അജാനംതോ യാംതി ക്ഷയമവശമന്യോന്യകലഹൈ-
-രമീ മായാഗ്രംഥൌ തവ പരിലുഠംതഃ സമയിനഃ ।
ജഗന്മാതര്ജന്മജ്വരഭയതമഃ കൌമുദി വയം
നമസ്തേ കുർവാണാഃ ശരണമുപയാമോ ഭഗവതീമ് ॥ 1 ॥

വചസ്തര്കാഗമ്യസ്വരസപരമാനംദവിഭവ-
-പ്രബോധാകാരായ ദ്യുതിതുലിതനീലോത്പലരുചേ ।
ശിവാദ്യാരാധ്യായ സ്തനഭരവിനമ്രായ സതതം
നമസ്തസ്മൈ കസ്മൈചന ഭവതു മുഗ്ധായ മഹസേ ॥ 2 ॥

അനാദ്യംതാഭേദപ്രണയരസികാപി പ്രണയിനീ
ശിവസ്യാസീര്യത്ത്വം പരിണയവിധൌ ദേവി ഗൃഹിണീ ।
സവിത്രീ ഭൂതാനാമപി യദുദഭൂഃ ശൈലതനയാ
തദേതത്സംസാരപ്രണയനമഹാനാടകമുഖമ് ॥ 3 ॥

ബ്രുവംത്യേകേ തത്ത്വം ഭഗവതി സദന്യേ വിദുരസ-
-ത്പരേ മാതഃ പ്രാഹുസ്തവ സദസദന്യേ സുകവയഃ ।
പരേ നൈതത്സർവം സമഭിദധതേ ദേവി സുധിയ-
-സ്തദേതത്ത്വന്മായാവിലസിതമശേഷം നനു ശിവേ ॥ 4 ॥

ലുഠദ്ഗുംജാഹാരസ്തനഭരനമന്മധ്യലതികാ-
-മുദംചദ്ധര്മാംഭഃ കണഗുണിതവക്ത്രാംബുജരുചമ് ।
ശിവം പാര്ഥത്രാണപ്രവണമൃഗയാകാരഗുണിതം
ശിവാമന്വഗ്യാംതീം ശരണമഹമന്വേമി ശബരീമ് ॥ 5 ॥

മിഥഃ കേശാകേശിപ്രഥനനിധനാസ്തര്കഘടനാഃ
ബഹുശ്രദ്ധാഭക്തിപ്രണതിവിഷയാഃ ശാസ്ത്രവിധയഃ ।
പ്രസീദ പ്രത്യക്ഷീഭവ ഗിരിസുതേ ദേഹി ശരണം
നിരാലംബം ചേതഃ പരിലുഠതി പാരിപ്ലവമിദമ് ॥ 6 ॥

ശുനാം വാ വഹ്നേർവാ ഖഗപരിഷദോ വാ യദശനം
കദാ കേന ക്വേതി ക്വചിദപി ന കശ്ചിത്കലയതി ।
അമുഷ്മിന്വിശ്വാസം വിജഹിഹി മമാഹ്നായ വപുഷി
പ്രപദ്യേഥാശ്ചേതഃ സകലജനനീമേവ ശരണമ് ॥ 7 ॥

തടിത്കോടിജ്യോതിര്ദ്യുതിദലിതഷഡ്ഗ്രംഥിഗഹനം
പ്രവിഷ്ടം സ്വാധാരം പുനരപി സുധാവൃഷ്ടിവപുഷാ ।
കിമപ്യഷ്ടാവിംശത്കിരണസകലീഭൂതമനിശം
ഭജേ ധാമ ശ്യാമം കുചഭരനതം ബര്ബരകചമ് ॥ 8 ॥

ചതുഷ്പത്രാംതഃ ഷഡ്ദലപുടഭഗാംതസ്ത്രിവലയ-
-സ്ഫുരദ്വിദ്യുദ്വഹ്നിദ്യുമണിനിയുതാഭദ്യുതിലതേ ।
ഷഡശ്രം ഭിത്ത്വാദൌ ദശദലമഥ ദ്വാദശദലം
കലാശ്രം ച ദ്വ്യശ്രം ഗതവതി നമസ്തേ ഗിരിസുതേ ॥ 9 ॥

കുലം കേചിത്പ്രാഹുർവപുരകുലമന്യേ തവ ബുധാഃ
പരേ തത്സംഭേദം സമഭിദധതേ കൌലമപരേ ।
ചതുര്ണാമപ്യേഷാമുപരി കിമപി പ്രാഹുരപരേ
മഹാമായേ തത്ത്വം തവ കഥമമീ നിശ്ചിനുമഹേ ॥ 10 ॥

ഷഡധ്വാരണ്യാനീം പ്രലയരവികോടിപ്രതിരുചാ
രുചാ ഭസ്മീകൃത്യ സ്വപദകമലപ്രഹ്വശിരസാമ് ।
വിതന്വാനഃ ശൈവം കിമപി വപുരിംദീവരരുചിഃ
കുചാഭ്യാമാനമ്രസ്തവ പുരുഷകാരോ വിജയതേ ॥ 11 ॥

പ്രകാശാനംദാഭ്യാമവിദിതചരീം മധ്യപദവീം
പ്രവിശ്യൈതദ്ദ്വംദ്വം രവിശശിസമാഖ്യം കബലയന് ।
പ്രപദ്യോര്ധ്വം നാദം ലയദഹനഭസ്മീകൃതകുലഃ
പ്രസാദാത്തേ ജംതുഃ ശിവമകുലമംബ പ്രവിശതി ॥ 12 ॥

മനുഷ്യാസ്തിര്യംചോ മരുത ഇതി ലോകത്രയമിദം
ഭവാംഭോധൌ മഗ്നം ത്രിഗുണലഹരീകോടിലുഠിതമ് ।
കടാക്ഷശ്ചേദ്യത്ര ക്വചന തവ മാതഃ കരുണയാ
ശരീരീ സദ്യോഽയം വ്രജതി പരമാനംദതനുതാമ് ॥ 13 ॥

പ്രിയംഗുശ്യാമാംഗീമരുണതരവാസം കിസലയാം
സമുന്മീലന്മുക്താഫലവഹലനേപഥ്യസുഭഗാമ് ।
സ്തനദ്വംദ്വസ്ഫാരസ്തബകനമിതാം കല്പലതികാം
സകൃദ്ധ്യായംതസ്ത്വാം ദധതി ശിവചിംതാമണിപദമ് ॥ 14 ॥

ഷഡാധാരാവര്തൈരപരിമിതമംത്രോര്മിപടലൈഃ
ലസന്മുദ്രാഫേനൈര്ബഹുവിധലസദ്ദൈവതഝഷൈഃ ।
ക്രമസ്രോതോഭിസ്ത്വം വഹസി പരനാദാമൃതനദീ
ഭവാനി പ്രത്യഗ്രാ ശിവചിദമൃതാബ്ധിപ്രണയിനീ ॥ 15 ॥

മഹീപാഥോവഹ്നിശ്വസനവിയദാത്മേംദുരവിഭി-
-ർവപുര്ഭിഗ്രസ്താശൈരപി തവ കിയാനംബ മഹിമാ ।
അമൂന്യാലോക്യംതേ ഭഗവതി ന കുത്രാപ്യണുതമാ-
-മവസ്ഥാം പ്രാപ്താനി ത്വയി തു പരമവ്യോമവപുഷി ॥ 16 ॥

കലാമാജ്ഞാം പ്രജ്ഞാം സമയമനുഭൂതിം സമരസം
ഗുരും പാരംപര്യം വിനയമുപദേശം ശിവപദമ് ।
പ്രമാണം നിർവാണം പ്രകൃതിമഭിഭൂതിം പരഗുഹാം
വിധിം വിദ്യാമാഹുഃ സകലജനനീമേവ മുനയഃ ॥ 17 ॥

പ്രലീനേ ശബ്ദൌഘേ തദനു വിരതേ ബിംദുവിഭവേ
തതസ്തത്ത്വേ ചാഷ്ടധ്വനിഭിരനപായിന്യധിഗതേ ।
ശ്രിതേ ശാക്തേ പർവണ്യനുകലിതചിന്മാത്ര ഗഹനാം
സ്വസംവിത്തിം യോഗീ രസയതി ശിവാഖ്യാം ഭഗവതീമ് ॥ 18 ॥

പരാനംദാകാരാം നിരവധിശിവൈശ്വര്യവപുഷം
നിരാകാരാം ജ്ഞാനപ്രകൃതിമപരിച്ഛിന്നകരുണാമ് ।
സവിത്രീം ലോകാനാം നിരതിശയധാമാസ്പദപദാം
ഭവോ വാ മോക്ഷോ വാ ഭവതു ഭവതീമേവ ഭജതാമ് ॥ 19 ॥

ജഗത്കായേ കൃത്വാ തദപി ഹൃദയേ തച്ച പുരുഷേ
പുമാംസം ബിംദുസ്ഥം തദപി വിയദാഖ്യേ ച ഗഹനേ ।
തദേതദ്ജ്ഞാനാഖ്യേ തദപി പരമാനംദഗഹനേ
മഹാവ്യോമാകാരേ ത്വദനുഭവശീലോ വിജയതേ ॥ 20 ॥

വിധേ വേദ്യേ വിദ്യേ വിവിധസമയേ വേദഗുലികേ
വിചിത്രേ വിശ്വാദ്യേ വിനയസുലഭേ വേദജനനി ।
ശിവജ്ഞേ ശൂലസ്ഥേ ശിവപദവദാന്യേ ശിവനിധേ
ശിവേ മാതര്മഹ്യം ത്വയി വിതര ഭക്തിം നിരുപമാമ് ॥ 21 ॥

വിധേര്മുംഡം ഹൃത്വാ യദകുരുത പാത്രം കരതലേ
ഹരിം ശൂലപ്രോതം യദഗമയദംസാഭരണതാമ് ।
അലംചക്രേ കംഠം യദപി ഗരലേനാംബ ഗിരിശഃ
ശിവസ്ഥായാഃ ശക്തേസ്തദിദമഖിലം തേ വിലസിതമ് ॥ 22 ॥

വിരിംച്യാഖ്യാ മാതഃ സൃജസി ഹരിസംജ്ഞാ ത്വമവസി
ത്രിലോകീം രുദ്രാഖ്യാ ഹരസി വിദധാസീശ്വരദശാമ് ।
ഭവംതീ നാദാഖ്യാ വിഹരസി ച പാശൌഘദലനീ
ത്വമേവൈകാഽനേകാ ഭവസി കൃതിഭേദൈര്ഗിരിസുതേ ॥ 23 ॥

മുനീനാം ചേതോഭിഃ പ്രമൃദിതകഷായൈരപി മനാ-
-ഗശക്യം സംസ്പ്രഷ്ടും ചകിതചകിതൈരംബ സതതമ് ।
ശ്രുതീനാം മൂര്ധാനഃ പ്രകൃതികഠിനാഃ കോമലതരേ
കഥം തേ വിംദംതേ പദകിസലയേ പാർവതി പദമ് ॥ 24 ॥

തടിദ്വല്ലീം നിത്യാമമൃതസരിതം പാരരഹിതാം
മലോത്തീര്ണാം ജ്യോത്സ്നാം പ്രകൃതിമഗുണഗ്രംഥിഗഹനാമ് ।
ഗിരാം ദൂരാം വിദ്യാമവിനതകുചാം വിശ്വജനനീ-
-മപര്യംതാം ലക്ഷ്മീമഭിദധതി സംതോ ഭഗവതീമ് ॥ 25 ॥

ശരീരം ക്ഷിത്യംഭഃ പ്രഭൃതിരചിതം കേവലമചിത്
സുഖം ദുഃഖം ചായം കലയതി പുമാംശ്ചേതന ഇതി ।
സ്ഫുടം ജാനാനോഽപി പ്രഭവതി ന ദേഹീ രഹയിതും
ശരീരാഹംകാരം തവ സമയബാഹ്യോ ഗിരിസുതേ ॥ 26 ॥

പിതാ മാതാ ഭ്രാതാ സുഹൃദനുചരഃ സദ്മ ഗൃഹിണീ
വപുഃ ക്ഷേത്രം മിത്രം ധനമപി യദാ മാം വിജഹതി ।
തദാ മേ ഭിംദാനാ സപദി ഭയമോഹാംധതമസം
മഹാജ്യോത്സ്നേ മാതര്ഭവ കരുണയാ സന്നിധികരീ ॥ 27 ॥

സുതാ ദക്ഷസ്യാദൌ കില സകലമാതസ്ത്വമുദഭൂഃ
സദോഷം തം ഹിത്വാ തദനു ഗിരിരാജസ്യ ദുഹിതാ ।
അനാദ്യംതാ ശംഭോരപൃഥഗപി ശക്തിര്ഭഗവതീ
വിവാഹാജ്ജായാസീത്യഹഹ ചരിതം വേത്തി തവ കഃ ॥ 28 ॥

കണാസ്ത്വദ്ദീപ്തീനാം രവിശശികൃശാനുപ്രഭൃതയഃ
പരം ബ്രഹ്മ ക്ഷുദ്രം തവ നിയതമാനംദകണികാ ।
ശിവാദി ക്ഷിത്യംതം ത്രിവലയതനോഃ സർവമുദരേ
തവാസ്തേ ഭക്തസ്യ സ്ഫുരസി ഹൃദി ചിത്രം ഭഗവതി ॥ 29 ॥

പുരഃ പശ്ചാദംതര്ബഹിരപരിമേയം പരിമിതം
പരം സ്ഥൂലം സൂക്ഷ്മം സകലമകുലം ഗുഹ്യമഗുഹമ് ।
ദവീയോ നേദീയഃ സദസദിതി വിശ്വം ഭഗവതീ
സദാ പശ്യംത്യാഖ്യാം വഹസി ഭുവനക്ഷോഭജനനീമ് ॥ 30 ॥

പ്രവിശ്യ ത്വന്മാര്ഗം സഹജദയയാ ദേശികദൃശാ
ഷഡധ്വധ്വാംതൌഘച്ഛിദുരഗണനാതീതകരുണാമ് ।
പരാമാജ്ഞാകാരാം സപദി ശിവയംതീം ശിവതനും
സ്വമാത്മാനം ധന്യാശ്ചിരമുപലഭംതേ ഭഗവതീമ് ॥ 31 ॥

മയൂഖാഃ പൂഷ്ണീവ ജ്വലന ഇവ തദ്ദീപ്തികണികാഃ
പയോധൌ കല്ലോലാഃ പ്രതിഹതമഹിമ്നീവ പൃഷതഃ ।
ഉദേത്യോദേത്യാംബ ത്വയി സഹ നിജൈഃ സാത്ത്വികഗുണൈ-
-ര്ഭജംതേ തത്ത്വൌഘാഃ പ്രശമമനുകല്പം പരവശാഃ ॥ 32 ॥

വിധുർവിഷ്ണുര്ബ്രഹ്മാ പ്രകൃതിരണുരാത്മാ ദിനകരഃ
സ്വഭാവോ ജൈനേംദ്രഃ സുഗതമുനിരാകാശമലിനഃ ।
ശിവഃ ശക്തിശ്ചേതി ശ്രുതിവിഷയതാം താമുപഗതാം
വികല്പൈരേഭിസ്ത്വാമഭിദധതി സംതോ ഭഗവതീമ് ॥ 33 ॥

ശിവസ്ത്വം ശക്തിസ്ത്വം ത്വമസി സമയാ ത്വം സമയിനീ
ത്വമാത്മാ ത്വം ദീക്ഷാ ത്വമയമണിമാദിര്ഗുണഗണഃ ।
അവിദ്യാ ത്വം വിദ്യാ ത്വമസി നിഖിലം ത്വം കിമപരം
പൃഥക്തത്ത്വം ത്വത്തോ ഭഗവതി ന വീക്ഷാമഹ ഇമേ ॥ 34 ॥

ത്വയാസൌ ജാനീതേ രചയതി ഭവത്യൈവ സതതം
ത്വയൈവേച്ഛത്യംബ ത്വമസി നിഖിലാ യസ്യ തനവഃ ।
ജഗത്സാമ്യം ശംഭോർവഹസി പരമവ്യോമവപുഷഃ
തഥാപ്യര്ധം ഭൂത്വാ വിഹരസി ശിവസ്യേതി കിമിദമ് ॥ 35 ॥

അസംഖ്യൈഃ പ്രാചീനൈര്ജനനി ജനനൈഃ കര്മവിലയാ-
-ത്സകൃജ്ജന്മന്യംതേ ഗുരുവപുഷമാസാദ്യ ഗിരിശമ് ।
അവാപ്യാജ്ഞാം ശൈവീം ശിവതനുമപി ത്വാം വിദിതവാ-
-ന്നയേയം ത്വത്പൂജാസ്തുതിവിരചനേനൈവ ദിവസാന് ॥ 36 ॥

യത്ഷട്പത്രം കമലമുദിതം തസ്യ യാ കര്ണികാഖ്യാ
യോനിസ്തസ്യാഃ പ്രഥിതമുദരേ യത്തദോംകാരപീഠമ് ।
തസ്യാപ്യംതഃ കുചഭരനതാം കുംഡലീതി പ്രസിദ്ധാം
ശ്യാമാകാരാം സകലജനനീം സംതതം ഭാവയാമി ॥ 37 ॥

ഭുവി പയസി കൃശാനൌ മാരുതേ ഖേ ശശാംകേ
സവിതരി യജമാനേഽപ്യഷ്ടധാ ശക്തിരേകാ ।
വഹസി കുചഭരാഭ്യാം യാവനമ്രാപി വിശ്വം
സകലജനനി സാ ത്വം പാഹി മാമിത്യവാച്യമ് ॥ 38 ॥

ഇതി ശ്രീകാളിദാസ വിരചിത പംചസ്തവ്യാം പംചമഃ സകലജനനീസ്തവഃ ।