శ్రుతీనాముత్తరం భాగం వేగవత్యాశ్చ దక్షిణమ్ ।
కామాదధివసన్ జీయాత్ కశ్చిదద్భుత కేసరీ ॥ 1 ॥

తపనేంద్వగ్నినయనః తాపానపచినోతు నః ।
తాపనీయరహస్యానాం సారః కామాసికా హరిః ॥ 2 ॥

ఆకంఠమాదిపురుషం
కంఠీరవముపరి కుంఠితారాతిమ్ ।
వేగోపకంఠసంగాత్
విముక్తవైకుంఠబహుమతిముపాసే ॥ 3 ॥

బంధుమఖిలస్య జంతోః
బంధురపర్యంకబంధరమణీయమ్ ।
విషమవిలోచనమీడే
వేగవతీపుళినకేళినరసింహమ్ ॥ 4 ॥

స్వస్థానేషు మరుద్గణాన్ నియమయన్ స్వాధీనసర్వేంద్రియః
పర్యంకస్థిరధారణా ప్రకటితప్రత్యఙ్ముఖావస్థితిః ।
ప్రాయేణ ప్రణిపేదుషః ప్రభురసౌ యోగం నిజం శిక్షయన్
కామానాతనుతాదశేషజగతాం కామాసికా కేసరీ ॥ 5 ॥

వికస్వరనఖస్వరుక్షతహిరణ్యవక్షఃస్థలీ-
-నిరర్గలవినిర్గలద్రుధిరసింధుసంధ్యాయితాః ।
అవంతు మదనాసికామనుజపంచవక్త్రస్య మాం
అహంప్రథమికామిథః ప్రకటితాహవా బాహవః ॥ 6 ॥

సటాపటలభీషణే సరభసాట్టహాసోద్భటే
స్ఫురత్ క్రుధిపరిస్ఫుట భ్రుకుటికేఽపి వక్త్రే కృతే ।
కృపాకపటకేసరిన్ దనుజడింభదత్తస్తనా
సరోజసదృశా దృశా వ్యతివిషజ్య తే వ్యజ్యతే ॥ 7 ॥

త్వయి రక్షతి రక్షకైః కిమన్యై-
-స్త్వయి చారక్షతి రక్షకైః కిమన్యైః ।
ఇతి నిశ్చితధీః శ్రయామి నిత్యం
నృహరే వేగవతీతటాశ్రయం త్వామ్ ॥ 8 ॥

ఇత్థం స్తుతః సకృదిహాష్టభిరేష పద్యైః
శ్రీవేంకటేశరచితైస్త్రిదశేంద్రవంద్యః ।
దుర్దాంతఘోరదురితద్విరదేంద్రభేదీ
కామాసికానరహరిర్వితనోతు కామాన్ ॥ 9 ॥

ఇతి శ్రీవేదాంతదేశికకృతం కామాసికాష్టకమ్ ।