అగస్తిరువాచ
ఆజానుబాహుమరవిన్దదళాయతాక్ష-
-మాజన్మశుద్ధరసహాసముఖప్రసాదమ్ ।
శ్యామం గృహీత శరచాపముదారరూపం
రామం సరామమభిరామమనుస్మరామి ॥ 1 ॥
అస్య శ్రీరామకవచస్య అగస్త్య ఋషిః అనుష్టుప్ ఛన్దః సీతాలక్ష్మణోపేతః శ్రీరామచన్ద్రో దేవతా శ్రీరామచన్ద్రప్రసాదసిద్ధ్యర్థే జపే వినియోగః ।
అథ ధ్యానం
నీలజీమూతసఙ్కాశం విద్యుద్వర్ణామ్బరావృతమ్ ।
కోమలాఙ్గం విశాలాక్షం యువానమతిసున్దరమ్ ॥ 1 ॥
సీతాసౌమిత్రిసహితం జటాముకుటధారిణమ్ ।
సాసితూణధనుర్బాణపాణిం దానవమర్దనమ్ ॥ 2 ॥
యదా చోరభయే రాజభయే శత్రుభయే తథా ।
ధ్యాత్వా రఘుపతిం క్రుద్ధం కాలానలసమప్రభమ్ ॥ 3 ॥
చీరకృష్ణాజినధరం భస్మోద్ధూళితవిగ్రహమ్ ।
ఆకర్ణాకృష్టవిశిఖకోదణ్డభుజమణ్డితమ్ ॥ 4 ॥
రణే రిపూన్ రావణాదీంస్తీక్ష్ణమార్గణవృష్టిభిః ।
సంహరన్తం మహావీరముగ్రమైన్ద్రరథస్థితమ్ ॥ 5 ॥
లక్ష్మణాద్యైర్మహావీరైర్వృతం హనుమదాదిభిః ।
సుగ్రీవాద్యైర్మాహావీరైః శైలవృక్షకరోద్యతైః ॥ 6 ॥
వేగాత్కరాలహుఙ్కారైర్భుభుక్కారమహారవైః ।
నదద్భిః పరివాదద్భిః సమరే రావణం ప్రతి ॥ 7 ॥
శ్రీరామ శత్రుసఙ్ఘాన్మే హన మర్దయ ఖాదయ ।
భూతప్రేతపిశాచాదీన్ శ్రీరామాశు వినాశయ ॥ 8 ॥
ఏవం ధ్యాత్వా జపేద్రామకవచం సిద్ధిదాయకమ్ ।
సుతీక్ష్ణ వజ్రకవచం శృణు వక్ష్యామ్యనుత్తమమ్ ॥ 9 ॥
అథ కవచమ్
శ్రీరామః పాతు మే మూర్ధ్ని పూర్వే చ రఘువంశజః ।
దక్షిణే మే రఘువరః పశ్చిమే పాతు పావనః ॥ 10 ॥
ఉత్తరే మే రఘుపతిర్భాలం దశరథాత్మజః ।
భ్రువోర్దూర్వాదలశ్యామస్తయోర్మధ్యే జనార్దనః ॥ 11 ॥
శ్రోత్రం మే పాతు రాజేన్ద్రో దృశౌ రాజీవలోచనః ।
ఘ్రాణం మే పాతు రాజర్షిర్గణ్డౌ మే జానకీపతిః ॥ 12 ॥
కర్ణమూలే ఖరధ్వంసీ భాలం మే రఘువల్లభః ।
జిహ్వాం మే వాక్పతిః పాతు దన్తపఙ్క్తీ రఘూత్తమః ॥ 13 ॥
ఓష్ఠౌ శ్రీరామచన్ద్రో మే ముఖం పాతు పరాత్పరః ।
కణ్ఠం పాతు జగద్వన్ద్యః స్కన్ధౌ మే రావణాన్తకః ॥ 14 ॥
ధనుర్బాణధరః పాతు భుజౌ మే వాలిమర్దనః ।
సర్వాణ్యఙ్గులిపర్వాణి హస్తౌ మే రాక్షసాన్తకః ॥ 15 ॥
వక్షో మే పాతు కాకుత్స్థః పాతు మే హృదయం హరిః ।
స్తనౌ సీతాపతిః పాతు పార్శ్వం మే జగదీశ్వరః ॥ 16 ॥
మధ్యం మే పాతు లక్ష్మీశో నాభిం మే రఘునాయకః ।
కౌసల్యేయః కటీ పాతు పృష్ఠం దుర్గతినాశనః ॥ 17 ॥
గుహ్యం పాతు హృషీకేశః సక్థినీ సత్యవిక్రమః ।
ఊరూ శార్ఙ్గధరః పాతు జానునీ హనుమత్ప్రియః ॥ 18 ॥
జఙ్ఘే పాతు జగద్వ్యాపీ పాదౌ మే తాటకాన్తకః ।
సర్వాఙ్గం పాతు మే విష్ణుః సర్వసన్ధీననామయః ॥ 19 ॥
జ్ఞానేన్ద్రియాణి ప్రాణాదీన్ పాతు మే మధుసూదనః ।
పాతు శ్రీరామభద్రో మే శబ్దాదీన్విషయానపి ॥ 20 ॥
ద్విపదాదీని భూతాని మత్సమ్బన్ధీని యాని చ ।
జామదగ్న్యమహాదర్పదలనః పాతు తాని మే ॥ 21 ॥
సౌమిత్రిపూర్వజః పాతు వాగాదీనీన్ద్రియాణి చ ।
రోమాఙ్కురాణ్యశేషాణి పాతు సుగ్రీవరాజ్యదః ॥ 22 ॥
వాఙ్మనోబుద్ధ్యహఙ్కారైర్జ్ఞానాజ్ఞానకృతాని చ ।
జన్మాన్తరకృతానీహ పాపాని వివిధాని చ ॥ 23 ॥
తాని సర్వాణి దగ్ధ్వాశు హరకోదణ్డఖణ్డనః ।
పాతు మాం సర్వతో రామః శార్ఙ్గబాణధరః సదా ॥ 24 ॥
ఇతి శ్రీరామచన్ద్రస్య కవచం వజ్రసమ్మితమ్ ।
గుహ్యాద్గుహ్యతమం దివ్యం సుతీక్ష్ణ మునిసత్తమ ॥ 25 ॥
యః పఠేచ్ఛృణుయాద్వాపి శ్రావయేద్వా సమాహితః ।
స యాతి పరమం స్థానం రామచన్ద్రప్రసాదతః ॥ 26 ॥
మహాపాతకయుక్తో వా గోఘ్నో వా భ్రూణహా తథా ।
శ్రీరామచన్ద్రకవచపఠనాచ్ఛుద్ధిమాప్నుయాత్ ॥ 27 ॥
బ్రహ్మహత్యాదిభిః పాపైర్ముచ్యతే నాత్ర సంశయః ।
భో సుతీక్ష్ణ యథా పృష్టం త్వయా మమ పురాః శుభమ్ ।
తథా శ్రీరామకవచం మయా తే వినివేదితమ్ ॥ 28 ॥
ఇతి శ్రీమదానన్దరామాయణే మనోహరకాణ్డే సుతీక్ష్ణాగస్త్యసంవాదే శ్రీరామకవచమ్ ॥
