𑌅𑌥 𑌶𑍍𑌰𑍀 𑌶𑌿𑌵𑌮𑌹𑌿𑌮𑍍𑌨𑌸𑍍𑌤𑍋𑌤𑍍𑌰𑌮𑍍 ॥

𑌮𑌹𑌿𑌮𑍍𑌨𑌃 𑌪𑌾𑌰𑌂 𑌤𑍇 𑌪𑌰𑌮𑌵𑌿𑌦𑍁𑌷𑍋 𑌯𑌦𑍍𑌯𑌸𑌦𑍃𑌶𑍀
𑌸𑍍𑌤𑍁𑌤𑌿𑌰𑍍𑌬𑍍𑌰𑌹𑍍𑌮𑌾𑌦𑍀𑌨𑌾𑌮𑌪𑌿 𑌤𑌦𑌵𑌸𑌨𑍍𑌨𑌾𑌸𑍍𑌤𑍍𑌵𑌯𑌿 𑌗𑌿𑌰𑌃 ।
𑌅𑌥𑌾𑌽𑌵𑌾𑌚𑍍𑌯𑌃 𑌸𑌰𑍍𑌵𑌃 𑌸𑍍𑌵𑌮𑌤𑌿𑌪𑌰𑌿𑌣𑌾𑌮𑌾𑌵𑌧𑌿 𑌗𑍃𑌣𑌨𑍍
𑌮𑌮𑌾𑌪𑍍𑌯𑍇𑌷 𑌸𑍍𑌤𑍋𑌤𑍍𑌰𑍇 𑌹𑌰 𑌨𑌿𑌰𑌪𑌵𑌾𑌦𑌃 𑌪𑌰𑌿𑌕𑌰𑌃 ॥ 1 ॥

𑌅𑌤𑍀𑌤𑌃 𑌪𑌂𑌥𑌾𑌨𑌂 𑌤𑌵 𑌚 𑌮𑌹𑌿𑌮𑌾 𑌵𑌾𑌙𑍍𑌮𑌨𑌸𑌯𑍋𑌃
𑌅𑌤𑌦𑍍𑌵𑍍𑌯𑌾𑌵𑍃𑌤𑍍𑌤𑍍𑌯𑌾 𑌯𑌂 𑌚𑌕𑌿𑌤𑌮𑌭𑌿𑌧𑌤𑍍𑌤𑍇 𑌶𑍍𑌰𑍁𑌤𑌿𑌰𑌪𑌿 ।
𑌸 𑌕𑌸𑍍𑌯 𑌸𑍍𑌤𑍋𑌤𑌵𑍍𑌯𑌃 𑌕𑌤𑌿𑌵𑌿𑌧𑌗𑍁𑌣𑌃 𑌕𑌸𑍍𑌯 𑌵𑌿𑌷𑌯𑌃
𑌪𑌦𑍇 𑌤𑍍𑌵𑌰𑍍𑌵𑌾𑌚𑍀𑌨𑍇 𑌪𑌤𑌤𑌿 𑌨 𑌮𑌨𑌃 𑌕𑌸𑍍𑌯 𑌨 𑌵𑌚𑌃 ॥ 2 ॥

𑌮𑌧𑍁𑌸𑍍𑌫𑍀𑌤𑌾 𑌵𑌾𑌚𑌃 𑌪𑌰𑌮𑌮𑌮𑍃𑌤𑌂 𑌨𑌿𑌰𑍍𑌮𑌿𑌤𑌵𑌤𑌃
𑌤𑌵 𑌬𑍍𑌰𑌹𑍍𑌮𑌨𑍍​ 𑌕𑌿𑌂 𑌵𑌾𑌗𑌪𑌿 𑌸𑍁𑌰𑌗𑍁𑌰𑍋𑌰𑍍𑌵𑌿𑌸𑍍𑌮𑌯𑌪𑌦𑌮𑍍 ।
𑌮𑌮 𑌤𑍍𑌵𑍇𑌤𑌾𑌂 𑌵𑌾𑌣𑍀𑌂 𑌗𑍁𑌣𑌕𑌥𑌨𑌪𑍁𑌣𑍍𑌯𑍇𑌨 𑌭𑌵𑌤𑌃
𑌪𑍁𑌨𑌾𑌮𑍀𑌤𑍍𑌯𑌰𑍍𑌥𑍇𑌽𑌸𑍍𑌮𑌿𑌨𑍍 𑌪𑍁𑌰𑌮𑌥𑌨 𑌬𑍁𑌦𑍍𑌧𑌿𑌰𑍍𑌵𑍍𑌯𑌵𑌸𑌿𑌤𑌾 ॥ 3 ॥

𑌤𑌵𑍈𑌶𑍍𑌵𑌰𑍍𑌯𑌂 𑌯𑌤𑍍𑌤𑌜𑍍𑌜𑌗𑌦𑍁𑌦𑌯𑌰𑌕𑍍𑌷𑌾𑌪𑍍𑌰𑌲𑌯𑌕𑍃𑌤𑍍
𑌤𑍍𑌰𑌯𑍀𑌵𑌸𑍍𑌤𑍁 𑌵𑍍𑌯𑌸𑍍𑌤𑌂 𑌤𑌿𑌸𑍍𑌰𑍁𑌷𑍁 𑌗𑍁𑌣𑌭𑌿𑌨𑍍𑌨𑌾𑌸𑍁 𑌤𑌨𑍁𑌷𑍁 ।
𑌅𑌭𑌵𑍍𑌯𑌾𑌨𑌾𑌮𑌸𑍍𑌮𑌿𑌨𑍍 𑌵𑌰𑌦 𑌰𑌮𑌣𑍀𑌯𑌾𑌮𑌰𑌮𑌣𑍀𑌂
𑌵𑌿𑌹𑌂𑌤𑍁𑌂 𑌵𑍍𑌯𑌾𑌕𑍍𑌰𑍋𑌶𑍀𑌂 𑌵𑌿𑌦𑌧𑌤 𑌇𑌹𑍈𑌕𑍇 𑌜𑌡𑌧𑌿𑌯𑌃 ॥ 4 ॥

𑌕𑌿𑌮𑍀𑌹𑌃 𑌕𑌿𑌂𑌕𑌾𑌯𑌃 𑌸 𑌖𑌲𑍁 𑌕𑌿𑌮𑍁𑌪𑌾𑌯𑌸𑍍𑌤𑍍𑌰𑌿𑌭𑍁𑌵𑌨𑌂
𑌕𑌿𑌮𑌾𑌧𑌾𑌰𑍋 𑌧𑌾𑌤𑌾 𑌸𑍃𑌜𑌤𑌿 𑌕𑌿𑌮𑍁𑌪𑌾𑌦𑌾𑌨 𑌇𑌤𑌿 𑌚 ।
𑌅𑌤𑌰𑍍𑌕𑍍𑌯𑍈𑌶𑍍𑌵𑌰𑍍𑌯𑍇 𑌤𑍍𑌵𑌯𑍍𑌯𑌨𑌵𑌸𑌰 𑌦𑍁𑌃𑌸𑍍𑌥𑍋 𑌹𑌤𑌧𑌿𑌯𑌃
𑌕𑍁𑌤𑌰𑍍𑌕𑍋𑌽𑌯𑌂 𑌕𑌾𑌂𑌶𑍍𑌚𑌿𑌤𑍍 𑌮𑍁𑌖𑌰𑌯𑌤𑌿 𑌮𑍋𑌹𑌾𑌯 𑌜𑌗𑌤𑌃 ॥ 5 ॥

𑌅𑌜𑌨𑍍𑌮𑌾𑌨𑍋 𑌲𑍋𑌕𑌾𑌃 𑌕𑌿𑌮𑌵𑌯𑌵𑌵𑌂𑌤𑍋𑌽𑌪𑌿 𑌜𑌗𑌤𑌾𑌂
𑌅𑌧𑌿𑌷𑍍𑌠𑌾𑌤𑌾𑌰𑌂 𑌕𑌿𑌂 𑌭𑌵𑌵𑌿𑌧𑌿𑌰𑌨𑌾𑌦𑍃𑌤𑍍𑌯 𑌭𑌵𑌤𑌿 ।
𑌅𑌨𑍀𑌶𑍋 𑌵𑌾 𑌕𑍁𑌰𑍍𑌯𑌾𑌦𑍍 𑌭𑍁𑌵𑌨𑌜𑌨𑌨𑍇 𑌕𑌃 𑌪𑌰𑌿𑌕𑌰𑍋
𑌯𑌤𑍋 𑌮𑌂𑌦𑌾𑌸𑍍𑌤𑍍𑌵𑌾𑌂 𑌪𑍍𑌰𑌤𑍍𑌯𑌮𑌰𑌵𑌰 𑌸𑌂𑌶𑍇𑌰𑌤 𑌇𑌮𑍇 ॥ 6 ॥

𑌤𑍍𑌰𑌯𑍀 𑌸𑌾𑌂𑌖𑍍𑌯𑌂 𑌯𑍋𑌗𑌃 𑌪𑌶𑍁𑌪𑌤𑌿𑌮𑌤𑌂 𑌵𑍈𑌷𑍍𑌣𑌵𑌮𑌿𑌤𑌿
𑌪𑍍𑌰𑌭𑌿𑌨𑍍𑌨𑍇 𑌪𑍍𑌰𑌸𑍍𑌥𑌾𑌨𑍇 𑌪𑌰𑌮𑌿𑌦𑌮𑌦𑌃 𑌪𑌥𑍍𑌯𑌮𑌿𑌤𑌿 𑌚 ।
𑌰𑍁𑌚𑍀𑌨𑌾𑌂 𑌵𑍈𑌚𑌿𑌤𑍍𑌰𑍍𑌯𑌾𑌦𑍃𑌜𑍁𑌕𑍁𑌟𑌿𑌲 𑌨𑌾𑌨𑌾𑌪𑌥𑌜𑍁𑌷𑌾𑌂
𑌨𑍃𑌣𑌾𑌮𑍇𑌕𑍋 𑌗𑌮𑍍𑌯𑌸𑍍𑌤𑍍𑌵𑌮𑌸𑌿 𑌪𑌯𑌸𑌾𑌮𑌰𑍍𑌣𑌵 𑌇𑌵 ॥ 𑍭 ॥

𑌮𑌹𑍋𑌕𑍍𑌷𑌃 𑌖𑌟𑍍𑌵𑌾𑌂𑌗𑌂 𑌪𑌰𑌶𑍁𑌰𑌜𑌿𑌨𑌂 𑌭𑌸𑍍𑌮 𑌫𑌣𑌿𑌨𑌃
𑌕𑌪𑌾𑌲𑌂 𑌚𑍇𑌤𑍀𑌯𑌤𑍍𑌤𑌵 𑌵𑌰𑌦 𑌤𑌂𑌤𑍍𑌰𑍋𑌪𑌕𑌰𑌣𑌮𑍍 ।
𑌸𑍁𑌰𑌾𑌸𑍍𑌤𑌾𑌂 𑌤𑌾𑌮𑍃𑌦𑍍𑌧𑌿𑌂 𑌦𑌧𑌤𑌿 𑌤𑍁 𑌭𑌵𑌦𑍍𑌭𑍂𑌪𑍍𑌰𑌣𑌿𑌹𑌿𑌤𑌾𑌂
𑌨 𑌹𑌿 𑌸𑍍𑌵𑌾𑌤𑍍𑌮𑌾𑌰𑌾𑌮𑌂 𑌵𑌿𑌷𑌯𑌮𑍃𑌗𑌤𑍃𑌷𑍍𑌣𑌾 𑌭𑍍𑌰𑌮𑌯𑌤𑌿 ॥ 𑍮 ॥

𑌧𑍍𑌰𑍁𑌵𑌂 𑌕𑌶𑍍𑌚𑌿𑌤𑍍 𑌸𑌰𑍍𑌵𑌂 𑌸𑌕𑌲𑌮𑌪𑌰𑌸𑍍𑌤𑍍𑌵𑌧𑍍𑌰𑍁𑌵𑌮𑌿𑌦𑌂
𑌪𑌰𑍋 𑌧𑍍𑌰𑍌𑌵𑍍𑌯𑌾𑌽𑌧𑍍𑌰𑍌𑌵𑍍𑌯𑍇 𑌜𑌗𑌤𑌿 𑌗𑌦𑌤𑌿 𑌵𑍍𑌯𑌸𑍍𑌤𑌵𑌿𑌷𑌯𑍇 ।
𑌸𑌮𑌸𑍍𑌤𑍇𑌽𑌪𑍍𑌯𑍇𑌤𑌸𑍍𑌮𑌿𑌨𑍍 𑌪𑍁𑌰𑌮𑌥𑌨 𑌤𑍈𑌰𑍍𑌵𑌿𑌸𑍍𑌮𑌿𑌤 𑌇𑌵
𑌸𑍍𑌤𑍁𑌵𑌨𑍍​ 𑌜𑌿𑌹𑍍𑌰𑍇𑌮𑌿 𑌤𑍍𑌵𑌾𑌂 𑌨 𑌖𑌲𑍁 𑌨𑌨𑍁 𑌧𑍃𑌷𑍍𑌟𑌾 𑌮𑍁𑌖𑌰𑌤𑌾 ॥ 𑍯 ॥

𑌤𑌵𑍈𑌶𑍍𑌵𑌰𑍍𑌯𑌂 𑌯𑌤𑍍𑌨𑌾𑌦𑍍 𑌯𑌦𑍁𑌪𑌰𑌿 𑌵𑌿𑌰𑌿𑌂𑌚𑌿𑌰𑍍𑌹𑌰𑌿𑌰𑌧𑌃
𑌪𑌰𑌿𑌚𑍍𑌛𑍇𑌤𑍁𑌂 𑌯𑌾𑌤𑌾𑌵𑌨𑌲𑌮𑌨𑌲𑌸𑍍𑌕𑌂𑌧𑌵𑌪𑍁𑌷𑌃 ।
𑌤𑌤𑍋 𑌭𑌕𑍍𑌤𑌿𑌶𑍍𑌰𑌦𑍍𑌧𑌾-𑌭𑌰𑌗𑍁𑌰𑍁-𑌗𑍃𑌣𑌦𑍍𑌭𑍍𑌯𑌾𑌂 𑌗𑌿𑌰𑌿𑌶 𑌯𑌤𑍍
𑌸𑍍𑌵𑌯𑌂 𑌤𑌸𑍍𑌥𑍇 𑌤𑌾𑌭𑍍𑌯𑌾𑌂 𑌤𑌵 𑌕𑌿𑌮𑌨𑍁𑌵𑍃𑌤𑍍𑌤𑌿𑌰𑍍𑌨 𑌫𑌲𑌤𑌿 ॥ 10 ॥

𑌅𑌯𑌤𑍍𑌨𑌾𑌦𑌾𑌸𑌾𑌦𑍍𑌯 𑌤𑍍𑌰𑌿𑌭𑍁𑌵𑌨𑌮𑌵𑍈𑌰𑌵𑍍𑌯𑌤𑌿𑌕𑌰𑌂
𑌦𑌶𑌾𑌸𑍍𑌯𑍋 𑌯𑌦𑍍𑌬𑌾𑌹𑍂𑌨𑌭𑍃𑌤 𑌰𑌣𑌕𑌂𑌡𑍂-𑌪𑌰𑌵𑌶𑌾𑌨𑍍 ।
𑌶𑌿𑌰𑌃𑌪𑌦𑍍𑌮𑌶𑍍𑌰𑍇𑌣𑍀-𑌰𑌚𑌿𑌤𑌚𑌰𑌣𑌾𑌂𑌭𑍋𑌰𑍁𑌹-𑌬𑌲𑍇𑌃
𑌸𑍍𑌥𑌿𑌰𑌾𑌯𑌾𑌸𑍍𑌤𑍍𑌵𑌦𑍍𑌭𑌕𑍍𑌤𑍇𑌸𑍍𑌤𑍍𑌰𑌿𑌪𑍁𑌰𑌹𑌰 𑌵𑌿𑌸𑍍𑌫𑍂𑌰𑍍𑌜𑌿𑌤𑌮𑌿𑌦𑌮𑍍 ॥ 11 ॥

𑌅𑌮𑍁𑌷𑍍𑌯 𑌤𑍍𑌵𑌤𑍍𑌸𑍇𑌵𑌾-𑌸𑌮𑌧𑌿𑌗𑌤𑌸𑌾𑌰𑌂 𑌭𑍁𑌜𑌵𑌨𑌂
𑌬𑌲𑌾𑌤𑍍 𑌕𑍈𑌲𑌾𑌸𑍇𑌽𑌪𑌿 𑌤𑍍𑌵𑌦𑌧𑌿𑌵𑌸𑌤𑍌 𑌵𑌿𑌕𑍍𑌰𑌮𑌯𑌤𑌃 ।
𑌅𑌲𑌭𑍍𑌯𑌾 𑌪𑌾𑌤𑌾𑌲𑍇𑌽𑌪𑍍𑌯𑌲𑌸𑌚𑌲𑌿𑌤𑌾𑌂𑌗𑍁𑌷𑍍𑌠𑌶𑌿𑌰𑌸𑌿
𑌪𑍍𑌰𑌤𑌿𑌷𑍍𑌠𑌾 𑌤𑍍𑌵𑌯𑍍𑌯𑌾𑌸𑍀𑌦𑍍 𑌧𑍍𑌰𑍁𑌵𑌮𑍁𑌪𑌚𑌿𑌤𑍋 𑌮𑍁𑌹𑍍𑌯𑌤𑌿 𑌖𑌲𑌃 ॥ 12 ॥

𑌯𑌦𑍃𑌦𑍍𑌧𑌿𑌂 𑌸𑍁𑌤𑍍𑌰𑌾𑌮𑍍𑌣𑍋 𑌵𑌰𑌦 𑌪𑌰𑌮𑍋𑌚𑍍𑌚𑍈𑌰𑌪𑌿 𑌸𑌤𑍀𑌂
𑌅𑌧𑌶𑍍𑌚𑌕𑍍𑌰𑍇 𑌬𑌾𑌣𑌃 𑌪𑌰𑌿𑌜𑌨𑌵𑌿𑌧𑍇𑌯𑌤𑍍𑌰𑌿𑌭𑍁𑌵𑌨𑌃 ।
𑌨 𑌤𑌚𑍍𑌚𑌿𑌤𑍍𑌰𑌂 𑌤𑌸𑍍𑌮𑌿𑌨𑍍 𑌵𑌰𑌿𑌵𑌸𑌿𑌤𑌰𑌿 𑌤𑍍𑌵𑌚𑍍𑌚𑌰𑌣𑌯𑍋𑌃
𑌨 𑌕𑌸𑍍𑌯𑌾𑌪𑍍𑌯𑍁𑌨𑍍𑌨𑌤𑍍𑌯𑍈 𑌭𑌵𑌤𑌿 𑌶𑌿𑌰𑌸𑌸𑍍𑌤𑍍𑌵𑌯𑍍𑌯𑌵𑌨𑌤𑌿𑌃 ॥ 13 ॥

𑌅𑌕𑌾𑌂𑌡-𑌬𑍍𑌰𑌹𑍍𑌮𑌾𑌂𑌡-𑌕𑍍𑌷𑌯𑌚𑌕𑌿𑌤-𑌦𑍇𑌵𑌾𑌸𑍁𑌰𑌕𑍃𑌪𑌾
𑌵𑌿𑌧𑍇𑌯𑌸𑍍𑌯𑌾𑌽𑌽𑌸𑍀𑌦𑍍​ 𑌯𑌸𑍍𑌤𑍍𑌰𑌿𑌨𑌯𑌨 𑌵𑌿𑌷𑌂 𑌸𑌂𑌹𑍃𑌤𑌵𑌤𑌃 ।
𑌸 𑌕𑌲𑍍𑌮𑌾𑌷𑌃 𑌕𑌂𑌠𑍇 𑌤𑌵 𑌨 𑌕𑍁𑌰𑍁𑌤𑍇 𑌨 𑌶𑍍𑌰𑌿𑌯𑌮𑌹𑍋
𑌵𑌿𑌕𑌾𑌰𑍋𑌽𑌪𑌿 𑌶𑍍𑌲𑌾𑌘𑍍𑌯𑍋 𑌭𑍁𑌵𑌨-𑌭𑌯- 𑌭𑌂𑌗- 𑌵𑍍𑌯𑌸𑌨𑌿𑌨𑌃 ॥ 14 ॥

𑌅𑌸𑌿𑌦𑍍𑌧𑌾𑌰𑍍𑌥𑌾 𑌨𑍈𑌵 𑌕𑍍𑌵𑌚𑌿𑌦𑌪𑌿 𑌸𑌦𑍇𑌵𑌾𑌸𑍁𑌰𑌨𑌰𑍇
𑌨𑌿𑌵𑌰𑍍𑌤𑌂𑌤𑍇 𑌨𑌿𑌤𑍍𑌯𑌂 𑌜𑌗𑌤𑌿 𑌜𑌯𑌿𑌨𑍋 𑌯𑌸𑍍𑌯 𑌵𑌿𑌶𑌿𑌖𑌾𑌃 ।
𑌸 𑌪𑌶𑍍𑌯𑌨𑍍𑌨𑍀𑌶 𑌤𑍍𑌵𑌾𑌮𑌿𑌤𑌰𑌸𑍁𑌰𑌸𑌾𑌧𑌾𑌰𑌣𑌮𑌭𑍂𑌤𑍍
𑌸𑍍𑌮𑌰𑌃 𑌸𑍍𑌮𑌰𑍍𑌤𑌵𑍍𑌯𑌾𑌤𑍍𑌮𑌾 𑌨 𑌹𑌿 𑌵𑌶𑌿𑌷𑍁 𑌪𑌥𑍍𑌯𑌃 𑌪𑌰𑌿𑌭𑌵𑌃 ॥ 15 ॥

𑌮𑌹𑍀 𑌪𑌾𑌦𑌾𑌘𑌾𑌤𑌾𑌦𑍍 𑌵𑍍𑌰𑌜𑌤𑌿 𑌸𑌹𑌸𑌾 𑌸𑌂𑌶𑌯𑌪𑌦𑌂
𑌪𑌦𑌂 𑌵𑌿𑌷𑍍𑌣𑍋𑌰𑍍𑌭𑍍𑌰𑌾𑌮𑍍𑌯𑌦𑍍 𑌭𑍁𑌜-𑌪𑌰𑌿𑌘-𑌰𑍁𑌗𑍍𑌣-𑌗𑍍𑌰𑌹- 𑌗𑌣𑌮𑍍 ।
𑌮𑍁𑌹𑍁𑌰𑍍𑌦𑍍𑌯𑍌𑌰𑍍𑌦𑍌𑌸𑍍𑌥𑍍𑌯𑌂 𑌯𑌾𑌤𑍍𑌯𑌨𑌿𑌭𑍃𑌤-𑌜𑌟𑌾-𑌤𑌾𑌡𑌿𑌤-𑌤𑌟𑌾
𑌜𑌗𑌦𑍍𑌰𑌕𑍍𑌷𑌾𑌯𑍈 𑌤𑍍𑌵𑌂 𑌨𑌟𑌸𑌿 𑌨𑌨𑍁 𑌵𑌾𑌮𑍈𑌵 𑌵𑌿𑌭𑍁𑌤𑌾 ॥ 16 ॥

𑌵𑌿𑌯𑌦𑍍𑌵𑍍𑌯𑌾𑌪𑍀 𑌤𑌾𑌰𑌾-𑌗𑌣-𑌗𑍁𑌣𑌿𑌤-𑌫𑍇𑌨𑍋𑌦𑍍𑌗𑌮-𑌰𑍁𑌚𑌿𑌃
𑌪𑍍𑌰𑌵𑌾𑌹𑍋 𑌵𑌾𑌰𑌾𑌂 𑌯𑌃 𑌪𑍃𑌷𑌤𑌲𑌘𑍁𑌦𑍃𑌷𑍍𑌟𑌃 𑌶𑌿𑌰𑌸𑌿 𑌤𑍇 ।
𑌜𑌗𑌦𑍍𑌦𑍍𑌵𑍀𑌪𑌾𑌕𑌾𑌰𑌂 𑌜𑌲𑌧𑌿𑌵𑌲𑌯𑌂 𑌤𑍇𑌨 𑌕𑍃𑌤𑌮𑌿𑌤𑌿
𑌅𑌨𑍇𑌨𑍈𑌵𑍋𑌨𑍍𑌨𑍇𑌯𑌂 𑌧𑍃𑌤𑌮𑌹𑌿𑌮 𑌦𑌿𑌵𑍍𑌯𑌂 𑌤𑌵 𑌵𑌪𑍁𑌃 ॥ 1𑍭 ॥

𑌰𑌥𑌃 𑌕𑍍𑌷𑍋𑌣𑍀 𑌯𑌂𑌤𑌾 𑌶𑌤𑌧𑍃𑌤𑌿𑌰𑌗𑍇𑌂𑌦𑍍𑌰𑍋 𑌧𑌨𑍁𑌰𑌥𑍋
𑌰𑌥𑌾𑌂𑌗𑍇 𑌚𑌂𑌦𑍍𑌰𑌾𑌰𑍍𑌕𑍌 𑌰𑌥-𑌚𑌰𑌣-𑌪𑌾𑌣𑌿𑌃 𑌶𑌰 𑌇𑌤𑌿 ।
𑌦𑌿𑌧𑌕𑍍𑌷𑍋𑌸𑍍𑌤𑍇 𑌕𑍋𑌽𑌯𑌂 𑌤𑍍𑌰𑌿𑌪𑍁𑌰𑌤𑍃𑌣𑌮𑌾𑌡𑌂𑌬𑌰-𑌵𑌿𑌧𑌿𑌃
𑌵𑌿𑌧𑍇𑌯𑍈𑌃 𑌕𑍍𑌰𑍀𑌡𑌂𑌤𑍍𑌯𑍋 𑌨 𑌖𑌲𑍁 𑌪𑌰𑌤𑌂𑌤𑍍𑌰𑌾𑌃 𑌪𑍍𑌰𑌭𑍁𑌧𑌿𑌯𑌃 ॥ 1𑍮 ॥

𑌹𑌰𑌿𑌸𑍍𑌤𑍇 𑌸𑌾𑌹𑌸𑍍𑌰𑌂 𑌕𑌮𑌲 𑌬𑌲𑌿𑌮𑌾𑌧𑌾𑌯 𑌪𑌦𑌯𑍋𑌃
𑌯𑌦𑍇𑌕𑍋𑌨𑍇 𑌤𑌸𑍍𑌮𑌿𑌨𑍍​ 𑌨𑌿𑌜𑌮𑍁𑌦𑌹𑌰𑌨𑍍𑌨𑍇𑌤𑍍𑌰𑌕𑌮𑌲𑌮𑍍 ।
𑌗𑌤𑍋 𑌭𑌕𑍍𑌤𑍍𑌯𑍁𑌦𑍍𑌰𑍇𑌕𑌃 𑌪𑌰𑌿𑌣𑌤𑌿𑌮𑌸𑍌 𑌚𑌕𑍍𑌰𑌵𑌪𑍁𑌷𑌃
𑌤𑍍𑌰𑌯𑌾𑌣𑌾𑌂 𑌰𑌕𑍍𑌷𑌾𑌯𑍈 𑌤𑍍𑌰𑌿𑌪𑍁𑌰𑌹𑌰 𑌜𑌾𑌗𑌰𑍍𑌤𑌿 𑌜𑌗𑌤𑌾𑌮𑍍 ॥ 1𑍯 ॥

𑌕𑍍𑌰𑌤𑍌 𑌸𑍁𑌪𑍍𑌤𑍇 𑌜𑌾𑌗𑍍𑌰𑌤𑍍​ 𑌤𑍍𑌵𑌮𑌸𑌿 𑌫𑌲𑌯𑍋𑌗𑍇 𑌕𑍍𑌰𑌤𑍁𑌮𑌤𑌾𑌂
𑌕𑍍𑌵 𑌕𑌰𑍍𑌮 𑌪𑍍𑌰𑌧𑍍𑌵𑌸𑍍𑌤𑌂 𑌫𑌲𑌤𑌿 𑌪𑍁𑌰𑍁𑌷𑌾𑌰𑌾𑌧𑌨𑌮𑍃𑌤𑍇 ।
𑌅𑌤𑌸𑍍𑌤𑍍𑌵𑌾𑌂 𑌸𑌂𑌪𑍍𑌰𑍇𑌕𑍍𑌷𑍍𑌯 𑌕𑍍𑌰𑌤𑍁𑌷𑍁 𑌫𑌲𑌦𑌾𑌨-𑌪𑍍𑌰𑌤𑌿𑌭𑍁𑌵𑌂
𑌶𑍍𑌰𑍁𑌤𑍌 𑌶𑍍𑌰𑌦𑍍𑌧𑌾𑌂 𑌬𑌧𑍍𑌵𑌾 𑌦𑍃𑌢𑌪𑌰𑌿𑌕𑌰𑌃 𑌕𑌰𑍍𑌮𑌸𑍁 𑌜𑌨𑌃 ॥ 20 ॥

𑌕𑍍𑌰𑌿𑌯𑌾𑌦𑌕𑍍𑌷𑍋 𑌦𑌕𑍍𑌷𑌃 𑌕𑍍𑌰𑌤𑍁𑌪𑌤𑌿𑌰𑌧𑍀𑌶𑌸𑍍𑌤𑌨𑍁𑌭𑍃𑌤𑌾𑌂
𑌋𑌷𑍀𑌣𑌾𑌮𑌾𑌰𑍍𑌤𑍍𑌵𑌿𑌜𑍍𑌯𑌂 𑌶𑌰𑌣𑌦 𑌸𑌦𑌸𑍍𑌯𑌾𑌃 𑌸𑍁𑌰-𑌗𑌣𑌾𑌃 ।
𑌕𑍍𑌰𑌤𑍁𑌭𑍍𑌰𑌂𑌶𑌸𑍍𑌤𑍍𑌵𑌤𑍍𑌤𑌃 𑌕𑍍𑌰𑌤𑍁𑌫𑌲-𑌵𑌿𑌧𑌾𑌨-𑌵𑍍𑌯𑌸𑌨𑌿𑌨𑌃
𑌧𑍍𑌰𑍁𑌵𑌂 𑌕𑌰𑍍𑌤𑍁𑌃 𑌶𑍍𑌰𑌦𑍍𑌧𑌾-𑌵𑌿𑌧𑍁𑌰𑌮𑌭𑌿𑌚𑌾𑌰𑌾𑌯 𑌹𑌿 𑌮𑌖𑌾𑌃 ॥ 21 ॥

𑌪𑍍𑌰𑌜𑌾𑌨𑌾𑌥𑌂 𑌨𑌾𑌥 𑌪𑍍𑌰𑌸𑌭𑌮𑌭𑌿𑌕𑌂 𑌸𑍍𑌵𑌾𑌂 𑌦𑍁𑌹𑌿𑌤𑌰𑌂
𑌗𑌤𑌂 𑌰𑍋𑌹𑌿𑌦𑍍​ 𑌭𑍂𑌤𑌾𑌂 𑌰𑌿𑌰𑌮𑌯𑌿𑌷𑍁𑌮𑍃𑌷𑍍𑌯𑌸𑍍𑌯 𑌵𑌪𑍁𑌷𑌾 ।
𑌧𑌨𑍁𑌷𑍍𑌪𑌾𑌣𑍇𑌰𑍍𑌯𑌾𑌤𑌂 𑌦𑌿𑌵𑌮𑌪𑌿 𑌸𑌪𑌤𑍍𑌰𑌾𑌕𑍃𑌤𑌮𑌮𑍁𑌂
𑌤𑍍𑌰𑌸𑌂𑌤𑌂 𑌤𑍇𑌽𑌦𑍍𑌯𑌾𑌪𑌿 𑌤𑍍𑌯𑌜𑌤𑌿 𑌨 𑌮𑍃𑌗𑌵𑍍𑌯𑌾𑌧𑌰𑌭𑌸𑌃 ॥ 22 ॥

𑌸𑍍𑌵𑌲𑌾𑌵𑌣𑍍𑌯𑌾𑌶𑌂𑌸𑌾 𑌧𑍃𑌤𑌧𑌨𑍁𑌷𑌮𑌹𑍍𑌨𑌾𑌯 𑌤𑍃𑌣𑌵𑌤𑍍
𑌪𑍁𑌰𑌃 𑌪𑍍𑌲𑍁𑌷𑍍𑌟𑌂 𑌦𑍃𑌷𑍍𑌟𑍍𑌵𑌾 𑌪𑍁𑌰𑌮𑌥𑌨 𑌪𑍁𑌷𑍍𑌪𑌾𑌯𑍁𑌧𑌮𑌪𑌿 ।
𑌯𑌦𑌿 𑌸𑍍𑌤𑍍𑌰𑍈𑌣𑌂 𑌦𑍇𑌵𑍀 𑌯𑌮𑌨𑌿𑌰𑌤-𑌦𑍇𑌹𑌾𑌰𑍍𑌧-𑌘𑌟𑌨𑌾𑌤𑍍
𑌅𑌵𑍈𑌤𑌿 𑌤𑍍𑌵𑌾𑌮𑌦𑍍𑌧𑌾 𑌬𑌤 𑌵𑌰𑌦 𑌮𑍁𑌗𑍍𑌧𑌾 𑌯𑍁𑌵𑌤𑌯𑌃 ॥ 23 ॥

𑌶𑍍𑌮𑌶𑌾𑌨𑍇𑌷𑍍𑌵𑌾𑌕𑍍𑌰𑍀𑌡𑌾 𑌸𑍍𑌮𑌰𑌹𑌰 𑌪𑌿𑌶𑌾𑌚𑌾𑌃 𑌸𑌹𑌚𑌰𑌾𑌃
𑌚𑌿𑌤𑌾-𑌭𑌸𑍍𑌮𑌾𑌲𑍇𑌪𑌃 𑌸𑍍𑌰𑌗𑌪𑌿 𑌨𑍃𑌕𑌰𑍋𑌟𑍀-𑌪𑌰𑌿𑌕𑌰𑌃 ।
𑌅𑌮𑌂𑌗𑌲𑍍𑌯𑌂 𑌶𑍀𑌲𑌂 𑌤𑌵 𑌭𑌵𑌤𑍁 𑌨𑌾𑌮𑍈𑌵𑌮𑌖𑌿𑌲𑌂
𑌤𑌥𑌾𑌪𑌿 𑌸𑍍𑌮𑌰𑍍𑌤𑍄𑌣𑌾𑌂 𑌵𑌰𑌦 𑌪𑌰𑌮𑌂 𑌮𑌂𑌗𑌲𑌮𑌸𑌿 ॥ 24 ॥

𑌮𑌨𑌃 𑌪𑍍𑌰𑌤𑍍𑌯𑌕𑍍𑌚𑌿𑌤𑍍𑌤𑍇 𑌸𑌵𑌿𑌧𑌮𑌵𑌿𑌧𑌾𑌯𑌾𑌤𑍍𑌤-𑌮𑌰𑍁𑌤𑌃
𑌪𑍍𑌰𑌹𑍃𑌷𑍍𑌯𑌦𑍍𑌰𑍋𑌮𑌾𑌣𑌃 𑌪𑍍𑌰𑌮𑌦-𑌸𑌲𑌿𑌲𑍋𑌤𑍍𑌸𑌂𑌗𑌤𑌿-𑌦𑍃𑌶𑌃 ।
𑌯𑌦𑌾𑌲𑍋𑌕𑍍𑌯𑌾𑌹𑍍𑌲𑌾𑌦𑌂 𑌹𑍍𑌰𑌦 𑌇𑌵 𑌨𑌿𑌮𑌜𑍍𑌯𑌾𑌮𑍃𑌤𑌮𑌯𑍇
𑌦𑌧𑌤𑍍𑌯𑌂𑌤𑌸𑍍𑌤𑌤𑍍𑌤𑍍𑌵𑌂 𑌕𑌿𑌮𑌪𑌿 𑌯𑌮𑌿𑌨𑌸𑍍𑌤𑌤𑍍 𑌕𑌿𑌲 𑌭𑌵𑌾𑌨𑍍 ॥ 25 ॥

𑌤𑍍𑌵𑌮𑌰𑍍𑌕𑌸𑍍𑌤𑍍𑌵𑌂 𑌸𑍋𑌮𑌸𑍍𑌤𑍍𑌵𑌮𑌸𑌿 𑌪𑌵𑌨𑌸𑍍𑌤𑍍𑌵𑌂 𑌹𑍁𑌤𑌵𑌹𑌃
𑌤𑍍𑌵𑌮𑌾𑌪𑌸𑍍𑌤𑍍𑌵𑌂 𑌵𑍍𑌯𑍋𑌮 𑌤𑍍𑌵𑌮𑍁 𑌧𑌰𑌣𑌿𑌰𑌾𑌤𑍍𑌮𑌾 𑌤𑍍𑌵𑌮𑌿𑌤𑌿 𑌚 ।
𑌪𑌰𑌿𑌚𑍍𑌛𑌿𑌨𑍍𑌨𑌾𑌮𑍇𑌵𑌂 𑌤𑍍𑌵𑌯𑌿 𑌪𑌰𑌿𑌣𑌤𑌾 𑌬𑌿𑌭𑍍𑌰𑌤𑌿 𑌗𑌿𑌰𑌂
𑌨 𑌵𑌿𑌦𑍍𑌮𑌸𑍍𑌤𑌤𑍍𑌤𑌤𑍍𑌤𑍍𑌵𑌂 𑌵𑌯𑌮𑌿𑌹 𑌤𑍁 𑌯𑌤𑍍 𑌤𑍍𑌵𑌂 𑌨 𑌭𑌵𑌸𑌿 ॥ 26 ॥

𑌤𑍍𑌰𑌯𑍀𑌂 𑌤𑌿𑌸𑍍𑌰𑍋 𑌵𑍃𑌤𑍍𑌤𑍀𑌸𑍍𑌤𑍍𑌰𑌿𑌭𑍁𑌵𑌨𑌮𑌥𑍋 𑌤𑍍𑌰𑍀𑌨𑌪𑌿 𑌸𑍁𑌰𑌾𑌨𑍍
𑌅𑌕𑌾𑌰𑌾𑌦𑍍𑌯𑍈𑌰𑍍𑌵𑌰𑍍𑌣𑍈𑌸𑍍𑌤𑍍𑌰𑌿𑌭𑌿𑌰𑌭𑌿𑌦𑌧𑌤𑍍 𑌤𑍀𑌰𑍍𑌣𑌵𑌿𑌕𑍃𑌤𑌿 ।
𑌤𑍁𑌰𑍀𑌯𑌂 𑌤𑍇 𑌧𑌾𑌮 𑌧𑍍𑌵𑌨𑌿𑌭𑌿𑌰𑌵𑌰𑍁𑌂𑌧𑌾𑌨𑌮𑌣𑍁𑌭𑌿𑌃
𑌸𑌮𑌸𑍍𑌤𑌂 𑌵𑍍𑌯𑌸𑍍𑌤𑌂 𑌤𑍍𑌵𑌾𑌂 𑌶𑌰𑌣𑌦 𑌗𑍃𑌣𑌾𑌤𑍍𑌯𑍋𑌮𑌿𑌤𑌿 𑌪𑌦𑌮𑍍 ॥ 2𑍭 ॥

𑌭𑌵𑌃 𑌶𑌰𑍍𑌵𑍋 𑌰𑍁𑌦𑍍𑌰𑌃 𑌪𑌶𑍁𑌪𑌤𑌿𑌰𑌥𑍋𑌗𑍍𑌰𑌃 𑌸𑌹𑌮𑌹𑌾𑌨𑍍
𑌤𑌥𑌾 𑌭𑍀𑌮𑍇𑌶𑌾𑌨𑌾𑌵𑌿𑌤𑌿 𑌯𑌦𑌭𑌿𑌧𑌾𑌨𑌾𑌷𑍍𑌟𑌕𑌮𑌿𑌦𑌮𑍍 ।
𑌅𑌮𑍁𑌷𑍍𑌮𑌿𑌨𑍍 𑌪𑍍𑌰𑌤𑍍𑌯𑍇𑌕𑌂 𑌪𑍍𑌰𑌵𑌿𑌚𑌰𑌤𑌿 𑌦𑍇𑌵 𑌶𑍍𑌰𑍁𑌤𑌿𑌰𑌪𑌿
𑌪𑍍𑌰𑌿𑌯𑌾𑌯𑌾𑌸𑍍𑌮𑍈𑌧𑌾𑌮𑍍𑌨𑍇 𑌪𑍍𑌰𑌣𑌿𑌹𑌿𑌤-𑌨𑌮𑌸𑍍𑌯𑍋𑌽𑌸𑍍𑌮𑌿 𑌭𑌵𑌤𑍇 ॥ 2𑍮 ॥

𑌨𑌮𑍋 𑌨𑍇𑌦𑌿𑌷𑍍𑌠𑌾𑌯 𑌪𑍍𑌰𑌿𑌯𑌦𑌵 𑌦𑌵𑌿𑌷𑍍𑌠𑌾𑌯 𑌚 𑌨𑌮𑌃
𑌨𑌮𑌃 𑌕𑍍𑌷𑍋𑌦𑌿𑌷𑍍𑌠𑌾𑌯 𑌸𑍍𑌮𑌰𑌹𑌰 𑌮𑌹𑌿𑌷𑍍𑌠𑌾𑌯 𑌚 𑌨𑌮𑌃 ।
𑌨𑌮𑍋 𑌵𑌰𑍍𑌷𑌿𑌷𑍍𑌠𑌾𑌯 𑌤𑍍𑌰𑌿𑌨𑌯𑌨 𑌯𑌵𑌿𑌷𑍍𑌠𑌾𑌯 𑌚 𑌨𑌮𑌃
𑌨𑌮𑌃 𑌸𑌰𑍍𑌵𑌸𑍍𑌮𑍈 𑌤𑍇 𑌤𑌦𑌿𑌦𑌮𑌤𑌿𑌸𑌰𑍍𑌵𑌾𑌯 𑌚 𑌨𑌮𑌃 ॥ 2𑍯 ॥

𑌬𑌹𑍁𑌲-𑌰𑌜𑌸𑍇 𑌵𑌿𑌶𑍍𑌵𑍋𑌤𑍍𑌪𑌤𑍍𑌤𑍌 𑌭𑌵𑌾𑌯 𑌨𑌮𑍋 𑌨𑌮𑌃
𑌪𑍍𑌰𑌬𑌲-𑌤𑌮𑌸𑍇 𑌤𑌤𑍍 𑌸𑌂𑌹𑌾𑌰𑍇 𑌹𑌰𑌾𑌯 𑌨𑌮𑍋 𑌨𑌮𑌃 ।
𑌜𑌨-𑌸𑍁𑌖𑌕𑍃𑌤𑍇 𑌸𑌤𑍍𑌤𑍍𑌵𑍋𑌦𑍍𑌰𑌿𑌕𑍍𑌤𑍌 𑌮𑍃𑌡𑌾𑌯 𑌨𑌮𑍋 𑌨𑌮𑌃
𑌪𑍍𑌰𑌮𑌹𑌸𑌿 𑌪𑌦𑍇 𑌨𑌿𑌸𑍍𑌤𑍍𑌰𑍈𑌗𑍁𑌣𑍍𑌯𑍇 𑌶𑌿𑌵𑌾𑌯 𑌨𑌮𑍋 𑌨𑌮𑌃 ॥ 30 ॥

𑌕𑍃𑌶-𑌪𑌰𑌿𑌣𑌤𑌿-𑌚𑍇𑌤𑌃 𑌕𑍍𑌲𑍇𑌶𑌵𑌶𑍍𑌯𑌂 𑌕𑍍𑌵 𑌚𑍇𑌦𑌂 𑌕𑍍𑌵 𑌚 𑌤𑌵 𑌗𑍁𑌣-𑌸𑍀𑌮𑍋𑌲𑍍𑌲𑌂𑌘𑌿𑌨𑍀 𑌶𑌶𑍍𑌵𑌦𑍃𑌦𑍍𑌧𑌿𑌃 ।
𑌇𑌤𑌿 𑌚𑌕𑌿𑌤𑌮𑌮𑌂𑌦𑍀𑌕𑍃𑌤𑍍𑌯 𑌮𑌾𑌂 𑌭𑌕𑍍𑌤𑌿𑌰𑌾𑌧𑌾𑌦𑍍 𑌵𑌰𑌦 𑌚𑌰𑌣𑌯𑍋𑌸𑍍𑌤𑍇 𑌵𑌾𑌕𑍍𑌯-𑌪𑍁𑌷𑍍𑌪𑍋𑌪𑌹𑌾𑌰𑌮𑍍 ॥ 31 ॥

𑌅𑌸𑌿𑌤-𑌗𑌿𑌰𑌿-𑌸𑌮𑌂 𑌸𑍍𑌯𑌾𑌤𑍍 𑌕𑌜𑍍𑌜𑌲𑌂 𑌸𑌿𑌂𑌧𑍁-𑌪𑌾𑌤𑍍𑌰𑍇 𑌸𑍁𑌰-𑌤𑌰𑍁𑌵𑌰-𑌶𑌾𑌖𑌾 𑌲𑍇𑌖𑌨𑍀 𑌪𑌤𑍍𑌰𑌮𑍁𑌰𑍍𑌵𑍀 ।
𑌲𑌿𑌖𑌤𑌿 𑌯𑌦𑌿 𑌗𑍃𑌹𑍀𑌤𑍍𑌵𑌾 𑌶𑌾𑌰𑌦𑌾 𑌸𑌰𑍍𑌵𑌕𑌾𑌲𑌂 𑌤𑌦𑌪𑌿 𑌤𑌵 𑌗𑍁𑌣𑌾𑌨𑌾𑌮𑍀𑌶 𑌪𑌾𑌰𑌂 𑌨 𑌯𑌾𑌤𑌿 ॥ 32 ॥

𑌅𑌸𑍁𑌰-𑌸𑍁𑌰-𑌮𑍁𑌨𑍀𑌂𑌦𑍍𑌰𑍈𑌰𑌰𑍍𑌚𑌿𑌤𑌸𑍍𑌯𑍇𑌂𑌦𑍁-𑌮𑍌𑌲𑍇𑌃 𑌗𑍍𑌰𑌥𑌿𑌤-𑌗𑍁𑌣𑌮𑌹𑌿𑌮𑍍𑌨𑍋 𑌨𑌿𑌰𑍍𑌗𑍁𑌣𑌸𑍍𑌯𑍇𑌶𑍍𑌵𑌰𑌸𑍍𑌯 ।
𑌸𑌕𑌲-𑌗𑌣-𑌵𑌰𑌿𑌷𑍍𑌠𑌃 𑌪𑍁𑌷𑍍𑌪𑌦𑌂𑌤𑌾𑌭𑌿𑌧𑌾𑌨𑌃 𑌰𑍁𑌚𑌿𑌰𑌮𑌲𑌘𑍁𑌵𑍃𑌤𑍍𑌤𑍈𑌃 𑌸𑍍𑌤𑍋𑌤𑍍𑌰𑌮𑍇𑌤𑌚𑍍𑌚𑌕𑌾𑌰 ॥ 33 ॥

𑌅𑌹𑌰𑌹𑌰𑌨𑌵𑌦𑍍𑌯𑌂 𑌧𑍂𑌰𑍍𑌜𑌟𑍇𑌃 𑌸𑍍𑌤𑍋𑌤𑍍𑌰𑌮𑍇𑌤𑌤𑍍 𑌪𑌠𑌤𑌿 𑌪𑌰𑌮𑌭𑌕𑍍𑌤𑍍𑌯𑌾 𑌶𑍁𑌦𑍍𑌧-𑌚𑌿𑌤𑍍𑌤𑌃 𑌪𑍁𑌮𑌾𑌨𑍍 𑌯𑌃 ।
𑌸 𑌭𑌵𑌤𑌿 𑌶𑌿𑌵𑌲𑍋𑌕𑍇 𑌰𑍁𑌦𑍍𑌰𑌤𑍁𑌲𑍍𑌯𑌸𑍍𑌤𑌥𑌾𑌽𑌤𑍍𑌰 𑌪𑍍𑌰𑌚𑍁𑌰𑌤𑌰-𑌧𑌨𑌾𑌯𑍁𑌃 𑌪𑍁𑌤𑍍𑌰𑌵𑌾𑌨𑍍 𑌕𑍀𑌰𑍍𑌤𑌿𑌮𑌾𑌂𑌶𑍍𑌚 ॥ 34 ॥

𑌮𑌹𑍇𑌶𑌾𑌨𑍍𑌨𑌾𑌪𑌰𑍋 𑌦𑍇𑌵𑍋 𑌮𑌹𑌿𑌮𑍍𑌨𑍋 𑌨𑌾𑌪𑌰𑌾 𑌸𑍍𑌤𑍁𑌤𑌿𑌃 ।
𑌅𑌘𑍋𑌰𑌾𑌨𑍍𑌨𑌾𑌪𑌰𑍋 𑌮𑌂𑌤𑍍𑌰𑍋 𑌨𑌾𑌸𑍍𑌤𑌿 𑌤𑌤𑍍𑌤𑍍𑌵𑌂 𑌗𑍁𑌰𑍋𑌃 𑌪𑌰𑌮𑍍 ॥ 35 ॥

𑌦𑍀𑌕𑍍𑌷𑌾 𑌦𑌾𑌨𑌂 𑌤𑌪𑌸𑍍𑌤𑍀𑌰𑍍𑌥𑌂 𑌜𑍍𑌞𑌾𑌨𑌂 𑌯𑌾𑌗𑌾𑌦𑌿𑌕𑌾𑌃 𑌕𑍍𑌰𑌿𑌯𑌾𑌃 ।
𑌮𑌹𑌿𑌮𑍍𑌨𑌸𑍍𑌤𑌵 𑌪𑌾𑌠𑌸𑍍𑌯 𑌕𑌲𑌾𑌂 𑌨𑌾𑌰𑍍𑌹𑌂𑌤𑌿 𑌷𑍋𑌡𑌶𑍀𑌮𑍍 ॥ 36 ॥

𑌕𑍁𑌸𑍁𑌮𑌦𑌶𑌨-𑌨𑌾𑌮𑌾 𑌸𑌰𑍍𑌵-𑌗𑌂𑌧𑌰𑍍𑌵-𑌰𑌾𑌜𑌃
𑌶𑌶𑌿𑌧𑌰𑌵𑌰-𑌮𑍌𑌲𑍇𑌰𑍍𑌦𑍇𑌵𑌦𑍇𑌵𑌸𑍍𑌯 𑌦𑌾𑌸𑌃 ।
𑌸 𑌖𑌲𑍁 𑌨𑌿𑌜-𑌮𑌹𑌿𑌮𑍍𑌨𑍋 𑌭𑍍𑌰𑌷𑍍𑌟 𑌏𑌵𑌾𑌸𑍍𑌯 𑌰𑍋𑌷𑌾𑌤𑍍
𑌸𑍍𑌤𑌵𑌨𑌮𑌿𑌦𑌮𑌕𑌾𑌰𑍍𑌷𑍀𑌦𑍍 𑌦𑌿𑌵𑍍𑌯-𑌦𑌿𑌵𑍍𑌯𑌂 𑌮𑌹𑌿𑌮𑍍𑌨𑌃 ॥ 3𑍭 ॥

𑌸𑍁𑌰𑌗𑍁𑌰𑍁𑌮𑌭𑌿𑌪𑍂𑌜𑍍𑌯 𑌸𑍍𑌵𑌰𑍍𑌗-𑌮𑍋𑌕𑍍𑌷𑍈𑌕-𑌹𑍇𑌤𑍁𑌂
𑌪𑌠𑌤𑌿 𑌯𑌦𑌿 𑌮𑌨𑍁𑌷𑍍𑌯𑌃 𑌪𑍍𑌰𑌾𑌂𑌜𑌲𑌿𑌰𑍍𑌨𑌾𑌨𑍍𑌯-𑌚𑍇𑌤𑌾𑌃 ।
𑌵𑍍𑌰𑌜𑌤𑌿 𑌶𑌿𑌵-𑌸𑌮𑍀𑌪𑌂 𑌕𑌿𑌨𑍍𑌨𑌰𑍈𑌃 𑌸𑍍𑌤𑍂𑌯𑌮𑌾𑌨𑌃
𑌸𑍍𑌤𑌵𑌨𑌮𑌿𑌦𑌮𑌮𑍋𑌘𑌂 𑌪𑍁𑌷𑍍𑌪𑌦𑌂𑌤𑌪𑍍𑌰𑌣𑍀𑌤𑌮𑍍 ॥ 3𑍮 ॥

𑌶𑍍𑌰𑍀 𑌪𑍁𑌷𑍍𑌪𑌦𑌂𑌤-𑌮𑍁𑌖-𑌪𑌂𑌕𑌜-𑌨𑌿𑌰𑍍𑌗𑌤𑍇𑌨
𑌸𑍍𑌤𑍋𑌤𑍍𑌰𑍇𑌣 𑌕𑌿𑌲𑍍𑌬𑌿𑌷-𑌹𑌰𑍇𑌣 𑌹𑌰-𑌪𑍍𑌰𑌿𑌯𑍇𑌣 ।
𑌕𑌂𑌠𑌸𑍍𑌥𑌿𑌤𑍇𑌨 𑌪𑌠𑌿𑌤𑍇𑌨 𑌸𑌮𑌾𑌹𑌿𑌤𑍇𑌨
𑌸𑍁𑌪𑍍𑌰𑍀𑌣𑌿𑌤𑍋 𑌭𑌵𑌤𑌿 𑌭𑍂𑌤𑌪𑌤𑌿𑌰𑍍𑌮𑌹𑍇𑌶𑌃 ॥ 43 ॥

𑌆𑌸𑌮𑌾𑌪𑍍𑌤𑌮𑌿𑌦𑌂 𑌸𑍍𑌤𑍋𑌤𑍍𑌰𑌂 𑌪𑍁𑌣𑍍𑌯𑌂 𑌗𑌂𑌧𑌰𑍍𑌵-𑌭𑌾𑌷𑌿𑌤𑌮𑍍 ।
𑌅𑌨𑍌𑌪𑌮𑍍𑌯𑌂 𑌮𑌨𑍋𑌹𑌾𑌰𑌿 𑌸𑌰𑍍𑌵𑌮𑍀𑌶𑍍𑌵𑌰𑌵𑌰𑍍𑌣𑌨𑌮𑍍 ॥ 3𑍯 ॥

𑌤𑌵 𑌤𑌤𑍍𑌤𑍍𑌵𑌂 𑌨 𑌜𑌾𑌨𑌾𑌮𑌿 𑌕𑍀𑌦𑍃𑌶𑍋𑌽𑌸𑌿 𑌮𑌹𑍇𑌶𑍍𑌵𑌰 ।
𑌯𑌾𑌦𑍃𑌶𑍋𑌽𑌸𑌿 𑌮𑌹𑌾𑌦𑍇𑌵 𑌤𑌾𑌦𑍃𑌶𑌾𑌯 𑌨𑌮𑍋 𑌨𑌮𑌃 ॥ 41 ॥

𑌏𑌕𑌕𑌾𑌲𑌂 𑌦𑍍𑌵𑌿𑌕𑌾𑌲𑌂 𑌵𑌾 𑌤𑍍𑌰𑌿𑌕𑌾𑌲𑌂 𑌯𑌃 𑌪𑌠𑍇𑌨𑍍𑌨𑌰𑌃 ।
𑌸𑌰𑍍𑌵𑌪𑌾𑌪-𑌵𑌿𑌨𑌿𑌰𑍍𑌮𑍁𑌕𑍍𑌤𑌃 𑌶𑌿𑌵 𑌲𑍋𑌕𑍇 𑌮𑌹𑍀𑌯𑌤𑍇 ॥ 42 ॥

𑌇𑌤𑍍𑌯𑍇𑌷𑌾 𑌵𑌾𑌙𑍍𑌮𑌯𑍀 𑌪𑍂𑌜𑌾 𑌶𑍍𑌰𑍀𑌮𑌚𑍍𑌛𑌂𑌕𑌰-𑌪𑌾𑌦𑌯𑍋𑌃 ।
𑌅𑌰𑍍𑌪𑌿𑌤𑌾 𑌤𑍇𑌨 𑌦𑍇𑌵𑍇𑌶𑌃 𑌪𑍍𑌰𑍀𑌯𑌤𑌾𑌂 𑌮𑍇 𑌸𑌦𑌾𑌶𑌿𑌵𑌃 ॥ 40 ॥

॥ 𑌇𑌤𑌿 𑌶𑍍𑌰𑍀 𑌪𑍁𑌷𑍍𑌪𑌦𑌂𑌤 𑌵𑌿𑌰𑌚𑌿𑌤𑌂 𑌶𑌿𑌵𑌮𑌹𑌿𑌮𑍍𑌨𑌃 𑌸𑍍𑌤𑍋𑌤𑍍𑌰𑌂 𑌸𑌮𑌾𑌪𑍍𑌤𑌮𑍍 ॥