ശ്രീവിദ്യേ ശിവവാമഭാഗനിലയേ ശ്രീരാജരാജാര്ചിതേ
ശ്രീനാഥാദിഗുരുസ്വരൂപവിഭവേ ചിംതാമണീപീഠികേ ।
ശ്രീവാണീഗിരിജാനുതാംഘ്രികമലേ ശ്രീശാംഭവി ശ്രീശിവേ
മധ്യാഹ്നേ മലയധ്വജാധിപസുതേ മാം പാഹി മീനാംബികേ ॥ 1 ॥
ചക്രസ്ഥേഽചപലേ ചരാചരജഗന്നാഥേ ജഗത്പൂജിതേ
ആര്താലീവരദേ നതാഭയകരേ വക്ഷോജഭാരാന്വിതേ ।
വിദ്യേ വേദകലാപമൌളിവിദിതേ വിദ്യുല്ലതാവിഗ്രഹേ
മാതഃ പൂര്ണസുധാരസാര്ദ്രഹൃദയേ മാം പാഹി മീനാംബികേ ॥ 2 ॥
കോടീരാംഗദരത്നകുംഡലധരേ കോദംഡബാണാംചിതേ
കോകാകാരകുചദ്വയോപരിലസത്പ്രാലംബഹാരാംചിതേ ।
ശിംജന്നൂപുരപാദസാരസമണീശ്രീപാദുകാലംകൃതേ
മദ്ദാരിദ്ര്യഭുജംഗഗാരുഡഖഗേ മാം പാഹി മീനാംബികേ ॥ 3 ॥
ബ്രഹ്മേശാച്യുതഗീയമാനചരിതേ പ്രേതാസനാംതസ്ഥിതേ
പാശോദംകുശചാപബാണകലിതേ ബാലേംദുചൂഡാംചിതേ ।
ബാലേ ബാലകുരംഗലോലനയനേ ബാലാര്കകോട്യുജ്ജ്വലേ
മുദ്രാരാധിതദൈവതേ മുനിസുതേ മാം പാഹി മീനാംബികേ ॥ 4 ॥
ഗംധർവാമരയക്ഷപന്നഗനുതേ ഗംഗാധരാലിംഗിതേ
ഗായത്രീഗരുഡാസനേ കമലജേ സുശ്യാമലേ സുസ്ഥിതേ ।
ഖാതീതേ ഖലദാരുപാവകശിഖേ ഖദ്യോതകോട്യുജ്ജ്വലേ
മംത്രാരാധിതദൈവതേ മുനിസുതേ മാം പാഹീ മീനാംബികേ ॥ 5 ॥
നാദേ നാരദതുംബുരാദ്യവിനുതേ നാദാംതനാദാത്മികേ
നിത്യേ നീലലതാത്മികേ നിരുപമേ നീവാരശൂകോപമേ ।
കാംതേ കാമകലേ കദംബനിലയേ കാമേശ്വരാംകസ്ഥിതേ
മദ്വിദ്യേ മദഭീഷ്ടകല്പലതികേ മാം പാഹി മീനാംബികേ ॥ 6 ॥
വീണാനാദനിമീലിതാര്ധനയനേ വിസ്രസ്തചൂലീഭരേ
താംബൂലാരുണപല്ലവാധരയുതേ താടംകഹാരാന്വിതേ ।
ശ്യാമേ ചംദ്രകളാവതംസകലിതേ കസ്തൂരികാഫാലികേ
പൂര്ണേ പൂര്ണകലാഭിരാമവദനേ മാം പാഹി മീനാംബികേ ॥ 7 ॥
ശബ്ദബ്രഹ്മമയീ ചരാചരമയീ ജ്യോതിര്മയീ വാങ്മയീ
നിത്യാനംദമയീ നിരംജനമയീ തത്ത്വംമയീ ചിന്മയീ ।
തത്ത്വാതീതമയീ പരാത്പരമയീ മായാമയീ ശ്രീമയീ
സർവൈശ്വര്യമയീ സദാശിവമയീ മാം പാഹി മീനാംബികേ ॥ 8 ॥
ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ മീനാക്ഷീ സ്തോത്രമ് ।
