VR 4.21 Kishkindha Kanda - Sarga 21 - Grantha

Collection of Spiritual and Devotional Literature in Various Indian Languages

View this in:

4.21 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌏𑌕𑌵𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ।

𑌤𑌤𑍋 𑌨𑌿𑌪𑌤𑌿𑌤𑌾𑌂 𑌤𑌾𑌰𑌾𑌂 𑌚𑍍𑌯𑍁𑌤𑌾𑌂 𑌤𑌾𑌰𑌾𑌮𑌿𑌵𑌾𑌂𑌬𑌰𑌾𑌤𑍍 ।
𑌶𑌨𑍈𑌰𑌾𑌶𑍍𑌵𑌾𑌸𑌯𑌾𑌮𑌾𑌸 𑌹𑌨𑍁𑌮𑌾𑌨𑍍𑌹𑌰𑌿𑌯𑍂𑌥𑌪𑌃 ॥ 1 ॥

𑌗𑍁𑌣𑌦𑍋𑌷𑌕𑍃𑌤𑌂 𑌜𑌂𑌤𑍁𑌸𑍍𑌸𑍍𑌵𑌕𑌰𑍍𑌮 𑌫𑌲𑌹𑍇𑌤𑍁𑌕𑌮𑍍 ।
𑌅𑌵𑍍𑌯𑌗𑍍𑌰𑌸𑍍𑌤𑌦𑌵𑌾𑌪𑍍𑌨𑍋𑌤𑌿 𑌸𑌰𑍍𑌵𑌂 𑌪𑍍𑌰𑍇𑌤𑍍𑌯 𑌶𑍁𑌭𑌾𑌶𑍁𑌭𑌮𑍍 ॥ 2 ॥

𑌶𑍋𑌚𑍍𑌯𑌾 𑌶𑍋𑌚𑌸𑌿 𑌕𑌂 𑌶𑍋𑌚𑍍𑌯𑌂 𑌦𑍀𑌨𑌂 𑌦𑍀𑌨𑌾𑌽𑌨𑍁𑌕𑌂𑌪𑌸𑍇 ।
𑌕𑌸𑍍𑌯 𑌕𑍋𑌵𑌾𑌽𑌨𑍁𑌶𑍋𑌚𑍍𑌯𑍋𑌽𑌸𑍍𑌤𑌿 𑌦𑍇𑌹𑍇𑌽𑌸𑍍𑌮𑌿𑌨𑍍 𑌬𑍁𑌦𑍍𑌬𑍁𑌦𑍋𑌪𑌮𑍇 ॥ 3 ॥

𑌅𑌂𑌗𑌦𑌸𑍍𑌤𑍁 𑌕𑍁𑌮𑌾𑌰𑍋𑌽𑌯𑌂 𑌦𑍍𑌰𑌷𑍍𑌟𑌵𑍍𑌯𑍋 𑌜𑍀𑌵𑌪𑍁𑌤𑍍𑌰𑌯𑌾 ।
𑌅𑌯𑌤𑍍𑌯𑌾𑌂 𑌚 𑌵𑌿𑌧𑍇𑌯𑌾𑌨𑌿 𑌸𑌮𑌰𑍍𑌥𑌾𑌨𑍍𑌯𑌸𑍍𑌯 𑌚𑌿𑌂𑌤𑌯 ॥ 4 ॥

𑌜𑌾𑌨𑌾𑌸𑍍𑌯𑌨𑌿𑌯𑌤𑌾𑌮𑍇𑌵𑌂 𑌭𑍂𑌤𑌾𑌨𑌾𑌮𑌾𑌗𑌤𑌿𑌂 𑌗𑌤𑌿𑌮𑍍 ।
𑌤𑌸𑍍𑌮𑌾𑌚𑍍𑌛𑍁𑌭𑌂 𑌹𑌿 𑌕𑌰𑍍𑌤𑌵𑍍𑌯𑌂 𑌪𑌂𑌡𑌿𑌤𑍇𑌨𑍈𑌹 𑌲𑍌𑌕𑌿𑌕𑌮𑍍 ॥ 5 ॥

𑌯𑌸𑍍𑌮𑌿𑌨𑍍𑌹𑌰𑌿𑌸𑌹𑌸𑍍𑌰𑌾𑌣𑌿 𑌪𑍍𑌰𑌯𑍁𑌤𑌾𑌨𑍍𑌯𑌰𑍍𑌬𑍁𑌦𑌾𑌨𑌿 𑌚 ।
𑌵𑌰𑍍𑌤𑌯𑌂𑌤𑌿 𑌕𑍃𑌤𑌾𑌂𑌶𑌾𑌨𑌿 𑌸𑍋𑌽𑌯𑌂 𑌦𑌿𑌷𑍍𑌟𑌾𑌂𑌤𑌮𑌾𑌗𑌤𑌃 ॥ 6 ॥

𑌯𑌦𑌯𑌂 𑌨𑍍𑌯𑌾𑌯𑌦𑍃𑌷𑍍𑌟𑌾𑌰𑍍𑌥𑌸𑍍𑌸𑌾𑌮𑌦𑌾𑌨𑌕𑍍𑌷𑌮𑌾𑌪𑌰𑌃 ।
𑌗𑌤𑍋 𑌧𑌰𑍍𑌮𑌜𑌿𑌤𑌾𑌂 𑌭𑍂𑌮𑌿𑌂 𑌨𑍈𑌨𑌂 𑌶𑍋𑌚𑌿𑌤𑍁𑌮𑌰𑍍𑌹𑌸𑌿 ॥ 𑍭 ॥

𑌸𑌰𑍍𑌵𑍇 𑌹𑌿 𑌹𑌰𑌿𑌶𑌾𑌰𑍍𑌦𑍂𑌲𑌾𑌃 𑌪𑍁𑌤𑍍𑌰𑌶𑍍𑌚𑌾𑌯𑌂 𑌤𑌵𑌾𑌂𑌗𑌦𑌃 ।
𑌇𑌦𑌂 𑌹𑌰𑍍𑌯𑍃𑌕𑍍𑌷𑌪𑌤𑌿𑌰𑌾𑌜𑍍𑌯𑌂 𑌚 𑌤𑍍𑌵𑌤𑍍𑌸𑌨𑌾𑌥𑌮𑌨𑌿𑌂𑌦𑌿𑌤𑍇 ॥ 𑍮 ॥

𑌤𑌾𑌵𑌿𑌮𑍌 𑌶𑍋𑌕𑌸𑌂𑌤𑌪𑍍𑌤𑍌 𑌶𑌨𑍈𑌃 𑌪𑍍𑌰𑍇𑌰𑌯 𑌭𑌾𑌮𑌿𑌨𑌿 ।
𑌤𑍍𑌵𑌯𑌾 𑌪𑌰𑌿𑌗𑍃𑌹𑍀𑌤𑍋𑌽𑌯𑌮𑌂𑌗𑌦𑌶𑍍𑌶𑌾𑌸𑍍𑌤𑍁 𑌮𑍇𑌦𑌿𑌨𑍀𑌮𑍍 ॥ 𑍯 ॥

𑌸𑌂𑌤𑌤𑌿𑌶𑍍𑌚 𑌯𑌥𑌾 𑌦𑍃𑌷𑍍𑌟𑌾 𑌕𑍃𑌤𑍍𑌯𑌂 𑌯𑌚𑍍𑌚𑌾𑌪𑌿 𑌸𑌾𑌂𑌪𑍍𑌰𑌤𑌮𑍍 ।
𑌰𑌾𑌜𑍍𑌞𑌸𑍍𑌤𑌤𑍍𑌕𑍍𑌰𑌿𑌯𑌤𑌾𑌂 𑌸𑌰𑍍𑌵𑌮𑍇𑌷 𑌕𑌾𑌲𑌸𑍍𑌯 𑌨𑌿𑌶𑍍𑌚𑌯𑌃 ॥ 10 ॥

𑌸𑌂𑌸𑍍𑌕𑌾𑌰𑍍𑌯𑍋 𑌹𑌰𑌿𑌰𑌾𑌜𑌶𑍍𑌚 𑌅𑌂𑌗𑌦𑌶𑍍𑌚𑌾𑌭𑌿𑌷𑌿𑌚𑍍𑌯𑌤𑌾𑌮𑍍 ।
𑌸𑌿𑌂𑌹𑌾𑌸𑌨𑌗𑌤𑌂 𑌪𑍁𑌤𑍍𑌰𑌂 𑌪𑌶𑍍𑌯𑌂𑌤𑍀 𑌶𑌾𑌂𑌤𑌿𑌮𑍇𑌷𑍍𑌯𑌸𑌿 ॥ 11 ॥

𑌸𑌾 𑌤𑌸𑍍𑌯 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌭𑌰𑍍𑌤𑍃𑌵𑍍𑌯𑌸𑌨𑌪𑍀𑌡𑌿𑌤𑌾 ।
𑌅𑌬𑍍𑌰𑌵𑍀𑌦𑍁𑌤𑍍𑌤𑌰𑌂 𑌤𑌾𑌰𑌾 𑌹𑌨𑍂𑌮𑌂𑌤𑌮𑌵𑌸𑍍𑌥𑌿𑌤𑌮𑍍 ॥ 12 ॥

𑌅𑌂𑌗𑌦𑌪𑍍𑌰𑌤𑌿𑌰𑍂𑌪𑌾𑌣𑌾𑌂 𑌪𑍁𑌤𑍍𑌰𑌾𑌣𑌾𑌮𑍇𑌕𑌤𑌶𑍍𑌶𑌤𑌮𑍍 ।
𑌹𑌤𑌸𑍍𑌯𑌾𑌪𑍍𑌯𑌸𑍍𑌯 𑌵𑍀𑌰𑌸𑍍𑌯 𑌗𑌾𑌤𑍍𑌰𑌸𑌂𑌶𑍍𑌲𑍇𑌷𑌣𑌂 𑌵𑌰𑌮𑍍 ॥ 13 ॥

𑌨 𑌚𑌾𑌹𑌂 𑌹𑌰𑌿𑌰𑌾𑌜𑌸𑍍𑌯 𑌪𑍍𑌰𑌭𑌵𑌾𑌮𑍍𑌯𑌂𑌗𑌦𑌸𑍍𑌯 𑌵𑌾 ।
𑌪𑌿𑌤𑍃𑌵𑍍𑌯𑌸𑍍𑌤𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌸𑌰𑍍𑌵𑌕𑌾𑌰𑍍𑌯𑍇𑌷𑍍𑌵𑌨𑌂𑌤𑌰𑌃 ॥ 14 ॥

𑌨 𑌹𑍍𑌯𑍇𑌷𑌾𑌬𑍁𑌦𑍍𑌧𑌿𑌰𑌾𑌸𑍍𑌥𑍇𑌯𑌾 𑌹𑌨𑍂𑌮𑌨𑍍𑌨𑌂𑌗𑌦𑌂 𑌪𑍍𑌰𑌤𑌿 ।
𑌪𑌿𑌤𑌾 𑌹𑌿 𑌬𑌂𑌧𑍁𑌃 𑌪𑍁𑌤𑍍𑌰𑌸𑍍𑌯 𑌨 𑌮𑌾𑌤𑌾 𑌹𑌰𑌿𑌸𑌤𑍍𑌤𑌮 ॥ 15 ॥

𑌨 𑌹𑌿 𑌮𑌮 𑌹𑌰𑌿𑌰𑌾𑌜𑌸𑌂𑌶𑍍𑌰𑌯𑌾𑌤𑍍 𑌕𑍍𑌷𑌮𑌤𑌰𑌮𑌸𑍍𑌤𑌿 𑌪𑌰𑌤𑍍𑌰 𑌚𑍇𑌹 𑌵𑌾 ।
𑌅𑌭𑌿𑌮𑍁𑌖𑌹𑌤𑌵𑍀𑌰𑌸𑍇𑌵𑌿𑌤𑌂 𑌶𑌯𑌨𑌮𑌿𑌦𑌂 𑌮𑌮 𑌸𑍇𑌵𑌿𑌤𑍁𑌂 𑌕𑍍𑌷𑌮𑌮𑍍 ॥ 16 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ॥

Browse Related Categories: