમુદ્ધર્તુમંબ ત્વમેકૈવ શક્તા ॥ 10 ॥
સમારભ્ય મૂલં ગતો બ્રહ્મચક્રં
ભવદ્દિવ્યચક્રેશ્વરીધામભાજઃ ।
મહાસિદ્ધિસંઘાતકલ્પદ્રુમાભા-
નવાપ્યાંબ નાદાનુપાસ્તે ચ યોગી ॥ 11 ॥
ગણેશૈર્ગ્રહૈરંબ નક્ષત્રપંક્ત્યા
તથા યોગિનીરાશિપીઠૈરભિન્નમ્ ।
મહાકાલમાત્માનમામૃશ્ય લોકં
વિધત્સે કૃતિં વા સ્થિતિં વા મહેશિ ॥ 12 ॥
લસત્તારહારામતિસ્વચ્છચેલાં
વહંતીં કરે પુસ્તકં ચાક્ષમાલામ્ ।
શરચ્ચંદ્રકોટિપ્રભાભાસુરાં ત્વાં
સકૃદ્ભાવયન્ભારતીવલ્લભઃ સ્યાત્ ॥ 13 ॥
સમુદ્યત્સહસ્રાર્કબિંબાભવક્ત્રાં
સ્વભાસૈવ સિંદૂરિતાજાંડકોટિમ્ ।
ધનુર્બાણપાશાંકુશાંધારયંતીં
સ્મરંતઃ સ્મરં વાપિ સંમોહયેયુઃ ॥ 14 ॥
મણિસ્યૂતતાટંકશોણાસ્યબિંબાં
હરિત્પટ્ટવસ્ત્રાં ત્વગુલ્લાસિભૂષામ્ ।
હૃદા ભાવયંસ્તપ્તહેમપ્રભાં ત્વાં
શ્રિયો નાશયત્યંબ ચાંચલ્યભાવમ્ ॥ 15 ॥
મહામંત્રરાજાંતબીજં પરાખ્યં
સ્વતો ન્યસ્તબિંદુ સ્વયં ન્યસ્તહાર્દમ્ ।
ભવદ્વક્ત્રવક્ષોજગુહ્યાભિધાનં
સ્વરૂપં સકૃદ્ભાવયેત્સ ત્વમેવ ॥ 16 ॥
તથાન્યે વિકલ્પેષુ નિર્વિણ્ણચિત્તા-
સ્તદેકં સમાધાય બિંદુત્રયં તે ।
પરાનંદસંધાનસિંધૌ નિમગ્નાઃ
પુનર્ગર્ભરંધ્રં ન પશ્યંતિ ધીરાઃ ॥ 17 ॥
ત્વદુન્મેષલીલાનુબંધાધિકારા-
ન્વિરિંચ્યાદિકાંસ્ત્વદ્ગુણાંભોધિબિંદૂન્ ।
ભજંતસ્તિતીર્ષંતિ સંસારસિંધું
શિવે તાવકીના સુસંભાવનેયમ્ ॥ 18 ॥
કદા વા ભવત્પાદપોતેન તૂર્ણં
ભવાંભોધિમુત્તીર્ય પૂર્ણાંતરંગઃ ।
નિમજ્જંતમેનં દુરાશાવિષાબ્ધૌ
સમાલોક્ય લોકં કથં પર્યુદાસ્સે ॥ 19 ॥
કદાવા હૃષીકાણિ સામ્યં ભજેયુઃ
કદા વા ન શત્રુર્ન મિત્રં ભવાનિ ।
કદા વા દુરાશાવિષૂચીવિલોપઃ
કદા વા મનો મે સમૂલં વિનશ્યેત્ ॥ 20 ॥
નમોવાકમાશાસ્મહે દેવિ યુષ્મ-
ત્પદાંભોજયુગ્માય તિગ્માય ગૌરિ ।
વિરિંચ્યાદિભાસ્વત્કિરીટપ્રતોલી-
પ્રદીપાયમાનપ્રભાભાસ્વરાય ॥ 21 ॥
કચે ચંદ્રરેખં કુચે તારહારં
કરે સ્વાદુચાપં શરે ષટ્પદૌઘમ્ ।
સ્મરામિ સ્મરારેરભિપ્રાયમેકં
મદાઘૂર્ણનેત્રં મદીયં નિધાનમ્ ॥ 22 ॥
શરેષ્વેવ નાસા ધનુષ્વેવ જિહ્વા
જપાપાટલે લોચને તે સ્વરૂપે ।
ત્વગેષા ભવચ્ચંદ્રખંડે શ્રવો મે
ગુણે તે મનોવૃત્તિરંબ ત્વયિ સ્યાત્ ॥ 23 ॥
જગત્કર્મધીરાન્વચોધૂતકીરાન્
કુચન્યસ્તહારાંકૃપાસિંધુપૂરાન્ ।
ભવાંભોધિપારાન્મહાપાપદૂરાન્
ભજે વેદસારાંશિવપ્રેમદારાન્ ॥ 24 ॥
સુધાસિંધુસારે ચિદાનંદનીરે
સમુત્ફુલ્લનીપે સુરત્રાંતરીપે ।
મણિવ્યૂહસાલે સ્થિતે હૈમશાલે
મનોજારિવામે નિષણ્ણં મનો મે ॥ 25 ॥
દૃગંતે વિલોલા સુગંધીષુમાલા
પ્રપંચેંદ્રજાલા વિપત્સિંધુકૂલા ।
મુનિસ્વાંતશાલા નમલ્લોકપાલા
હૃદિ પ્રેમલોલામૃતસ્વાદુલીલા ॥ 26 ॥
જગજ્જાલમેતત્ત્વયૈવાંબ સૃષ્ટં
ત્વમેવાદ્ય યાસીંદ્રિયૈરર્થજાલમ્ ।
ત્વમેકૈવ કર્ત્રી ત્વમેકૈવ ભોક્ત્રી
ન મે પુણ્યપાપે ન મે બંધમોક્ષૌ ॥ 27 ॥
ઇતિ પ્રેમભારેણ કિંચિન્મયોક્તં
ન બુધ્વૈવ તત્ત્વં મદીયં ત્વદીયમ્ ।
વિનોદાય બાલસ્ય મૌર્ખ્યં હિ માતસ્-
તદેતત્પ્રલાપસ્તુતિં મે ગૃહાણ ॥ 28 ॥
॥ ઇતિ શ્રીમચ્છંકરાચાર્યવિરચિતા દેવીભુજંગં સંપૂર્ણમ્ ॥
