ଭଗଵତି ଭଵଲୀଲାମୌଳିମାଲେ ତଵାଂଭଃ
କଣମଣୁପରିମାଣଂ ପ୍ରାଣିନୋ ୟେ ସ୍ପୃଶଂତି ।
ଅମରନଗରନାରୀଚାମରଗ୍ରାହିଣୀନାଂ
ଵିଗତକଲିକଲଂକାତଂକମଂକେ ଲୁଠଂତି ॥ 1 ॥

ବ୍ରହ୍ମାଂଡଂ ଖଂଡୟଂତୀ ହରଶିରସି ଜଟାଵଲ୍ଲିମୁଲ୍ଲାସୟଂତୀ
ସ୍ଵର୍ଲୋକାଦାପତଂତୀ କନକଗିରିଗୁହାଗଂଡଶୈଲାତ୍ ସ୍ଖଲଂତୀ ।
କ୍ଷୋଣୀପୃଷ୍ଟେ ଲୁଠଂତୀ ଦୁରିତଚୟଚମୂର୍ନିର୍ଭରଂ ଭର୍ତ୍ସୟଂତୀ
ପାଥୋଧିଂ ପୂରୟଂତୀ ସୁରନଗରସରିତ୍ପାଵନୀ ନଃ ପୁନାତୁ ॥ 2 ॥

ମଜ୍ଜନ୍ମାତଂଗକୁଂଭଚ୍ୟୁତମଦମଦିରାମୋଦମତ୍ତାଲିଜାଲଂ
ସ୍ନାନୈଃ ସିଦ୍ଧାଂଗନାନାଂ କୁଚୟୁଗଵିଗଲତ୍କୁଂକୁମାସଂଗପିଂଗମ୍ ।
ସାୟଂ ପ୍ରାତର୍ମୁନୀନାଂ କୁଶକୁସୁମଚୟୈଶ୍ଛିନ୍ନତୀରସ୍ଥନୀରଂ
ପାୟାନ୍ନୋ ଗାଂଗମଂଭଃ କରିକରମକରାକ୍ରାଂତରହସ୍ତରଂଗମ୍ ॥ 3 ॥

ଆଦାଵାଦିପିତାମହସ୍ୟ ନିୟମଵ୍ୟାପାରପାତ୍ରେ ଜଲଂ
ପଶ୍ଚାତ୍ପନ୍ନଗଶାୟିନୋ ଭଗଵତଃ ପାଦୋଦକଂ ପାଵନମ୍ ।
ଭୂୟଃ ଶଂଭୁଜଟାଵିଭୂଷଣମଣିର୍ଜହ୍ନୋର୍ମହର୍ଷେରିୟଂ
କନ୍ୟା କଲ୍ମଷନାଶିନୀ ଭଗଵତୀ ଭାଗୀରଥୀ ପାତୁ ମାମ୍ ॥ 4 ॥

ଶୈଲେଂଦ୍ରାଦଵତାରିଣୀ ନିଜଜଲେ ମଜ୍ଜଜ୍ଜନୋତ୍ତାରିଣୀ
ପାରାଵାରଵିହାରିଣୀ ଭଵଭୟଶ୍ରେଣୀସମୁତ୍ସାରିଣୀ ।
ଶେଷାଂଗୈରନୁକାରିଣୀ ହରଶିରୋଵଲ୍ଲୀଦଳାକାରିଣୀ
କାଶୀପ୍ରାଂତଵିହାରିଣୀ ଵିଜୟତେ ଗଂଗା ମନୋହାରିଣୀ ॥ 5 ॥

କୁତୋ ଵୀଚୀ ଵୀଚିସ୍ତଵ ୟଦି ଗତା ଲୋଚନପଥଂ
ତ୍ଵମାପୀତା ପୀତାଂବରପୁରଵାସଂ ଵିତରସି ।
ତ୍ଵଦୁତ୍ସଂଗେ ଗଂଗେ ପତତି ୟଦି କାୟସ୍ତନୁଭୃତାଂ
ତଦା ମାତଃ ଶାଂତକ୍ରତଵପଦଲାଭୋଽପ୍ୟତିଲଘୁଃ ॥ 6 ॥

ଭଗଵତି ତଵ ତୀରେ ନୀରମାତ୍ରାଶନୋଽହଂ
ଵିଗତଵିଷୟତୃଷ୍ଣଃ କୃଷ୍ଣମାରାଧୟାମି ।
ସକଲକଲୁଷଭଂଗେ ସ୍ଵର୍ଗସୋପାନସଂଗେ
ତରଲତରତରଂଗେ ଦେଵି ଗଂଗେ ପ୍ରସୀଦ ॥ 7 ॥

ମାତର୍ଜାହ୍ନଵି ଶଂଭୁସଂଗମିଲିତେ ମୌଳୌ ନିଧାୟାଂଜଲିଂ
ତ୍ଵତ୍ତୀରେ ଵପୁଷୋଽଵସାନସମୟେ ନାରାୟଣାଂଘ୍ରିଦ୍ଵୟମ୍ ।
ସାନଂଦଂ ସ୍ମରତୋ ଭଵିଷ୍ୟତି ମମ ପ୍ରାଣପ୍ରୟାଣୋତ୍ସଵେ
ଭୂୟାଦ୍ଭକ୍ତିରଵିଚ୍ୟୁତା ହରିହରାଦ୍ଵୈତାତ୍ମିକା ଶାଶ୍ଵତୀ ॥ 8 ॥

ଗଂଗାଷ୍ଟକମିଦଂ ପୁଣ୍ୟଂ ୟଃ ପଠେତ୍ପ୍ରୟତୋ ନରଃ ।
ସର୍ଵପାପଵିନିର୍ମୁକ୍ତୋ ଵିଷ୍ଣୁଲୋକଂ ସ ଗଚ୍ଛତି ॥ 9 ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଗଂଗାଷ୍ଟକଂ ସଂପୂର୍ଣମ୍ ।