𑌭𑌾𑌸𑍍𑌵𑌾𑌨𑍍 𑌕𑌾𑌶𑍍𑌯𑌪𑌗𑍋𑌤𑍍𑌰𑌜𑍋𑌽𑌰𑍁𑌣𑌰𑍁𑌚𑌿𑌰𑍍𑌯𑌃 𑌸𑌿𑌂𑌹𑌪𑍋𑌽𑌰𑍍𑌕𑌃 𑌸𑌮𑌿-
-𑌤𑍍𑌷𑌟𑍍𑌤𑍍𑌰𑌿𑌸𑍍𑌥𑍋𑌽𑌦𑌶𑌶𑍋𑌭𑌨𑍋 𑌗𑍁𑌰𑍁𑌶𑌶𑍀 𑌭𑍌𑌮𑌾𑌃 𑌸𑍁𑌮𑌿𑌤𑍍𑌰𑌾𑌃 𑌸𑌦𑌾 ।
𑌶𑍁𑌕𑍍𑌰𑍋 𑌮𑌂𑌦𑌰𑌿𑌪𑍁𑌃 𑌕𑌳𑌿𑌂𑌗𑌜𑌨𑌪𑌶𑍍𑌚𑌾𑌗𑍍𑌨𑍀𑌶𑍍𑌵𑌰𑍌 𑌦𑍇𑌵𑌤𑍇
𑌮𑌧𑍍𑌯𑍇𑌵𑌰𑍍𑌤𑍁𑌲𑌪𑍂𑌰𑍍𑌵𑌦𑌿𑌗𑍍𑌦𑌿𑌨𑌕𑌰𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 1 ॥

𑌚𑌂𑌦𑍍𑌰𑌃 𑌕𑌰𑍍𑌕𑌟𑌕𑌪𑍍𑌰𑌭𑍁𑌃 𑌸𑌿𑌤𑌨𑌿𑌭𑌶𑍍𑌚𑌾𑌤𑍍𑌰𑍇𑌯𑌗𑍋𑌤𑍍𑌰𑍋𑌦𑍍𑌭𑌵-
-𑌶𑍍𑌚𑌾𑌤𑍍𑌰𑍇𑌯𑌶𑍍𑌚𑌤𑍁𑌰𑌶𑍍𑌰𑌵𑌾𑌰𑍁𑌣𑌮𑍁𑌖𑌶𑍍𑌚𑌾𑌪𑍇 𑌉𑌮𑌾𑌧𑍀𑌶𑍍𑌵𑌰𑌃 ।
𑌷𑌟𑍍𑌸𑌪𑍍𑌤𑌾𑌗𑍍𑌨𑌿 𑌦𑌶𑍈𑌕𑌶𑍋𑌭𑌨𑌫𑌲𑍋 𑌨𑍋𑌰𑌿𑌰𑍍𑌬𑍁𑌧𑌾𑌰𑍍𑌕𑍌𑌪𑍍𑌰𑌿𑌯𑍌
𑌸𑍍𑌵𑌾𑌮𑍀 𑌯𑌾𑌮𑍁𑌨𑌜𑌶𑍍𑌚 𑌪𑌰𑍍𑌣𑌸𑌮𑌿𑌧𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 2 ॥

𑌭𑍌𑌮𑍋 𑌦𑌕𑍍𑌷𑌿𑌣𑌦𑌿𑌕𑍍𑌤𑍍𑌰𑌿𑌕𑍋𑌣𑌯𑌮𑌦𑌿𑌗𑍍𑌵𑌿𑌂𑌧𑍍𑌯𑍇𑌶𑍍𑌵𑌰𑌃 𑌖𑌾𑌦𑌿𑌰𑌃
𑌸𑍍𑌵𑌾𑌮𑍀 𑌵𑍃𑌶𑍍𑌚𑌿𑌕𑌮𑍇𑌷𑌯𑍋𑌸𑍍𑌤𑍁 𑌸𑍁𑌗𑍁𑌰𑍁𑌶𑍍𑌚𑌾𑌰𑍍𑌕𑌃 𑌶𑌶𑍀 𑌸𑍌𑌹𑍃𑌦𑌃 ।
𑌜𑍍𑌞𑍋𑌽𑌰𑌿𑌃 𑌷𑌟𑍍𑌤𑍍𑌰𑌿𑌫𑌲𑌪𑍍𑌰𑌦𑌶𑍍𑌚 𑌵𑌸𑍁𑌧𑌾𑌸𑍍𑌕𑌂𑌦𑍌 𑌕𑍍𑌰𑌮𑌾𑌦𑍍𑌦𑍇𑌵𑌤𑍇
𑌭𑌾𑌰𑌦𑍍𑌵𑌾𑌜𑌕𑍁𑌲𑍋𑌦𑍍𑌵𑌹𑍋𑌽𑌰𑍁𑌣𑌰𑍁𑌚𑌿𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 3 ॥

𑌸𑍌𑌮𑍍𑌯𑌃 𑌪𑍀𑌤 𑌉𑌦𑌙𑍍𑌮𑍁𑌖𑌃 𑌸𑌮𑌿𑌦𑌪𑌾𑌮𑌾𑌰𑍍𑌗𑍋𑌽𑌤𑍍𑌰𑌿𑌗𑍋𑌤𑍍𑌰𑍋𑌦𑍍𑌭𑌵𑍋
𑌬𑌾𑌣𑍇𑌶𑌾𑌨𑌦𑌿𑌶𑌃 𑌸𑍁𑌹𑍃𑌦𑍍𑌰𑌵𑌿𑌸𑍁𑌤𑌃 𑌶𑌾𑌂𑌤𑌃 𑌸𑍁𑌤𑌃 𑌶𑍀𑌤𑌗𑍋𑌃 ।
𑌕𑌨𑍍𑌯𑌾𑌯𑍁𑌗𑍍𑌮𑌪𑌤𑌿𑌰𑍍𑌦𑌶𑌾𑌷𑍍𑌟𑌚𑌤𑍁𑌰𑌃 𑌷𑌣𑍍𑌣𑍇𑌤𑍍𑌰𑌗𑌃 𑌶𑍋𑌭𑌨𑍋
𑌵𑌿𑌷𑍍𑌣𑍁𑌰𑍍𑌦𑍇𑌵𑍍𑌯𑌧𑌿𑌦𑍇𑌵𑌤𑍇 𑌮𑌗𑌧𑌪𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 4 ॥

𑌜𑍀𑌵𑌶𑍍𑌚𑌾𑌂𑌗𑌿𑌰𑌗𑍋𑌤𑍍𑌰𑌜𑍋𑌤𑍍𑌤𑌰𑌮𑍁𑌖𑍋 𑌦𑍀𑌰𑍍𑌘𑍋𑌤𑍍𑌤𑌰𑌾𑌶𑌾𑌸𑍍𑌥𑌿𑌤𑌃
𑌪𑍀𑌤𑍋𑌽𑌶𑍍𑌵𑌤𑍍𑌥𑌸𑌮𑌿𑌚𑍍𑌚 𑌸𑌿𑌂𑌧𑍁𑌜𑌨𑌿𑌤𑌶𑍍𑌚𑌾𑌪𑍋𑌽𑌥 𑌮𑍀𑌨𑌾𑌧𑌿𑌪𑌃 ।
𑌸𑍂𑌰𑍍𑌯𑍇𑌂𑌦𑍁𑌕𑍍𑌷𑌿𑌤𑌿𑌜𑌾𑌃 𑌪𑍍𑌰𑌿𑌯𑌾 𑌬𑍁𑌧𑌸𑌿𑌤𑍌 𑌶𑌤𑍍𑌰𑍂 𑌸𑌮𑌾𑌶𑍍𑌚𑌾𑌪𑌰𑍇
𑌸𑌪𑍍𑌤𑌦𑍍𑌵𑍇 𑌨𑌵𑌪𑌂𑌚𑌮𑍇 𑌶𑍁𑌭𑌕𑌰𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 5 ॥

𑌶𑍁𑌕𑍍𑌰𑍋 𑌭𑌾𑌰𑍍𑌗𑌵𑌗𑍋𑌤𑍍𑌰𑌜𑌃 𑌸𑌿𑌤𑌰𑍁𑌚𑌿𑌃 𑌪𑍂𑌰𑍍𑌵𑌾𑌮𑍁𑌖𑌃 𑌪𑍂𑌰𑍍𑌵𑌦𑌿𑌕𑍍
𑌪𑌾𑌂𑌚𑌾𑌲𑌸𑍍𑌥 𑌵𑍃𑌷𑌸𑍍𑌤𑍁𑌲𑌾𑌧𑌿𑌪𑌮𑌹𑌾𑌰𑌾𑌷𑍍𑌟𑍍𑌰𑌾𑌧𑌿𑌪𑍌𑌦𑍁𑌂𑌬𑌰𑌃 ।
𑌇𑌂𑌦𑍍𑌰𑌾𑌣𑍀𑌮𑌘𑌵𑌾 𑌬𑍁𑌧𑌶𑍍𑌚 𑌰𑌵𑌿𑌜𑍋 𑌮𑌿𑌤𑍍𑌰𑍋𑌰𑍍𑌕 𑌚𑌂𑌦𑍍𑌰𑌾𑌵𑌰𑍀
𑌷𑌷𑍍𑌠𑌤𑍍𑌰𑌿𑌰𑍍𑌦𑌶𑌵𑌰𑍍𑌜𑌿𑌤𑍇 𑌭𑍃𑌗𑍁𑌸𑍁𑌤𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 6 ॥

𑌮𑌂𑌦𑌃 𑌕𑍃𑌷𑍍𑌣𑌨𑌿𑌭𑌃 𑌸𑌪𑌶𑍍𑌚𑌿𑌮𑌮𑍁𑌖𑌃 𑌸𑍌𑌰𑌾𑌷𑍍𑌟𑍍𑌰𑌪𑌃 𑌕𑌾𑌶𑍍𑌯𑌪𑌃
𑌸𑍍𑌵𑌾𑌮𑍀 𑌨𑌕𑍍𑌰𑌸𑍁𑌕𑍁𑌂𑌭𑌯𑍋𑌰𑍍𑌬𑍁𑌧𑌸𑌿𑌤𑍌 𑌮𑌿𑌤𑍍𑌰𑍌 𑌕𑍁𑌜𑍇𑌂𑌦𑍂 𑌦𑍍𑌵𑌿𑌷𑍌 ।
𑌸𑍍𑌥𑌾𑌨𑌂 𑌪𑌶𑍍𑌚𑌿𑌮𑌦𑌿𑌕𑍍 𑌪𑍍𑌰𑌜𑌾𑌪𑌤𑌿𑌯𑌮𑍌 𑌦𑍇𑌵𑍌 𑌧𑌨𑍁𑌰𑍍𑌧𑌾𑌰𑌕𑌃
𑌷𑌟𑍍𑌤𑍍𑌰𑌿𑌸𑍍𑌥𑌃 𑌶𑍁𑌭𑌕𑍃𑌚𑍍𑌛𑌨𑍀 𑌰𑌵𑌿𑌸𑍁𑌤𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 𑍭 ॥

𑌰𑌾𑌹𑍁𑌃 𑌸𑌿𑌂𑌹𑌳𑌦𑍇𑌶𑌪𑍋𑌽𑌪𑌿 𑌸𑌤𑌮𑌃 𑌕𑍃𑌷𑍍𑌣𑌾𑌂𑌗𑌶𑍂𑌰𑍍𑌪𑌾𑌸𑌨𑍋
𑌯𑌃 𑌪𑍈𑌠𑍀𑌨𑌸𑌗𑍋𑌤𑍍𑌰𑌸𑌂𑌭𑌵𑌸𑌮𑌿𑌦𑍍𑌦𑍂𑌰𑍍𑌵𑌾𑌮𑍁𑌖𑍋 𑌦𑌕𑍍𑌷𑌿𑌣𑌃 ।
𑌯𑌃 𑌸𑌰𑍍𑌪𑌃 𑌪𑌶𑍁𑌦𑍈𑌵𑌤𑍋𑌽𑌖𑌿𑌲𑌗𑌤𑌃 𑌸𑍂𑌰𑍍𑌯𑌗𑍍𑌰𑌹𑍇 𑌛𑌾𑌦𑌕𑌃
𑌷𑌟𑍍𑌤𑍍𑌰𑌿𑌸𑍍𑌥𑌃 𑌶𑍁𑌭𑌕𑍃𑌚𑍍𑌚 𑌸𑌿𑌂𑌹𑌕𑌸𑍁𑌤𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 𑍮 ॥

𑌕𑍇𑌤𑍁𑌰𑍍𑌜𑍈𑌮𑌿𑌨𑌿𑌗𑍋𑌤𑍍𑌰𑌜𑌃 𑌕𑍁𑌶𑌸𑌮𑌿𑌦𑍍𑌵𑌾𑌯𑌵𑍍𑌯𑌕𑍋𑌣𑍇𑌸𑍍𑌥𑌿𑌤-
-𑌶𑍍𑌚𑌿𑌤𑍍𑌰𑌾𑌂𑌕𑌧𑍍𑌵𑌜𑌲𑌾𑌂𑌛𑌨𑍋 𑌹𑌿 𑌭𑌗𑌵𑌾𑌨𑍍 𑌯𑍋 𑌦𑌕𑍍𑌷𑌿𑌣𑌾𑌶𑌾𑌮𑍁𑌖𑌃 ।
𑌬𑍍𑌰𑌹𑍍𑌮𑌾 𑌚𑍈𑌵 𑌤𑍁 𑌚𑌿𑌤𑍍𑌰𑌗𑍁𑌪𑍍𑌤𑌪𑌤𑌿𑌮𑌾𑌨𑍍 𑌪𑍍𑌰𑍀𑌤𑍍𑌯𑌾𑌧𑌿𑌦𑍇𑌵𑌃 𑌸𑌦𑌾
𑌷𑌟𑍍𑌤𑍍𑌰𑌿𑌸𑍍𑌥𑌃 𑌶𑍁𑌭𑌕𑍃𑌚𑍍𑌚 𑌬𑌰𑍍𑌬𑌰𑌪𑌤𑌿𑌃 𑌕𑍁𑌰𑍍𑌯𑌾𑌤𑍍𑌸𑌦𑌾 𑌮𑌂𑌗𑌳𑌮𑍍 ॥ 𑍯 ॥

𑌇𑌤𑌿 𑌨𑌵𑌗𑍍𑌰𑌹 𑌮𑌂𑌗𑌳 𑌸𑍍𑌤𑍋𑌤𑍍𑌰𑌮𑍍 ।