ඉංද්රද්යුම්නඃ පාංඩ්යඛංඩාධිරාජ-
ස්ත්වද්භක්තාත්මා චංදනාද්රෞ කදාචිත් ।
ත්වත් සේවායාං මග්නධීරාලුලෝකේ
නෛවාගස්ත්යං ප්රාප්තමාතිථ්යකාමම් ॥1॥
කුංභෝද්භූතිඃ සංභෘතක්රෝධභාරඃ
ස්තබ්ධාත්මා ත්වං හස්තිභූයං භජේති ।
ශප්ත්වාऽථෛනං ප්රත්යගාත් සෝऽපි ලේභේ
හස්තීංද්රත්වං ත්වත්ස්මෘතිව්යක්තිධන්යම් ॥2॥
දග්ධාංභෝධේර්මධ්යභාජි ත්රිකූටේ
ක්රීඩංඡෛලේ යූථපෝऽයං වශාභිඃ ।
සර්වාන් ජංතූනත්යවර්තිෂ්ට ශක්ත්යා
ත්වද්භක්තානාං කුත්ර නෝත්කර්ෂලාභඃ ॥3॥
ස්වේන ස්ථේම්නා දිව්යදේශත්වශක්ත්යා
සෝऽයං ඛේදානප්රජානන් කදාචිත් ।
ශෛලප්රාංතේ ඝර්මතාංතඃ සරස්යාං
යූථෛස්සාර්ධං ත්වත්ප්රණුන්නෝऽභිරේමේ ॥4॥
හූහූස්තාවද්දේවලස්යාපි ශාපාත්
ග්රාහීභූතස්තජ්ජලේ බර්තමානඃ ।
ජග්රාහෛනං හස්තිනං පාදදේශේ
ශාංත්යර්ථං හි ශ්රාංතිදෝऽසි ස්වකානාම් ॥5॥
ත්වත්සේවායා වෛභවාත් දුර්නිරෝධං
යුධ්යංතං තං වත්සරාණාං සහස්රම් ।
ප්රාප්තේ කාලේ ත්වත්පදෛකාග්ර්යසිධ්යෛ
නක්රාක්රාංතං හස්තිවර්යං ව්යධාස්ත්වම් ॥6॥
ආර්තිව්යක්තප්රාක්තනජ්ඤානභක්තිඃ
ශුංඩෝත්ක්ෂිප්තෛඃ පුංඩරීකෛඃ සමර්චන් ।
පූර්වාභ්යස්තං නිර්විශේෂාත්මනිෂ්ඨං
ස්තෝත්රං ශ්රේෂ්ඨං සෝऽන්වගාදීත් පරාත්මන් ॥7॥
ශ්රුත්වා ස්තෝත්රං නිර්ගුණස්ථං සමස්තං
බ්රහ්මේශාද්යෛර්නාහමිත්යප්රයාතේ ।
සර්වාත්මා ත්වං භූරිකාරුණ්යවේගාත්
තාර්ක්ෂ්යාරූඪඃ ප්රේක්ෂිතෝऽභූඃ පුරස්තාත් ॥8॥
හස්තීංද්රං තං හස්තපද්මේන ධෘත්වා
චක්රේණ ත්වං නක්රවර්යං ව්යදාරීඃ ।
ගංධර්වේऽස්මින් මුක්තශාපේ ස හස්තී
ත්වත්සාරූප්යං ප්රාප්ය දේදීප්යතේ ස්ම ॥9॥
ඒතද්වෘත්තං ත්වාං ච මාං ච ප්රගේ යෝ
ගායේත්සෝऽයං භූයසේ ශ්රේයසේ ස්යාත් ।
ඉත්යුක්ත්වෛනං තේන සාර්ධං ගතස්ත්වං
ධිෂ්ණ්යං විෂ්ණෝ පාහි වාතාලයේශ ॥10॥
