రుచిరువాచ ।
అర్చితానామమూర్తానాం పితౄణాం దీప్తతేజసామ్ ।
నమస్యామి సదా తేషాం ధ్యానినాం దివ్యచక్షుషామ్ ॥ 1 ॥

ఇన్ద్రాదీనాం చ నేతారో దక్షమారీచయోస్తథా ।
సప్తర్షీణాం తథాన్యేషాం తాన్నమస్యామి కామదాన్ ॥ 2 ॥

మన్వాదీనాం చ నేతారః సూర్యాచన్ద్రమసోస్తథా ।
తాన్నమస్యామ్యహం సర్వాన్ పితౄనప్యుదధావపి ॥ 3 ॥

నక్షత్రాణాం గ్రహాణాం చ వాయ్వగ్న్యోర్నభసస్తథా ।
ద్యావాపృథివ్యోశ్చ తథా నమస్యామి కృతాఞ్జలిః ॥ 4 ॥

దేవర్షీణాం జనితౄంశ్చ సర్వలోక నమస్కృతాన్ ।
అక్షయ్యస్య సదా దాతౄన్ నమస్యేహం కృతాఞ్జలిః ॥ 5 ॥

ప్రజాపతేః కశ్యపాయ సోమాయ వరుణాయ చ ।
యోగేశ్వరేభ్యశ్చ సదా నమస్యామి కృతాఞ్జలిః ॥ 6 ॥

నమో గణేభ్యః సప్తభ్యస్తథా లోకేషు సప్తసు ।
స్వయమ్భువే నమస్యామి బ్రహ్మణే యోగచక్షుషే ॥ 7 ॥

సోమాధారాన్ పితృగణాన్ యోగమూర్తిధరాంస్తథా ।
నమస్యామి తథా సోమం పితరం జగతామహమ్ ॥ 8 ॥

అగ్నిరూపాంస్తథైవాన్యాన్ నమస్యామి పితౄనహమ్ ।
అగ్నిసోమమయం విశ్వం యత ఏతదశేషతః ॥ 9 ॥

యే చ తేజసి యే చైతే సోమసూర్యాగ్నిమూర్తయః ।
జగత్స్వరూపిణశ్చైవ తథా బ్రహ్మస్వరూపిణః ॥ 10 ॥

తేభ్యోఽఖిలేభ్యో యోగిభ్యః పితృభ్యో యతమానసః ।
నమో నమో నమస్తేఽస్తు ప్రసీదన్తు స్వధాభుజః ॥ 11 ॥

ఇతి శ్రీ గరుడపురాణే ఊననవతితమోఽధ్యాయే రుచికృత ద్వితీయ పితృ స్తోత్రమ్ ।