ഭാസ്വാന് കാശ്യപഗോത്രജോഽരുണരുചിര്യഃ സിംഹപോഽര്കഃ സമി-
-ത്ഷട്ത്രിസ്ഥോഽദശശോഭനോ ഗുരുശശീ ഭൌമാഃ സുമിത്രാഃ സദാ ।
ശുക്രോ മംദരിപുഃ കളിംഗജനപശ്ചാഗ്നീശ്വരൌ ദേവതേ
മധ്യേവര്തുലപൂർവദിഗ്ദിനകരഃ കുര്യാത്സദാ മംഗളമ് ॥ 1 ॥

ചംദ്രഃ കര്കടകപ്രഭുഃ സിതനിഭശ്ചാത്രേയഗോത്രോദ്ഭവ-
-ശ്ചാത്രേയശ്ചതുരശ്രവാരുണമുഖശ്ചാപേ ഉമാധീശ്വരഃ ।
ഷട്സപ്താഗ്നി ദശൈകശോഭനഫലോ നോരിര്ബുധാര്കൌപ്രിയൌ
സ്വാമീ യാമുനജശ്ച പര്ണസമിധഃ കുര്യാത്സദാ മംഗളമ് ॥ 2 ॥

ഭൌമോ ദക്ഷിണദിക്ത്രികോണയമദിഗ്വിംധ്യേശ്വരഃ ഖാദിരഃ
സ്വാമീ വൃശ്ചികമേഷയോസ്തു സുഗുരുശ്ചാര്കഃ ശശീ സൌഹൃദഃ ।
ജ്ഞോഽരിഃ ഷട്ത്രിഫലപ്രദശ്ച വസുധാസ്കംദൌ ക്രമാദ്ദേവതേ
ഭാരദ്വാജകുലോദ്വഹോഽരുണരുചിഃ കുര്യാത്സദാ മംഗളമ് ॥ 3 ॥

സൌമ്യഃ പീത ഉദങ്മുഖഃ സമിദപാമാര്ഗോഽത്രിഗോത്രോദ്ഭവോ
ബാണേശാനദിശഃ സുഹൃദ്രവിസുതഃ ശാംതഃ സുതഃ ശീതഗോഃ ।
കന്യായുഗ്മപതിര്ദശാഷ്ടചതുരഃ ഷണ്ണേത്രഗഃ ശോഭനോ
വിഷ്ണുര്ദേവ്യധിദേവതേ മഗധപഃ കുര്യാത്സദാ മംഗളമ് ॥ 4 ॥

ജീവശ്ചാംഗിരഗോത്രജോത്തരമുഖോ ദീര്ഘോത്തരാശാസ്ഥിതഃ
പീതോഽശ്വത്ഥസമിച്ച സിംധുജനിതശ്ചാപോഽഥ മീനാധിപഃ ।
സൂര്യേംദുക്ഷിതിജാഃ പ്രിയാ ബുധസിതൌ ശത്രൂ സമാശ്ചാപരേ
സപ്തദ്വേ നവപംചമേ ശുഭകരഃ കുര്യാത്സദാ മംഗളമ് ॥ 5 ॥

ശുക്രോ ഭാര്ഗവഗോത്രജഃ സിതരുചിഃ പൂർവാമുഖഃ പൂർവദിക്
പാംചാലസ്ഥ വൃഷസ്തുലാധിപമഹാരാഷ്ട്രാധിപൌദുംബരഃ ।
ഇംദ്രാണീമഘവാ ബുധശ്ച രവിജോ മിത്രോര്ക ചംദ്രാവരീ
ഷഷ്ഠത്രിര്ദശവര്ജിതേ ഭൃഗുസുതഃ കുര്യാത്സദാ മംഗളമ് ॥ 6 ॥

മംദഃ കൃഷ്ണനിഭഃ സപശ്ചിമമുഖഃ സൌരാഷ്ട്രപഃ കാശ്യപഃ
സ്വാമീ നക്രസുകുംഭയോര്ബുധസിതൌ മിത്രൌ കുജേംദൂ ദ്വിഷൌ ।
സ്ഥാനം പശ്ചിമദിക് പ്രജാപതിയമൌ ദേവൌ ധനുര്ധാരകഃ
ഷട്ത്രിസ്ഥഃ ശുഭകൃച്ഛനീ രവിസുതഃ കുര്യാത്സദാ മംഗളമ് ॥ 7 ॥

രാഹുഃ സിംഹളദേശപോഽപി സതമഃ കൃഷ്ണാംഗശൂര്പാസനോ
യഃ പൈഠീനസഗോത്രസംഭവസമിദ്ദൂർവാമുഖോ ദക്ഷിണഃ ।
യഃ സര്പഃ പശുദൈവതോഽഖിലഗതഃ സൂര്യഗ്രഹേ ഛാദകഃ
ഷട്ത്രിസ്ഥഃ ശുഭകൃച്ച സിംഹകസുതഃ കുര്യാത്സദാ മംഗളമ് ॥ 8 ॥

കേതുര്ജൈമിനിഗോത്രജഃ കുശസമിദ്വായവ്യകോണേസ്ഥിത-
-ശ്ചിത്രാംകധ്വജലാംഛനോ ഹി ഭഗവാന് യോ ദക്ഷിണാശാമുഖഃ ।
ബ്രഹ്മാ ചൈവ തു ചിത്രഗുപ്തപതിമാന് പ്രീത്യാധിദേവഃ സദാ
ഷട്ത്രിസ്ഥഃ ശുഭകൃച്ച ബര്ബരപതിഃ കുര്യാത്സദാ മംഗളമ് ॥ 9 ॥

ഇതി നവഗ്രഹ മംഗള സ്തോത്രമ് ।