ಅಸ್ಯ ಶ್ರೀದತ್ತಾತ್ರೇಯ ದ್ವಾದಶನಾಮ ಸ್ತೋತ್ರಮನ್ತ್ರಸ್ಯ ಪರಮಹಂಸ ಋಷಿಃ ಶ್ರೀದತ್ತಾತ್ರೇಯ ಪರಮಾತ್ಮಾ ದೇವತಾ ಅನುಷ್ಟುಪ್ಛನ್ದಃ ಸಕಲಕಾಮನಾಸಿದ್ಧ್ಯರ್ಥೇ ಜಪೇ ವಿನಿಯೋಗಃ ।

ಪ್ರಥಮಸ್ತು ಮಹಾಯೋಗೀ ದ್ವಿತೀಯಃ ಪ್ರಭುರೀಶ್ವರಃ ।
ತೃತೀಯಶ್ಚ ತ್ರಿಮೂರ್ತಿಶ್ಚ ಚತುರ್ಥೋ ಜ್ಞಾನಸಾಗರಃ ॥ 1 ॥

ಪಞ್ಚಮೋ ಜ್ಞಾನವಿಜ್ಞಾನಂ ಷಷ್ಠಸ್ಯಾತ್ ಸರ್ವಮಙ್ಗಲಮ್ ।
ಸಪ್ತಮೋ ಪುಣ್ಡರೀಕಾಕ್ಷೋ ಅಷ್ಟಮೋ ದೇವವಲ್ಲಭಃ ॥ 2 ॥

ನವಮೋ ನನ್ದದೇವೇಶೋ ದಶಮೋ ನನ್ದದಾಯಕಃ ।
ಏಕಾದಶೋ ಮಹಾರುದ್ರೋ ದ್ವಾದಶೋ ಕರುಣಾಕರಃ ॥ 3 ॥

ಏತಾನಿ ದ್ವಾದಶನಾಮಾನಿ ದತ್ತಾತ್ರೇಯ ಮಹಾತ್ಮನಃ ।
ಮನ್ತ್ರರಾಜೇತಿ ವಿಖ್ಯಾತಂ ದತ್ತಾತ್ರೇಯ ಹರಃ ಪರಃ ॥ 4 ॥

ಕ್ಷಯೋಪಸ್ಮಾರ ಕುಷ್ಠಾದಿ ತಾಪಜ್ವರನಿವಾರಣಮ್ ।
ರಾಜದ್ವಾರೇ ಪದೇ ಘೋರೇ ಸಙ್ಗ್ರಾಮೇಷು ಜಲಾನ್ತರೇ ॥ 5 ॥

ಗಿರೇ ಗುಹಾನ್ತರೇಽರಣ್ಯೇ ವ್ಯಾಘ್ರಚೋರಭಯಾದಿಷು ।
ಆವರ್ತನೇ ಸಹಸ್ರೇಷು ಲಭತೇ ವಾಞ್ಛಿತಂ ಫಲಮ್ ॥ 6 ॥

ತ್ರಿಕಾಲೇ ಯಃ ಪಠೇನ್ನಿತ್ಯಂ ಮೋಕ್ಷಸಿದ್ಧಿಮವಾಪ್ನುಯಾತ್ ।
ದತ್ತಾತ್ರೇಯ ಸದಾ ರಕ್ಷೇತ್ ಯದಾ ಸತ್ಯಂ ನ ಸಂಶಯಃ ॥ 7 ॥

ವಿದ್ಯಾರ್ಥೀ ಲಭತೇ ವಿದ್ಯಾಂ ರೋಗೀ ರೋಗಾತ್ ಪ್ರಮುಚ್ಯತೇ ।
ಅಪುತ್ರೋ ಲಭತೇ ಪುತ್ರಂ ದರಿದ್ರೋ ಲಭತೇ ಧನಮ್ ॥ 8 ॥

ಅಭಾರ್ಯೋ ಲಭತೇ ಭಾರ್ಯಾಂ ಸುಖಾರ್ಥೀ ಲಭತೇ ಸುಖಮ್ ।
ಮುಚ್ಯತೇ ಸರ್ವಪಾಪೇಭ್ಯೋ ಸರ್ವತ್ರ ವಿಜಯೀ ಭವೇತ್ ॥ 9 ॥

ಇತಿ ಶ್ರೀ ದತ್ತಾತ್ರೇಯ ದ್ವಾದಶನಾಮ ಸ್ತೋತ್ರಮ್ ।