న్యాసః
అఙ్గన్యాసః
ఓం ఓం పాదయోః నమః ।
ఓం నం జానునోః నమః ।
ఓం మోం ఊర్వోః నమః ।
ఓం నాం ఉదరే నమః ।
ఓం రాం హృది నమః ।
ఓం యం ఉరసి నమః ।
ఓం ణాం ముఖే నమః ।
ఓం యం శిరసి నమః ।
కరన్యాసః
ఓం ఓం దక్షిణతర్జన్యాం నమః ।
ఓం నం దక్షిణమధ్యమాయాం నమః ।
ఓం మోం దక్షిణానామికాయాం నమః ।
ఓం భం దక్షిణకనిష్ఠికాయాం నమః ।
ఓం గం వామకనిష్ఠికాయాం నమః ।
ఓం వం వామానికాయాం నమః ।
ఓం తేం వామమధ్యమాయాం నమః ।
ఓం వాం వామతర్జన్యాం నమః ।
ఓం సుం దక్షిణాఙ్గుష్ఠోర్ధ్వపర్వణి నమః ।
ఓం దేం దక్షిణాఙ్గుష్ఠాధః పర్వణి నమః ।
ఓం వాం వామాఙ్గుష్ఠోర్ధ్వపర్వణి నమః ।
ఓం యం వామాఙ్గుష్ఠాధః పర్వణి నమః ।
విష్ణుషడక్షరన్యాసః
ఓం ఓం హృదయే నమః ।
ఓం విం మూర్ధ్నై నమః ।
ఓం షం భ్రుర్వోర్మధ్యే నమః ।
ఓం ణం శిఖాయాం నమః ।
ఓం వేం నేత్రయోః నమః ।
ఓం నం సర్వసన్ధిషు నమః ।
ఓం మః ప్రాచ్యాం అస్త్రాయ ఫట్ ।
ఓం మః ఆగ్నేయ్యాం అస్త్రాయ ఫట్ ।
ఓం మః దక్షిణస్యాం అస్త్రాయ ఫట్ ।
ఓం మః నైఋత్యే అస్త్రాయ ఫట్ ।
ఓం మః ప్రతీచ్యాం అస్త్రాయ ఫట్ ।
ఓం మః వాయవ్యే అస్త్రాయ ఫట్ ।
ఓం మః ఉదీచ్యాం అస్త్రాయ ఫట్ ।
ఓం మః ఐశాన్యాం అస్త్రాయ ఫట్ ।
ఓం మః ఊర్ధ్వాయాం అస్త్రాయ ఫట్ ।
ఓం మః అధరాయాం అస్త్రాయ ఫట్ ।
శ్రీ హరిః
అథ శ్రీనారాయణకవచ
రాజోవాచ
యయా గుప్తః సహస్రాక్షః సవాహాన్ రిపుసైనికాన్ ।
క్రీడన్నివ వినిర్జిత్య త్రిలోక్యా బుభుజే శ్రియమ్ ॥ 1 ॥
భగవంస్తన్మమాఖ్యాహి వర్మ నారాయణాత్మకమ్ ।
యథాఽఽతతాయినః శత్రూన్ యేన గుప్తోఽజయన్మృధే ॥ 2 ॥
శ్రీ శుక ఉవాచ
వృతః పురోహితస్త్వాష్ట్రో మహేన్ద్రాయానుపృచ్ఛతే ।
నారాయణాఖ్యం వర్మాహ తదిహైకమనాః శృణు ॥ 3 ॥
శ్రీవిశ్వరూప ఉవాచ
ధౌతాఙ్ఘ్రిపాణిరాచమ్య సపవిత్ర ఉదఙ్ముఖః ।
కృతస్వాఙ్గకరన్యాసో మన్త్రాభ్యాం వాగ్యతః శుచిః ॥ 4 ॥
నారాయణమయం వర్మ సన్నహ్యేద్భయ ఆగతే ।
దైవభూతాత్మకర్మభ్యో నారాయణమయః పుమాన్ ॥ 5 ॥
పాదయోర్జానునోరూర్వోరుదరే హృద్యథోరసి ।
ముఖే శిరస్యానుపూర్వ్యాదోఙ్కారాదీని విన్యసేత్ ॥ 6 ॥
ఓం నమో నారాయణాయేతి విపర్యయమథాపి వా ।
కరన్యాసం తతః కుర్యాద్ద్వాదశాక్షరవిద్యయా ॥ 7 ॥
ప్రణవాదియకారాన్తమఙ్గుల్యఙ్గుష్ఠపర్వసు ।
న్యసేద్ధృదయ ఓఙ్కారం వికారమను మూర్ధని ॥ 8 ॥
షకారం తు భ్రువోర్మధ్యే ణకారం శిఖయా న్యసేత్ ।
వేకారం నేత్రయోర్యుఞ్జ్యాన్నకారం సర్వసన్ధిషు ॥ 9 ॥
మకారమస్త్రముద్దిశ్య మన్త్రమూర్తిర్భవేద్బుధః ।
సవిసర్గం ఫడన్తం తత్సర్వదిక్షు వినిర్దిశేత్ ॥ 10 ॥
ఓం విష్ణవే నమః ॥
ఇత్యాత్మానం పరం ధ్యాయేద్ధ్యేయం షట్ఛక్తిభిర్యుతమ్ ।
విద్యాతేజస్తపోమూర్తిమిమం మన్త్రముదాహరేత్ ॥ 11 ॥
ఓం హరిర్విదధ్యాన్మమ సర్వరక్షాం
న్యస్తాఙ్ఘ్రిపద్మః పతగేన్ద్ర పృష్ఠే ।
దరారిచర్మాసిగదేషుచాప-
-పాశాన్దధానోఽష్టగుణోఽష్టబాహుః ॥ 12 ॥
జలేషు మాం రక్షతు మత్స్యమూర్తి-
-ర్యాదోగణేభ్యో వరుణస్య పాశాత్ ।
స్థలేషు మాయావటువామనోఽవ్యా-
-త్త్రివిక్రమః ఖేఽవతు విశ్వరూపః ॥ 13 ॥
దుర్గేష్వటవ్యాజిముఖాదిషు ప్రభుః
పాయాన్నృసింహోఽసురయూథపారిః ।
విముఞ్చతో యస్య మహాట్టహాసం
దిశో వినేదుర్న్యపతంశ్చ గర్భాః ॥ 14 ॥
రక్షత్వసౌ మాధ్వని యజ్ఞకల్పః
స్వదంష్ట్రయోన్నీతధరో వరాహః ।
రామోఽద్రికూటేష్వథ విప్రవాసే
సలక్ష్మణోఽవ్యాద్భరతాగ్రజోఽస్మాన్ ॥ 15 ॥
మాముగ్రధర్మాదఖిలాత్ప్రమాదా-
-న్నారాయణః పాతు నరశ్చ హాసాత్ ।
దత్తస్త్వయోగాదథ యోగనాథః
పాయాద్గుణేశః కపిలః కర్మబన్ధాత్ ॥ 16 ॥
సనత్కుమారోఽవతు కామదేవా-
-ద్ధయాననో మాం పథి దేవహేలనాత్ ।
దేవర్షివర్యః పురుషార్చనాన్తరా-
-త్కూర్మో హరిర్మాం నిరయాదశేషాత్ ॥ 17 ॥
ధన్వన్తరిర్భగవాన్పాత్వపథ్యా-
-ద్ద్వన్ద్వాద్భయాదృషభో నిర్జితాత్మా ।
యజ్ఞశ్చ లోకాదవతాజ్జనాన్తా-
-ద్బలో గణాత్క్రోధవశాదహీన్ద్రః ॥ 18 ॥
ద్వైపాయనో భగవానప్రబోధా-
-ద్బుద్ధస్తు పాషణ్డగణాత్ప్రమాదాత్ ।
కల్కిః కలేః కాలమలాత్ప్రపాతు
ధర్మావనాయోరుకృతావతారః ॥ 19 ॥
మాం కేశవో గదయా ప్రాతరవ్యా-
-ద్గోవిన్ద ఆసఙ్గవమాత్తవేణుః ।
నారాయణః ప్రాహ్ణ ఉదాత్తశక్తి-
-ర్మధ్యన్దినే విష్ణురరీన్ద్రపాణిః ॥ 20 ॥
దేవోఽపరాహ్ణే మధుహోగ్రధన్వా
సాయం త్రిధామావతు మాధవో మామ్ ।
దోషే హృషీకేశ ఉతార్ధరాత్రే
నిశీథ ఏకోఽవతు పద్మనాభః ॥ 21 ॥
శ్రీవత్సధామాఽపరరాత్ర ఈశః
ప్రత్యుష ఈశోఽసిధరో జనార్దనః ।
దామోదరోఽవ్యాదనుసన్ధ్యం ప్రభాతే
విశ్వేశ్వరో భగవాన్కాలమూర్తిః ॥ 22 ॥
చక్రం యుగాన్తానలతిగ్మనేమి
భ్రమత్సమన్తాద్భగవత్ప్రయుక్తమ్ ।
దన్దగ్ధి దన్దగ్ధ్యరిసైన్యమాశు
కక్షం యథా వాతసఖో హుతాశః ॥ 23 ॥
గదేఽశనిస్పర్శనవిస్ఫులిఙ్గే
నిష్పిణ్ఢి నిష్పిణ్ఢ్యజితప్రియాసి ।
కూష్మాణ్డవైనాయకయక్షరక్షో
భూతగ్రహాంశ్చూర్ణయ చూర్ణయారీన్ ॥ 24 ॥
త్వం యాతుధానప్రమథప్రేతమాతృ-
-పిశాచవిప్రగ్రహఘోరదృష్టీన్ ।
దరేన్ద్ర విద్రావయ కృష్ణపూరితో
భీమస్వనోఽరేర్హృదయాని కమ్పయన్ ॥ 25 ॥
త్వం తిగ్మధారాసివరారిసైన్య-
-మీశప్రయుక్తో మమ ఛిన్ధి ఛిన్ధి ।
చక్షూంషి చర్మన్ శతచన్ద్ర ఛాదయ
ద్విషామఘోనాం హర పాపచక్షుషామ్ ॥ 26 ॥
యన్నో భయం గ్రహేభ్యోఽభూత్కేతుభ్యో నృభ్య ఏవ చ ।
సరీసృపేభ్యో దంష్ట్రిభ్యో భూతేభ్యోఽఘేభ్య ఏవ చ ॥ 27 ॥
సర్వాణ్యేతాని భగవన్నామరూపాస్త్రకీర్తనాత్ ।
ప్రయాన్తు సఙ్క్షయం సద్యో యే నః శ్రేయఃప్రతీపకాః ॥ 28 ॥
గరుడో భగవాన్ స్తోత్రస్తోమశ్ఛన్దోమయః ప్రభుః ।
రక్షత్వశేషకృచ్ఛ్రేభ్యో విష్వక్సేనః స్వనామభిః ॥ 29 ॥
సర్వాపద్భ్యో హరేర్నామరూపయానాయుధాని నః ।
బుద్ధీన్ద్రియమనఃప్రాణాన్పాన్తు పార్షదభూషణాః ॥ 30 ॥
యథా హి భగవానేవ వస్తుతః సదసచ్చ యత్ ।
సత్యేనానేన నః సర్వే యాన్తు నాశముపద్రవాః ॥ 31 ॥
యథైకాత్మ్యానుభావానాం వికల్పరహితః స్వయమ్ ।
భూషణాయుధలిఙ్గాఖ్యా ధత్తే శక్తీః స్వమాయయా ॥ 32 ॥
తేనైవ సత్యమానేన సర్వజ్ఞో భగవాన్ హరిః ।
పాతు సర్వైః స్వరూపైర్నః సదా సర్వత్ర సర్వగః ॥ 33 ॥
విదిక్షు దిక్షూర్ధ్వమధః సమన్తా-
-దన్తర్బహిర్భగవాన్నారసింహః ।
ప్రహాపయఁల్లోకభయం స్వనేన
స్వతేజసా గ్రస్తసమస్తతేజాః ॥ 34 ॥
మఘవన్నిదమాఖ్యాతం వర్మ నారాయణాత్మకమ్ ।
విజేష్యస్యఞ్జసా యేన దంశితోఽసురయూథపాన్ ॥ 35 ॥
ఏతద్ధారయమాణస్తు యం యం పశ్యతి చక్షుషా ।
పదా వా సంస్పృశేత్సద్యః సాధ్వసాత్స విముచ్యతే ॥ 36 ॥
న కుతశ్చిద్భయం తస్య విద్యాం ధారయతో భవేత్ ।
రాజదస్యుగ్రహాదిభ్యో వ్యాధ్యాదిభ్యశ్చ కర్హిచిత్ ॥ 37 ॥
ఇమాం విద్యాం పురా కశ్చిత్కౌశికో ధారయన్ ద్విజః ।
యోగధారణయా స్వాఙ్గం జహౌ స మరుధన్వని ॥ 38 ॥
తస్యోపరి విమానేన గన్ధర్వపతిరేకదా ।
యయౌ చిత్రరథః స్త్రీభిర్వృతో యత్ర ద్విజక్షయః ॥ 39 ॥
గగనాన్న్యపతత్సద్యః సవిమానో హ్యవాక్ఛిరాః ।
స వాలఖిల్యవచనాదస్థీన్యాదాయ విస్మితః ।
ప్రాప్య ప్రాచ్యాం సరస్వత్యాం స్నాత్వా ధామ స్వమన్వగాత్ ॥ 40 ॥
శ్రీ శుక ఉవాచ
య ఇదం శృణుయాత్కాలే యో ధారయతి చాదృతః ।
తం నమస్యన్తి భూతాని ముచ్యతే సర్వతో భయాత్ ॥ 41 ॥
ఏతాం విద్యామధిగతో విశ్వరూపాచ్ఛతక్రతుః ।
త్రైలోక్యలక్ష్మీం బుభుజే వినిర్జిత్య మృధేఽసురాన్ ॥ 42 ॥
ఇతి శ్రీమద్భాగవతే మహాపురాణే షష్ఠస్కన్ధే నారాయణవర్మోపదేశో నామాష్టమోఽధ్యాయః ।
