നാരദ ഉവാച
ഭഗവന് ദേവദേവേശ ഭൂതഭവ്യജഗത്പ്രഭോ ।
കവചം ച ശ്രുതം ദിവ്യം ഗായത്രീമംത്രവിഗ്രഹമ് ॥ 1 ॥
അധുനാ ശ്രോതുമിച്ഛാമി ഗായത്രീഹൃദയം പരമ് ।
യദ്ധാരണാദ്ഭവേത്പുണ്യം ഗായത്രീജപതോഽഖിലമ് ॥ 2 ॥
ശ്രീനാരായണ ഉവാച
ദേവ്യാശ്ച ഹൃദയം പ്രോക്തം നാരദാഥർവണേ സ്ഫുടമ് ।
തദേവാഹം പ്രവക്ഷ്യാമി രഹസ്യാതിരഹസ്യകമ് ॥ 3 ॥
വിരാഡ്രൂപാം മഹാദേവീം ഗായത്രീം വേദമാതരമ് ।
ധ്യാത്വാ തസ്യാസ്ത്വഥാംഗേഷു ധ്യായേദേതാശ്ച ദേവതാഃ ॥ 4 ॥
പിംഡബ്രഹ്മംഡയോരൈക്യാദ്ഭാവയേത്സ്വതനൌ തഥാ ।
ദേവീരൂപേ നിജേ ദേഹേ തന്മയത്വായ സാധകഃ ॥ 5 ॥
നാദേവോഽഭ്യര്ചയേദ്ദേവമിതി വേദവിദോ വിദുഃ ।
തതോഽഭേദായ കായേ സ്വേ ഭാവയേദ്ദേവതാ ഇമാഃ ॥ 6 ॥
അഥ തത്സംപ്രവക്ഷ്യാമി തന്മയത്വമഥോ ഭവേത് ।
ഗായത്രീഹൃദയസ്യാഽസ്യാഽപ്യഹമേവ ഋഷിഃ സ്മൃതഃ ॥ 7 ॥
ഗായത്രീഛംദ ഉദ്ദിഷ്ടം ദേവതാ പരമേശ്വരീ ।
പൂർവോക്തേന പ്രകാരേണ കുര്യാദംഗാനി ഷട്ക്രമാത് ।
ആസനേ വിജനേ ദേശേ ധ്യായേദേകാഗ്രമാനസഃ ॥ 8 ॥
അഥാര്ഥന്യാസഃ । ദ്യൌമൂര്ധ്നി ദൈവതമ് । ദംതപംക്താവശ്വിനൌ । ഉഭേ സംധ്യേ ചൌഷ്ഠൌ । മുഖമഗ്നിഃ । ജിഹ്വാ സരസ്വതീ । ഗ്രീവായാം തു ബൃഹസ്പതിഃ । സ്തനയോർവസവോഽഷ്ടൌ । ബാഹ്വോര്മരുതഃ । ഹൃദയേ പര്ജന്യഃ । ആകാശമുദരമ് । നാഭാവംതരിക്ഷമ് । കട്യോരിംദ്രാഗ്നീ । ജഘനേ വിജ്ഞാനഘനഃ പ്രജാപതിഃ । കൈലാസമലയേ ഊരൂ । വിശ്വേദേവാ ജാന്വോഃ । ജംഘായാം കൌശികഃ । ഗുഹ്യമയനേ । ഊരൂ പിതരഃ । പാദൌ പൃഥിവീ । വനസ്പതയോഽംഗുലീഷു । ഋഷയോ രോമാണി । നഖാനി മുഹൂര്താനി । അസ്ഥിഷു ഗ്രഹാഃ । അസൃങ്മാംസമൃതവഃ ॥ സംവത്സരാ വൈ നിമിഷമ് । അഹോരാത്രാവാദിത്യശ്ചംദ്രമാഃ । പ്രവരാം ദിവ്യാം ഗായത്രീം സഹസ്രനേത്രാം ശരണമഹം പ്രപദ്യേ ॥
ഓം തത്സവിതുർവരേണ്യായ നമഃ । ഓം തത്പൂർവാജയായ നമഃ । തത്പ്രാതരാദിത്യായ നമഃ । തത്പ്രാതരാദിത്യപ്രതിഷ്ഠായൈ നമഃ ॥
പ്രാതരധീയാനോ രാത്രികൃതം പാപം നാശയതി । സായമധീയാനോ ദിവസകൃതം പാപം നാശയതി । സായം പ്രാതരധീയാനോ അപാപോ ഭവതി । സർവതീര്ഥേഷു സ്നാതോ ഭവതി । സർവൈര്ദേവൈര്ജ്ഞാതോ ഭവതി । അവാച്യവചനാത്പൂതോ ഭവതി । അഭക്ഷ്യഭക്ഷണാത്പൂതോ ഭവതി । അഭോജ്യഭോജനാത്പൂതോ ഭവതി । അചോഷ്യചോഷണാത്പൂതോ ഭവതി । അസാധ്യസാധനാത്പൂതോ ഭവതി । ദുഷ്പ്രതിഗ്രഹശതസഹസ്രാത്പൂതോ ഭവതി । സർവപ്രതിഗ്രഹാത്പൂതോ ഭവതി । പംക്തിദൂഷണാത്പൂതോ ഭവതി । അനൃതവചനാത്പൂതോ ഭവതി । അഥാഽബ്രഹ്മചാരീ ബ്രഹ്മചാരീ ഭവതീ । അനേന ഹൃദയേനാധീതേന ക്രതുസഹസ്രേണേഷ്ടം ഭവതി । ഷഷ്ടിശതസഹസ്രഗായത്ര്യാ ജപ്യാനി ഫലാനി ഭവംതി । അഷ്ടൌ ബ്രാഹ്മണാന് സമ്യഗ്ഗ്രാഹയേത് । തസ്യ സിദ്ധിര്ഭവതി । യ ഇദം നിത്യമധീയാനോ ബ്രാഹ്മണഃ പ്രാതഃ ശുചിഃ സർവപാപൈഃ പ്രമുച്യത ഇതി । ബ്രഹ്മലോകേ മഹീയതേ ॥
ഇത്യാഹ ഭഗവാന് ശ്രീനാരായണഃ ॥
ഇതി ശ്രീദേവീഭാഗവതേ മഹാപുരാണേ ദ്വാദശസ്കംധേ ശ്രീ ഗായത്രീ ഹൃദയം നാമ ചതുര്ഥോഽധ്യായഃ ॥
