అస్య శ్రీ చన్ద్ర కవచస్య । గౌతమ ఋషిః । అనుష్టుప్ ఛన్దః । శ్రీ చన్ద్రో దేవతా । చన్ద్ర ప్రీత్యర్థే జపే వినియోగః ॥

ధ్యానం

సమం చతుర్భుజం వన్దే కేయూర మకుటోజ్వలమ్ ।
వాసుదేవస్య నయనం శఙ్కరస్య చ భూషణమ్ ॥

ఏవం ధ్యాత్వా జపేన్నిత్యం శశినః కవచం శుభమ్ ॥

అథ చన్ద్ర కవచమ్

శశీ పాతు శిరోదేశం భాలం పాతు కలానిధిః ।
చక్షుషీ చన్ద్రమాః పాతు శ్రుతీ పాతు నిశాపతిః ॥ 1 ॥

ప్రాణం క్షపకరః పాతు ముఖం కుముదబాన్ధవః ।
పాతు కణ్ఠం చ మే సోమః స్కన్ధే జైవాతృకస్తథా ॥ 2 ॥

కరౌ సుధాకరః పాతు వక్షః పాతు నిశాకరః ।
హృదయం పాతు మే చన్ద్రో నాభిం శఙ్కరభూషణః ॥ 3 ॥

మధ్యం పాతు సురశ్రేష్ఠః కటిం పాతు సుధాకరః ।
ఊరూ తారాపతిః పాతు మృగాఙ్కో జానునీ సదా ॥ 4 ॥

అబ్ధిజః పాతు మే జఙ్ఘే పాతు పాదౌ విధుః సదా ।
సర్వాణ్యన్యాని చాఙ్గాని పాతు చన్ద్రోఖిలం వపుః ॥ 5 ॥

ఫలశ్రుతిః
ఏతద్ధి కవచం దివ్యం భుక్తి ముక్తి ప్రదాయకమ్ ।
యః పఠేచ్ఛృణుయాద్వాపి సర్వత్ర విజయీ భవేత్ ॥ 6 ॥

॥ ఇతి శ్రీచన్ద్ర కవచం సమ్పూర్ణమ్ ॥