𑌕𑌲𑍍𑌪𑌾𑌨𑍋𑌕𑌹𑌪𑍁𑌷𑍍𑌪𑌜𑌾𑌲𑌵𑌿𑌲𑌸𑌨𑍍𑌨𑍀𑌲𑌾𑌲𑌕𑌾𑌂 𑌮𑌾𑌤𑍃𑌕𑌾𑌂
𑌕𑌾𑌂𑌤𑌾𑌂 𑌕𑌂𑌜𑌦𑌳𑍇𑌕𑍍𑌷𑌣𑌾𑌂 𑌕𑌲𑌿𑌮𑌲𑌪𑍍𑌰𑌧𑍍𑌵𑌂𑌸𑌿𑌨𑍀𑌂 𑌕𑌾𑌳𑌿𑌕𑌾𑌮𑍍 ।
𑌕𑌾𑌂𑌚𑍀𑌨𑍂𑌪𑍁𑌰𑌹𑌾𑌰𑌦𑌾𑌮𑌸𑍁𑌭𑌗𑌾𑌂 𑌕𑌾𑌂𑌚𑍀𑌪𑍁𑌰𑍀𑌨𑌾𑌯𑌿𑌕𑌾𑌂
𑌕𑌾𑌮𑌾𑌕𑍍𑌷𑍀𑌂 𑌕𑌰𑌿𑌕𑍁𑌂𑌭𑌸𑌨𑍍𑌨𑌿𑌭𑌕𑍁𑌚𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 1 ॥
𑌕𑌾𑌶𑌾𑌭𑌾𑌂 𑌶𑍁𑌕𑌭𑌾𑌸𑍁𑌰𑌾𑌂 𑌪𑍍𑌰𑌵𑌿𑌲𑌸𑌤𑍍𑌕𑍋𑌶𑌾𑌤𑌕𑍀 𑌸𑌨𑍍𑌨𑌿𑌭𑌾𑌂
𑌚𑌂𑌦𑍍𑌰𑌾𑌰𑍍𑌕𑌾𑌨𑌲𑌲𑍋𑌚𑌨𑌾𑌂 𑌸𑍁𑌰𑍁𑌚𑌿𑌰𑌾𑌲𑌂𑌕𑌾𑌰𑌭𑍂𑌷𑍋𑌜𑍍𑌜𑍍𑌵𑌲𑌾𑌮𑍍 ।
𑌬𑍍𑌰𑌹𑍍𑌮𑌶𑍍𑌰𑍀𑌪𑌤𑌿𑌵𑌾𑌸𑌵𑌾𑌦𑌿𑌮𑍁𑌨𑌿𑌭𑌿𑌃 𑌸𑌂𑌸𑍇𑌵𑌿𑌤𑌾𑌂𑌘𑍍𑌰𑌿𑌦𑍍𑌵𑌯𑌾𑌂
𑌕𑌾𑌮𑌾𑌕𑍍𑌷𑍀𑌂 𑌗𑌜𑌰𑌾𑌜𑌮𑌂𑌦𑌗𑌮𑌨𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 2 ॥
𑌐𑌂 𑌕𑍍𑌲𑍀𑌂 𑌸𑍌𑌰𑌿𑌤𑌿 𑌯𑌾𑌂 𑌵𑌦𑌂𑌤𑌿 𑌮𑍁𑌨𑌯𑌸𑍍𑌤𑌤𑍍𑌤𑍍𑌵𑌾𑌰𑍍𑌥𑌰𑍂𑌪𑌾𑌂 𑌪𑌰𑌾𑌂
𑌵𑌾𑌚𑌾𑌮𑌾𑌦𑌿𑌮𑌕𑌾𑌰𑌣𑌂 𑌹𑍃𑌦𑌿 𑌸𑌦𑌾 𑌧𑍍𑌯𑌾𑌯𑌂𑌤𑌿 𑌯𑌾𑌂 𑌯𑍋𑌗𑌿𑌨𑌃 ।
𑌬𑌾𑌲𑌾𑌂 𑌫𑌾𑌲𑌵𑌿𑌲𑍋𑌚𑌨𑌾𑌂 𑌨𑌵𑌜𑌪𑌾𑌵𑌰𑍍𑌣𑌾𑌂 𑌸𑍁𑌷𑍁𑌮𑍍𑌨𑌾𑌶𑍍𑌰𑌿𑌤𑌾𑌂
𑌕𑌾𑌮𑌾𑌕𑍍𑌷𑍀𑌂 𑌕𑌲𑌿𑌤𑌾𑌵𑌤𑌂𑌸𑌸𑍁𑌭𑌗𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 3 ॥
𑌯𑌤𑍍𑌪𑌾𑌦𑌾𑌂𑌬𑍁𑌜𑌰𑍇𑌣𑍁𑌲𑍇𑌶𑌮𑌨𑌿𑌶𑌂 𑌲𑌬𑍍𑌧𑍍𑌵𑌾 𑌵𑌿𑌧𑌤𑍍𑌤𑍇 𑌵𑌿𑌧𑌿-
-𑌰𑍍𑌵𑌿𑌶𑍍𑌵𑌂 𑌤𑌤𑍍𑌪𑌰𑌿𑌪𑌾𑌤𑌿 𑌵𑌿𑌷𑍍𑌣𑍁𑌰𑌖𑌿𑌲𑌂 𑌯𑌸𑍍𑌯𑌾𑌃 𑌪𑍍𑌰𑌸𑌾𑌦𑌾𑌚𑍍𑌚𑌿𑌰𑌮𑍍 ।
𑌰𑍁𑌦𑍍𑌰𑌃 𑌸𑌂𑌹𑌰𑌤𑌿 𑌕𑍍𑌷𑌣𑌾𑌤𑍍𑌤𑌦𑌖𑌿𑌲𑌂 𑌯𑌨𑍍𑌮𑌾𑌯𑌯𑌾 𑌮𑍋𑌹𑌿𑌤𑌃
𑌕𑌾𑌮𑌾𑌕𑍍𑌷𑍀𑌮𑌤𑌿𑌚𑌿𑌤𑍍𑌰𑌚𑌾𑌰𑍁𑌚𑌰𑌿𑌤𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 4 ॥
𑌸𑍂𑌕𑍍𑌷𑍍𑌮𑌾𑌤𑍍𑌸𑍂𑌕𑍍𑌷𑍍𑌮𑌤𑌰𑌾𑌂 𑌸𑍁𑌲𑌕𑍍𑌷𑌿𑌤𑌤𑌨𑍁𑌂 𑌕𑍍𑌷𑌾𑌂𑌤𑌾𑌕𑍍𑌷𑌰𑍈𑌰𑍍𑌲𑌕𑍍𑌷𑌿𑌤𑌾𑌂
𑌵𑍀𑌕𑍍𑌷𑌾𑌶𑌿𑌕𑍍𑌷𑌿𑌤𑌰𑌾𑌕𑍍𑌷𑌸𑌾𑌂 𑌤𑍍𑌰𑌿𑌭𑍁𑌵𑌨𑌕𑍍𑌷𑍇𑌮𑌂𑌕𑌰𑍀𑌮𑌕𑍍𑌷𑌯𑌾𑌮𑍍 ।
𑌸𑌾𑌕𑍍𑌷𑌾𑌲𑍍𑌲𑌕𑍍𑌷𑌣𑌲𑌕𑍍𑌷𑌿𑌤𑌾𑌕𑍍𑌷𑌰𑌮𑌯𑍀𑌂 𑌦𑌾𑌕𑍍𑌷𑌾𑌯𑌣𑍀𑌂 𑌸𑌾𑌕𑍍𑌷𑌿𑌣𑍀𑌂
𑌕𑌾𑌮𑌾𑌕𑍍𑌷𑍀𑌂 𑌶𑍁𑌭𑌲𑌕𑍍𑌷𑌣𑍈𑌃 𑌸𑍁𑌲𑌲𑌿𑌤𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 5 ॥
𑌓𑌂𑌕𑌾𑌰𑌾𑌂𑌗𑌣𑌦𑍀𑌪𑌿𑌕𑌾𑌮𑍁𑌪𑌨𑌿𑌷𑌤𑍍𑌪𑍍𑌰𑌾𑌸𑌾𑌦𑌪𑌾𑌰𑌾𑌵𑌤𑍀𑌂
𑌆𑌮𑍍𑌨𑌾𑌯𑌾𑌂𑌬𑍁𑌧𑌿𑌚𑌂𑌦𑍍𑌰𑌿𑌕𑌾𑌮𑌘𑌤𑌮𑌃𑌪𑍍𑌰𑌧𑍍𑌵𑌂𑌸𑌹𑌂𑌸𑌪𑍍𑌰𑌭𑌾𑌮𑍍 ।
𑌕𑌾𑌂𑌚𑍀𑌪𑌟𑍍𑌟𑌣𑌪𑌂𑌜𑌰𑌾𑌂𑌤𑌰𑌶𑍁𑌕𑍀𑌂 𑌕𑌾𑌰𑍁𑌣𑍍𑌯𑌕𑌲𑍍𑌲𑍋𑌲𑌿𑌨𑍀𑌂
𑌕𑌾𑌮𑌾𑌕𑍍𑌷𑍀𑌂 𑌶𑌿𑌵𑌕𑌾𑌮𑌰𑌾𑌜𑌮𑌹𑌿𑌷𑍀𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ 6 ॥
𑌹𑍍𑌰𑍀𑌂𑌕𑌾𑌰𑌾𑌤𑍍𑌮𑌕𑌵𑌰𑍍𑌣𑌮𑌾𑌤𑍍𑌰𑌪𑌠𑌨𑌾𑌦𑍈𑌂𑌦𑍍𑌰𑍀𑌂 𑌶𑍍𑌰𑌿𑌯𑌂 𑌤𑌨𑍍𑌵𑌤𑍀𑌂
𑌚𑌿𑌨𑍍𑌮𑌾𑌤𑍍𑌰𑌾𑌂 𑌭𑍁𑌵𑌨𑍇𑌶𑍍𑌵𑌰𑍀𑌮𑌨𑍁𑌦𑌿𑌨𑌂 𑌭𑌿𑌕𑍍𑌷𑌾𑌪𑍍𑌰𑌦𑌾𑌨𑌕𑍍𑌷𑌮𑌾𑌮𑍍 ।
𑌵𑌿𑌶𑍍𑌵𑌾𑌘𑍌𑌘𑌨𑌿𑌵𑌾𑌰𑌿𑌣𑍀𑌂 𑌵𑌿𑌮𑌲𑌿𑌨𑍀𑌂 𑌵𑌿𑌶𑍍𑌵𑌂𑌭𑌰𑌾𑌂 𑌮𑌾𑌤𑍃𑌕𑌾𑌂
𑌕𑌾𑌮𑌾𑌕𑍍𑌷𑍀𑌂 𑌪𑌰𑌿𑌪𑍂𑌰𑍍𑌣𑌚𑌂𑌦𑍍𑌰𑌵𑌦𑌨𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ ॥
𑌵𑌾𑌗𑍍𑌦𑍇𑌵𑍀𑌤𑌿 𑌚 𑌯𑌾𑌂 𑌵𑌦𑌂𑌤𑌿 𑌮𑍁𑌨𑌯𑌃 𑌕𑍍𑌷𑍀𑌰𑌾𑌬𑍍𑌧𑌿𑌕𑌨𑍍𑌯𑍇𑌤𑌿 𑌚
𑌕𑍍𑌷𑍋𑌣𑍀𑌭𑍃𑌤𑍍𑌤𑌨𑌯𑍇𑌤𑌿 𑌚 𑌶𑍍𑌰𑍁𑌤𑌿𑌗𑌿𑌰𑍋 𑌯𑌾𑌂 𑌆𑌮𑌨𑌂𑌤𑌿 𑌸𑍍𑌫𑍁𑌟𑌮𑍍 ।
𑌏𑌕𑌾𑌨𑍇𑌕𑌫𑌲𑌪𑍍𑌰𑌦𑌾𑌂 𑌬𑌹𑍁𑌵𑌿𑌧𑌾𑌽𑌽𑌕𑌾𑌰𑌾𑌸𑍍𑌤𑌨𑍂𑌸𑍍𑌤𑌨𑍍𑌵𑌤𑍀𑌂
𑌕𑌾𑌮𑌾𑌕𑍍𑌷𑍀𑌂 𑌸𑌕𑌲𑌾𑌰𑍍𑌤𑌿𑌭𑌂𑌜𑌨𑌪𑌰𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ ॥
𑌮𑌾𑌯𑌾𑌮𑌾𑌦𑌿𑌮𑌕𑌾𑌰𑌣𑌂 𑌤𑍍𑌰𑌿𑌜𑌗𑌤𑌾𑌮𑌾𑌰𑌾𑌧𑌿𑌤𑌾𑌂𑌘𑍍𑌰𑌿𑌦𑍍𑌵𑌯𑌾𑌂
𑌆𑌨𑌂𑌦𑌾𑌮𑍃𑌤𑌵𑌾𑌰𑌿𑌰𑌾𑌶𑌿𑌨𑌿𑌲𑌯𑌾𑌂 𑌵𑌿𑌦𑍍𑌯𑌾𑌂 𑌵𑌿𑌪𑌶𑍍𑌚𑌿𑌦𑍍𑌧𑌿𑌯𑌾𑌮𑍍 ।
𑌮𑌾𑌯𑌾𑌮𑌾𑌨𑍁𑌷𑌰𑍂𑌪𑌿𑌣𑍀𑌂 𑌮𑌣𑌿𑌲𑌸𑌨𑍍𑌮𑌧𑍍𑌯𑌾𑌂 𑌮𑌹𑌾𑌮𑌾𑌤𑍃𑌕𑌾𑌂
𑌕𑌾𑌮𑌾𑌕𑍍𑌷𑍀𑌂 𑌕𑌰𑌿𑌰𑌾𑌜𑌮𑌂𑌦𑌗𑌮𑌨𑌾𑌂 𑌵𑌂𑌦𑍇 𑌮𑌹𑍇𑌶𑌪𑍍𑌰𑌿𑌯𑌾𑌮𑍍 ॥ ॥
𑌕𑌾𑌂𑌤𑌾 𑌕𑌾𑌮𑌦𑍁𑌘𑌾 𑌕𑌰𑍀𑌂𑌦𑍍𑌰𑌗𑌮𑌨𑌾 𑌕𑌾𑌮𑌾𑌰𑌿𑌵𑌾𑌮𑌾𑌂𑌕𑌗𑌾
𑌕𑌲𑍍𑌯𑌾𑌣𑍀 𑌕𑌲𑌿𑌤𑌾𑌵𑌤𑌾𑌰𑌸𑍁𑌭𑌗𑌾 𑌕𑌸𑍍𑌤𑍂𑌰𑌿𑌕𑌾𑌚𑌰𑍍𑌚𑌿𑌤𑌾
𑌕𑌂𑌪𑌾𑌤𑍀𑌰𑌰𑌸𑌾𑌲𑌮𑍂𑌲𑌨𑌿𑌲𑌯𑌾 𑌕𑌾𑌰𑍁𑌣𑍍𑌯𑌕𑌲𑍍𑌲𑍋𑌲𑌿𑌨𑍀
𑌕𑌲𑍍𑌯𑌾𑌣𑌾𑌨𑌿 𑌕𑌰𑍋𑌤𑍁 𑌮𑍇 𑌭𑌗𑌵𑌤𑍀 𑌕𑌾𑌂𑌚𑍀𑌪𑍁𑌰𑍀𑌦𑍇𑌵𑌤𑌾 ॥ 10 ॥
𑌇𑌤𑌿 𑌶𑍍𑌰𑍀 𑌕𑌾𑌮𑌾𑌕𑍍𑌷𑍀 𑌸𑍍𑌤𑍋𑌤𑍍𑌰𑌮𑍍 ।
