VR 4.44 Kishkindha Kanda - Sarga 44 - Grantha

Collection of Spiritual and Devotional Literature in Various Indian Languages

View this in:

4.44 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌵𑌿𑌶𑍇𑌷𑍇𑌣 𑌤𑍁 𑌸𑍁𑌗𑍍𑌰𑍀𑌵𑍋 𑌹𑌨𑍂𑌮𑌤𑍍𑌯𑌰𑍍𑌥𑌮𑍁𑌕𑍍𑌤𑌵𑌾𑌨𑍍 ।
𑌸 𑌹𑌿 𑌤𑌸𑍍𑌮𑌿𑌨𑍍𑌹𑌰𑌿𑌶𑍍𑌰𑍇𑌷𑍍𑌠𑍇 𑌨𑌿𑌶𑍍𑌚𑌿𑌤𑌾𑌰𑍍𑌥𑍋𑌽𑌰𑍍𑌥𑌸𑌾𑌧𑌨𑍇 ॥ 1 ॥

𑌅𑌬𑍍𑌰𑌵𑍀𑌚𑍍𑌚 𑌹𑌨𑍂𑌮𑌂𑌤𑌂 𑌵𑌿𑌕𑍍𑌰𑌾𑌂𑌤𑌮𑌨𑌿𑌲𑌾𑌤𑍍𑌮𑌜𑌮𑍍 ।
𑌸𑍁𑌗𑍍𑌰𑍀𑌵𑌃 𑌪𑌰𑌮𑌪𑍍𑌰𑍀𑌤𑌃 𑌪𑍍𑌰𑌭𑍁 𑌸𑍍𑌸𑌰𑍍𑌵𑌵𑌨𑍌𑌕𑌸𑌾𑌮𑍍 ॥ 2 ॥

𑌨 𑌭𑍂𑌮𑍌 𑌨𑌾𑌂𑌤𑌰𑌿𑌕𑍍𑌷𑍇 𑌵𑌾 𑌨𑌾𑌂𑌬𑌰𑍇 𑌨𑌾𑌮𑌰𑌾𑌲𑌯𑍇 ।
𑌨𑌾𑌪𑍍𑌸𑍁 𑌵𑌾 𑌗𑌤𑌿𑌸𑌂𑌗𑌂 𑌤𑍇 𑌪𑌶𑍍𑌯𑌾𑌮𑌿 𑌹𑌰𑌿𑌪𑍁𑌂𑌗𑌵 ॥ 3 ॥

𑌸𑌾𑌸𑍁𑌰𑌾𑌸𑍍𑌸𑌹𑌗𑌂𑌧𑌰𑍍𑌵𑌾𑌸𑍍𑌸𑌨𑌾𑌗𑌨𑌰𑌦𑍇𑌵𑌤𑌾𑌃 ।
𑌵𑌿𑌦𑌿𑌤𑌾 𑌸𑍍𑌸𑌰𑍍𑌵𑌲𑍋𑌕𑌾𑌸𑍍𑌤𑍇 𑌸𑌸𑌾𑌗𑌰𑌧𑌰𑌾𑌧𑌰𑌾𑌃 ॥ 4 ॥

𑌗𑌤𑌿𑌰𑍍𑌵𑍇𑌗𑌶𑍍𑌚 𑌤𑍇𑌜𑌶𑍍𑌚 𑌲𑌾𑌘𑌵𑌂 𑌚 𑌮𑌹𑌾𑌕𑌪𑍇 ।
𑌪𑌿𑌤𑍁𑌸𑍍𑌤𑍇 𑌸𑌦𑍃𑌶𑌂 𑌵𑍀𑌰 𑌮𑌾𑌰𑍁𑌤𑌸𑍍𑌯 𑌮𑌹𑍌𑌜𑌸𑌃 ॥ 5 ॥

𑌤𑍇𑌜𑌸𑌾 𑌵𑌾𑌪𑌿 𑌤𑍇 𑌭𑍂𑌤𑌂 𑌨 𑌸𑌮𑌂 𑌭𑍁𑌵𑌿 𑌨 𑌵𑌿𑌦𑍍𑌯𑌤𑍇 ।
𑌤𑌦𑍍𑌯𑌥𑌾 𑌲𑌭𑍍𑌯𑌤𑍇 𑌸𑍀𑌤𑌾 𑌤𑌤𑍍𑌤𑍍𑌵𑌮𑍇𑌵𑍋𑌪𑌪𑌾𑌦𑌯 ॥ 6 ॥

𑌤𑍍𑌵𑌯𑍍𑌯𑍇𑌵 𑌹𑌨𑍁𑌮 𑌨𑍍𑌨𑌸𑍍𑌤𑌿 𑌬𑌲𑌂 𑌬𑍁𑌦𑍍𑌧𑌿𑌃 𑌪𑌰𑌾𑌕𑍍𑌰𑌮𑌃 ।
𑌦𑍇𑌶𑌕𑌾𑌲𑌾𑌨𑍁𑌵𑍃𑌤𑍍𑌤𑌿𑌶𑍍𑌚 𑌨𑌯𑌶𑍍𑌚 𑌨𑌯𑌪𑌂𑌡𑌿𑌤 ॥ 𑍭 ॥

𑌤𑌤𑌃 𑌕𑌾𑌰𑍍𑌯𑌸𑌮𑌾𑌸𑌂𑌗𑌮𑌵𑌗𑌮𑍍𑌯 𑌹𑌨𑍂𑌮𑌤𑌿 ।
𑌵𑌿𑌦𑌿𑌤𑍍𑌵𑌾 𑌹𑌨𑍁𑌮𑌂𑌤𑌂 𑌚 𑌚𑌿𑌂𑌤𑌯𑌾𑌮𑌾𑌸 𑌰𑌾𑌘𑌵𑌃 ॥ 𑍮 ॥

𑌸𑌰𑍍𑌵𑌥𑌾 𑌨𑌿𑌶𑍍𑌚𑌿𑌤𑌾𑌰𑍍𑌥𑍋𑌽𑌯𑌂 𑌹𑌨𑍂𑌮𑌤𑌿 𑌹𑌰𑍀𑌶𑍍𑌵𑌰𑌃 ।
𑌨𑌿𑌶𑍍𑌚𑌿𑌤𑌾𑌰𑍍𑌥𑌕𑌰𑌶𑍍𑌚𑌾𑌪𑌿 𑌹𑌨𑍂𑌮𑌾𑌨𑍍𑌕𑌾𑌰𑍍𑌯𑌸𑌾𑌧𑌨𑍇 ॥ 𑍯 ॥

𑌤𑌦𑍇𑌵𑌂 𑌪𑍍𑌰𑌸𑍍𑌥𑌿𑌤𑌸𑍍𑌯𑌾𑌸𑍍𑌯 𑌪𑌰𑌿𑌜𑍍𑌞𑌾𑌤𑌸𑍍𑌯 𑌕𑌰𑍍𑌮𑌭𑌿𑌃 ।
𑌭𑌰𑍍𑌤𑍍𑌰𑌾 𑌪𑌰𑌿𑌗𑍃𑌹𑍀𑌤𑌸𑍍𑌯 𑌧𑍍𑌰𑍁𑌵𑌃 𑌕𑌾𑌰𑍍𑌯𑌫𑌲𑍋𑌦𑌯𑌃 ॥ 10 ॥

𑌤𑌂 𑌸𑌮𑍀𑌕𑍍𑌷𑍍𑌯 𑌮𑌹𑌾𑌤𑍇𑌜𑌾 𑌵𑍍𑌯𑌵𑌸𑌾𑌯𑍋𑌤𑍍𑌤𑌰𑌂 𑌹𑌰𑌿𑌮𑍍 ।
𑌕𑍃𑌤𑌾𑌰𑍍𑌥 𑌇𑌵 𑌸𑌂𑌵𑍃𑌤𑍍𑌤𑌃 𑌪𑍍𑌰𑌹𑍃𑌷𑍍𑌟𑍇𑌂𑌦𑍍𑌰𑌿𑌯𑌮𑌾𑌨𑌸𑌃 ॥ 11 ॥

𑌦𑌦𑍌 𑌤𑌸𑍍𑌯 𑌤𑌤𑌃 𑌪𑍍𑌰𑍀𑌤𑌸𑍍𑌸𑍍𑌵𑌨𑌾𑌮𑌾𑌂𑌕𑍋𑌪𑌶𑍋𑌭𑌿𑌤𑌮𑍍 ।
𑌅𑌂𑌗𑍁𑌲𑍀𑌯𑌮𑌭𑌿𑌜𑍍𑌞𑌾𑌨𑌂 𑌰𑌾𑌜𑌪𑍁𑌤𑍍𑌰𑍍𑌯𑌾𑌃 𑌪𑌰𑌂𑌤𑌪𑌃 ॥ 12 ॥

𑌅𑌨𑍇𑌨 𑌤𑍍𑌵𑌾𑌂 𑌹𑌰𑌿𑌶𑍍𑌰𑍇𑌷𑍍𑌠 𑌚𑌿𑌹𑍍𑌨𑍇𑌨 𑌜𑌨𑌕𑌾𑌤𑍍𑌮𑌜𑌾 ।
𑌮𑌤𑍍𑌸𑌕𑌾𑌶𑌾𑌦𑌨𑍁𑌪𑍍𑌰𑌾𑌪𑍍𑌤𑌮𑌨𑍁𑌦𑍍𑌵𑌿𑌗𑍍𑌨𑌾𑌽𑌨𑍁𑌪𑌶𑍍𑌯𑌤𑌿 ॥ 13 ॥

𑌵𑍍𑌯𑌵𑌸𑌾𑌯𑌶𑍍𑌚 𑌤𑍇 𑌵𑍀𑌰 𑌸𑌤𑍍𑌤𑍍𑌵𑌯𑍁𑌕𑍍𑌤𑌶𑍍𑌚 𑌵𑌿𑌕𑍍𑌰𑌮𑌃 ।
𑌸𑍁𑌗𑍍𑌰𑍀𑌵𑌸𑍍𑌯 𑌚 𑌸𑌂𑌦𑍇𑌶𑌸𑍍𑌸𑌿𑌦𑍍𑌧𑌿𑌂 𑌕𑌥𑌯𑌤𑍀𑌵 𑌮𑍇 ॥ 14 ॥

𑌸 𑌤𑌦𑍍𑌗𑍃𑌹𑍍𑌯 𑌹𑌰𑌿𑌶𑍍𑌰𑍇𑌷𑍍𑌠𑌃 𑌸𑍍𑌥𑌾𑌪𑍍𑌯 𑌮𑍂𑌰𑍍𑌧𑍍𑌨𑌿 𑌕𑍃𑌤𑌾𑌂𑌜𑌲𑌿𑌃 ।
𑌵𑌂𑌦𑌿𑌤𑍍𑌵𑌾 𑌚𑌰𑌣𑍌 𑌚𑍈𑌵 𑌪𑍍𑌰𑌸𑍍𑌥𑌿𑌤𑌃 𑌪𑍍𑌲𑌵𑌗𑍋𑌤𑍍𑌤𑌮𑌃 ॥ 15 ॥

𑌸 𑌤𑌤𑍍𑌪𑍍𑌰𑌕𑌰𑍍𑌷𑌨𑍍 𑌹𑌰𑍀𑌣𑌾𑌂 𑌮𑌹𑌦𑍍𑌬𑌲𑌂 𑌬𑌭𑍂𑌵 𑌵𑍀𑌰𑌃 𑌪𑌵𑌨𑌾𑌤𑍍𑌮𑌜𑌃 𑌕𑌪𑌿𑌃 ।
𑌗𑌤𑌾𑌂𑌬𑍁𑌦𑍇 𑌵𑍍𑌯𑍋𑌮𑍍𑌨𑌿 𑌵𑌿𑌶𑍁𑌦𑍍𑌧𑌮𑌂𑌡𑌲𑌃 𑌶𑌶𑍀𑌵 𑌨𑌕𑍍𑌷𑌤𑍍𑌰𑌗𑌣𑍋𑌪𑌶𑍋𑌭𑌿𑌤𑌃 ॥ 16 ॥

𑌅𑌤𑌿𑌬𑌲 𑌬𑌲𑌮𑌾𑌶𑍍𑌰𑌿𑌤𑌸𑍍𑌤𑌵𑌾𑌹𑌂 𑌹𑌰𑌿𑌵𑌰𑌵𑌿𑌕𑍍𑌰𑌮 𑌵𑌿𑌕𑍍𑌰𑌮𑍈𑌰𑌨𑌲𑍍𑌪𑍈𑌃 ।
𑌪𑌵𑌨𑌸𑍁𑌤 𑌯𑌥𑌾𑌽𑌭𑌿𑌗𑌮𑍍𑌯𑌤𑍇 𑌸𑌾 𑌜𑌨𑌕𑌸𑍁𑌤𑌾 𑌹𑌨𑍁𑌮𑌂 𑌸𑍍𑌤𑌥𑌾 𑌕𑍁𑌰𑍁𑌷𑍍𑌵 ॥ 1𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Browse Related Categories: