నారసింహో మహాసింహో దివ్యసింహో మహాబలః ।
ఉగ్రసింహో మహాదేవస్స్తమ్భజశ్చోగ్రలోచనః ॥ 1 ॥

రౌద్రస్సర్వాద్భుతః శ్రీమాన్ యోగానన్దస్త్రివిక్రమః ।
హరిః కోలాహలశ్చక్రీ విజయో జయవర్ధనః ॥ 2 ॥

పఞ్చాననః పరబ్రహ్మ చాఽఘోరో ఘోరవిక్రమః ।
జ్వలన్ముఖో జ్వాలమాలీ మహాజ్వాలో మహాప్రభుః ॥ 3 ॥

నిటిలాక్షస్సహస్రాక్షో దుర్నిరీక్షః ప్రతాపనః ।
మహాదంష్ట్రాయుధః ప్రాజ్ఞశ్చణ్డకోపీ సదాశివః ॥ 4 ॥

హిరణ్యకశిపుధ్వంసీ దైత్యదానవభఞ్జనః ।
గుణభద్రో మహాభద్రో బలభద్రస్సుభద్రకః ॥ 5 ॥

కరాళో వికరాళశ్చ వికర్తా సర్వకర్తృకః ।
శింశుమారస్త్రిలోకాత్మా ఈశస్సర్వేశ్వరో విభుః ॥ 6 ॥

భైరవాడమ్బరో దివ్యశ్చాఽచ్యుతః కవి మాధవః ।
అధోక్షజోఽక్షరశ్శర్వో వనమాలీ వరప్రదః ॥ 7 ॥

విశ్వమ్భరోఽద్భుతో భవ్యః శ్రీవిష్ణుః పురుషోత్తమః ।
అనఘాస్త్రో నఖాస్త్రశ్చ సూర్యజ్యోతిస్సురేశ్వరః ॥ 8 ॥

సహస్రబాహుఃస్సర్వజ్ఞస్సర్వసిద్ధిప్రదాయకః ।
వజ్రదంష్ట్రో వజ్రనఖో మహానన్దః పరన్తపః ॥ 9 ॥

సర్వమన్త్రైకరూపశ్చ సర్వయన్త్రవిదారణః ।
సర్వతన్త్రాత్మకోఽవ్యక్తస్సువ్యక్తో భక్తవత్సలః ॥ 10 ॥

వైశాఖశుక్లభూతోత్థః శరణాగతవత్సలః ।
ఉదారకీర్తిః పుణ్యాత్మా మహాత్మా చణ్డవిక్రమః ॥ 11 ॥

వేదత్రయప్రపూజ్యశ్చ భగవాన్పరమేశ్వరః ।
శ్రీవత్సాఙ్కః శ్రీనివాసో జగద్వ్యాపీ జగన్మయః ॥ 12 ॥

జగత్పాలో జగన్నాథో మహాకాయో ద్విరూపభృత్ ।
పరమాత్మా పరఞ్జ్యోతిర్నిర్గుణశ్చ నృకేసరీ ॥ 13 ॥

పరతత్త్వః పరన్ధామ సచ్చిదానన్దవిగ్రహః ।
లక్ష్మీనృసింహస్సర్వాత్మా ధీరః ప్రహ్లాదపాలకః ॥ 14 ॥

ఇదం శ్రీమన్నృసింహస్య నామ్నామష్టోత్తరం శతమ్ ।
త్రిసన్ధ్యం యః పఠేద్భక్త్యా సర్వాభీష్టమవాప్నుయాత్ ॥ 15 ॥

ఇతి శ్రీనృసింహపూజాకల్పే శ్రీ లక్ష్మీనృసింహాష్టోత్తరశతనామ స్తోత్రమ్ ।