കല്പാനോകഹപുഷ്പജാലവിലസന്നീലാലകാം മാതൃകാം
കാംതാം കംജദളേക്ഷണാം കലിമലപ്രധ്വംസിനീം കാളികാമ് ।
കാംചീനൂപുരഹാരദാമസുഭഗാം കാംചീപുരീനായികാം
കാമാക്ഷീം കരികുംഭസന്നിഭകുചാം വംദേ മഹേശപ്രിയാമ് ॥ 1 ॥
കാശാഭാം ശുകഭാസുരാം പ്രവിലസത്കോശാതകീ സന്നിഭാം
ചംദ്രാര്കാനലലോചനാം സുരുചിരാലംകാരഭൂഷോജ്ജ്വലാമ് ।
ബ്രഹ്മശ്രീപതിവാസവാദിമുനിഭിഃ സംസേവിതാംഘ്രിദ്വയാം
കാമാക്ഷീം ഗജരാജമംദഗമനാം വംദേ മഹേശപ്രിയാമ് ॥ 2 ॥
ഐം ക്ലീം സൌരിതി യാം വദംതി മുനയസ്തത്ത്വാര്ഥരൂപാം പരാം
വാചാമാദിമകാരണം ഹൃദി സദാ ധ്യായംതി യാം യോഗിനഃ ।
ബാലാം ഫാലവിലോചനാം നവജപാവര്ണാം സുഷുമ്നാശ്രിതാം
കാമാക്ഷീം കലിതാവതംസസുഭഗാം വംദേ മഹേശപ്രിയാമ് ॥ 3 ॥
യത്പാദാംബുജരേണുലേശമനിശം ലബ്ധ്വാ വിധത്തേ വിധി-
-ർവിശ്വം തത്പരിപാതി വിഷ്ണുരഖിലം യസ്യാഃ പ്രസാദാച്ചിരമ് ।
രുദ്രഃ സംഹരതി ക്ഷണാത്തദഖിലം യന്മായയാ മോഹിതഃ
കാമാക്ഷീമതിചിത്രചാരുചരിതാം വംദേ മഹേശപ്രിയാമ് ॥ 4 ॥
സൂക്ഷ്മാത്സൂക്ഷ്മതരാം സുലക്ഷിതതനും ക്ഷാംതാക്ഷരൈര്ലക്ഷിതാം
വീക്ഷാശിക്ഷിതരാക്ഷസാം ത്രിഭുവനക്ഷേമംകരീമക്ഷയാമ് ।
സാക്ഷാല്ലക്ഷണലക്ഷിതാക്ഷരമയീം ദാക്ഷായണീം സാക്ഷിണീം
കാമാക്ഷീം ശുഭലക്ഷണൈഃ സുലലിതാം വംദേ മഹേശപ്രിയാമ് ॥ 5 ॥
ഓംകാരാംഗണദീപികാമുപനിഷത്പ്രാസാദപാരാവതീം
ആമ്നായാംബുധിചംദ്രികാമഘതമഃപ്രധ്വംസഹംസപ്രഭാമ് ।
കാംചീപട്ടണപംജരാംതരശുകീം കാരുണ്യകല്ലോലിനീം
കാമാക്ഷീം ശിവകാമരാജമഹിഷീം വംദേ മഹേശപ്രിയാമ് ॥ 6 ॥
ഹ്രീംകാരാത്മകവര്ണമാത്രപഠനാദൈംദ്രീം ശ്രിയം തന്വതീം
ചിന്മാത്രാം ഭുവനേശ്വരീമനുദിനം ഭിക്ഷാപ്രദാനക്ഷമാമ് ।
വിശ്വാഘൌഘനിവാരിണീം വിമലിനീം വിശ്വംഭരാം മാതൃകാം
കാമാക്ഷീം പരിപൂര്ണചംദ്രവദനാം വംദേ മഹേശപ്രിയാമ് ॥ 7 ॥
വാഗ്ദേവീതി ച യാം വദംതി മുനയഃ ക്ഷീരാബ്ധികന്യേതി ച
ക്ഷോണീഭൃത്തനയേതി ച ശ്രുതിഗിരോ യാം ആമനംതി സ്ഫുടമ് ।
ഏകാനേകഫലപ്രദാം ബഹുവിധാഽഽകാരാസ്തനൂസ്തന്വതീം
കാമാക്ഷീം സകലാര്തിഭംജനപരാം വംദേ മഹേശപ്രിയാമ് ॥ 8 ॥
മായാമാദിമകാരണം ത്രിജഗതാമാരാധിതാംഘ്രിദ്വയാം
ആനംദാമൃതവാരിരാശിനിലയാം വിദ്യാം വിപശ്ചിദ്ധിയാമ് ।
മായാമാനുഷരൂപിണീം മണിലസന്മധ്യാം മഹാമാതൃകാം
കാമാക്ഷീം കരിരാജമംദഗമനാം വംദേ മഹേശപ്രിയാമ് ॥ 9 ॥
കാംതാ കാമദുഘാ കരീംദ്രഗമനാ കാമാരിവാമാംകഗാ
കല്യാണീ കലിതാവതാരസുഭഗാ കസ്തൂരികാചര്ചിതാ
കംപാതീരരസാലമൂലനിലയാ കാരുണ്യകല്ലോലിനീ
കല്യാണാനി കരോതു മേ ഭഗവതീ കാംചീപുരീദേവതാ ॥ 10 ॥
ഇതി ശ്രീ കാമാക്ഷീ സ്തോത്രമ് ।
