ଓଂ ଅସ୍ୟ ଶ୍ରୀ ରୁଦ୍ର କଵଚସ୍ତୋତ୍ର ମହାମଂତ୍ରସ୍ୟ ଦୂର୍ଵାସୃଷିଃ ଅନୁଷ୍ଠୁପ୍ ଛଂଦଃ ତ୍ର୍ୟଂବକ ରୁଦ୍ରୋ ଦେଵତା ହ୍ରାଂ ବୀଜଂ ଶ୍ରୀଂ ଶକ୍ତିଃ ହ୍ରୀଂ କୀଲକଂ ମମ ମନସୋଽଭୀଷ୍ଟସିଦ୍ଧ୍ୟର୍ଥେ ଜପେ ଵିନିୟୋଗଃ ।
ହ୍ରାମିତ୍ୟାଦି ଷଡ୍ବୀଜୈଃ ଷଡଂଗନ୍ୟାସଃ ॥
ଧ୍ୟାନମ୍ ।
ଶାଂତଂ ପଦ୍ମାସନସ୍ଥଂ ଶଶିଧରମକୁଟଂ ପଂଚଵକ୍ତ୍ରଂ ତ୍ରିନେତ୍ରଂ
ଶୂଲଂ ଵଜ୍ରଂ ଚ ଖଡ୍ଗଂ ପରଶୁମଭୟଦଂ ଦକ୍ଷଭାଗେ ଵହଂତମ୍ ।
ନାଗଂ ପାଶଂ ଚ ଘଂଟାଂ ପ୍ରଳୟ ହୁତଵହଂ ସାଂକୁଶଂ ଵାମଭାଗେ
ନାନାଲଂକାରୟୁକ୍ତଂ ସ୍ଫଟିକମଣିନିଭଂ ପାର୍ଵତୀଶଂ ନମାମି ॥
ଦୂର୍ଵାସ ଉଵାଚ ।
ପ୍ରଣମ୍ୟ ଶିରସା ଦେଵଂ ସ୍ଵୟଂଭୁଂ ପରମେଶ୍ଵରମ୍ ।
ଏକଂ ସର୍ଵଗତଂ ଦେଵଂ ସର୍ଵଦେଵମୟଂ ଵିଭୁମ୍ ॥ 1 ॥
ରୁଦ୍ର ଵର୍ମ ପ୍ରଵକ୍ଷ୍ୟାମି ଅଂଗ ପ୍ରାଣସ୍ୟ ରକ୍ଷୟେ ।
ଅହୋରାତ୍ରମୟଂ ଦେଵଂ ରକ୍ଷାର୍ଥଂ ନିର୍ମିତଂ ପୁରା ॥ 2 ॥
ରୁଦ୍ରୋ ମେ ଚାଗ୍ରତଃ ପାତୁ ପାତୁ ପାର୍ଶ୍ଵୌ ହରସ୍ତଥା ।
ଶିରୋ ମେ ଈଶ୍ଵରଃ ପାତୁ ଲଲାଟଂ ନୀଲଲୋହିତଃ ॥ 3 ॥
ନେତ୍ରୟୋସ୍ତ୍ର୍ୟଂବକଃ ପାତୁ ମୁଖଂ ପାତୁ ମହେଶ୍ଵରଃ ।
କର୍ଣୟୋଃ ପାତୁ ମେ ଶଂଭୁଃ ନାସିକାୟାଂ ସଦାଶିଵଃ ॥ 4 ॥
ଵାଗୀଶଃ ପାତୁ ମେ ଜିହ୍ଵାଂ ଓଷ୍ଠୌ ପାତ୍ଵଂବିକାପତିଃ ।
ଶ୍ରୀକଂଠଃ ପାତୁ ମେ ଗ୍ରୀଵାଂ ବାହୂଂଶ୍ଚୈଵ ପିନାକଧୃତ୍ ॥ 5 ॥
ହୃଦୟଂ ମେ ମହାଦେଵଃ ଈଶ୍ଵରୋଵ୍ୟାତ୍ ସ୍ତନାଂତରମ୍ ।
ନାଭିଂ କଟିଂ ଚ ଵକ୍ଷଶ୍ଚ ପାତୁ ସର୍ଵଂ ଉମାପତିଃ ॥ 6 ॥
ବାହୁମଧ୍ୟାଂତରଂ ଚୈଵ ସୂକ୍ଷ୍ମରୂପଃ ସଦାଶିଵଃ ।
ସ୍ଵରଂ ରକ୍ଷତୁ ସର୍ଵେଶୋ ଗାତ୍ରାଣି ଚ ୟଥା କ୍ରମମ୍ ॥ 7 ॥
ଵଜ୍ରଶକ୍ତିଧରଂ ଚୈଵ ପାଶାଂକୁଶଧରଂ ତଥା ।
ଗଂଡଶୂଲଧରଂ ନିତ୍ୟଂ ରକ୍ଷତୁ ତ୍ରିଦଶେଶ୍ଵରଃ ॥ 8 ॥
ପ୍ରସ୍ଥାନେଷୁ ପଦେ ଚୈଵ ଵୃକ୍ଷମୂଲେ ନଦୀତଟେ ।
ସଂଧ୍ୟାୟାଂ ରାଜଭଵନେ ଵିରୂପାକ୍ଷସ୍ତୁ ପାତୁ ମାମ୍ ॥ 9 ॥
ଶୀତୋଷ୍ଣାଦଥ କାଲେଷୁ ତୁହି ନ ଦ୍ରୁମକଂଟକେ ।
ନିର୍ମନୁଷ୍ୟେଽସମେ ମାର୍ଗେ ତ୍ରାହି ମାଂ ଵୃଷଭଧ୍ଵଜ ॥ 10 ॥
ଇତ୍ୟେତଦ୍ରୁଦ୍ରକଵଚଂ ପଵିତ୍ରଂ ପାପନାଶନମ୍ ।
ମହାଦେଵପ୍ରସାଦେନ ଦୂର୍ଵାସୋ ମୁନିକଲ୍ପିତମ୍ ॥ 11 ॥
ମମାଖ୍ୟାତଂ ସମାସେନ ନ ଭୟଂ ଵିଂଦତି କ୍ଵଚିତ୍ ।
ପ୍ରାପ୍ନୋତି ପରମାରୋଗ୍ୟଂ ପୁଣ୍ୟମାୟୁଷ୍ୟଵର୍ଧନମ୍ ॥ 12 ॥
ଵିଦ୍ୟାର୍ଥୀ ଲଭତେ ଵିଦ୍ୟାଂ ଧନାର୍ଥୀ ଲଭତେ ଧନମ୍ ।
କନ୍ୟାର୍ଥୀ ଲଭତେ କନ୍ୟାଂ ନ ଭୟଂ ଵିଂଦତେ କ୍ଵଚିତ୍ ॥ 13 ॥
ଅପୁତ୍ରୋ ଲଭତେ ପୁତ୍ରଂ ମୋକ୍ଷାର୍ଥୀ ମୋକ୍ଷମାପ୍ନୁୟାତ୍ ।
ତ୍ରାହି ତ୍ରାହି ମହାଦେଵ ତ୍ରାହି ତ୍ରାହି ତ୍ରୟୀମୟ ॥ 14 ॥
ତ୍ରାହି ମାଂ ପାର୍ଵତୀନାଥ ତ୍ରାହି ମାଂ ତ୍ରିପୁରଂତକ ।
ପାଶଂ ଖଟ୍ଵାଂଗ ଦିଵ୍ୟାସ୍ତ୍ରଂ ତ୍ରିଶୂଲଂ ରୁଦ୍ରମେଵ ଚ ॥ 15 ॥
ନମସ୍କରୋମି ଦେଵେଶ ତ୍ରାହି ମାଂ ଜଗଦୀଶ୍ଵର ।
ଶତ୍ରୁମଧ୍ୟେ ସଭାମଧ୍ୟେ ଗ୍ରାମମଧ୍ୟେ ଗୃହାଂତରେ ॥ 16 ॥
ଗମନାଗମନେ ଚୈଵ ତ୍ରାହି ମାଂ ଭକ୍ତଵତ୍ସଲ ।
ତ୍ଵଂ ଚିତ୍ତଂ ତ୍ଵଂ ମାନସଂ ଚ ତ୍ଵଂ ବୁଦ୍ଧିସ୍ତ୍ଵଂ ପରାୟଣମ୍ ॥ 17 ॥
କର୍ମଣା ମନସା ଚୈଵ ତ୍ଵଂ ବୁଦ୍ଧିଶ୍ଚ ୟଥା ସଦା ।
ଜ୍ଵରଭୟଂ ଛିଂଦି ସର୍ଵଜ୍ଵରଭୟଂ ଛିଂଦି ଗ୍ରହଭୟଂ ଛିଂଦି ॥ 18 ॥
ସର୍ଵଶତ୍ରୂନ୍ନିଵର୍ତ୍ୟାପି ସର୍ଵଵ୍ୟାଧିନିଵାରଣମ୍ ।
ରୁଦ୍ରଲୋକଂ ସ ଗଚ୍ଛତି ରୁଦ୍ରଲୋକଂ ସଗଚ୍ଛତ୍ୟୋନ୍ନମ ଇତି ॥ 19 ॥
ଇତି ସ୍କଂଦପୁରାଣେ ଦୂର୍ଵାସ ପ୍ରୋକ୍ତଂ ଶ୍ରୀ ରୁଦ୍ରକଵଚମ୍ ॥
