භගවති භවලීලාමෞළිමාලේ තවාංභඃ
කණමණුපරිමාණං ප්රාණිනෝ යේ ස්පෘශංති ।
අමරනගරනාරීචාමරග්රාහිණීනාං
විගතකලිකලංකාතංකමංකේ ලුඨංති ॥ 1 ॥

බ්රහ්මාංඩං ඛංඩයංතී හරශිරසි ජටාවල්ලිමුල්ලාසයංතී
ස්වර්ලෝකාදාපතංතී කනකගිරිගුහාගංඩශෛලාත් ස්ඛලංතී ।
ක්ෂෝණීපෘෂ්ටේ ලුඨංතී දුරිතචයචමූර්නිර්භරං භර්ත්සයංතී
පාථෝධිං පූරයංතී සුරනගරසරිත්පාවනී නඃ පුනාතු ॥ 2 ॥

මජ්ජන්මාතංගකුංභච්යුතමදමදිරාමෝදමත්තාලිජාලං
ස්නානෛඃ සිද්ධාංගනානාං කුචයුගවිගලත්කුංකුමාසංගපිංගම් ।
සායං ප්රාතර්මුනීනාං කුශකුසුමචයෛශ්ඡින්නතීරස්ථනීරං
පායාන්නෝ ගාංගමංභඃ කරිකරමකරාක්රාංතරහස්තරංගම් ॥ 3 ॥

ආදාවාදිපිතාමහස්ය නියමව්යාපාරපාත්රේ ජලං
පශ්චාත්පන්නගශායිනෝ භගවතඃ පාදෝදකං පාවනම් ।
භූයඃ ශංභුජටාවිභූෂණමණිර්ජහ්නෝර්මහර්ෂේරියං
කන්යා කල්මෂනාශිනී භගවතී භාගීරථී පාතු මාම් ॥ 4 ॥

ශෛලේංද්රාදවතාරිණී නිජජලේ මජ්ජජ්ජනෝත්තාරිණී
පාරාවාරවිහාරිණී භවභයශ්රේණීසමුත්සාරිණී ।
ශේෂාංගෛරනුකාරිණී හරශිරෝවල්ලීදළාකාරිණී
කාශීප්රාංතවිහාරිණී විජයතේ ගංගා මනෝහාරිණී ॥ 5 ॥

කුතෝ වීචී වීචිස්තව යදි ගතා ලෝචනපථං
ත්වමාපීතා පීතාංබරපුරවාසං විතරසි ।
ත්වදුත්සංගේ ගංගේ පතති යදි කායස්තනුභෘතාං
තදා මාතඃ ශාංතක්රතවපදලාභෝऽප්යතිලඝුඃ ॥ 6 ॥

භගවති තව තීරේ නීරමාත්රාශනෝऽහං
විගතවිෂයතෘෂ්ණඃ කෘෂ්ණමාරාධයාමි ।
සකලකලුෂභංගේ ස්වර්ගසෝපානසංගේ
තරලතරතරංගේ දේවි ගංගේ ප්රසීද ॥ 7 ॥

මාතර්ජාහ්නවි ශංභුසංගමිලිතේ මෞළෞ නිධායාංජලිං
ත්වත්තීරේ වපුෂෝऽවසානසමයේ නාරායණාංඝ්රිද්වයම් ।
සානංදං ස්මරතෝ භවිෂ්යති මම ප්රාණප්රයාණෝත්සවේ
භූයාද්භක්තිරවිච්යුතා හරිහරාද්වෛතාත්මිකා ශාශ්වතී ॥ 8 ॥

ගංගාෂ්ටකමිදං පුණ්යං යඃ පඨේත්ප්රයතෝ නරඃ ।
සර්වපාපවිනිර්මුක්තෝ විෂ්ණුලෝකං ස ගච්ඡති ॥ 9 ॥

ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ ගංගාෂ්ටකං සංපූර්ණම් ।