ବ୍ରହ୍ମଵିଷ୍ଣୁମହେଶା ଊଚୁଃ ।
ଅଜଂ ନିର୍ଵିକଲ୍ପଂ ନିରାକାରମେକଂ
ନିରାନଂଦମଦ୍ଵୈତମାନଂଦପୂର୍ଣମ୍ ।
ପରଂ ନିର୍ଗୁଣଂ ନିର୍ଵିଶେଷଂ ନିରୀହଂ
ପରବ୍ରହ୍ମରୂପଂ ଗଣେଶଂ ଭଜେମ ॥ 1 ॥

ଗୁଣାତୀତମାଦ୍ୟଂ ଚିଦାନଂଦରୂପଂ
ଚିଦାଭାସକଂ ସର୍ଵଗଂ ଜ୍ଞାନଗମ୍ୟମ୍ ।
ମୁନିଧ୍ୟେୟମାକାଶରୂପଂ ପରେଶଂ
ପରବ୍ରହ୍ମରୂପଂ ଗଣେଶଂ ଭଜେମ ॥ 2 ॥

ଜଗତ୍କାରଣଂ କାରଣଜ୍ଞାନରୂପଂ
ସୁରାଦିଂ ସୁଖାଦିଂ ୟୁଗାଦିଂ ଗଣେଶମ୍ ।
ଜଗଦ୍ଵ୍ୟାପିନଂ ଵିଶ୍ଵଵଂଦ୍ୟଂ ସୁରେଶଂ
ପରବ୍ରହ୍ମରୂପଂ ଗଣେଶଂ ଭଜେମ ॥ 3 ॥

ରଜୋୟୋଗତୋ ବ୍ରହ୍ମରୂପଂ ଶ୍ରୁତିଜ୍ଞଂ
ସଦା କାର୍ୟସକ୍ତଂ ହୃଦାଚିଂତ୍ୟରୂପମ୍ ।
ଜଗତ୍କାରକଂ ସର୍ଵଵିଦ୍ୟାନିଧାନଂ
ପରବ୍ରହ୍ମରୂପଂ ଗଣେଶଂ ନତାସ୍ମଃ ॥ 4 ॥

ସଦା ସତ୍ତ୍ଵୟୋଗଂ ମୁଦା କ୍ରୀଡମାନଂ
ସୁରାରୀନ୍ହରଂତଂ ଜଗତ୍ପାଲୟଂତମ୍ ।
ଅନେକାଵତାରଂ ନିଜଜ୍ଞାନହାରଂ
ସଦା ଵିଷ୍ଣୁରୂପଂ ଗଣେଶଂ ନମାମଃ ॥ 5 ॥

ତମୋୟୋଗିନଂ ରୁଦ୍ରରୂପଂ ତ୍ରିନେତ୍ରଂ
ଜଗଦ୍ଧାରକଂ ତାରକଂ ଜ୍ଞାନହେତୁମ୍ ।
ଅନେକାଗମୈଃ ସ୍ଵଂ ଜନଂ ବୋଧୟଂତଂ
ସଦା ଶର୍ଵରୂପଂ ଗଣେଶଂ ନମାମଃ ॥ 6 ॥

ତମସ୍ତୋମହାରଂ ଜନାଜ୍ଞାନହାରଂ
ତ୍ରୟୀଵେଦସାରଂ ପରବ୍ରହ୍ମପାରମ୍ ।
ମୁନିଜ୍ଞାନକାରଂ ଵିଦୂରେଵିକାରଂ
ସଦା ବ୍ରହ୍ମରୂପଂ ଗଣେଶଂ ନମାମଃ ॥ 7 ॥

ନିଜୈରୋଷଧୀସ୍ତର୍ପୟଂତଂ କରୋଦ୍ୟୈଃ
ସରୌଘାନ୍କଲାଭିଃ ସୁଧାସ୍ରାଵିଣୀଭିଃ ।
ଦିନେଶାଂଶୁ ସଂତାପହାରଂ ଦ୍ଵିଜେଶଂ
ଶଶାଂକସ୍ଵରୂପଂ ଗଣେଶଂ ନମାମଃ ॥ 8 ॥

ପ୍ରକାଶସ୍ଵରୂପଂ ନଭୋଵାୟୁରୂପଂ
ଵିକାରାଦିହେତୁଂ କଲାକାଲଭୂତମ୍ ।
ଅନେକକ୍ରିୟାନେକଶକ୍ତିସ୍ଵରୂପଂ
ସଦା ଶକ୍ତିରୂପଂ ଗଣେଶଂ ନମାମଃ ॥ 9 ॥

ପ୍ରଧାନସ୍ଵରୂପଂ ମହତ୍ତତ୍ତ୍ଵରୂପଂ
ଧରାଵାରିରୂପଂ ଦିଗୀଶାଦିରୂପମ୍ ।
ଅସତ୍ସତ୍ସ୍ଵରୂପଂ ଜଗଦ୍ଧେତୁଭୂତଂ
ସଦା ଵିଶ୍ଵରୂପଂ ଗଣେଶଂ ନତାସ୍ମଃ ॥ 10 ॥

ତ୍ଵଦୀୟେ ମନଃ ସ୍ଥାପୟେଦଂଘ୍ରିୟୁଗ୍ମେ
ଜନୋ ଵିଘ୍ନସଂଘାନ୍ନ ପୀଡାଂ ଲଭେତ ।
ଲସତ୍ସୂର୍ୟବିଂବେ ଵିଶାଲେ ସ୍ଥିତୋଽୟଂ
ଜନୋଧ୍ଵାଂତ ପୀଡାଂ କଥଂ ଵା ଲଭେତ ॥ 11 ॥

ଵୟଂ ଭ୍ରାମିତାଃ ସର୍ଵଥାଽଜ୍ଞାନୟୋଗା-
-ଦଲବ୍ଧା ତଵାଂଘ୍ରିଂ ବହୂନ୍ଵର୍ଷପୂଗାନ୍ ।
ଇଦାନୀମଵାପ୍ତାସ୍ତଵୈଵ ପ୍ରସାଦା-
-ତ୍ପ୍ରପନ୍ନାନ୍ସଦା ପାହି ଵିଶ୍ଵଂଭରାଦ୍ୟ ॥ 12 ॥

ଗଣେଶ ଉଵାଚ ।
ଇଦଂ ୟଃ ପଠେତ୍ପ୍ରାତରୁତ୍ଥାୟ ଧୀମାନ୍
ତ୍ରିସଂଧ୍ୟଂ ସଦା ଭକ୍ତିୟୁକ୍ତୋ ଵିଶୁଦ୍ଧଃ ।
ସପୁତ୍ରାନ୍ ଶ୍ରିୟଂ ସର୍ଵକାମାନ୍ ଲଭେତ
ପରବ୍ରହ୍ମରୂପୋ ଭଵେଦଂତକାଲେ ॥ 13 ॥

ଇତି ଗଣେଶପୁରାଣେ ଉପାସନାଖଂଡେ ତ୍ରୟୋଦଶୋଽଧ୍ୟାୟେ ଶ୍ରୀଗଣପତିସ୍ତଵଃ ।