𑌧𑌨𑌹𑍀𑌨𑍋 𑌨 𑌹𑍀𑌨𑌶𑍍𑌚 𑌧𑌨𑌿𑌕𑌃 𑌸 𑌸𑍁𑌨𑌿𑌶𑍍𑌚𑌯𑌃 ।
𑌵𑌿𑌦𑍍𑌯𑌾𑌰𑌤𑍍𑌨𑍇𑌨 𑌹𑍀𑌨𑍋 𑌯𑌃 𑌸 𑌹𑍀𑌨𑌃 𑌸𑌰𑍍𑌵𑌵𑌸𑍍𑌤𑍁𑌷𑍁 ॥ 01 ॥

𑌦𑍃𑌷𑍍𑌟𑌿𑌪𑍂𑌤𑌂 𑌨𑍍𑌯𑌸𑍇𑌤𑍍𑌪𑌾𑌦𑌂 𑌵𑌸𑍍𑌤𑍍𑌰𑌪𑍂𑌤𑌂 𑌪𑌿𑌬𑍇𑌜𑍍𑌜𑌲𑌮𑍍 ।
𑌶𑌾𑌸𑍍𑌤𑍍𑌰𑌪𑍂𑌤𑌂 𑌵𑌦𑍇𑌦𑍍𑌵𑌾𑌕𑍍𑌯𑌃 𑌮𑌨𑌃𑌪𑍂𑌤𑌂 𑌸𑌮𑌾𑌚𑌰𑍇𑌤𑍍 ॥ 02 ॥

𑌸𑍁𑌖𑌾𑌰𑍍𑌥𑍀 𑌚𑍇𑌤𑍍𑌤𑍍𑌯𑌜𑍇𑌦𑍍𑌵𑌿𑌦𑍍𑌯𑌾𑌂 𑌵𑌿𑌦𑍍𑌯𑌾𑌰𑍍𑌥𑍀 𑌚𑍇𑌤𑍍𑌤𑍍𑌯𑌜𑍇𑌤𑍍𑌸𑍁𑌖𑌮𑍍 ।
𑌸𑍁𑌖𑌾𑌰𑍍𑌥𑌿𑌨𑌃 𑌕𑍁𑌤𑍋 𑌵𑌿𑌦𑍍𑌯𑌾 𑌸𑍁𑌖𑌂 𑌵𑌿𑌦𑍍𑌯𑌾𑌰𑍍𑌥𑌿𑌨𑌃 𑌕𑍁𑌤𑌃 ॥ 03 ॥

𑌕𑌵𑌯𑌃 𑌕𑌿𑌂 𑌨 𑌪𑌶𑍍𑌯𑌂𑌤𑌿 𑌕𑌿𑌂 𑌨 𑌭𑌕𑍍𑌷𑌂𑌤𑌿 𑌵𑌾𑌯𑌸𑌾𑌃 ।
𑌮𑌦𑍍𑌯𑌪𑌾𑌃 𑌕𑌿𑌂 𑌨 𑌜𑌲𑍍𑌪𑌂𑌤𑌿 𑌕𑌿𑌂 𑌨 𑌕𑍁𑌰𑍍𑌵𑌂𑌤𑌿 𑌯𑍋𑌷𑌿𑌤𑌃 ॥ 04 ॥

𑌰𑌂𑌕𑌂 𑌕𑌰𑍋𑌤𑌿 𑌰𑌾𑌜𑌾𑌨𑌂 𑌰𑌾𑌜𑌾𑌨𑌂 𑌰𑌂𑌕𑌮𑍇𑌵 𑌚 ।
𑌧𑌨𑌿𑌨𑌂 𑌨𑌿𑌰𑍍𑌧𑌨𑌂 𑌚𑍈𑌵 𑌨𑌿𑌰𑍍𑌧𑌨𑌂 𑌧𑌨𑌿𑌨𑌂 𑌵𑌿𑌧𑌿𑌃 ॥ 05 ॥

𑌲𑍁𑌬𑍍𑌧𑌾𑌨𑌾𑌂 𑌯𑌾𑌚𑌕𑌃 𑌶𑌤𑍍𑌰𑍁𑌰𑍍𑌮𑍂𑌰𑍍𑌖𑌾𑌨𑌾𑌂 𑌬𑍋𑌧𑌕𑍋 𑌰𑌿𑌪𑍁𑌃 ।
𑌜𑌾𑌰𑌸𑍍𑌤𑍍𑌰𑍀𑌣𑌾𑌂 𑌪𑌤𑌿𑌃 𑌶𑌤𑍍𑌰𑍁𑌶𑍍𑌚𑍌𑌰𑌾𑌣𑌾𑌂 𑌚𑌂𑌦𑍍𑌰𑌮𑌾 𑌰𑌿𑌪𑍁𑌃 ॥ 06 ॥

𑌯𑍇𑌷𑌾𑌂 𑌨 𑌵𑌿𑌦𑍍𑌯𑌾 𑌨 𑌤𑌪𑍋 𑌨 𑌦𑌾𑌨𑌂
𑌜𑍍𑌞𑌾𑌨𑌂 𑌨 𑌶𑍀𑌲𑌾𑌂 𑌨 𑌗𑍁𑌣𑍋 𑌨 𑌧𑌰𑍍𑌮𑌃 ।
𑌤𑍇 𑌮𑌰𑍍𑌤𑍍𑌯𑌲𑍋𑌕𑍇 𑌭𑍁𑌵𑌿 𑌭𑌾𑌰𑌭𑍂𑌤𑌾
𑌮𑌨𑍁𑌷𑍍𑌯𑌰𑍂𑌪𑍇𑌣 𑌮𑍃𑌗𑌾𑌶𑍍𑌚𑌰𑌂𑌤𑌿 ॥ 0𑍭 ॥

𑌅𑌂𑌤𑌃𑌸𑌾𑌰𑌵𑌿𑌹𑍀𑌨𑌾𑌨𑌾𑌮𑍁𑌪𑌦𑍇𑌶𑍋 𑌨 𑌜𑌾𑌯𑌤𑍇 ।
𑌮𑌲𑌯𑌾𑌚𑌲𑌸𑌂𑌸𑌰𑍍𑌗𑌾𑌨𑍍𑌨 𑌵𑍇𑌣𑍁𑌶𑍍𑌚𑌂𑌦𑌨𑌾𑌯𑌤𑍇 ॥ 0𑍮 ॥

𑌯𑌸𑍍𑌯 𑌨𑌾𑌸𑍍𑌤𑌿 𑌸𑍍𑌵𑌯𑌂 𑌪𑍍𑌰𑌜𑍍𑌞𑌾 𑌶𑌾𑌸𑍍𑌤𑍍𑌰𑌂 𑌤𑌸𑍍𑌯 𑌕𑌰𑍋𑌤𑌿 𑌕𑌿𑌮𑍍 ।
𑌲𑍋𑌚𑌨𑌾𑌭𑍍𑌯𑌾𑌂 𑌵𑌿𑌹𑍀𑌨𑌸𑍍𑌯 𑌦𑌰𑍍𑌪𑌣𑌃 𑌕𑌿𑌂 𑌕𑌰𑌿𑌷𑍍𑌯𑌤𑌿 ॥ 0𑍯 ॥

𑌦𑍁𑌰𑍍𑌜𑌨𑌂 𑌸𑌜𑍍𑌜𑌨𑌂 𑌕𑌰𑍍𑌤𑍁𑌮𑍁𑌪𑌾𑌯𑍋 𑌨𑌹𑌿 𑌭𑍂𑌤𑌲𑍇 ।
𑌅𑌪𑌾𑌨𑌂 𑌶𑌾𑌤𑌧𑌾 𑌧𑍌𑌤𑌂 𑌨 𑌶𑍍𑌰𑍇𑌷𑍍𑌠𑌮𑌿𑌂𑌦𑍍𑌰𑌿𑌯𑌂 𑌭𑌵𑍇𑌤𑍍 ॥ 10 ॥

𑌆𑌪𑍍𑌤𑌦𑍍𑌵𑍇𑌷𑌾𑌦𑍍𑌭𑌵𑍇𑌨𑍍𑌮𑍃𑌤𑍍𑌯𑍁𑌃 𑌪𑌰𑌦𑍍𑌵𑍇𑌷𑌾𑌦𑍍𑌧𑌨𑌕𑍍𑌷𑌯𑌃 ।
𑌰𑌾𑌜𑌦𑍍𑌵𑍇𑌷𑌾𑌦𑍍𑌭𑌵𑍇𑌨𑍍𑌨𑌾𑌶𑍋 𑌬𑍍𑌰𑌹𑍍𑌮𑌦𑍍𑌵𑍇𑌷𑌾𑌤𑍍𑌕𑍁𑌲𑌕𑍍𑌷𑌯𑌃 ॥ 11 ॥

𑌵𑌰𑌂 𑌵𑌨𑌂 𑌵𑍍𑌯𑌾𑌘𑍍𑌰𑌗𑌜𑍇𑌂𑌦𑍍𑌰𑌸𑍇𑌵𑌿𑌤𑌂
𑌦𑍍𑌰𑍁𑌮𑌾𑌲𑌯𑌂 𑌪𑌤𑍍𑌰𑌫𑌲𑌾𑌂𑌬𑍁𑌸𑍇𑌵𑌨𑌮𑍍 ।
𑌤𑍃𑌣𑍇𑌷𑍁 𑌶𑌯𑍍𑌯𑌾 𑌶𑌤𑌜𑍀𑌰𑍍𑌣𑌵𑌲𑍍𑌕𑌲𑌂
𑌨 𑌬𑌂𑌧𑍁𑌮𑌧𑍍𑌯𑍇 𑌧𑌨𑌹𑍀𑌨𑌜𑍀𑌵𑌨𑌮𑍍 ॥ 12 ॥

𑌵𑌿𑌪𑍍𑌰𑍋 𑌵𑍃𑌕𑍍𑌷𑌸𑍍𑌤𑌸𑍍𑌯 𑌮𑍂𑌲𑌂 𑌚 𑌸𑌂𑌧𑍍𑌯𑌾
𑌵𑍇𑌦𑌃 𑌶𑌾𑌖𑌾 𑌧𑌰𑍍𑌮𑌕𑌰𑍍𑌮𑌾𑌣𑌿 𑌪𑌤𑍍𑌰𑌮𑍍 ।
𑌤𑌸𑍍𑌮𑌾𑌨𑍍𑌮𑍂𑌲𑌂 𑌯𑌤𑍍𑌨𑌤𑍋 𑌰𑌕𑍍𑌷𑌣𑍀𑌯𑌂
𑌛𑌿𑌨𑍍𑌨𑍇 𑌮𑍂𑌲𑍇 𑌨𑍈𑌵 𑌶𑌾𑌖𑌾 𑌨 𑌪𑌤𑍍𑌰𑌮𑍍 ॥ 13 ॥

𑌮𑌾𑌤𑌾 𑌚 𑌕𑌮𑌲𑌾 𑌦𑍇𑌵𑍀 𑌪𑌿𑌤𑌾 𑌦𑍇𑌵𑍋 𑌜𑌨𑌾𑌰𑍍𑌦𑌨𑌃 ।
𑌬𑌾𑌂𑌧𑌵𑌾 𑌵𑌿𑌷𑍍𑌣𑍁𑌭𑌕𑍍𑌤𑌾𑌶𑍍𑌚 𑌸𑍍𑌵𑌦𑍇𑌶𑍋 𑌭𑍁𑌵𑌨𑌤𑍍𑌰𑌯𑌮𑍍 ॥ 14 ॥

𑌏𑌕𑌵𑍃𑌕𑍍𑌷𑌸𑌮𑌾𑌰𑍂𑌢𑌾 𑌨𑌾𑌨𑌾𑌵𑌰𑍍𑌣𑌾 𑌵𑌿𑌹𑌂𑌗𑌮𑌾𑌃 ।
𑌪𑍍𑌰𑌭𑌾𑌤𑍇 𑌦𑌿𑌕𑍍𑌷𑍁 𑌦𑌶𑌸𑍁 𑌯𑌾𑌂𑌤𑌿 𑌕𑌾 𑌤𑌤𑍍𑌰 𑌵𑍇𑌦𑌨𑌾 ॥ 15 ॥

𑌬𑍁𑌦𑍍𑌧𑌿𑌰𑍍𑌯𑌸𑍍𑌯 𑌬𑌲𑌂 𑌤𑌸𑍍𑌯 𑌨𑌿𑌰𑍍𑌬𑍁𑌦𑍍𑌧𑍇𑌶𑍍𑌚 𑌕𑍁𑌤𑍋 𑌬𑌲𑌮𑍍 ।
𑌵𑌨𑍇 𑌸𑌿𑌂𑌹𑍋 𑌯𑌦𑍋𑌨𑍍𑌮𑌤𑍍𑌤𑌃 𑌮𑌶𑌕𑍇𑌨 𑌨𑌿𑌪𑌾𑌤𑌿𑌤𑌃 ॥ 16 ॥

𑌕𑌾 𑌚𑌿𑌂𑌤𑌾 𑌮𑌮 𑌜𑍀𑌵𑌨𑍇 𑌯𑌦𑌿 𑌹𑌰𑌿𑌰𑍍𑌵𑌿𑌶𑍍𑌵𑌂𑌭𑌰𑍋 𑌗𑍀𑌯𑌤𑍇
𑌨𑍋 𑌚𑍇𑌦𑌰𑍍𑌭𑌕𑌜𑍀𑌵𑌨𑌾𑌯 𑌜𑌨𑌨𑍀𑌸𑍍𑌤𑌨𑍍𑌯𑌂 𑌕𑌥𑌂 𑌨𑌿𑌰𑍍𑌮𑌮𑍇 ।
𑌇𑌤𑍍𑌯𑌾𑌲𑍋𑌚𑍍𑌯 𑌮𑍁𑌹𑍁𑌰𑍍𑌮𑍁𑌹𑍁𑌰𑍍𑌯𑌦𑍁𑌪𑌤𑍇 𑌲𑌕𑍍𑌷𑍍𑌮𑍀𑌪𑌤𑍇 𑌕𑍇𑌵𑌲𑌂
𑌤𑍍𑌵𑌤𑍍𑌪𑌾𑌦𑌾𑌂𑌬𑍁𑌜𑌸𑍇𑌵𑌨𑍇𑌨 𑌸𑌤𑌤𑌂 𑌕𑌾𑌲𑍋 𑌮𑌯𑌾 𑌨𑍀𑌯𑌤𑍇 ॥ 1𑍭 ॥

𑌗𑍀𑌰𑍍𑌵𑌾𑌣𑌵𑌾𑌣𑍀𑌷𑍁 𑌵𑌿𑌶𑌿𑌷𑍍𑌟𑌬𑍁𑌦𑍍𑌧𑌿-
𑌸𑍍𑌤𑌥𑌾𑌪𑌿 𑌭𑌾𑌷𑌾𑌂𑌤𑌰𑌲𑍋𑌲𑍁𑌪𑍋𑌽𑌹𑌮𑍍 ।
𑌯𑌥𑌾 𑌸𑍁𑌧𑌾𑌯𑌾𑌮𑌮𑌰𑍇𑌷𑍁 𑌸𑌤𑍍𑌯𑌾𑌂
𑌸𑍍𑌵𑌰𑍍𑌗𑌾𑌂𑌗𑌨𑌾𑌨𑌾𑌮𑌧𑌰𑌾𑌸𑌵𑍇 𑌰𑍁𑌚𑌿𑌃 ॥ 1𑍮 ॥

𑌅𑌨𑍍𑌨𑌾𑌦𑍍𑌦𑌶𑌗𑍁𑌣𑌂 𑌪𑌿𑌷𑍍𑌟𑌂 𑌪𑌿𑌷𑍍𑌟𑌾𑌦𑍍𑌦𑌶𑌗𑍁𑌣𑌂 𑌪𑌯𑌃 ।
𑌪𑌯𑌸𑍋𑌽𑌷𑍍𑌟𑌗𑍁𑌣𑌂 𑌮𑌾𑌂𑌸𑌾𑌂 𑌮𑌾𑌂𑌸𑌾𑌦𑍍𑌦𑌶𑌗𑍁𑌣𑌂 𑌘𑍃𑌤𑌮𑍍 ॥ 1𑍯 ॥

𑌶𑍋𑌕𑍇𑌨 𑌰𑍋𑌗𑌾 𑌵𑌰𑍍𑌧𑌂𑌤𑍇 𑌪𑌯𑌸𑌾 𑌵𑌰𑍍𑌧𑌤𑍇 𑌤𑌨𑍁𑌃 ।
𑌘𑍃𑌤𑍇𑌨 𑌵𑌰𑍍𑌧𑌤𑍇 𑌵𑍀𑌰𑍍𑌯𑌂 𑌮𑌾𑌂𑌸𑌾𑌨𑍍𑌮𑌾𑌂𑌸𑌂 𑌪𑍍𑌰𑌵𑌰𑍍𑌧𑌤𑍇 ॥ 20 ॥