ନ୍ୟାସଃ
ଅଂଗନ୍ୟାସଃ
ଓଂ ଓଂ ପାଦୟୋଃ ନମଃ ।
ଓଂ ନଂ ଜାନୁନୋଃ ନମଃ ।
ଓଂ ମୋଂ ଊର୍ଵୋଃ ନମଃ ।
ଓଂ ନାଂ ଉଦରେ ନମଃ ।
ଓଂ ରାଂ ହୃଦି ନମଃ ।
ଓଂ ୟଂ ଉରସି ନମଃ ।
ଓଂ ଣାଂ ମୁଖେ ନମଃ ।
ଓଂ ୟଂ ଶିରସି ନମଃ ।
କରନ୍ୟାସଃ
ଓଂ ଓଂ ଦକ୍ଷିଣତର୍ଜନ୍ୟାଂ ନମଃ ।
ଓଂ ନଂ ଦକ୍ଷିଣମଧ୍ୟମାୟାଂ ନମଃ ।
ଓଂ ମୋଂ ଦକ୍ଷିଣାନାମିକାୟାଂ ନମଃ ।
ଓଂ ଭଂ ଦକ୍ଷିଣକନିଷ୍ଠିକାୟାଂ ନମଃ ।
ଓଂ ଗଂ ଵାମକନିଷ୍ଠିକାୟାଂ ନମଃ ।
ଓଂ ଵଂ ଵାମାନିକାୟାଂ ନମଃ ।
ଓଂ ତେଂ ଵାମମଧ୍ୟମାୟାଂ ନମଃ ।
ଓଂ ଵାଂ ଵାମତର୍ଜନ୍ୟାଂ ନମଃ ।
ଓଂ ସୁଂ ଦକ୍ଷିଣାଂଗୁଷ୍ଠୋର୍ଧ୍ଵପର୍ଵଣି ନମଃ ।
ଓଂ ଦେଂ ଦକ୍ଷିଣାଂଗୁଷ୍ଠାଧଃ ପର୍ଵଣି ନମଃ ।
ଓଂ ଵାଂ ଵାମାଂଗୁଷ୍ଠୋର୍ଧ୍ଵପର୍ଵଣି ନମଃ ।
ଓଂ ୟଂ ଵାମାଂଗୁଷ୍ଠାଧଃ ପର୍ଵଣି ନମଃ ।
ଵିଷ୍ଣୁଷଡକ୍ଷରନ୍ୟାସଃ
ଓଂ ଓଂ ହୃଦୟେ ନମଃ ।
ଓଂ ଵିଂ ମୂର୍ଧ୍ନୈ ନମଃ ।
ଓଂ ଷଂ ଭ୍ରୁର୍ଵୋର୍ମଧ୍ୟେ ନମଃ ।
ଓଂ ଣଂ ଶିଖାୟାଂ ନମଃ ।
ଓଂ ଵେଂ ନେତ୍ରୟୋଃ ନମଃ ।
ଓଂ ନଂ ସର୍ଵସଂଧିଷୁ ନମଃ ।
ଓଂ ମଃ ପ୍ରାଚ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ଆଗ୍ନେୟ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ଦକ୍ଷିଣସ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ନୈଋତ୍ୟେ ଅସ୍ତ୍ରାୟ ଫଟ୍ ।
ଓଂ ମଃ ପ୍ରତୀଚ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ଵାୟଵ୍ୟେ ଅସ୍ତ୍ରାୟ ଫଟ୍ ।
ଓଂ ମଃ ଉଦୀଚ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ଐଶାନ୍ୟାଂ ଅସ୍ତ୍ରାୟ ଫଟ୍ ।
ଓଂ ମଃ ଊର୍ଧ୍ଵାୟାଂ ଅସ୍ତ୍ରାୟ ଫଟ୍ ।
ଓଂ ମଃ ଅଧରାୟାଂ ଅସ୍ତ୍ରାୟ ଫଟ୍ ।
ଶ୍ରୀ ହରିଃ
ଅଥ ଶ୍ରୀନାରାୟଣକଵଚ
ରାଜୋଵାଚ
ୟୟା ଗୁପ୍ତଃ ସହସ୍ରାକ୍ଷଃ ସଵାହାନ୍ ରିପୁସୈନିକାନ୍ ।
କ୍ରୀଡନ୍ନିଵ ଵିନିର୍ଜିତ୍ୟ ତ୍ରିଲୋକ୍ୟା ବୁଭୁଜେ ଶ୍ରିୟମ୍ ॥ 1 ॥
ଭଗଵଂସ୍ତନ୍ମମାଖ୍ୟାହି ଵର୍ମ ନାରାୟଣାତ୍ମକମ୍ ।
ୟଥାଽଽତତାୟିନଃ ଶତ୍ରୂନ୍ ୟେନ ଗୁପ୍ତୋଽଜୟନ୍ମୃଧେ ॥ 2 ॥
ଶ୍ରୀ ଶୁକ ଉଵାଚ
ଵୃତଃ ପୁରୋହିତସ୍ତ୍ଵାଷ୍ଟ୍ରୋ ମହେଂଦ୍ରାୟାନୁପୃଚ୍ଛତେ ।
ନାରାୟଣାଖ୍ୟଂ ଵର୍ମାହ ତଦିହୈକମନାଃ ଶୃଣୁ ॥ 3 ॥
ଶ୍ରୀଵିଶ୍ଵରୂପ ଉଵାଚ
ଧୌତାଂଘ୍ରିପାଣିରାଚମ୍ୟ ସପଵିତ୍ର ଉଦଙ୍ମୁଖଃ ।
କୃତସ୍ଵାଂଗକରନ୍ୟାସୋ ମଂତ୍ରାଭ୍ୟାଂ ଵାଗ୍ୟତଃ ଶୁଚିଃ ॥ 4 ॥
ନାରାୟଣମୟଂ ଵର୍ମ ସନ୍ନହ୍ୟେଦ୍ଭୟ ଆଗତେ ।
ଦୈଵଭୂତାତ୍ମକର୍ମଭ୍ୟୋ ନାରାୟଣମୟଃ ପୁମାନ୍ ॥ 5 ॥
ପାଦୟୋର୍ଜାନୁନୋରୂର୍ଵୋରୁଦରେ ହୃଦ୍ୟଥୋରସି ।
ମୁଖେ ଶିରସ୍ୟାନୁପୂର୍ଵ୍ୟାଦୋଂକାରାଦୀନି ଵିନ୍ୟସେତ୍ ॥ 6 ॥
ଓଂ ନମୋ ନାରାୟଣାୟେତି ଵିପର୍ୟୟମଥାପି ଵା ।
କରନ୍ୟାସଂ ତତଃ କୁର୍ୟାଦ୍ଦ୍ଵାଦଶାକ୍ଷରଵିଦ୍ୟୟା ॥ 7 ॥
ପ୍ରଣଵାଦିୟକାରାଂତମଂଗୁଲ୍ୟଂଗୁଷ୍ଠପର୍ଵସୁ ।
ନ୍ୟସେଦ୍ଧୃଦୟ ଓଂକାରଂ ଵିକାରମନୁ ମୂର୍ଧନି ॥ 8 ॥
ଷକାରଂ ତୁ ଭ୍ରୁଵୋର୍ମଧ୍ୟେ ଣକାରଂ ଶିଖୟା ନ୍ୟସେତ୍ ।
ଵେକାରଂ ନେତ୍ରୟୋର୍ୟୁଂଜ୍ୟାନ୍ନକାରଂ ସର୍ଵସଂଧିଷୁ ॥ 9 ॥
ମକାରମସ୍ତ୍ରମୁଦ୍ଦିଶ୍ୟ ମଂତ୍ରମୂର୍ତିର୍ଭଵେଦ୍ବୁଧଃ ।
ସଵିସର୍ଗଂ ଫଡଂତଂ ତତ୍ସର୍ଵଦିକ୍ଷୁ ଵିନିର୍ଦିଶେତ୍ ॥ 10 ॥
ଓଂ ଵିଷ୍ଣଵେ ନମଃ ॥
ଇତ୍ୟାତ୍ମାନଂ ପରଂ ଧ୍ୟାୟେଦ୍ଧ୍ୟେୟଂ ଷଟ୍ଛକ୍ତିଭିର୍ୟୁତମ୍ ।
ଵିଦ୍ୟାତେଜସ୍ତପୋମୂର୍ତିମିମଂ ମଂତ୍ରମୁଦାହରେତ୍ ॥ 11 ॥
ଓଂ ହରିର୍ଵିଦଧ୍ୟାନ୍ମମ ସର୍ଵରକ୍ଷାଂ
ନ୍ୟସ୍ତାଂଘ୍ରିପଦ୍ମଃ ପତଗେଂଦ୍ର ପୃଷ୍ଠେ ।
ଦରାରିଚର୍ମାସିଗଦେଷୁଚାପ-
-ପାଶାଂଦଧାନୋଽଷ୍ଟଗୁଣୋଽଷ୍ଟବାହୁଃ ॥ 12 ॥
ଜଲେଷୁ ମାଂ ରକ୍ଷତୁ ମତ୍ସ୍ୟମୂର୍ତି-
-ର୍ୟାଦୋଗଣେଭ୍ୟୋ ଵରୁଣସ୍ୟ ପାଶାତ୍ ।
ସ୍ଥଲେଷୁ ମାୟାଵଟୁଵାମନୋଽଵ୍ୟା-
-ତ୍ତ୍ରିଵିକ୍ରମଃ ଖେଽଵତୁ ଵିଶ୍ଵରୂପଃ ॥ 13 ॥
ଦୁର୍ଗେଷ୍ଵଟଵ୍ୟାଜିମୁଖାଦିଷୁ ପ୍ରଭୁଃ
ପାୟାନ୍ନୃସିଂହୋଽସୁରୟୂଥପାରିଃ ।
ଵିମୁଂଚତୋ ୟସ୍ୟ ମହାଟ୍ଟହାସଂ
ଦିଶୋ ଵିନେଦୁର୍ନ୍ୟପତଂଶ୍ଚ ଗର୍ଭାଃ ॥ 14 ॥
ରକ୍ଷତ୍ଵସୌ ମାଧ୍ଵନି ୟଜ୍ଞକଲ୍ପଃ
ସ୍ଵଦଂଷ୍ଟ୍ରୟୋନ୍ନୀତଧରୋ ଵରାହଃ ।
ରାମୋଽଦ୍ରିକୂଟେଷ୍ଵଥ ଵିପ୍ରଵାସେ
ସଲକ୍ଷ୍ମଣୋଽଵ୍ୟାଦ୍ଭରତାଗ୍ରଜୋଽସ୍ମାନ୍ ॥ 15 ॥
ମାମୁଗ୍ରଧର୍ମାଦଖିଲାତ୍ପ୍ରମାଦା-
-ନ୍ନାରାୟଣଃ ପାତୁ ନରଶ୍ଚ ହାସାତ୍ ।
ଦତ୍ତସ୍ତ୍ଵୟୋଗାଦଥ ୟୋଗନାଥଃ
ପାୟାଦ୍ଗୁଣେଶଃ କପିଲଃ କର୍ମବଂଧାତ୍ ॥ 16 ॥
ସନତ୍କୁମାରୋଽଵତୁ କାମଦେଵା-
-ଦ୍ଧୟାନନୋ ମାଂ ପଥି ଦେଵହେଲନାତ୍ ।
ଦେଵର୍ଷିଵର୍ୟଃ ପୁରୁଷାର୍ଚନାଂତରା-
-ତ୍କୂର୍ମୋ ହରିର୍ମାଂ ନିରୟାଦଶେଷାତ୍ ॥ 17 ॥
ଧନ୍ଵଂତରିର୍ଭଗଵାନ୍ପାତ୍ଵପଥ୍ୟା-
-ଦ୍ଦ୍ଵଂଦ୍ଵାଦ୍ଭୟାଦୃଷଭୋ ନିର୍ଜିତାତ୍ମା ।
ୟଜ୍ଞଶ୍ଚ ଲୋକାଦଵତାଜ୍ଜନାଂତା-
-ଦ୍ବଲୋ ଗଣାତ୍କ୍ରୋଧଵଶାଦହୀଂଦ୍ରଃ ॥ 18 ॥
ଦ୍ଵୈପାୟନୋ ଭଗଵାନପ୍ରବୋଧା-
-ଦ୍ବୁଦ୍ଧସ୍ତୁ ପାଷଂଡଗଣାତ୍ପ୍ରମାଦାତ୍ ।
କଲ୍କିଃ କଲେଃ କାଲମଲାତ୍ପ୍ରପାତୁ
ଧର୍ମାଵନାୟୋରୁକୃତାଵତାରଃ ॥ 19 ॥
ମାଂ କେଶଵୋ ଗଦୟା ପ୍ରାତରଵ୍ୟା-
-ଦ୍ଗୋଵିଂଦ ଆସଂଗଵମାତ୍ତଵେଣୁଃ ।
ନାରାୟଣଃ ପ୍ରାହ୍ଣ ଉଦାତ୍ତଶକ୍ତି-
-ର୍ମଧ୍ୟଂଦିନେ ଵିଷ୍ଣୁରରୀଂଦ୍ରପାଣିଃ ॥ 20 ॥
ଦେଵୋଽପରାହ୍ଣେ ମଧୁହୋଗ୍ରଧନ୍ଵା
ସାୟଂ ତ୍ରିଧାମାଵତୁ ମାଧଵୋ ମାମ୍ ।
ଦୋଷେ ହୃଷୀକେଶ ଉତାର୍ଧରାତ୍ରେ
ନିଶୀଥ ଏକୋଽଵତୁ ପଦ୍ମନାଭଃ ॥ 21 ॥
ଶ୍ରୀଵତ୍ସଧାମାଽପରରାତ୍ର ଈଶଃ
ପ୍ରତ୍ୟୁଷ ଈଶୋଽସିଧରୋ ଜନାର୍ଦନଃ ।
ଦାମୋଦରୋଽଵ୍ୟାଦନୁସଂଧ୍ୟଂ ପ୍ରଭାତେ
ଵିଶ୍ଵେଶ୍ଵରୋ ଭଗଵାନ୍କାଲମୂର୍ତିଃ ॥ 22 ॥
ଚକ୍ରଂ ୟୁଗାଂତାନଲତିଗ୍ମନେମି
ଭ୍ରମତ୍ସମଂତାଦ୍ଭଗଵତ୍ପ୍ରୟୁକ୍ତମ୍ ।
ଦଂଦଗ୍ଧି ଦଂଦଗ୍ଧ୍ୟରିସୈନ୍ୟମାଶୁ
କକ୍ଷଂ ୟଥା ଵାତସଖୋ ହୁତାଶଃ ॥ 23 ॥
ଗଦେଽଶନିସ୍ପର୍ଶନଵିସ୍ଫୁଲିଂଗେ
ନିଷ୍ପିଂଢି ନିଷ୍ପିଂଢ୍ୟଜିତପ୍ରିୟାସି ।
କୂଷ୍ମାଂଡଵୈନାୟକୟକ୍ଷରକ୍ଷୋ
ଭୂତଗ୍ରହାଂଶ୍ଚୂର୍ଣୟ ଚୂର୍ଣୟାରୀନ୍ ॥ 24 ॥
ତ୍ଵଂ ୟାତୁଧାନପ୍ରମଥପ୍ରେତମାତୃ-
-ପିଶାଚଵିପ୍ରଗ୍ରହଘୋରଦୃଷ୍ଟୀନ୍ ।
ଦରେଂଦ୍ର ଵିଦ୍ରାଵୟ କୃଷ୍ଣପୂରିତୋ
ଭୀମସ୍ଵନୋଽରେର୍ହୃଦୟାନି କଂପୟନ୍ ॥ 25 ॥
ତ୍ଵଂ ତିଗ୍ମଧାରାସିଵରାରିସୈନ୍ୟ-
-ମୀଶପ୍ରୟୁକ୍ତୋ ମମ ଛିଂଧି ଛିଂଧି ।
ଚକ୍ଷୂଂଷି ଚର୍ମନ୍ ଶତଚଂଦ୍ର ଛାଦୟ
ଦ୍ଵିଷାମଘୋନାଂ ହର ପାପଚକ୍ଷୁଷାମ୍ ॥ 26 ॥
ୟନ୍ନୋ ଭୟଂ ଗ୍ରହେଭ୍ୟୋଽଭୂତ୍କେତୁଭ୍ୟୋ ନୃଭ୍ୟ ଏଵ ଚ ।
ସରୀସୃପେଭ୍ୟୋ ଦଂଷ୍ଟ୍ରିଭ୍ୟୋ ଭୂତେଭ୍ୟୋଽଘେଭ୍ୟ ଏଵ ଚ ॥ 27 ॥
ସର୍ଵାଣ୍ୟେତାନି ଭଗଵନ୍ନାମରୂପାସ୍ତ୍ରକୀର୍ତନାତ୍ ।
ପ୍ରୟାଂତୁ ସଂକ୍ଷୟଂ ସଦ୍ୟୋ ୟେ ନଃ ଶ୍ରେୟଃପ୍ରତୀପକାଃ ॥ 28 ॥
ଗରୁଡୋ ଭଗଵାନ୍ ସ୍ତୋତ୍ରସ୍ତୋମଶ୍ଛଂଦୋମୟଃ ପ୍ରଭୁଃ ।
ରକ୍ଷତ୍ଵଶେଷକୃଚ୍ଛ୍ରେଭ୍ୟୋ ଵିଷ୍ଵକ୍ସେନଃ ସ୍ଵନାମଭିଃ ॥ 29 ॥
ସର୍ଵାପଦ୍ଭ୍ୟୋ ହରେର୍ନାମରୂପୟାନାୟୁଧାନି ନଃ ।
ବୁଦ୍ଧୀଂଦ୍ରିୟମନଃପ୍ରାଣାନ୍ପାଂତୁ ପାର୍ଷଦଭୂଷଣାଃ ॥ 30 ॥
ୟଥା ହି ଭଗଵାନେଵ ଵସ୍ତୁତଃ ସଦସଚ୍ଚ ୟତ୍ ।
ସତ୍ୟେନାନେନ ନଃ ସର୍ଵେ ୟାଂତୁ ନାଶମୁପଦ୍ରଵାଃ ॥ 31 ॥
ୟଥୈକାତ୍ମ୍ୟାନୁଭାଵାନାଂ ଵିକଲ୍ପରହିତଃ ସ୍ଵୟମ୍ ।
ଭୂଷଣାୟୁଧଲିଂଗାଖ୍ୟା ଧତ୍ତେ ଶକ୍ତୀଃ ସ୍ଵମାୟୟା ॥ 32 ॥
ତେନୈଵ ସତ୍ୟମାନେନ ସର୍ଵଜ୍ଞୋ ଭଗଵାନ୍ ହରିଃ ।
ପାତୁ ସର୍ଵୈଃ ସ୍ଵରୂପୈର୍ନଃ ସଦା ସର୍ଵତ୍ର ସର୍ଵଗଃ ॥ 33 ॥
ଵିଦିକ୍ଷୁ ଦିକ୍ଷୂର୍ଧ୍ଵମଧଃ ସମଂତା-
-ଦଂତର୍ବହିର୍ଭଗଵାନ୍ନାରସିଂହଃ ।
ପ୍ରହାପୟଁଲ୍ଲୋକଭୟଂ ସ୍ଵନେନ
ସ୍ଵତେଜସା ଗ୍ରସ୍ତସମସ୍ତତେଜାଃ ॥ 34 ॥
ମଘଵନ୍ନିଦମାଖ୍ୟାତଂ ଵର୍ମ ନାରାୟଣାତ୍ମକମ୍ ।
ଵିଜେଷ୍ୟସ୍ୟଂଜସା ୟେନ ଦଂଶିତୋଽସୁରୟୂଥପାନ୍ ॥ 35 ॥
ଏତଦ୍ଧାରୟମାଣସ୍ତୁ ୟଂ ୟଂ ପଶ୍ୟତି ଚକ୍ଷୁଷା ।
ପଦା ଵା ସଂସ୍ପୃଶେତ୍ସଦ୍ୟଃ ସାଧ୍ଵସାତ୍ସ ଵିମୁଚ୍ୟତେ ॥ 36 ॥
ନ କୁତଶ୍ଚିଦ୍ଭୟଂ ତସ୍ୟ ଵିଦ୍ୟାଂ ଧାରୟତୋ ଭଵେତ୍ ।
ରାଜଦସ୍ୟୁଗ୍ରହାଦିଭ୍ୟୋ ଵ୍ୟାଧ୍ୟାଦିଭ୍ୟଶ୍ଚ କର୍ହିଚିତ୍ ॥ 37 ॥
ଇମାଂ ଵିଦ୍ୟାଂ ପୁରା କଶ୍ଚିତ୍କୌଶିକୋ ଧାରୟନ୍ ଦ୍ଵିଜଃ ।
ୟୋଗଧାରଣୟା ସ୍ଵାଂଗଂ ଜହୌ ସ ମରୁଧନ୍ଵନି ॥ 38 ॥
ତସ୍ୟୋପରି ଵିମାନେନ ଗଂଧର୍ଵପତିରେକଦା ।
ୟୟୌ ଚିତ୍ରରଥଃ ସ୍ତ୍ରୀଭିର୍ଵୃତୋ ୟତ୍ର ଦ୍ଵିଜକ୍ଷୟଃ ॥ 39 ॥
ଗଗନାନ୍ନ୍ୟପତତ୍ସଦ୍ୟଃ ସଵିମାନୋ ହ୍ୟଵାକ୍ଛିରାଃ ।
ସ ଵାଲଖିଲ୍ୟଵଚନାଦସ୍ଥୀନ୍ୟାଦାୟ ଵିସ୍ମିତଃ ।
ପ୍ରାପ୍ୟ ପ୍ରାଚ୍ୟାଂ ସରସ୍ଵତ୍ୟାଂ ସ୍ନାତ୍ଵା ଧାମ ସ୍ଵମନ୍ଵଗାତ୍ ॥ 40 ॥
ଶ୍ରୀ ଶୁକ ଉଵାଚ
ୟ ଇଦଂ ଶୃଣୁୟାତ୍କାଲେ ୟୋ ଧାରୟତି ଚାଦୃତଃ ।
ତଂ ନମସ୍ୟଂତି ଭୂତାନି ମୁଚ୍ୟତେ ସର୍ଵତୋ ଭୟାତ୍ ॥ 41 ॥
ଏତାଂ ଵିଦ୍ୟାମଧିଗତୋ ଵିଶ୍ଵରୂପାଚ୍ଛତକ୍ରତୁଃ ।
ତ୍ରୈଲୋକ୍ୟଲକ୍ଷ୍ମୀଂ ବୁଭୁଜେ ଵିନିର୍ଜିତ୍ୟ ମୃଧେଽସୁରାନ୍ ॥ 42 ॥
ଇତି ଶ୍ରୀମଦ୍ଭାଗଵତେ ମହାପୁରାଣେ ଷଷ୍ଠସ୍କଂଧେ ନାରାୟଣଵର୍ମୋପଦେଶୋ ନାମାଷ୍ଟମୋଽଧ୍ୟାୟଃ ।
