నృసింహకవచం వక్ష్యే ప్రహ్లాదేనోదితం పురా ।
సర్వరక్షాకరం పుణ్యం సర్వోపద్రవనాశనమ్ ॥ 1 ॥

సర్వసమ్పత్కరం చైవ స్వర్గమోక్షప్రదాయకమ్ ।
ధ్యాత్వా నృసింహం దేవేశం హేమసింహాసనస్థితమ్ ॥ 2 ॥

వివృతాస్యం త్రినయనం శరదిన్దుసమప్రభమ్ ।
లక్ష్మ్యాలిఙ్గితవామాఙ్గం విభూతిభిరుపాశ్రితమ్ ॥ 3 ॥

చతుర్భుజం కోమలాఙ్గం స్వర్ణకుణ్డలశోభితమ్ ।
సరోజశోభితోరస్కం రత్నకేయూరముద్రితమ్ ॥ 4 ॥ [రత్నకేయూరశోభితమ్]

తప్తకాఞ్చనసఙ్కాశం పీతనిర్మలవాసనమ్ ।
ఇన్ద్రాదిసురమౌళిస్థస్ఫురన్మాణిక్యదీప్తిభిః ॥ 5 ॥

విరాజితపదద్వన్ద్వం శఙ్ఖచక్రాదిహేతిభిః ।
గరుత్మతా సవినయం స్తూయమానం ముదాన్వితమ్ ॥ 6 ॥

స్వహృత్కమలసంవాసం కృత్వా తు కవచం పఠేత్ ।
నృసింహో మే శిరః పాతు లోకరక్షాత్మసమ్భవః ॥ 7 ॥

సర్వగోఽపి స్తమ్భవాసః ఫాలం మే రక్షతు ధ్వనిమ్ ।
నృసింహో మే దృశౌ పాతు సోమసూర్యాగ్నిలోచనః ॥ 8 ॥

స్మృతిం మే పాతు నృహరిర్మునివర్యస్తుతిప్రియః ।
నాసాం మే సింహనాసస్తు ముఖం లక్ష్మీముఖప్రియః ॥ 9 ॥

సర్వవిద్యాధిపః పాతు నృసింహో రసనాం మమ ।
వక్త్రం పాత్విన్దువదనః సదా ప్రహ్లాదవన్దితః ॥ 10 ॥

నృసింహః పాతు మే కణ్ఠం స్కన్ధౌ భూభరణాన్తకృత్ ।
దివ్యాస్త్రశోభితభుజో నృసింహః పాతు మే భుజౌ ॥ 11 ॥

కరౌ మే దేవవరదో నృసింహః పాతు సర్వతః ।
హృదయం యోగిసాధ్యశ్చ నివాసం పాతు మే హరిః ॥ 12 ॥

మధ్యం పాతు హిరణ్యాక్షవక్షఃకుక్షివిదారణః ।
నాభిం మే పాతు నృహరిః స్వనాభి బ్రహ్మసంస్తుతః ॥ 13 ॥

బ్రహ్మాణ్డకోటయః కట్యాం యస్యాసౌ పాతు మే కటిమ్ ।
గుహ్యం మే పాతు గుహ్యానాం మన్త్రాణాం గుహ్యరూపధృక్ ॥ 14 ॥

ఊరూ మనోభవః పాతు జానునీ నరరూపధృక్ ।
జఙ్ఘే పాతు ధరాభారహర్తా యోఽసౌ నృకేసరీ ॥ 15 ॥

సురరాజ్యప్రదః పాతు పాదౌ మే నృహరీశ్వరః ।
సహస్రశీర్షా పురుషః పాతు మే సర్వశస్తనుమ్ ॥ 16 ॥

మహోగ్రః పూర్వతః పాతు మహావీరాగ్రజోఽగ్నితః ।
మహావిష్ణుర్దక్షిణే తు మహాజ్వాలస్తు నైరృతౌ ॥ 17 ॥

పశ్చిమే పాతు సర్వేశో దిశి మే సర్వతోముఖః ।
నృసింహః పాతు వాయవ్యాం సౌమ్యాం భూషణవిగ్రహః ॥ 18 ॥

ఈశాన్యాం పాతు భద్రో మే సర్వమఙ్గళదాయకః ।
సంసారభయదః పాతు మృత్యోర్మృత్యుర్నృకేసరీ ॥ 19 ॥

ఇదం నృసింహకవచం ప్రహ్లాదముఖమణ్డితమ్ ।
భక్తిమాన్యః పఠేన్నిత్యం సర్వపాపైః ప్రముచ్యతే ॥ 20 ॥

పుత్రవాన్ ధనవాన్ లోకే దీర్ఘాయురుపజాయతే ।
యం యం కామయతే కామం తం తం ప్రాప్నోత్యసంశయమ్ ॥ 21 ॥

సర్వత్ర జయమాప్నోతి సర్వత్ర విజయీ భవేత్ ।
భూమ్యన్తరిక్షదివ్యానాం గ్రహాణాం వినివారణమ్ ॥ 22 ॥

వృశ్చికోరగసమ్భూతవిషాపహరణం పరమ్ ।
బ్రహ్మరాక్షసయక్షాణాం దూరోత్సారణకారణమ్ ॥ 23 ॥

భూర్జే వా తాళపత్రే వా కవచం లిఖితం శుభమ్ ।
కరమూలే ధృతం యేన సిధ్యేయుః కర్మసిద్ధయః ॥ 24 ॥

దేవాసురమనుష్యేషు స్వం స్వమేవ జయం లభేత్ ।
ఏకసన్ధ్యం త్రిసన్ధ్యం వా యః పఠేన్నియతో నరః ॥ 25 ॥

సర్వమఙ్గళమాఙ్గళ్యం భుక్తిం ముక్తిం చ విన్దతి ।
ద్వాత్రింశతిసహస్రాణి పఠేచ్ఛుద్ధాత్మనాం నృణామ్ ॥ 26 ॥

కవచస్యాస్య మన్త్రస్య మన్త్రసిద్ధిః ప్రజాయతే ।
అనేన మన్త్రరాజేన కృత్వా భస్మాభిమన్త్రణమ్ ॥ 27 ॥

తిలకం విన్యసేద్యస్తు తస్య గ్రహభయం హరేత్ ।
త్రివారం జపమానస్తు దత్తం వార్యభిమన్త్ర్య చ ॥ 28 ॥

ప్రాశయేద్యో నరో మన్త్రం నృసింహధ్యానమాచరేత్ ।
తస్య రోగాః ప్రణశ్యన్తి యే చ స్యుః కుక్షిసమ్భవాః ॥ 29 ॥

కిమత్ర బహునోక్తేన నృసింహసదృశో భవేత్ ।
మనసా చిన్తితం యత్తు స తచ్చాప్నోత్యసంశయమ్ ॥ 30 ॥

గర్జన్తం గర్జయన్తం నిజభుజపటలం స్ఫోటయన్తం హఠన్తం
రూప్యన్తం తాపయన్తం దివి భువి దితిజం క్షేపయన్తం క్షిపన్తమ్ ।
క్రన్దన్తం రోషయన్తం దిశి దిశి సతతం సంహరన్తం భరన్తం
వీక్షన్తం ఘూర్ణయన్తం శరనికరశతైర్దివ్యసింహం నమామి ॥

ఇతి శ్రీబ్రహ్మాణ్డపురాణే ప్రహ్లాదోక్తం శ్రీ నృసింహ కవచమ్ ।