ଅଥ କଥମପି ମଦ୍ରାସନାଂ ତ୍ଵଦ୍ଗୁଣଲେଶୈର୍ଵିଶୋଧୟାମି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 1 ॥
ଆଖଂଡଲମଦଖଂଡନପଂଡିତ ତଂଡୁପ୍ରିୟ ଚଂଡୀଶ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 2 ॥
ଇଭଚର୍ମାଂବର ଶଂବରରିପୁଵପୁରପହରଣୋଜ୍ଜ୍ଵଲନୟନ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 3 ॥
ଈଶ ଗିରୀଶ ନରେଶ ପରେଶ ମହେଶ ବିଲେଶୟଭୂଷଣ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 4 ॥
ଉମୟା ଦିଵ୍ୟସୁମଂଗଳଵିଗ୍ରହୟାଲିଂଗିତଵାମାଂଗ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 5 ॥
ଊରୀକୁରୁ ମାମଜ୍ଞମନାଥଂ ଦୂରୀକୁରୁ ମେ ଦୁରିତଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 6 ॥
ଋଷିଵରମାନସହଂସ ଚରାଚରଜନନସ୍ଥିତିଲୟକାରଣ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 7 ॥
ୠକ୍ଷାଧୀଶକିରୀଟ ମହୋକ୍ଷାରୂଢ ଵିଧୃତରୁଦ୍ରାକ୍ଷ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 8 ॥
ଲୁଵର୍ଣଦ୍ଵଂଦ୍ଵମଵୃଂତସୁକୁସୁମମିଵାଂଘ୍ରୌ ତଵାର୍ପୟାମି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 9 ॥
ଏକଂ ସଦିତି ଶ୍ରୁତ୍ୟା ତ୍ଵମେଵ ସଦସୀତ୍ୟୁପାସ୍ମହେ ମୃଡ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 10 ॥
ଐକ୍ୟଂ ନିଜଭକ୍ତେଭ୍ୟୋ ଵିତରସି ଵିଶ୍ଵଂଭରୋଽତ୍ର ସାକ୍ଷୀ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 11 ॥
ଓମିତି ତଵ ନିର୍ଦେଷ୍ଟ୍ରୀ ମାୟାସ୍ମାକଂ ମୃଡୋପକର୍ତ୍ରୀ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 12 ॥
ଔଦାସ୍ୟଂ ସ୍ଫୁଟୟତି ଵିଷୟେଷୁ ଦିଗଂବରତା ଚ ତଵୈଵ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 13 ॥
ଅଂତଃକରଣଵିଶୁଦ୍ଧିଂ ଭକ୍ତିଂ ଚ ତ୍ଵୟି ସତୀଂ ପ୍ରଦେହି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 14 ॥
ଅସ୍ତୋପାଧିସମସ୍ତଵ୍ୟସ୍ତୈ ରୂପୈର୍ଜଗନ୍ମୟୋଽସି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 15 ॥
କରୁଣାଵରୁଣାଲୟ ମୟି ଦାସ ଉଦାସସ୍ତଵୋଚିତୋ ନ ହି ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 16 ॥
ଖଲସହଵାସଂ ଵିଘଟୟ ଘଟୟ ସତାମେଵ ସଂଗମନିଶଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 17 ॥
ଗରଳଂ ଜଗଦୁପକୃତୟେ ଗିଲିତଂ ଭଵତା ସମୋଽସ୍ତି କୋଽତ୍ର ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 18 ॥
ଘନସାରଗୌରଗାତ୍ର ପ୍ରଚୁରଜଟାଜୂଟବଦ୍ଧଗଂଗ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 19 ॥
ଜ୍ଞପ୍ତିଃ ସର୍ଵଶରୀରେଷ୍ଵଖଂଡିତା ୟା ଵିଭାତି ସା ତ୍ଵଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 20 ॥
ଚପଲଂ ମମ ହୃଦୟକପିଂ ଵିଷୟଦ୍ରୁଚରଂ ଦୃଢଂ ବଧାନ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 21 ॥
ଛାୟା ସ୍ଥାଣୋରପି ତଵ ତାପଂ ନମତାଂ ହରତ୍ୟହୋ ଶିଵ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 22 ॥
ଜୟ କୈଲାସନିଵାସ ପ୍ରମଥଗଣାଧୀଶ ଭୂସୁରାର୍ଚିତ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 23 ॥
ଝଣୁତକଝଂକିଣୁଝଣୁତତ୍କିଟତକ-ଶବ୍ଦୈର୍ନଟସି ମହାନଟ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 24 ॥
ଜ୍ଞାନଂ ଵିକ୍ଷେପାଵୃତିରହିତଂ କୁରୁ ମେ ଗୁରୁସ୍ତ୍ଵମେଵ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 25 ॥
ଟଂକାରସ୍ତଵ ଧନୁଷୋ ଦଲୟତି ହୃଦୟଂ ଦ୍ଵିଷାମଶନିରିଵ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 26 ॥
ଠାକୃତିରିଵ ତଵ ମାୟା ବହିରଂତଃ ଶୂନ୍ୟରୂପିଣୀ ଖଲୁ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 27 ॥
ଡଂବରମଂବୁରୁହାମପି ଦଲୟତ୍ୟନଘଂ ତ୍ଵଦଂଘ୍ରିୟୁଗଳଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 28 ॥
ଢକ୍କାକ୍ଷସୂତ୍ରଶୂଲଦ୍ରୁହିଣକରୋଟୀସମୁଲ୍ଲସତ୍କର ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 29 ॥
ଣାକାରଗର୍ଭିଣୀ ଚେଚ୍ଛୁଭଦା ତେ ଶରଗତିର୍ନୃଣାମିହ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 30 ॥
ତଵ ମନ୍ଵତିସଂଜପତଃ ସଦ୍ୟସ୍ତରତି ନରୋ ହି ଭଵାବ୍ଧିଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 31 ॥
ଥୂତ୍କାରସ୍ତସ୍ୟ ମୁଖେ ଭୂୟାତ୍ତେ ନାମ ନାସ୍ତି ୟସ୍ୟ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 32 ॥
ଦୟନୀୟଶ୍ଚ ଦୟାଳୁଃ କୋଽସ୍ତି ମଦନ୍ୟସ୍ତ୍ଵଦନ୍ୟ ଇହ ଵଦ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 33 ॥
ଧର୍ମସ୍ଥାପନଦକ୍ଷ ତ୍ର୍ୟକ୍ଷ ଗୁରୋ ଦକ୍ଷୟଜ୍ଞଶିକ୍ଷକ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 34 ॥
ନନୁ ତାଡିତୋଽସି ଧନୁଷା ଲୁବ୍ଧଧିୟା ତ୍ଵଂ ପୁରା ନରେଣ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 35 ॥
ପରିମାତୁଂ ତଵ ମୂର୍ତିଂ ନାଲମଜସ୍ତତ୍ପରାତ୍ପରୋଽସି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 36 ॥
ଫଲମିହ ନୃତୟା ଜନୁଷସ୍ତ୍ଵତ୍ପଦସେଵା ସନାତନେଶ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 37 ॥
ବଲମାରୋଗ୍ୟଂ ଚାୟୁସ୍ତ୍ଵଦ୍ଗୁଣରୁଚିତାଂ ଚିରଂ ପ୍ରଦେହି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 38 ॥
ଭଗଵନ୍ଭର୍ଗ ଭୟାପହ ଭୂତପତେ ଭୂତିଭୂଷିତାଂଗ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 39 ॥
ମହିମା ତଵ ନ ହି ମାତି ଶ୍ରୁତିଷୁ ହିମାନୀଧରାତ୍ମଜାଧଵ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 40 ॥
ୟମନିୟମାଦିଭିରଂଗୈର୍ୟମିନୋ ହୃଦୟେ ଭଜଂତି ସ ତ୍ଵଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 41 ॥
ରଜ୍ଜାଵହିରିଵ ଶୁକ୍ତୌ ରଜତମିଵ ତ୍ଵୟି ଜଗଂତି ଭାଂତି ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 42 ॥
ଲବ୍ଧ୍ଵା ଭଵତ୍ପ୍ରସାଦାଚ୍ଚକ୍ରଂ ଵିଧୁରଵତି ଲୋକମଖିଲଂ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 43 ॥
ଵସୁଧାତଦ୍ଧରତଚ୍ଛୟରଥମୌର୍ଵୀଶର ପରାକୃତାସୁର ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 44 ॥
ଶର୍ଵ ଦେଵ ସର୍ଵୋତ୍ତମ ସର୍ଵଦ ଦୁର୍ଵୃତ୍ତଗର୍ଵହରଣ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 45 ॥
ଷଡ୍ରିପୁଷଡୂର୍ମିଷଡ୍ଵିକାରହର ସନ୍ମୁଖ ଷଣ୍ମୁଖଜନକ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 46 ॥
ସତ୍ୟଂ ଜ୍ଞାନମନଂତଂ ବ୍ରହ୍ମେତ୍ୟେତଲ୍ଲକ୍ଷଣଲକ୍ଷିତ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 47 ॥
ହାହାହୂହୂମୁଖସୁରଗାୟକଗୀତାପଦାନପଦ୍ୟ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 48 ॥
ଳାଦିର୍ନ ହି ପ୍ରୟୋଗସ୍ତଦଂତମିହ ମଂଗଳଂ ସଦାସ୍ତୁ ଵିଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 49 ॥
କ୍ଷଣମିଵ ଦିଵସାନ୍ନେଷ୍ୟତି ତ୍ଵତ୍ପଦସେଵାକ୍ଷଣୋତ୍ସୁକଃ ଶିଵ ଭୋ ।
ସାଂବ ସଦାଶିଵ ଶଂଭୋ ଶଂକର ଶରଣଂ ମେ ତଵ ଚରଣୟୁଗମ୍ ॥ 50 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ସୁଵର୍ଣମାଲା ସ୍ତୁତିଃ ସଂପୂର୍ଣା ॥
