ત્વત્તીરે મણિકર્ણિકે હરિહરૌ સાયુજ્યમુક્તિપ્રદૌ
વાદંતૌ કુરુતઃ પરસ્પરમુભૌ જંતોઃ પ્રયાણોત્સવે ।
મદ્રૂપો મનુજોઽયમસ્તુ હરિણા પ્રોક્તઃ શિવસ્તત્ક્ષણા-
ત્તન્મધ્યાદ્ભૃગુલાંછનો ગરુડગઃ પીતાંબરો નિર્ગતઃ ॥ 1 ॥
ઇંદ્રાદ્યાસ્ત્રિદશાઃ પતંતિ નિયતં ભોગક્ષયે યે પુન-
ર્જાયંતે મનુજાસ્તતોપિ પશવઃ કીટાઃ પતંગાદયઃ ।
યે માતર્મણિકર્ણિકે તવ જલે મજ્જંતિ નિષ્કલ્મષાઃ
સાયુજ્યેઽપિ કિરીટકૌસ્તુભધરા નારાયણાઃ સ્યુર્નરાઃ ॥ 2 ॥
કાશી ધન્યતમા વિમુક્તનગરી સાલંકૃતા ગંગયા
તત્રેયં મણિકર્ણિકા સુખકરી મુક્તિર્હિ તત્કિંકરી ।
સ્વર્લોકસ્તુલિતઃ સહૈવ વિબુધૈઃ કાશ્યા સમં બ્રહ્મણા
કાશી ક્ષોણિતલે સ્થિતા ગુરુતરા સ્વર્ગો લઘુત્વં ગતઃ ॥ 3 ॥
ગંગાતીરમનુત્તમં હિ સકલં તત્રાપિ કાશ્યુત્તમા
તસ્યાં સા મણિકર્ણિકોત્તમતમા યેત્રેશ્વરો મુક્તિદઃ ।
દેવાનામપિ દુર્લભં સ્થલમિદં પાપૌઘનાશક્ષમં
પૂર્વોપાર્જિતપુણ્યપુંજગમકં પુણ્યૈર્જનૈઃ પ્રાપ્યતે ॥ 4 ॥
દુઃખાંભોધિગતો હિ જંતુનિવહસ્તેષાં કથં નિષ્કૃતિઃ
જ્ઞાત્વા તદ્ધિ વિરિંચિના વિરચિતા વારાણસી શર્મદા ।
લોકાઃસ્વર્ગસુખાસ્તતોઽપિ લઘવો ભોગાંતપાતપ્રદાઃ
કાશી મુક્તિપુરી સદા શિવકરી ધર્માર્થમોક્ષપ્રદા ॥ 5 ॥
એકો વેણુધરો ધરાધરધરઃ શ્રીવત્સભૂષાધરઃ
યોઽપ્યેકઃ કિલ શંકરો વિષધરો ગંગાધરો માધવઃ ।
યે માતર્મણિકર્ણિકે તવ જલે મજ્જંતિ તે માનવાઃ
રુદ્રા વા હરયો ભવંતિ બહવસ્તેષાં બહુત્વં કથમ્ ॥ 6 ॥
ત્વત્તીરે મરણં તુ મંગળકરં દેવૈરપિ શ્લાઘ્યતે
શક્રસ્તં મનુજં સહસ્રનયનૈર્દ્રષ્ટું સદા તત્પરઃ ।
આયાંતં સવિતા સહસ્રકિરણૈઃ પ્રત્યુદ્ગતોઽભૂત્સદા
પુણ્યોઽસૌ વૃષગોઽથવા ગરુડગઃ કિં મંદિરં યાસ્યતિ ॥ 7 ॥
મધ્યાહ્ને મણિકર્ણિકાસ્નપનજં પુણ્યં ન વક્તું ક્ષમઃ
સ્વીયૈરબ્ધશતૈશ્ચતુર્મુખધરો વેદાર્થદીક્ષાગુરુઃ ।
યોગાભ્યાસબલેન ચંદ્રશિખરસ્તત્પુણ્યપારંગત-
સ્ત્વત્તીરે પ્રકરોતિ સુપ્તપુરુષં નારાયણં વા શિવમ્ ॥ 8 ॥
કૃચ્છ્રૈ કોટિશતૈઃ સ્વપાપનિધનં યચ્ચાશ્વમેધૈઃ ફલં
તત્સર્વે મણિકર્ણિકાસ્નપનજે પુણ્યે પ્રવિષ્ટં ભવેત્ ।
સ્નાત્વા સ્તોત્રમિદં નરઃ પઠતિ ચેત્સંસારપાથોનિધિં
તીર્ત્વા પલ્વલવત્પ્રયાતિ સદનં તેજોમયં બ્રહ્મણઃ ॥ 9 ॥
