విశుద్ధం పరం సచ్చిదానన్దరూపం
గుణాధారమాధారహీనం వరేణ్యమ్ ।
మహాన్తం విభాన్తం గుహాన్తం గుణాన్తం
సుఖాన్తం స్వయం ధామ రామం ప్రపద్యే ॥ 1 ॥
శివం నిత్యమేకం విభుం తారకాఖ్యం
సుఖాకారమాకారశూన్యం సుమాన్యమ్ ।
మహేశం కలేశం సురేశం పరేశం
నరేశం నిరీశం మహీశం ప్రపద్యే ॥ 2 ॥
యదావర్ణయత్కర్ణమూలేఽన్తకాలే
శివో రామ రామేతి రామేతి కాశ్యామ్ ।
తదేకం పరం తారకబ్రహ్మరూపం
భజేఽహం భజేఽహం భజేఽహం భజేఽహమ్ ॥ 3 ॥
మహారత్నపీఠే శుభే కల్పమూలే
సుఖాసీనమాదిత్యకోటిప్రకాశమ్ ।
సదా జానకీలక్ష్మణోపేతమేకం
సదా రామచన్ద్రం భజేఽహం భజేఽహమ్ ॥ 4 ॥
క్వణద్రత్నమఞ్జీరపాదారవిన్దం
లసన్మేఖలాచారుపీతామ్బరాఢ్యమ్ ।
మహారత్నహారోల్లసత్కౌస్తుభాఙ్గం
నదచ్చఞ్చరీమఞ్జరీలోలమాలమ్ ॥ 5 ॥
లసచ్చన్ద్రికాస్మేరశోణాధరాభం
సముద్యత్పతఙ్గేన్దుకోటిప్రకాశమ్ ।
నమద్బ్రహ్మరుద్రాదికోటీరరత్న
స్ఫురత్కాన్తినీరాజనారాధితాఙ్ఘ్రిమ్ ॥ 6 ॥
పురః ప్రాఞ్జలీనాఞ్జనేయాదిభక్తాన్
స్వచిన్ముద్రయా భద్రయా బోధయన్తమ్ ।
భజేఽహం భజేఽహం సదా రామచన్ద్రం
త్వదన్యం న మన్యే న మన్యే న మన్యే ॥ 7 ॥
యదా మత్సమీపం కృతాన్తః సమేత్య
ప్రచణ్డప్రకోపైర్భటైర్భీషయేన్మామ్ ।
తదావిష్కరోషి త్వదీయం స్వరూపం
సదాపత్ప్రణాశం సకోదణ్డబాణమ్ ॥ 8 ॥
నిజే మానసే మన్దిరే సన్నిధేహి
ప్రసీద ప్రసీద ప్రభో రామచన్ద్ర ।
ససౌమిత్రిణా కైకయీనన్దనేన
స్వశక్త్యానుభక్త్యా చ సంసేవ్యమాన ॥ 9 ॥
స్వభక్తాగ్రగణ్యైః కపీశైర్మహీశై-
-రనీకైరనేకైశ్చ రామ ప్రసీద ।
నమస్తే నమోఽస్త్వీశ రామ ప్రసీద
ప్రశాధి ప్రశాధి ప్రకాశం ప్రభో మామ్ ॥ 10 ॥
త్వమేవాసి దైవం పరం మే యదేకం
సుచైతన్యమేతత్త్వదన్యం న మన్యే ।
యతోఽభూదమేయం వియద్వాయుతేజో
జలోర్వ్యాదికార్యం చరం చాచరం చ ॥ 11 ॥
నమః సచ్చిదానన్దరూపాయ తస్మై
నమో దేవదేవాయ రామాయ తుభ్యమ్ ।
నమో జానకీజీవితేశాయ తుభ్యం
నమః పుణ్డరీకాయతాక్షాయ తుభ్యమ్ ॥ 12 ॥
నమో భక్తియుక్తానురక్తాయ తుభ్యం
నమః పుణ్యపుఞ్జైకలభ్యాయ తుభ్యమ్ ।
నమో వేదవేద్యాయ చాద్యాయ పుంసే
నమః సున్దరాయేన్దిరావల్లభాయ ॥ 13 ॥
నమో విశ్వకర్త్రే నమో విశ్వహర్త్రే
నమో విశ్వభోక్త్రే నమో విశ్వమాత్రే ।
నమో విశ్వనేత్రే నమో విశ్వజేత్రే
నమో విశ్వపిత్రే నమో విశ్వమాత్రే ॥ 14 ॥
నమస్తే నమస్తే సమస్తప్రపఞ్చ-
-ప్రభోగప్రయోగప్రమాణప్రవీణ ।
మదీయం మనస్త్వత్పదద్వన్ద్వసేవాం
విధాతుం ప్రవృత్తం సుచైతన్యసిద్ధ్యై ॥ 15 ॥
శిలాపి త్వదఙ్ఘ్రిక్షమాసఙ్గిరేణు
ప్రసాదాద్ధి చైతన్యమాధత్త రామ ।
నరస్త్వత్పదద్వన్ద్వసేవావిధానా-
-త్సుచైతన్యమేతీతి కిం చిత్రమత్ర ॥ 16 ॥
పవిత్రం చరిత్రం విచిత్రం త్వదీయం
నరా యే స్మరన్త్యన్వహం రామచన్ద్ర ।
భవన్తం భవాన్తం భరన్తం భజన్తో
లభన్తే కృతాన్తం న పశ్యన్త్యతోఽన్తే ॥ 17 ॥
స పుణ్యః స గణ్యః శరణ్యో మమాయం
నరో వేద యో దేవచూడామణిం త్వామ్ ।
సదాకారమేకం చిదానన్దరూపం
మనోవాగగమ్యం పరం ధామ రామ ॥ 18 ॥
ప్రచణ్డప్రతాపప్రభావాభిభూత-
-ప్రభూతారివీర ప్రభో రామచన్ద్ర ।
బలం తే కథం వర్ణ్యతేఽతీవ బాల్యే
యతోఽఖణ్డి చణ్డీశకోదణ్డదణ్డమ్ ॥ 19 ॥
దశగ్రీవముగ్రం సపుత్రం సమిత్రం
సరిద్దుర్గమధ్యస్థరక్షోగణేశమ్ ।
భవన్తం వినా రామ వీరో నరో వా
సురో వాఽమరో వా జయేత్కస్త్రిలోక్యామ్ ॥ 20 ॥
సదా రామ రామేతి రామామృతం తే
సదారామమానన్దనిష్యన్దకన్దమ్ ।
పిబన్తం నమన్తం సుదన్తం హసన్తం
హనూమన్తమన్తర్భజే తం నితాన్తమ్ ॥ 21 ॥
సదా రామ రామేతి రామామృతం తే
సదారామమానన్దనిష్యన్దకన్దమ్ ।
పిబన్నన్వహం నన్వహం నైవ మృత్యో-
-ర్బిభేమి ప్రసాదాదసాదాత్తవైవ ॥ 22 ॥
అసీతాసమేతైరకోదణ్డభూషై-
-రసౌమిత్రివన్ద్యైరచణ్డప్రతాపైః ।
అలఙ్కేశకాలైరసుగ్రీవమిత్రై-
-రరామాభిధేయైరలం దైవతైర్నః ॥ 23 ॥
అవీరాసనస్థైరచిన్ముద్రికాఢ్యై-
-రభక్తాఞ్జనేయాదితత్త్వప్రకాశైః ।
అమన్దారమూలైరమన్దారమాలై-
-రరామాభిధేయైరలం దైవతైర్నః ॥ 24 ॥
అసిన్ధుప్రకోపైరవన్ద్యప్రతాపై-
-రబన్ధుప్రయాణైరమన్దస్మితాఢ్యైః ।
అదణ్డప్రవాసైరఖణ్డప్రబోధై-
-రరామాభిధేయైరలం దైవతైర్నః ॥ 25 ॥
హరే రామ సీతాపతే రావణారే
ఖరారే మురారేఽసురారే పరేతి ।
లపన్తం నయన్తం సదాకాలమేవం
సమాలోకయాలోకయాశేషబన్ధో ॥ 26 ॥
నమస్తే సుమిత్రాసుపుత్రాభివన్ద్య
నమస్తే సదా కైకయీనన్దనేడ్య ।
నమస్తే సదా వానరాధీశవన్ద్య
నమస్తే నమస్తే సదా రామచన్ద్ర ॥ 27 ॥
ప్రసీద ప్రసీద ప్రచణ్డప్రతాప
ప్రసీద ప్రసీద ప్రచణ్డారికాల ।
ప్రసీద ప్రసీద ప్రపన్నానుకమ్పిన్
ప్రసీద ప్రసీద ప్రభో రామచన్ద్ర ॥ 28 ॥
భుజఙ్గప్రయాతం పరం వేదసారం
ముదా రామచన్ద్రస్య భక్త్యా చ నిత్యమ్ ।
పఠన్సన్తతం చిన్తయన్స్వాన్తరఙ్గే
స ఏవ స్వయం రామచన్ద్రః స ధన్యః ॥ 29 ॥
ఇతి శ్రీమచ్ఛఙ్కరాచార్య కృతం శ్రీ రామ భుజఙ్గప్రయాత స్తోత్రమ్ ।
