ହେ ଚଂଦ୍ରଚୂଡ ମଦନାଂତକ ଶୂଲପାଣେ
ସ୍ଥାଣୋ ଗିରୀଶ ଗିରିଜେଶ ମହେଶ ଶଂଭୋ ।
ଭୂତେଶ ଭୀତଭୟସୂଦନ ମାମନାଥଂ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 1 ॥
ହେ ପାର୍ଵତୀହୃଦୟଵଲ୍ଲଭ ଚଂଦ୍ରମୌଳେ
ଭୂତାଧିପ ପ୍ରମଥନାଥ ଗିରୀଶଚାପ ।
ହେ ଵାମଦେଵ ଭଵ ରୁଦ୍ର ପିନାକପାଣେ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 2 ॥
ହେ ନୀଲକଂଠ ଵୃଷଭଧ୍ଵଜ ପଂଚଵକ୍ତ୍ର
ଲୋକେଶ ଶେଷଵଲୟ ପ୍ରମଥେଶ ଶର୍ଵ ।
ହେ ଧୂର୍ଜଟେ ପଶୁପତେ ଗିରିଜାପତେ ମାଂ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 3 ॥
ହେ ଵିଶ୍ଵନାଥ ଶିଵ ଶଂକର ଦେଵଦେଵ
ଗଂଗାଧର ପ୍ରମଥନାୟକ ନଂଦିକେଶ ।
ବାଣେଶ୍ଵରାଂଧକରିପୋ ହର ଲୋକନାଥ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 4 ॥
ଵାରାଣସୀପୁରପତେ ମଣିକର୍ଣିକେଶ
ଵୀରେଶ ଦକ୍ଷମଖକାଲ ଵିଭୋ ଗଣେଶ ।
ସର୍ଵଜ୍ଞ ସର୍ଵହୃଦୟୈକନିଵାସ ନାଥ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 5 ॥
ଶ୍ରୀମନ୍ମହେଶ୍ଵର କୃପାମୟ ହେ ଦୟାଳୋ
ହେ ଵ୍ୟୋମକେଶ ଶିତିକଂଠ ଗଣାଧିନାଥ ।
ଭସ୍ମାଂଗରାଗ ନୃକପାଲକଲାପମାଲ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 6 ॥
କୈଲାସଶୈଲଵିନିଵାସ ଵୃଷାକପେ ହେ
ମୃତ୍ୟୁଂଜୟ ତ୍ରିନୟନ ତ୍ରିଜଗନ୍ନିଵାସ ।
ନାରାୟଣପ୍ରିୟ ମଦାପହ ଶକ୍ତିନାଥ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 7 ॥
ଵିଶ୍ଵେଶ ଵିଶ୍ଵଭଵନାଶକ ଵିଶ୍ଵରୂପ
ଵିଶ୍ଵାତ୍ମକ ତ୍ରିଭୁଵନୈକଗୁଣାଧିକେଶ ।
ହେ ଵିଶ୍ଵନାଥ କରୁଣାମୟ ଦୀନବଂଧୋ
ସଂସାରଦୁଃଖଗହନାଜ୍ଜଗଦୀଶ ରକ୍ଷ ॥ 8 ॥
ଗୌରୀଵିଲାସଭଵନାୟ ମହେଶ୍ଵରାୟ
ପଂଚାନନାୟ ଶରଣାଗତକଲ୍ପକାୟ ।
ଶର୍ଵାୟ ସର୍ଵଜଗତାମଧିପାୟ ତସ୍ମୈ
ଦାରିଦ୍ର୍ୟଦୁଃଖଦହନାୟ ନମଃ ଶିଵାୟ ॥ 9 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶ୍ରୀଶିଵନାମାଵଳ୍ୟଷ୍ଟକଂ ସଂପୂର୍ଣମ୍ ॥
