അഥ കഥമപി മദ്രാസനാം ത്വദ്ഗുണലേശൈർവിശോധയാമി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 1 ॥

ആഖംഡലമദഖംഡനപംഡിത തംഡുപ്രിയ ചംഡീശ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 2 ॥

ഇഭചര്മാംബര ശംബരരിപുവപുരപഹരണോജ്ജ്വലനയന വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 3 ॥

ഈശ ഗിരീശ നരേശ പരേശ മഹേശ ബിലേശയഭൂഷണ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 4 ॥

ഉമയാ ദിവ്യസുമംഗളവിഗ്രഹയാലിംഗിതവാമാംഗ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 5 ॥

ഊരീകുരു മാമജ്ഞമനാഥം ദൂരീകുരു മേ ദുരിതം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 6 ॥

ഋഷിവരമാനസഹംസ ചരാചരജനനസ്ഥിതിലയകാരണ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 7 ॥

ൠക്ഷാധീശകിരീട മഹോക്ഷാരൂഢ വിധൃതരുദ്രാക്ഷ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 8 ॥

ലുവര്ണദ്വംദ്വമവൃംതസുകുസുമമിവാംഘ്രൌ തവാര്പയാമി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 9 ॥

ഏകം സദിതി ശ്രുത്യാ ത്വമേവ സദസീത്യുപാസ്മഹേ മൃഡ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 10 ॥

ഐക്യം നിജഭക്തേഭ്യോ വിതരസി വിശ്വംഭരോഽത്ര സാക്ഷീ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 11 ॥

ഓമിതി തവ നിര്ദേഷ്ട്രീ മായാസ്മാകം മൃഡോപകര്ത്രീ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 12 ॥

ഔദാസ്യം സ്ഫുടയതി വിഷയേഷു ദിഗംബരതാ ച തവൈവ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 13 ॥

അംതഃകരണവിശുദ്ധിം ഭക്തിം ച ത്വയി സതീം പ്രദേഹി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 14 ॥

അസ്തോപാധിസമസ്തവ്യസ്തൈ രൂപൈര്ജഗന്മയോഽസി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 15 ॥

കരുണാവരുണാലയ മയി ദാസ ഉദാസസ്തവോചിതോ ന ഹി ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 16 ॥

ഖലസഹവാസം വിഘടയ ഘടയ സതാമേവ സംഗമനിശം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 17 ॥

ഗരളം ജഗദുപകൃതയേ ഗിലിതം ഭവതാ സമോഽസ്തി കോഽത്ര വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 18 ॥

ഘനസാരഗൌരഗാത്ര പ്രചുരജടാജൂടബദ്ധഗംഗ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 19 ॥

ജ്ഞപ്തിഃ സർവശരീരേഷ്വഖംഡിതാ യാ വിഭാതി സാ ത്വം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 20 ॥

ചപലം മമ ഹൃദയകപിം വിഷയദ്രുചരം ദൃഢം ബധാന വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 21 ॥

ഛായാ സ്ഥാണോരപി തവ താപം നമതാം ഹരത്യഹോ ശിവ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 22 ॥

ജയ കൈലാസനിവാസ പ്രമഥഗണാധീശ ഭൂസുരാര്ചിത ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 23 ॥

ഝണുതകഝംകിണുഝണുതത്കിടതക-ശബ്ദൈര്നടസി മഹാനട ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 24 ॥

ജ്ഞാനം വിക്ഷേപാവൃതിരഹിതം കുരു മേ ഗുരുസ്ത്വമേവ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 25 ॥

ടംകാരസ്തവ ധനുഷോ ദലയതി ഹൃദയം ദ്വിഷാമശനിരിവ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 26 ॥

ഠാകൃതിരിവ തവ മായാ ബഹിരംതഃ ശൂന്യരൂപിണീ ഖലു ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 27 ॥

ഡംബരമംബുരുഹാമപി ദലയത്യനഘം ത്വദംഘ്രിയുഗളം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 28 ॥

ഢക്കാക്ഷസൂത്രശൂലദ്രുഹിണകരോടീസമുല്ലസത്കര ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 29 ॥

ണാകാരഗര്ഭിണീ ചേച്ഛുഭദാ തേ ശരഗതിര്നൃണാമിഹ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 30 ॥

തവ മന്വതിസംജപതഃ സദ്യസ്തരതി നരോ ഹി ഭവാബ്ധിം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 31 ॥

ഥൂത്കാരസ്തസ്യ മുഖേ ഭൂയാത്തേ നാമ നാസ്തി യസ്യ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 32 ॥

ദയനീയശ്ച ദയാളുഃ കോഽസ്തി മദന്യസ്ത്വദന്യ ഇഹ വദ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 33 ॥

ധര്മസ്ഥാപനദക്ഷ ത്ര്യക്ഷ ഗുരോ ദക്ഷയജ്ഞശിക്ഷക ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 34 ॥

നനു താഡിതോഽസി ധനുഷാ ലുബ്ധധിയാ ത്വം പുരാ നരേണ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 35 ॥

പരിമാതും തവ മൂര്തിം നാലമജസ്തത്പരാത്പരോഽസി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 36 ॥

ഫലമിഹ നൃതയാ ജനുഷസ്ത്വത്പദസേവാ സനാതനേശ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 37 ॥

ബലമാരോഗ്യം ചായുസ്ത്വദ്ഗുണരുചിതാം ചിരം പ്രദേഹി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 38 ॥

ഭഗവന്ഭര്ഗ ഭയാപഹ ഭൂതപതേ ഭൂതിഭൂഷിതാംഗ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 39 ॥

മഹിമാ തവ ന ഹി മാതി ശ്രുതിഷു ഹിമാനീധരാത്മജാധവ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 40 ॥

യമനിയമാദിഭിരംഗൈര്യമിനോ ഹൃദയേ ഭജംതി സ ത്വം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 41 ॥

രജ്ജാവഹിരിവ ശുക്തൌ രജതമിവ ത്വയി ജഗംതി ഭാംതി വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 42 ॥

ലബ്ധ്വാ ഭവത്പ്രസാദാച്ചക്രം വിധുരവതി ലോകമഖിലം ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 43 ॥

വസുധാതദ്ധരതച്ഛയരഥമൌർവീശര പരാകൃതാസുര ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 44 ॥

ശർവ ദേവ സർവോത്തമ സർവദ ദുർവൃത്തഗർവഹരണ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 45 ॥

ഷഡ്രിപുഷഡൂര്മിഷഡ്വികാരഹര സന്മുഖ ഷണ്മുഖജനക വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 46 ॥

സത്യം ജ്ഞാനമനംതം ബ്രഹ്മേത്യേതല്ലക്ഷണലക്ഷിത ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 47 ॥

ഹാഹാഹൂഹൂമുഖസുരഗായകഗീതാപദാനപദ്യ വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 48 ॥

ളാദിര്ന ഹി പ്രയോഗസ്തദംതമിഹ മംഗളം സദാസ്തു വിഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 49 ॥

ക്ഷണമിവ ദിവസാന്നേഷ്യതി ത്വത്പദസേവാക്ഷണോത്സുകഃ ശിവ ഭോ ।
സാംബ സദാശിവ ശംഭോ ശംകര ശരണം മേ തവ ചരണയുഗമ് ॥ 50 ॥

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ സുവര്ണമാലാ സ്തുതിഃ സംപൂര്ണാ ॥