කල්පානෝකහපුෂ්පජාලවිලසන්නීලාලකාං මාතෘකාං
කාංතාං කංජදළේක්ෂණාං කලිමලප්රධ්වංසිනීං කාළිකාම් ।
කාංචීනූපුරහාරදාමසුභගාං කාංචීපුරීනායිකාං
කාමාක්ෂීං කරිකුංභසන්නිභකුචාං වංදේ මහේශප්රියාම් ॥ 1 ॥
කාශාභාං ශුකභාසුරාං ප්රවිලසත්කෝශාතකී සන්නිභාං
චංද්රාර්කානලලෝචනාං සුරුචිරාලංකාරභූෂෝජ්ජ්වලාම් ।
බ්රහ්මශ්රීපතිවාසවාදිමුනිභිඃ සංසේවිතාංඝ්රිද්වයාං
කාමාක්ෂීං ගජරාජමංදගමනාං වංදේ මහේශප්රියාම් ॥ 2 ॥
ඓං ක්ලීං සෞරිති යාං වදංති මුනයස්තත්ත්වාර්ථරූපාං පරාං
වාචාමාදිමකාරණං හෘදි සදා ධ්යායංති යාං යෝගිනඃ ।
බාලාං ඵාලවිලෝචනාං නවජපාවර්ණාං සුෂුම්නාශ්රිතාං
කාමාක්ෂීං කලිතාවතංසසුභගාං වංදේ මහේශප්රියාම් ॥ 3 ॥
යත්පාදාංබුජරේණුලේශමනිශං ලබ්ධ්වා විධත්තේ විධි-
-ර්විශ්වං තත්පරිපාති විෂ්ණුරඛිලං යස්යාඃ ප්රසාදාච්චිරම් ।
රුද්රඃ සංහරති ක්ෂණාත්තදඛිලං යන්මායයා මෝහිතඃ
කාමාක්ෂීමතිචිත්රචාරුචරිතාං වංදේ මහේශප්රියාම් ॥ 4 ॥
සූක්ෂ්මාත්සූක්ෂ්මතරාං සුලක්ෂිතතනුං ක්ෂාංතාක්ෂරෛර්ලක්ෂිතාං
වීක්ෂාශික්ෂිතරාක්ෂසාං ත්රිභුවනක්ෂේමංකරීමක්ෂයාම් ।
සාක්ෂාල්ලක්ෂණලක්ෂිතාක්ෂරමයීං දාක්ෂායණීං සාක්ෂිණීං
කාමාක්ෂීං ශුභලක්ෂණෛඃ සුලලිතාං වංදේ මහේශප්රියාම් ॥ 5 ॥
ඕංකාරාංගණදීපිකාමුපනිෂත්ප්රාසාදපාරාවතීං
ආම්නායාංබුධිචංද්රිකාමඝතමඃප්රධ්වංසහංසප්රභාම් ।
කාංචීපට්ටණපංජරාංතරශුකීං කාරුණ්යකල්ලෝලිනීං
කාමාක්ෂීං ශිවකාමරාජමහිෂීං වංදේ මහේශප්රියාම් ॥ 6 ॥
හ්රීංකාරාත්මකවර්ණමාත්රපඨනාදෛංද්රීං ශ්රියං තන්වතීං
චින්මාත්රාං භුවනේශ්වරීමනුදිනං භික්ෂාප්රදානක්ෂමාම් ।
විශ්වාඝෞඝනිවාරිණීං විමලිනීං විශ්වංභරාං මාතෘකාං
කාමාක්ෂීං පරිපූර්ණචංද්රවදනාං වංදේ මහේශප්රියාම් ॥ 7 ॥
වාග්දේවීති ච යාං වදංති මුනයඃ ක්ෂීරාබ්ධිකන්යේති ච
ක්ෂෝණීභෘත්තනයේති ච ශ්රුතිගිරෝ යාං ආමනංති ස්ඵුටම් ।
ඒකානේකඵලප්රදාං බහුවිධාऽऽකාරාස්තනූස්තන්වතීං
කාමාක්ෂීං සකලාර්තිභංජනපරාං වංදේ මහේශප්රියාම් ॥ 8 ॥
මායාමාදිමකාරණං ත්රිජගතාමාරාධිතාංඝ්රිද්වයාං
ආනංදාමෘතවාරිරාශිනිලයාං විද්යාං විපශ්චිද්ධියාම් ।
මායාමානුෂරූපිණීං මණිලසන්මධ්යාං මහාමාතෘකාං
කාමාක්ෂීං කරිරාජමංදගමනාං වංදේ මහේශප්රියාම් ॥ 9 ॥
කාංතා කාමදුඝා කරීංද්රගමනා කාමාරිවාමාංකගා
කල්යාණී කලිතාවතාරසුභගා කස්තූරිකාචර්චිතා
කංපාතීරරසාලමූලනිලයා කාරුණ්යකල්ලෝලිනී
කල්යාණානි කරෝතු මේ භගවතී කාංචීපුරීදේවතා ॥ 10 ॥
ඉති ශ්රී කාමාක්ෂී ස්තෝත්රම් ।
