అథ శివకచమ్
అస్య శ్రీ శివకవచ స్తోత్ర మహామన్త్రస్య ।
ఋషభ-యోగీశ్వర ఋషిః ।
అనుష్టుప్ ఛన్దః ।
శ్రీ-సామ్బసదాశివో దేవతా ।
ఓం బీజమ్ ।
నమః శక్తిః ।
శివాయేతి కీలకమ్ ।
సామ్బసదాశివప్రీత్యర్థే జపే వినియోగః ॥

కరన్యాసః
ఓం సదాశివాయ అఙ్గుష్ఠాభ్యాం నమః ।
నం గఙ్గాధరాయ తర్జనీభ్యాం నమః ।
మం మృత్యుఞ్జయాయ మధ్యమాభ్యాం నమః ।
శిం శూలపాణయే అనామికాభ్యాం నమః ।
వాం పినాకపాణయే కనిష్ఠికాభ్యాం నమః ।
యం ఉమాపతయే కరతలకరపృష్ఠాభ్యాం నమః ।

హృదయాది అఙ్గన్యాసః
ఓం సదాశివాయ హృదయాయ నమః ।
నం గఙ్గాధరాయ శిరసే స్వాహా ।
మం మృత్యుఞ్జయాయ శిఖాయై వషట్ ।
శిం శూలపాణయే కవచాయ హుమ్ ।
వాం పినాకపాణయే నేత్రత్రయాయ వౌషట్ ।
యం ఉమాపతయే అస్త్రాయ ఫట్ ।
భూర్భువస్సువరోమితి దిగ్బన్ధః ॥

ధ్యానమ్
వజ్రదంష్ట్రం త్రినయనం కాలకణ్ఠ మరిన్దమమ్ ।
సహస్రకర-మత్యుగ్రం వన్దే శమ్భుం ఉమాపతిమ్ ॥
రుద్రాక్ష-కఙ్కణ-లసత్కర-దణ్డయుగ్మః పాలాన్తరా-లసిత-భస్మధృత-త్రిపుణ్డ్రః ।
పఞ్చాక్షరం పరిపఠన్ వరమన్త్రరాజం ధ్యాయన్ సదా పశుపతిం శరణం వ్రజేథాః ॥

అతః పరం సర్వపురాణ-గుహ్యం నిఃశేష-పాపౌఘహరం పవిత్రమ్ ।
జయప్రదం సర్వ-విపత్ప్రమోచనం వక్ష్యామి శైవం కవచం హితాయ తే ॥

పఞ్చపూజా
లం పృథివ్యాత్మనే గన్ధం సమర్పయామి ।
హం ఆకాశాత్మనే పుష్పైః పూజయామి ।
యం వాయ్వాత్మనే ధూపం ఆఘ్రాపయామి ।
రం అగ్న్యాత్మనే దీపం దర్శయామి ।
వం అమృతాత్మనే అమృతం మహా-నైవేద్యం నివేదయామి ।
సం సర్వాత్మనే సర్వోపచార-పూజాం సమర్పయామి ॥

మన్త్రః

ఋషభ ఉవాచ ।
నమస్కృత్య మహాదేవం విశ్వ-వ్యాపిన-మీశ్వరమ్ ।
వక్ష్యే శివమయం వర్మ సర్వరక్షాకరం నృణామ్ ॥ 1 ॥

శుచౌ దేశే సమాసీనో యథావత్కల్పితాసనః ।
జితేన్ద్రియో జితప్రాణ-శ్చిన్తయేచ్ఛివమవ్యయమ్ ॥ 2 ॥

హృత్పుణ్డరీకాన్తరసన్నివిష్టం
స్వతేజసా వ్యాప్త-నభోఽవకాశమ్ ।
అతీన్ద్రియం సూక్ష్మమనన్తమాద్యం
ధ్యాయేత్పరానన్దమయం మహేశమ్ ॥ 3 ॥

ధ్యానావధూతాఖిలకర్మబన్ధ-
-శ్చిరం చిదానన్దనిమగ్నచేతాః ।
షడక్షరన్యాససమాహితాత్మా
శైవేన కుర్యాత్కవచేన రక్షామ్ ॥ 4 ॥

మాం పాతు దేవోఽఖిలదేవతాత్మా
సంసారకూపే పతితం గభీరే ।
తన్నామ దివ్యం వరమన్త్రమూలం
ధునోతు మే సర్వమఘం హృదిస్థమ్ ॥ 5 ॥

సర్వత్ర మాం రక్షతు విశ్వమూర్తి-
-ర్జ్యోతి-ర్మయానన్దఘనశ్చిదాత్మా ।
అణోరణీయానురుశక్తిరేకః
స ఈశ్వరః పాతు భయాదశేషాత్ ॥ 6 ॥

యో భూస్వరూపేణ బిభర్తి విశ్వం
పాయాత్స భూమేర్గిరిశోఽష్టమూర్తిః ।
యోఽపాం స్వరూపేణ నృణాం కరోతి
సఞ్జీవనం సోఽవతు మాం జలేభ్యః ॥ 7 ॥

కల్పావసానే భువనాని దగ్ధ్వా
సర్వాణి యో నృత్యతి భూరిలీలః ।
స కాలరుద్రోఽవతు మాం దవాగ్నే-
-ర్వాత్యాదిభీతే-రఖిలాచ్చ తాపాత్ ॥ 8 ॥

ప్రదీప్త-విద్యుత్కనకావభాసో
విద్యావరాభీతి-కుఠారపాణిః ।
చతుర్ముఖస్తత్పురుషస్త్రినేత్రః
ప్రాచ్యాం స్థితో రక్షతు మామజస్రమ్ ॥ 9 ॥

కుఠార ఖేటాఙ్కుశపాశశూల
కపాలపాశాక్ష గుణాన్దధానః ।
చతుర్ముఖో నీల-రుచిస్త్రినేత్రః
పాయాదఘోరో దిశి దక్షిణస్యామ్ ॥ 10 ॥

కున్దేన్దు-శఙ్ఖ-స్ఫటికావభాసో
వేదాక్షమాలా-వరదాభయాఙ్కః ।
త్ర్యక్షశ్చతుర్వక్త్ర ఉరుప్రభావః
సద్యోఽధిజాతోఽవతు మాం ప్రతీచ్యామ్ ॥ 11 ॥

వరాక్ష-మాలాభయటఙ్క-హస్తః
సరోజ-కిఞ్జల్కసమానవర్ణః ।
త్రిలోచన-శ్చారుచతుర్ముఖో మాం
పాయాదుదీచ్యాం దిశి వామదేవః ॥ 12 ॥

వేదాభయేష్టాఙ్కుశటఙ్కపాశ-
-కపాలఢక్కాక్షర-శూలపాణిః ।
సితద్యుతిః పఞ్చముఖోఽవతాన్మా-
-మీశాన ఊర్ధ్వం పరమప్రకాశః ॥ 13 ॥

మూర్ధానమవ్యాన్మమ చన్ద్రమౌళిః
ఫాలం మమావ్యాదథ ఫాలనేత్రః ।
నేత్రే మమావ్యాద్భగనేత్రహారీ
నాసాం సదా రక్షతు విశ్వనాథః ॥ 14 ॥

పాయాచ్ఛ్రుతీ మే శ్రుతిగీతకీర్తిః
కపోలమవ్యాత్సతతం కపాలీ ।
వక్త్రం సదా రక్షతు పఞ్చవక్త్రో
జిహ్వాం సదా రక్షతు వేదజిహ్వః ॥ 15 ॥

కణ్ఠం గిరీశోఽవతు నీలకణ్ఠః
పాణిద్వయం పాతు పినాకపాణిః ।
దోర్మూలమవ్యాన్మమ ధర్మబాహుః
వక్షఃస్థలం దక్షమఖాన్తకోఽవ్యాత్ ॥ 16 ॥

మమోదరం పాతు గిరీన్ద్రధన్వా
మధ్యం మమావ్యాన్మదనాన్తకారీ ।
హేరమ్బతాతో మమ పాతు నాభిం
పాయాత్కటిం ధూర్జటిరీశ్వరో మే ॥ 17 ॥
[స్మరారి-రవ్యాన్మమ గుహ్యదేశమ్
పృష్టం సదా రక్షతు పార్వతీశః ।]

ఊరుద్వయం పాతు కుబేరమిత్రో
జానుద్వయం మే జగదీశ్వరోఽవ్యాత్ ।
జఙ్ఘాయుగం పుఙ్గవకేతురవ్యా-
-త్పాదౌ మమావ్యాత్సురవన్ద్యపాదః ॥ 18 ॥

మహేశ్వరః పాతు దినాదియామే
మాం మధ్యయామేఽవతు వామదేవః ।
త్రిలోచనః పాతు తృతీయయామే
వృషధ్వజః పాతు దినాన్త్యయామే ॥ 19 ॥

పాయాన్నిశాదౌ శశిశేఖరో మాం
గఙ్గాధరో రక్షతు మాం నిశీథే ।
గౌరీపతిః పాతు నిశావసానే
మృత్యుఞ్జయో రక్షతు సర్వకాలమ్ ॥ 20 ॥

అన్తఃస్థితం రక్షతు శఙ్కరో మాం
స్థాణుః సదా పాతు బహిఃస్థితం మామ్ ।
తదన్తరే పాతు పతిః పశూనాం
సదాశివో రక్షతు మాం సమన్తాత్ ॥ 21 ॥

తిష్ఠన్త-మవ్యాద్భువనైకనాథః
పాయాద్వ్రజన్తం ప్రమథాధినాథః ।
వేదాన్తవేద్యోఽవతు మాం నిషణ్ణం
మామవ్యయః పాతు శివః శయానమ్ ॥ 22 ॥

మార్గేషు మాం రక్షతు నీలకణ్ఠః
శైలాది-దుర్గేషు పురత్రయారిః ।
అరణ్యవాసాది-మహాప్రవాసే
పాయాన్మృగవ్యాధ ఉదారశక్తిః ॥ 23 ॥

కల్పాన్త-కాలోగ్ర-పటుప్రకోపః [కటోప]
స్ఫుటాట్ట-హాసోచ్చలితాణ్డ-కోశః ।
ఘోరారి-సేనార్ణవదుర్నివార-
-మహాభయాద్రక్షతు వీరభద్రః ॥ 24 ॥

పత్త్యశ్వమాతఙ్గ-రథావరూధినీ- [ఘటావరూథ]
-సహస్ర-లక్షాయుత-కోటిభీషణమ్ ।
అక్షౌహిణీనాం శతమాతతాయినాం
ఛిన్ద్యాన్మృడో ఘోరకుఠారధారయా ॥ 25 ॥

నిహన్తు దస్యూన్ప్రళయానలార్చి-
-ర్జ్వలత్త్రిశూలం త్రిపురాన్తకస్య ।
శార్దూల-సింహర్క్షవృకాది-హింస్రాన్
సన్త్రాసయత్వీశ-ధనుః పినాకః ॥ 26 ॥

దుస్స్వప్న దుశ్శకున దుర్గతి దౌర్మనస్య
దుర్భిక్ష దుర్వ్యసన దుస్సహ దుర్యశాంసి ।
ఉత్పాత-తాప-విషభీతి-మసద్గ్రహార్తిం
వ్యాధీంశ్చ నాశయతు మే జగతామధీశః ॥ 27 ॥

ఓం నమో భగవతే సదాశివాయ
సకల-తత్త్వాత్మకాయ
సర్వ-మన్త్ర-స్వరూపాయ
సర్వ-యన్త్రాధిష్ఠితాయ
సర్వ-తన్త్ర-స్వరూపాయ
సర్వ-తత్త్వ-విదూరాయ
బ్రహ్మ-రుద్రావతారిణే-నీలకణ్ఠాయ
పార్వతీ-మనోహరప్రియాయ
సోమ-సూర్యాగ్ని-లోచనాయ
భస్మోద్ధూళిత-విగ్రహాయ
మహామణి-ముకుట-ధారణాయ
మాణిక్య-భూషణాయ
సృష్టిస్థితి-ప్రళయకాల-రౌద్రావతారాయ
దక్షాధ్వర-ధ్వంసకాయ
మహాకాల-భేదనాయ
మూలధారైక-నిలయాయ
తత్వాతీతాయ
గఙ్గాధరాయ
సర్వ-దేవాది-దేవాయ
షడాశ్రయాయ
వేదాన్త-సారాయ
త్రివర్గ-సాధనాయ
అనన్తకోటి-బ్రహ్మాణ్డ-నాయకాయ
అనన్త-వాసుకి-తక్షక-కర్కోటక-శఙ్ఖ-కులిక-పద్మ-మహాపద్మేతి-అష్ట-మహా-నాగ-కులభూషణాయ
ప్రణవస్వరూపాయ
చిదాకాశాయ
ఆకాశ-దిక్-స్వరూపాయ
గ్రహ-నక్షత్ర-మాలినే
సకలాయ
కళఙ్క-రహితాయ
సకల-లోకైక-కర్త్రే
సకల-లోకైక-భర్త్రే
సకల-లోకైక-సంహర్త్రే
సకల-లోకైక-గురవే
సకల-లోకైక-సాక్షిణే
సకల-నిగమగుహ్యాయ
సకల-వేదాన్త-పారగాయ
సకల-లోకైక-వరప్రదాయ
సకల-లోకైక-శఙ్కరాయ
సకల-దురితార్తి-భఞ్జనాయ
సకల-జగదభయఙ్కరాయ
శశాఙ్క-శేఖరాయ
శాశ్వత-నిజావాసాయ
నిరాకారాయ
నిరాభాసాయ
నిరామయాయ
నిర్మలాయ
నిర్లోభాయ
నిర్మదాయ
నిశ్చిన్తాయ
నిరహఙ్కారాయ
నిరఙ్కుశాయ
నిష్కళఙ్కాయ
నిర్గుణాయ
నిష్కామాయ
నిరూపప్లవాయ
నిరవధ్యాయ
నిరన్తరాయ
నిరుపద్రవాయ
నిరవద్యాయ
నిరన్తరాయ
నిష్కారణాయ
నిరాతఙ్కాయ
నిష్ప్రపఞ్చాయ
నిస్సఙ్గాయ
నిర్ద్వన్ద్వాయ
నిరాధారాయ
నీరాగాయ
నిశ్క్రోధయ
నిర్లోభయ
నిష్పాపాయ
నిర్వికల్పాయ
నిర్భేదాయ
నిష్క్రియాయ
నిస్తులాయ
నిశ్శంశయాయ
నిరఞ్జనాయ
నిరుపమ-విభవాయ
నిత్య-శుద్ధ-బుద్ధ-ముక్త-పరిపూర్ణ-సచ్చిదానన్దాద్వయాయ
పరమ-శాన్త-స్వరూపాయ
పరమ-శాన్త-ప్రకాశాయ
తేజోరూపాయ
తేజోమయాయ
తేజోఽధిపతయే
జయ జయ రుద్ర మహారుద్ర
మహా-రౌద్ర
భద్రావతార
మహా-భైరవ
కాల-భైరవ
కల్పాన్త-భైరవ
కపాల-మాలాధర
ఖట్వాఙ్గ-చర్మ-ఖడ్గ-ధర
పాశాఙ్కుశ-డమరూశూల-చాప-బాణ-గదా-శక్తి-భిన్ది-
పాల-తోమర-ముసల-భుశుణ్డీ-ముద్గర-పాశ-పరిఘ-శతఘ్నీ-చక్రాద్యాయుధ-భీషణాకార
సహస్ర-ముఖ
దంష్ట్రాకరాల-వదన
వికటాట్టహాస
విస్ఫాతిత-బ్రహ్మాణ్డ-మణ్డల-నాగేన్ద్రకుణ్డల
నాగేన్ద్రహార
నాగేన్ద్రవలయ
నాగేన్ద్రచర్మధర
నాగేన్ద్రనికేతన
మృత్యుఞ్జయ
త్ర్యమ్బక
త్రిపురాన్తక
విశ్వరూప
విరూపాక్ష
విశ్వేశ్వర
వృషభవాహన
విషవిభూషణ
విశ్వతోముఖ
సర్వతోముఖ
మాం రక్ష రక్ష
జ్వల జ్వల
ప్రజ్వల ప్రజ్వల
మహామృత్యుభయం శమయ శమయ
అపమృత్యుభయం నాశయ నాశయ
రోగభయం ఉత్సాదయ ఉత్సాదయ
విషసర్పభయం శమయ శమయ
చోరాన్ మారయ మారయ
మమ శత్రూన్ ఉచ్చాటయ ఉచ్చాటయ
త్రిశూలేన విదారయ విదారయ
కుఠారేణ భిన్ధి భిన్ధి
ఖడ్గేన ఛిన్ద్ది ఛిన్ద్ది
ఖట్వాఙ్గేన విపోధయ విపోధయ
మమ పాపం శోధయ శోధయ
ముసలేన నిష్పేషయ నిష్పేషయ
బాణైః సన్తాడయ సన్తాడయ
యక్ష రక్షాంసి భీషయ భీషయ
అశేష భూతాన్ విద్రావయ విద్రావయ
కూష్మాణ్డ-భూత-బేతాళ-మారీగణ-బ్రహ్మరాక్షస-గణాన్ సన్త్రాసయ సన్త్రాసయ
మమ అభయం కురు కురు
[మమ పాపం శోధయ శోధయ]
నరక-మహాభయాన్ మాం ఉద్ధర ఉద్ధర
విత్రస్తం మాం ఆశ్వాసయ ఆశ్వాసయ
అమృత-కటాక్ష-వీక్షణేన మాం ఆలోకయ ఆలోకయ
సఞ్జీవయ సఞ్జీవయ
క్షుత్తృష్ణార్తం మాం ఆప్యాయయ ఆప్యాయయ
దుఃఖాతురం మాం ఆనన్దయ ఆనన్దయ
శివకవచేన మాం ఆచ్ఛాదయ ఆచ్ఛాదయ
హర హర
హర హర
మృత్యుఞ్జయ
త్ర్యమ్బక
సదాశివ
పరమశివ
నమస్తే నమస్తే నమస్తే నమః ॥

పూర్వవత్ - హృదయాది న్యాసః ।
పఞ్చపూజా ॥
భూర్భువస్సువరోమితి దిగ్విమోకః ॥

ఫలశ్రుతిః

ఋషభ ఉవాచ ।
ఇత్యేతత్కవచం శైవం వరదం వ్యాహృతం మయా ।
సర్వ-బాధా-ప్రశమనం రహస్యం సర్వదేహినామ్ ॥ 1 ॥

యః సదా ధారయేన్మర్త్యః శైవం కవచముత్తమమ్ ।
న తస్య జాయతే క్వాపి భయం శమ్భోరనుగ్రహాత్ ॥ 2 ॥

క్షీణాయు-ర్మృత్యుమాపన్నో మహారోగహతోఽపి వా ।
సద్యః సుఖమవాప్నోతి దీర్ఘమాయుశ్చ విన్దతి ॥ 3 ॥

సర్వదారిద్ర్యశమనం సౌమాఙ్గల్య-వివర్ధనమ్ ।
యో ధత్తే కవచం శైవం స దేవైరపి పూజ్యతే ॥ 4 ॥

మహాపాతక-సఙ్ఘాతైర్ముచ్యతే చోపపాతకైః ।
దేహాన్తే శివమాప్నోతి శివ-వర్మానుభావతః ॥ 5 ॥

త్వమపి శ్రద్ధయా వత్స శైవం కవచముత్తమమ్ ।
ధారయస్వ మయా దత్తం సద్యః శ్రేయో హ్యవాప్స్యసి ॥ 6 ॥

సూత ఉవాచ ।
ఇత్యుక్త్వా ఋషభో యోగీ తస్మై పార్థివ-సూనవే ।
దదౌ శఙ్ఖం మహారావం ఖడ్గం చారినిషూదనమ్ ॥ 7 ॥

పునశ్చ భస్మ సమ్మన్త్ర్య తదఙ్గం సర్వతోఽస్పృశత్ ।
గజానాం షట్సహస్రస్య ద్విగుణం చ బలం దదౌ ॥ 8 ॥

భస్మప్రభావాత్సమ్ప్రాప్య బలైశ్వర్యధృతిస్మృతిః ।
స రాజపుత్రః శుశుభే శరదర్క ఇవ శ్రియా ॥ 9 ॥

తమాహ ప్రాఞ్జలిం భూయః స యోగీ రాజనన్దనమ్ ।
ఏష ఖడ్గో మయా దత్తస్తపోమన్త్రానుభావతః ॥ 10 ॥

శితధారమిమం ఖడ్గం యస్మై దర్శయసి స్ఫుటమ్ ।
స సద్యో మ్రియతే శత్రుః సాక్షాన్మృత్యురపి స్వయమ్ ॥ 11 ॥

అస్య శఙ్ఖస్య నిహ్రాదం యే శృణ్వన్తి తవాహితాః ।
తే మూర్ఛితాః పతిష్యన్తి న్యస్తశస్త్రా విచేతనాః ॥ 12 ॥

ఖడ్గశఙ్ఖావిమౌ దివ్యౌ పరసైన్యవినాశినౌ ।
ఆత్మసైన్యస్వపక్షాణాం శౌర్యతేజోవివర్ధనౌ ॥ 13 ॥

ఏతయోశ్చ ప్రభావేన శైవేన కవచేన చ ।
ద్విషట్సహస్రనాగానాం బలేన మహతాపి చ ॥ 14 ॥

భస్మధారణసామర్థ్యాచ్ఛత్రుసైన్యం విజేష్యసి ।
ప్రాప్య సింహాసనం పైత్ర్యం గోప్తాసి పృథివీమిమామ్ ॥ 15 ॥

ఇతి భద్రాయుషం సమ్యగనుశాస్య సమాతృకమ్ ।
తాభ్యాం సమ్పూజితః సోఽథ యోగీ స్వైరగతిర్యయౌ ॥ 16 ॥

ఇతి శ్రీస్కాన్దమహాపురాణే బ్రహ్మోత్తరఖణ్డే శివకవచ ప్రభావ వర్ణనం నామ ద్వాదశోఽధ్యాయః సమ్పూర్ణః ॥