උද්ගච්ඡතස්තව කරාදමෘතං හරත්සු
දෛත්යේෂු තානශරණානනුනීය දේවාන් ।
සද්යස්තිරෝදධිථ දේව භවත්ප්රභාවා-
දුද්යත්ස්වයූථ්යකලහා දිතිජා බභූවුඃ ॥1॥
ශ්යාමාං රුචාऽපි වයසාऽපි තනුං තදානීං
ප්රාප්තෝऽසි තුංගකුචමංඩලභංගුරාං ත්වම් ।
පීයූෂකුංභකලහං පරිමුච්ය සර්වේ
තෘෂ්ණාකුලාඃ ප්රතියයුස්ත්වදුරෝජකුංභේ ॥2॥
කා ත්වං මෘගාක්ෂි විභජස්ව සුධාමිමාමි-
ත්යාරූඪරාගවිවශානභියාචතෝऽමූන් ।
විශ්වස්යතේ මයි කථං කුලටාऽස්මි දෛත්යා
ඉත්යාලපන්නපි සුවිශ්වසිතානතානීඃ ॥3॥
මෝදාත් සුධාකලශමේෂු දදත්සු සා ත්වං
දුශ්චේෂ්ටිතං මම සහධ්වමිති බ්රුවාණා ।
පංක්තිප්රභේදවිනිවේශිතදේවදෛත්යා
ලීලාවිලාසගතිභිඃ සමදාඃ සුධාං තාම් ॥4॥
අස්මාස්වියං ප්රණයිණීත්යසුරේෂු තේෂු
ජෝෂං ස්ථිතේෂ්වථ සමාප්ය සුධාං සුරේෂු ।
ත්වං භක්තලෝකවශගෝ නිජරූපමේත්ය
ස්වර්භානුමර්ධපරිපීතසුධං ව්යලාවීඃ ॥5॥
ත්වත්තඃ සුධාහරණයෝග්යඵලං පරේෂු
දත්වා ගතේ ත්වයි සුරෛඃ ඛලු තේ ව්යගෘහ්ණන් ।
ඝෝරේऽථ මූර්ඡති රණේ බලිදෛත්යමායා-
ව්යාමෝහිතේ සුරගණේ ත්වමිහාවිරාසීඃ ॥6॥
ත්වං කාලනේමිමථ මාලිමුඛාංජඝංථ
ශක්රෝ ජඝාන බලිජංභවලාන් සපාකාන් ।
ශුෂ්කාර්ද්රදුෂ්කරවධේ නමුචෞ ච ලූනේ
ඵේනේන නාරදගිරා න්යරුණෝ රණං ත්වම් ॥7॥
යෝෂාවපුර්දනුජමෝහනමාහිතං තේ
ශ්රුත්වා විලෝකනකුතූහලවාන් මහේශඃ ।
භූතෛස්සමං ගිරිජයා ච ගතඃ පදං තේ
ස්තුත්වාऽබ්රවීදභිමතං ත්වමථෝ තිරෝධාඃ ॥8॥
ආරාමසීමනි ච කංදුකඝාතලීලා-
ලෝලායමානනයනාං කමනීං මනෝජ්ඤාම් ।
ත්වාමේෂ වීක්ෂ්ය විගලද්වසනාං මනෝභූ-
වේගාදනංගරිපුරංග සමාලිලිංග ॥9॥
භූයෝऽපි විද්රුතවතීමුපධාව්ය දේවෝ
වීර්යප්රමෝක්ෂවිකසත්පරමාර්ථබෝධඃ ।
ත්වන්මානිතස්තව මහත්ත්වමුවාච දේව්යෛ
තත්තාදෘශස්ත්වමව වාතනිකේතනාථ ॥10॥
