બ્રહ્મવિષ્ણુમહેશા ઊચુઃ ।
અજં નિર્વિકલ્પં નિરાકારમેકં
નિરાનંદમદ્વૈતમાનંદપૂર્ણમ્ ।
પરં નિર્ગુણં નિર્વિશેષં નિરીહં
પરબ્રહ્મરૂપં ગણેશં ભજેમ ॥ 1 ॥

ગુણાતીતમાદ્યં ચિદાનંદરૂપં
ચિદાભાસકં સર્વગં જ્ઞાનગમ્યમ્ ।
મુનિધ્યેયમાકાશરૂપં પરેશં
પરબ્રહ્મરૂપં ગણેશં ભજેમ ॥ 2 ॥

જગત્કારણં કારણજ્ઞાનરૂપં
સુરાદિં સુખાદિં યુગાદિં ગણેશમ્ ।
જગદ્વ્યાપિનં વિશ્વવંદ્યં સુરેશં
પરબ્રહ્મરૂપં ગણેશં ભજેમ ॥ 3 ॥

રજોયોગતો બ્રહ્મરૂપં શ્રુતિજ્ઞં
સદા કાર્યસક્તં હૃદાચિંત્યરૂપમ્ ।
જગત્કારકં સર્વવિદ્યાનિધાનં
પરબ્રહ્મરૂપં ગણેશં નતાસ્મઃ ॥ 4 ॥

સદા સત્ત્વયોગં મુદા ક્રીડમાનં
સુરારીન્હરંતં જગત્પાલયંતમ્ ।
અનેકાવતારં નિજજ્ઞાનહારં
સદા વિષ્ણુરૂપં ગણેશં નમામઃ ॥ 5 ॥

તમોયોગિનં રુદ્રરૂપં ત્રિનેત્રં
જગદ્ધારકં તારકં જ્ઞાનહેતુમ્ ।
અનેકાગમૈઃ સ્વં જનં બોધયંતં
સદા શર્વરૂપં ગણેશં નમામઃ ॥ 6 ॥

તમસ્તોમહારં જનાજ્ઞાનહારં
ત્રયીવેદસારં પરબ્રહ્મપારમ્ ।
મુનિજ્ઞાનકારં વિદૂરેવિકારં
સદા બ્રહ્મરૂપં ગણેશં નમામઃ ॥ 7 ॥

નિજૈરોષધીસ્તર્પયંતં કરોદ્યૈઃ
સરૌઘાન્કલાભિઃ સુધાસ્રાવિણીભિઃ ।
દિનેશાંશુ સંતાપહારં દ્વિજેશં
શશાંકસ્વરૂપં ગણેશં નમામઃ ॥ 8 ॥

પ્રકાશસ્વરૂપં નભોવાયુરૂપં
વિકારાદિહેતું કલાકાલભૂતમ્ ।
અનેકક્રિયાનેકશક્તિસ્વરૂપં
સદા શક્તિરૂપં ગણેશં નમામઃ ॥ 9 ॥

પ્રધાનસ્વરૂપં મહત્તત્ત્વરૂપં
ધરાવારિરૂપં દિગીશાદિરૂપમ્ ।
અસત્સત્સ્વરૂપં જગદ્ધેતુભૂતં
સદા વિશ્વરૂપં ગણેશં નતાસ્મઃ ॥ 10 ॥

ત્વદીયે મનઃ સ્થાપયેદંઘ્રિયુગ્મે
જનો વિઘ્નસંઘાન્ન પીડાં લભેત ।
લસત્સૂર્યબિંબે વિશાલે સ્થિતોઽયં
જનોધ્વાંત પીડાં કથં વા લભેત ॥ 11 ॥

વયં ભ્રામિતાઃ સર્વથાઽજ્ઞાનયોગા-
-દલબ્ધા તવાંઘ્રિં બહૂન્વર્ષપૂગાન્ ।
ઇદાનીમવાપ્તાસ્તવૈવ પ્રસાદા-
-ત્પ્રપન્નાન્સદા પાહિ વિશ્વંભરાદ્ય ॥ 12 ॥

ગણેશ ઉવાચ ।
ઇદં યઃ પઠેત્પ્રાતરુત્થાય ધીમાન્
ત્રિસંધ્યં સદા ભક્તિયુક્તો વિશુદ્ધઃ ।
સપુત્રાન્ શ્રિયં સર્વકામાન્ લભેત
પરબ્રહ્મરૂપો ભવેદંતકાલે ॥ 13 ॥

ઇતિ ગણેશપુરાણે ઉપાસનાખંડે ત્રયોદશોઽધ્યાયે શ્રીગણપતિસ્તવઃ ।