Dhanyashtakam - Grantha | Vaidika Vignanam

(𑌪𑍍𑌰𑌹𑌰𑍍𑌷𑌣𑍀𑌵𑍃𑌤𑍍𑌤𑌮𑍍 -)
𑌤𑌜𑍍𑌜𑍍𑌞𑌾𑌨𑌂 𑌪𑍍𑌰𑌶𑌮𑌕𑌰𑌂 𑌯𑌦𑌿𑌂𑌦𑍍𑌰𑌿𑌯𑌾𑌣𑌾𑌂
𑌤𑌜𑍍𑌜𑍍𑌞𑍇𑌯𑌂 𑌯𑌦𑍁𑌪𑌨𑌿𑌷𑌤𑍍𑌸𑍁 𑌨𑌿𑌶𑍍𑌚𑌿𑌤𑌾𑌰𑍍𑌥𑌮𑍍 ।
𑌤𑍇 𑌧𑌨𑍍𑌯𑌾 𑌭𑍁𑌵𑌿 𑌪𑌰𑌮𑌾𑌰𑍍𑌥𑌨𑌿𑌶𑍍𑌚𑌿𑌤𑍇𑌹𑌾𑌃
𑌶𑍇𑌷𑌾𑌸𑍍𑌤𑍁 𑌭𑍍𑌰𑌮𑌨𑌿𑌲𑌯𑍇 𑌪𑌰𑌿𑌭𑍍𑌰𑌮𑌂𑌤𑌃 ॥ 1॥

(𑌵𑌸𑌂𑌤𑌤𑌿𑌲𑌕𑌾𑌵𑍃𑌤𑍍𑌤𑌮𑍍 -)
𑌆𑌦𑍌 𑌵𑌿𑌜𑌿𑌤𑍍𑌯 𑌵𑌿𑌷𑌯𑌾𑌨𑍍𑌮𑌦𑌮𑍋𑌹𑌰𑌾𑌗-
𑌦𑍍𑌵𑍇𑌷𑌾𑌦𑌿𑌶𑌤𑍍𑌰𑍁𑌗𑌣𑌮𑌾𑌹𑍃𑌤𑌯𑍋𑌗𑌰𑌾𑌜𑍍𑌯𑌾𑌃 ।
𑌜𑍍𑌞𑌾𑌤𑍍𑌵𑌾 𑌮𑌤𑌂 𑌸𑌮𑌨𑍁𑌭𑍂𑌯𑌪𑌰𑌾𑌤𑍍𑌮𑌵𑌿𑌦𑍍𑌯𑌾-
𑌕𑌾𑌂𑌤𑌾𑌸𑍁𑌖𑌂 𑌵𑌨𑌗𑍃𑌹𑍇 𑌵𑌿𑌚𑌰𑌂𑌤𑌿 𑌧𑌨𑍍𑌯𑌾𑌃 ॥ 2॥

𑌤𑍍𑌯𑌕𑍍𑌤𑍍𑌵𑌾 𑌗𑍃𑌹𑍇 𑌰𑌤𑌿𑌮𑌧𑍋𑌗𑌤𑌿𑌹𑍇𑌤𑍁𑌭𑍂𑌤𑌾𑌮𑍍
𑌆𑌤𑍍𑌮𑍇𑌚𑍍𑌛𑌯𑍋𑌪𑌨𑌿𑌷𑌦𑌰𑍍𑌥𑌰𑌸𑌂 𑌪𑌿𑌬𑌂𑌤𑌃 ।
𑌵𑍀𑌤𑌸𑍍𑌪𑍃𑌹𑌾 𑌵𑌿𑌷𑌯𑌭𑍋𑌗𑌪𑌦𑍇 𑌵𑌿𑌰𑌕𑍍𑌤𑌾
𑌧𑌨𑍍𑌯𑌾𑌶𑍍𑌚𑌰𑌂𑌤𑌿 𑌵𑌿𑌜𑌨𑍇𑌷𑍁 𑌵𑌿𑌰𑌕𑍍𑌤𑌸𑌂𑌗𑌾𑌃 ॥ 3॥

𑌤𑍍𑌯𑌕𑍍𑌤𑍍𑌵𑌾 𑌮𑌮𑌾𑌹𑌮𑌿𑌤𑌿 𑌬𑌂𑌧𑌕𑌰𑍇 𑌪𑌦𑍇 𑌦𑍍𑌵𑍇
𑌮𑌾𑌨𑌾𑌵𑌮𑌾𑌨𑌸𑌦𑍃𑌶𑌾𑌃 𑌸𑌮𑌦𑌰𑍍𑌶𑌿𑌨𑌶𑍍𑌚 ।
𑌕𑌰𑍍𑌤𑌾𑌰𑌮𑌨𑍍𑌯𑌮𑌵𑌗𑌮𑍍𑌯 𑌤𑌦𑌰𑍍𑌪𑌿𑌤𑌾𑌨𑌿
𑌕𑍁𑌰𑍍𑌵𑌂𑌤𑌿 𑌕𑌰𑍍𑌮𑌪𑌰𑌿𑌪𑌾𑌕𑌫𑌲𑌾𑌨𑌿 𑌧𑌨𑍍𑌯𑌾𑌃 ॥ 4॥

𑌤𑍍𑌯𑌕𑍍𑌤𑍍𑌵𑍀𑌷𑌣𑌾𑌤𑍍𑌰𑌯𑌮𑌵𑍇𑌕𑍍𑌷𑌿𑌤𑌮𑍋𑌕𑍍𑌷𑌮𑌰𑍍𑌗𑌾
𑌭𑍈𑌕𑍍𑌷𑌾𑌮𑍃𑌤𑍇𑌨 𑌪𑌰𑌿𑌕𑌲𑍍𑌪𑌿𑌤𑌦𑍇𑌹𑌯𑌾𑌤𑍍𑌰𑌾𑌃 ।
𑌜𑍍𑌯𑍋𑌤𑌿𑌃 𑌪𑌰𑌾𑌤𑍍𑌪𑌰𑌤𑌰𑌂 𑌪𑌰𑌮𑌾𑌤𑍍𑌮𑌸𑌂𑌜𑍍𑌞𑌂
𑌧𑌨𑍍𑌯𑌾 𑌦𑍍𑌵𑌿𑌜𑌾𑌰𑌹𑌸𑌿 𑌹𑍃𑌦𑍍𑌯𑌵𑌲𑍋𑌕𑌯𑌂𑌤𑌿 ॥ 5॥

𑌨𑌾𑌸𑌨𑍍𑌨 𑌸𑌨𑍍𑌨 𑌸𑌦𑌸𑌨𑍍𑌨 𑌮𑌹𑌸𑌨𑍍𑌨𑌚𑌾𑌣𑍁
𑌨 𑌸𑍍𑌤𑍍𑌰𑍀 𑌪𑍁𑌮𑌾𑌨𑍍𑌨 𑌚 𑌨𑌪𑍁𑌂𑌸𑌕𑌮𑍇𑌕𑌬𑍀𑌜𑌮𑍍 ।
𑌯𑍈𑌰𑍍𑌬𑍍𑌰𑌹𑍍𑌮 𑌤𑌤𑍍𑌸𑌮𑌮𑍁𑌪𑌾𑌸𑌿𑌤𑌮𑍇𑌕𑌚𑌿𑌤𑍍𑌤𑍈𑌃
𑌧𑌨𑍍𑌯𑌾 𑌵𑌿𑌰𑍇𑌜𑍁𑌰𑌿𑌤𑍍𑌤𑌰𑍇𑌭𑌵𑌪𑌾𑌶𑌬𑌦𑍍𑌧𑌾𑌃 ॥ 6॥

𑌅𑌜𑍍𑌞𑌾𑌨𑌪𑌂𑌕𑌪𑌰𑌿𑌮𑌗𑍍𑌨𑌮𑌪𑍇𑌤𑌸𑌾𑌰𑌂
𑌦𑍁𑌃𑌖𑌾𑌲𑌯𑌂 𑌮𑌰𑌣𑌜𑌨𑍍𑌮𑌜𑌰𑌾𑌵𑌸𑌕𑍍𑌤𑌮𑍍 ।
𑌸𑌂𑌸𑌾𑌰𑌬𑌂𑌧𑌨𑌮𑌨𑌿𑌤𑍍𑌯𑌮𑌵𑍇𑌕𑍍𑌷𑍍𑌯 𑌧𑌨𑍍𑌯𑌾
𑌜𑍍𑌞𑌾𑌨𑌾𑌸𑌿𑌨𑌾 𑌤𑌦𑌵𑌶𑍀𑌰𑍍𑌯 𑌵𑌿𑌨𑌿𑌶𑍍𑌚𑌯𑌂𑌤𑌿 ॥ 𑍭॥

𑌶𑌾𑌂𑌤𑍈𑌰𑌨𑌨𑍍𑌯𑌮𑌤𑌿𑌭𑌿𑌰𑍍𑌮𑌧𑍁𑌰𑌸𑍍𑌵𑌭𑌾𑌵𑍈𑌃
𑌏𑌕𑌤𑍍𑌵𑌨𑌿𑌶𑍍𑌚𑌿𑌤𑌮𑌨𑍋𑌭𑌿𑌰𑌪𑍇𑌤𑌮𑍋𑌹𑍈𑌃 ।
𑌸𑌾𑌕𑌂 𑌵𑌨𑍇𑌷𑍁 𑌵𑌿𑌜𑌿𑌤𑌾𑌤𑍍𑌮𑌪𑌦𑌸𑍍𑌵𑌰𑍁𑌪𑌂
𑌤𑌦𑍍𑌵𑌸𑍍𑌤𑍁 𑌸𑌮𑍍𑌯𑌗𑌨𑌿𑌶𑌂 𑌵𑌿𑌮𑍃𑌶𑌂𑌤𑌿 𑌧𑌨𑍍𑌯𑌾𑌃 ॥ 𑍮॥

(𑌮𑌾𑌲𑌿𑌨𑍀𑌵𑍃𑌤𑍍𑌤𑌮𑍍 -)
𑌅𑌹𑌿𑌮𑌿𑌵 𑌜𑌨𑌯𑍋𑌗𑌂 𑌸𑌰𑍍𑌵𑌦𑌾 𑌵𑌰𑍍𑌜𑌯𑍇𑌦𑍍𑌯𑌃
𑌕𑍁𑌣𑌪𑌮𑌿𑌵 𑌸𑍁𑌨𑌾𑌰𑍀𑌂 𑌤𑍍𑌯𑌕𑍍𑌤𑍁𑌕𑌾𑌮𑍋 𑌵𑌿𑌰𑌾𑌗𑍀 ।
𑌵𑌿𑌷𑌮𑌿𑌵 𑌵𑌿𑌷𑌯𑌾𑌨𑍍𑌯𑍋 𑌮𑌨𑍍𑌯𑌮𑌾𑌨𑍋 𑌦𑍁𑌰𑌂𑌤𑌾𑌨𑍍
𑌜𑌯𑌤𑌿 𑌪𑌰𑌮𑌹𑌂𑌸𑍋 𑌮𑍁𑌕𑍍𑌤𑌿𑌭𑌾𑌵𑌂 𑌸𑌮𑍇𑌤𑌿 ॥ 𑍯॥

(𑌶𑌾𑌰𑍍𑌦𑍂𑌲𑌵𑌿𑌕𑍍𑌰𑍀𑌡𑌿𑌤𑌵𑍃𑌤𑍍𑌤𑌮𑍍 -)
𑌸𑌂𑌪𑍂𑌰𑍍𑌣𑌂 𑌜𑌗𑌦𑍇𑌵 𑌨𑌂𑌦𑌨𑌵𑌨𑌂 𑌸𑌰𑍍𑌵𑍇𑌽𑌪𑌿 𑌕𑌲𑍍𑌪𑌦𑍍𑌰𑍁𑌮𑌾
𑌗𑌾𑌂𑌗𑌂 𑌵𑌰𑌿 𑌸𑌮𑌸𑍍𑌤𑌵𑌾𑌰𑌿𑌨𑌿𑌵𑌹𑌃 𑌪𑍁𑌣𑍍𑌯𑌾𑌃 𑌸𑌮𑌸𑍍𑌤𑌾𑌃 𑌕𑍍𑌰𑌿𑌯𑌾𑌃 ।
𑌵𑌾𑌚𑌃 𑌪𑍍𑌰𑌾𑌕𑍃𑌤𑌸𑌂𑌸𑍍𑌕𑍃𑌤𑌾𑌃 𑌶𑍍𑌰𑍁𑌤𑌿𑌶𑌿𑌰𑍋𑌵𑌾𑌰𑌾𑌣𑌸𑍀 𑌮𑍇𑌦𑌿𑌨𑍀
𑌸𑌰𑍍𑌵𑌾𑌵𑌸𑍍𑌥𑌿𑌤𑌿𑌰𑌸𑍍𑌯 𑌵𑌸𑍍𑌤𑍁𑌵𑌿𑌷𑌯𑌾 𑌦𑍃𑌷𑍍𑌟𑍇 𑌪𑌰𑌬𑍍𑌰𑌹𑍍𑌮𑌣𑌿 ॥ 10॥

॥ 𑌇𑌤𑌿 𑌶𑍍𑌰𑍀𑌮𑌦𑍍 𑌶𑌂𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌂 𑌧𑌨𑍍𑌯𑌾𑌷𑍍𑌟𑌕𑌂 𑌸𑌮𑌾𑌪𑍍𑌤𑌮𑍍 ॥

Browse Related Categories: