॥ 𑌇𑌤𑌿 𑌶𑍍𑌰𑍀𑌮𑌾𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿 𑌵𑌿𑌦𑍁𑌰𑌵𑌾𑌕𑍍𑌯𑍇 𑌚𑌤𑍍𑌵𑌾𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥

𑌵𑌿𑌦𑍁𑌰 𑌉𑌵𑌾𑌚 ।

𑌯𑍋𑌽𑌭𑍍𑌯𑌰𑍍𑌥𑌿𑌤𑌃 𑌸𑌦𑍍𑌭𑌿𑌰𑌸𑌜𑍍𑌜𑌮𑌾𑌨𑌃
𑌕𑌰𑍋𑌤𑍍𑌯𑌰𑍍𑌥𑌂 𑌶𑌕𑍍𑌤𑌿𑌮𑌹𑌾𑌪𑌯𑌿𑌤𑍍𑌵𑌾 ।
𑌕𑍍𑌷𑌿𑌪𑍍𑌰𑌂 𑌯𑌶𑌸𑍍𑌤𑌂 𑌸𑌮𑍁𑌪𑍈𑌤𑌿 𑌸𑌂𑌤𑌮𑌲𑌂
𑌪𑍍𑌰𑌸𑌨𑍍𑌨𑌾 𑌹𑌿 𑌸𑍁𑌖𑌾𑌯 𑌸𑌂𑌤𑌃 ॥ 1॥

𑌮𑌹𑌾𑌂𑌤𑌮𑌪𑍍𑌯𑌰𑍍𑌥𑌮𑌧𑌰𑍍𑌮𑌯𑍁𑌕𑍍𑌤𑌂
𑌯𑌃 𑌸𑌂𑌤𑍍𑌯𑌜𑌤𑍍𑌯𑌨𑍁𑌪𑌾𑌕𑍍𑌰𑍁𑌷𑍍𑌟 𑌏𑌵 ।
𑌸𑍁𑌖𑌂 𑌸 𑌦𑍁𑌃𑌖𑌾𑌨𑍍𑌯𑌵𑌮𑍁𑌚𑍍𑌯 𑌶𑍇𑌤𑍇
𑌜𑍀𑌰𑍍𑌣𑌾𑌂 𑌤𑍍𑌵𑌚𑌂 𑌸𑌰𑍍𑌪 𑌇𑌵𑌾𑌵𑌮𑍁𑌚𑍍𑌯 ॥ 2॥

𑌅𑌨𑍃𑌤𑌂 𑌚 𑌸𑌮𑍁𑌤𑍍𑌕𑌰𑍍𑌷𑍇 𑌰𑌾𑌜𑌗𑌾𑌮𑌿 𑌚 𑌪𑍈𑌶𑍁𑌨𑌮𑍍 ।
𑌗𑍁𑌰𑍋𑌶𑍍𑌚𑌾𑌲𑍀𑌕 𑌨𑌿𑌰𑍍𑌬𑌂𑌧𑌃 𑌸𑌮𑌾𑌨𑌿 𑌬𑍍𑌰𑌹𑍍𑌮𑌹𑌤𑍍𑌯𑌯𑌾 ॥ 3॥

𑌅𑌸𑍂𑌯𑍈𑌕 𑌪𑌦𑌂 𑌮𑍃𑌤𑍍𑌯𑍁𑌰𑌤𑌿𑌵𑌾𑌦𑌃 𑌶𑍍𑌰𑌿𑌯𑍋 𑌵𑌧𑌃 ।
𑌅𑌶𑍁𑌶𑍍𑌰𑍂𑌷𑌾 𑌤𑍍𑌵𑌰𑌾 𑌶𑍍𑌲𑌾𑌘𑌾 𑌵𑌿𑌦𑍍𑌯𑌾𑌯𑌾𑌃 𑌶𑌤𑍍𑌰𑌵𑌸𑍍𑌤𑍍𑌰𑌯𑌃 ॥ 4॥

𑌸𑍁𑌖𑌾𑌰𑍍𑌥𑌿𑌨𑌃 𑌕𑍁𑌤𑍋 𑌵𑌿𑌦𑍍𑌯𑌾 𑌨𑌾𑌸𑍍𑌤𑌿 𑌵𑌿𑌦𑍍𑌯𑌾𑌰𑍍𑌥𑌿𑌨𑌃 𑌸𑍁𑌖𑌮𑍍 ।
𑌸𑍁𑌖𑌾𑌰𑍍𑌥𑍀 𑌵𑌾 𑌤𑍍𑌯𑌜𑍇𑌦𑍍𑌵𑌿𑌦𑍍𑌯𑌾𑌂 𑌵𑌿𑌦𑍍𑌯𑌾𑌰𑍍𑌥𑍀 𑌵𑌾 𑌸𑍁𑌖𑌂 𑌤𑍍𑌯𑌜𑍇𑌤𑍍 ॥ 5॥

𑌨𑌾𑌗𑍍𑌨𑌿𑌸𑍍𑌤𑍃𑌪𑍍𑌯𑌤𑌿 𑌕𑌾𑌷𑍍𑌠𑌾𑌨𑌾𑌂 𑌨𑌾𑌪𑌗𑌾𑌨𑌾𑌂 𑌮𑌹𑍋𑌦𑌧𑌿𑌃 ।
𑌨𑌾𑌂𑌤𑌕𑌃 𑌸𑌰𑍍𑌵𑌭𑍂𑌤𑌾𑌨𑌾𑌂 𑌨 𑌪𑍁𑌂𑌸𑌾𑌂 𑌵𑌾𑌮𑌲𑍋𑌚𑌨𑌾 ॥ 6॥

𑌆𑌶𑌾 𑌧𑍃𑌤𑌿𑌂 𑌹𑌂𑌤𑌿 𑌸𑌮𑍃𑌦𑍍𑌧𑌿𑌮𑌂𑌤𑌕𑌃
𑌕𑍍𑌰𑍋𑌧𑌃 𑌶𑍍𑌰𑌿𑌯𑌂 𑌹𑌂𑌤𑌿 𑌯𑌶𑌃 𑌕𑌦𑌰𑍍𑌯𑌤𑌾 ।
𑌅𑌪𑌾𑌲𑌨𑌂 𑌹𑌂𑌤𑌿 𑌪𑌶𑍂𑌂𑌶𑍍𑌚 𑌰𑌾𑌜𑌨𑍍𑌨𑍍
𑌏𑌕𑌃 𑌕𑍍𑌰𑍁𑌦𑍍𑌧𑍋 𑌬𑍍𑌰𑌾𑌹𑍍𑌮𑌣𑍋 𑌹𑌂𑌤𑌿 𑌰𑌾𑌷𑍍𑌟𑍍𑌰𑌮𑍍 ॥ 𑍭॥

𑌅𑌜𑌶𑍍𑌚 𑌕𑌾𑌂𑌸𑍍𑌯𑌂 𑌚 𑌰𑌥𑌶𑍍𑌚 𑌨𑌿𑌤𑍍𑌯𑌂
𑌮𑌧𑍍𑌵𑌾𑌕𑌰𑍍𑌷𑌃 𑌶𑌕𑍁𑌨𑌿𑌃 𑌶𑍍𑌰𑍋𑌤𑍍𑌰𑌿𑌯𑌶𑍍 𑌚 ।
𑌵𑍃𑌦𑍍𑌧𑍋 𑌜𑍍𑌞𑌾𑌤𑌿𑌰𑌵𑌸𑌨𑍍𑌨𑍋 𑌵𑌯𑌸𑍍𑌯
𑌏𑌤𑌾𑌨𑌿 𑌤𑍇 𑌸𑌂𑌤𑍁 𑌗𑍃𑌹𑍇 𑌸𑌦𑍈𑌵 ॥ 𑍮॥

𑌅𑌜𑍋𑌕𑍍𑌷𑌾 𑌚𑌂𑌦𑌨𑌂 𑌵𑍀𑌣𑌾 𑌆𑌦𑌰𑍍𑌶𑍋 𑌮𑌧𑍁𑌸𑌰𑍍𑌪𑌿𑌷𑍀 ।
𑌵𑌿𑌷𑌮𑍌𑌦𑍁𑌂𑌬𑌰𑌂 𑌶𑌂𑌖𑌃 𑌸𑍍𑌵𑌰𑍍𑌣𑌂 𑌨𑌾𑌭𑌿𑌶𑍍𑌚 𑌰𑍋𑌚𑌨𑌾 ॥ 𑍯॥

𑌗𑍃𑌹𑍇 𑌸𑍍𑌥𑌾𑌪𑌯𑌿𑌤𑌵𑍍𑌯𑌾𑌨𑌿 𑌧𑌨𑍍𑌯𑌾𑌨𑌿 𑌮𑌨𑍁𑌰𑌬𑍍𑌰𑌵𑍀𑌤𑍍 ।
𑌦𑍇𑌵 𑌬𑍍𑌰𑌾𑌹𑍍𑌮𑌣 𑌪𑍂𑌜𑌾𑌰𑍍𑌥𑌮𑌤𑌿𑌥𑍀𑌨𑌾𑌂 𑌚 𑌭𑌾𑌰𑌤 ॥ 10॥

𑌇𑌦𑌂 𑌚 𑌤𑍍𑌵𑌾𑌂 𑌸𑌰𑍍𑌵𑌪𑌰𑌂 𑌬𑍍𑌰𑌵𑍀𑌮𑌿
𑌪𑍁𑌣𑍍𑌯𑌂 𑌪𑌦𑌂 𑌤𑌾𑌤 𑌮𑌹𑌾𑌵𑌿𑌶𑌿𑌷𑍍𑌟𑌮𑍍 ।
𑌨 𑌜𑌾𑌤𑍁 𑌕𑌾𑌮𑌾𑌨𑍍𑌨 𑌭𑌯𑌾𑌨𑍍𑌨 𑌲𑍋𑌭𑌾𑌦𑍍
𑌧𑌰𑍍𑌮𑌂 𑌤𑍍𑌯𑌜𑍇𑌜𑍍𑌜𑍀𑌵𑌿𑌤𑌸𑍍𑌯𑌾𑌪𑌿 𑌹𑍇𑌤𑍋𑌃 ॥ 11॥

𑌨𑌿𑌤𑍍𑌯𑍋 𑌧𑌰𑍍𑌮𑌃 𑌸𑍁𑌖𑌦𑍁𑌃𑌖𑍇 𑌤𑍍𑌵𑌨𑌿𑌤𑍍𑌯𑍇
𑌨𑌿𑌤𑍍𑌯𑍋 𑌜𑍀𑌵𑍋 𑌧𑌾𑌤𑍁𑌰𑌸𑍍𑌯 𑌤𑍍𑌵𑌨𑌿𑌤𑍍𑌯𑌃 ।
𑌤𑍍𑌯𑌕𑍍𑌤𑍍𑌵𑌾𑌨𑌿𑌤𑍍𑌯𑌂 𑌪𑍍𑌰𑌤𑌿𑌤𑌿𑌷𑍍𑌠𑌸𑍍𑌵 𑌨𑌿𑌤𑍍𑌯𑍇
𑌸𑌂𑌤𑍁𑌷𑍍𑌯 𑌤𑍍𑌵𑌂 𑌤𑍋𑌷 𑌪𑌰𑍋 𑌹𑌿 𑌲𑌾𑌭𑌃 ॥ 12॥

𑌮𑌹𑌾𑌬𑌲𑌾𑌨𑍍𑌪𑌶𑍍𑌯 𑌮𑌨𑌾𑌨𑍁𑌭𑌾𑌵𑌾𑌨𑍍
𑌪𑍍𑌰𑌶𑌾𑌸𑍍𑌯 𑌭𑍂𑌮𑌿𑌂 𑌧𑌨𑌧𑌾𑌨𑍍𑌯 𑌪𑍂𑌰𑍍𑌣𑌾𑌮𑍍 ।
𑌰𑌾𑌜𑍍𑌯𑌾𑌨𑌿 𑌹𑌿𑌤𑍍𑌵𑌾 𑌵𑌿𑌪𑍁𑌲𑌾𑌂𑌶𑍍𑌚 𑌭𑍋𑌗𑌾𑌨𑍍
𑌗𑌤𑌾𑌨𑍍𑌨𑌰𑍇𑌂𑌦𑍍𑌰𑌾𑌨𑍍𑌵𑌶𑌮𑌂𑌤𑌕𑌸𑍍𑌯 ॥ 13॥

𑌮𑍃𑌤𑌂 𑌪𑍁𑌤𑍍𑌰𑌂 𑌦𑍁𑌃𑌖𑌪𑍁𑌷𑍍𑌟𑌂 𑌮𑌨𑍁𑌷𑍍𑌯𑌾
𑌉𑌤𑍍𑌕𑍍𑌷𑌿𑌪𑍍𑌯 𑌰𑌾𑌜𑌨𑍍𑌸𑍍𑌵𑌗𑍃𑌹𑌾𑌨𑍍𑌨𑌿𑌰𑍍𑌹𑌰𑌂𑌤𑌿 ।
𑌤𑌂 𑌮𑍁𑌕𑍍𑌤𑌕𑍇𑌶𑌾𑌃 𑌕𑌰𑍁𑌣𑌂 𑌰𑍁𑌦𑌂𑌤𑌶𑍍
𑌚𑌿𑌤𑌾𑌮𑌧𑍍𑌯𑍇 𑌕𑌾𑌷𑍍𑌠𑌮𑌿𑌵 𑌕𑍍𑌷𑌿𑌪𑌂𑌤𑌿 ॥ 14॥

𑌅𑌨𑍍𑌯𑍋 𑌧𑌨𑌂 𑌪𑍍𑌰𑍇𑌤𑌗𑌤𑌸𑍍𑌯 𑌭𑍁𑌂𑌕𑍍𑌤𑍇
𑌵𑌯𑌾𑌂𑌸𑌿 𑌚𑌾𑌗𑍍𑌨𑌿𑌶𑍍𑌚 𑌶𑌰𑍀𑌰𑌧𑌾𑌤𑍂𑌨𑍍 ।
𑌦𑍍𑌵𑌾𑌭𑍍𑌯𑌾𑌮𑌯𑌂 𑌸𑌹 𑌗𑌚𑍍𑌛𑌤𑍍𑌯𑌮𑍁𑌤𑍍𑌰
𑌪𑍁𑌣𑍍𑌯𑍇𑌨 𑌪𑌾𑌪𑍇𑌨 𑌚 𑌵𑍇𑌷𑍍𑌟𑍍𑌯𑌮𑌾𑌨𑌃 ॥ 15॥

𑌉𑌤𑍍𑌸𑍃𑌜𑍍𑌯 𑌵𑌿𑌨𑌿𑌵𑌰𑍍𑌤𑌂𑌤𑍇 𑌜𑍍𑌞𑌾𑌤𑌯𑌃 𑌸𑍁𑌹𑍃𑌦𑌃 𑌸𑍁𑌤𑌾𑌃 ।
𑌅𑌗𑍍𑌨𑍌 𑌪𑍍𑌰𑌾𑌸𑍍𑌤𑌂 𑌤𑍁 𑌪𑍁𑌰𑍁𑌷𑌂 𑌕𑌰𑍍𑌮𑌾𑌨𑍍𑌵𑍇𑌤𑌿 𑌸𑍍𑌵𑌯𑌂 𑌕𑍃𑌤𑌮𑍍 ॥ 16॥

𑌅𑌸𑍍𑌮𑌾𑌲𑍍𑌲𑍋𑌕𑌾𑌦𑍂𑌰𑍍𑌧𑍍𑌵𑌮𑌮𑍁𑌷𑍍𑌯 𑌚𑌾𑌧𑍋
𑌮𑌹𑌤𑍍𑌤𑌮𑌸𑍍𑌤𑌿𑌷𑍍𑌠𑌤𑌿 𑌹𑍍𑌯𑌂𑌧𑌕𑌾𑌰𑌮𑍍 ।
𑌤𑌦𑍍𑌵𑍈 𑌮𑌹𑌾𑌮𑍋𑌹𑌨𑌮𑌿𑌂𑌦𑍍𑌰𑌿𑌯𑌾𑌣𑌾𑌂
𑌬𑍁𑌧𑍍𑌯𑌸𑍍𑌵 𑌮𑌾 𑌤𑍍𑌵𑌾𑌂 𑌪𑍍𑌰𑌲𑌭𑍇𑌤 𑌰𑌾𑌜𑌨𑍍 ॥ 1𑍭॥

𑌇𑌦𑌂 𑌵𑌚𑌃 𑌶𑌕𑍍𑌷𑍍𑌯𑌸𑌿 𑌚𑍇𑌦𑍍𑌯𑌥𑌾𑌵𑌨𑍍
𑌨𑌿𑌶𑌮𑍍𑌯 𑌸𑌰𑍍𑌵𑌂 𑌪𑍍𑌰𑌤𑌿𑌪𑌤𑍍𑌤𑍁𑌮𑍇𑌵𑌮𑍍 ।
𑌯𑌶𑌃 𑌪𑌰𑌂 𑌪𑍍𑌰𑌾𑌪𑍍𑌸𑍍𑌯𑌸𑌿 𑌜𑍀𑌵𑌲𑍋𑌕𑍇
𑌭𑌯𑌂 𑌨 𑌚𑌾𑌮𑍁𑌤𑍍𑌰 𑌨 𑌚𑍇𑌹 𑌤𑍇𑌽𑌸𑍍𑌤𑌿 ॥ 1𑍮॥

𑌆𑌤𑍍𑌮𑌾 𑌨𑌦𑍀 𑌭𑌾𑌰𑌤 𑌪𑍁𑌣𑍍𑌯𑌤𑍀𑌰𑍍𑌥𑌾
𑌸𑌤𑍍𑌯𑍋𑌦𑌕𑌾 𑌧𑍃𑌤𑌿𑌕𑍂𑌲𑌾 𑌦𑌮𑍋𑌰𑍍𑌮𑌿𑌃 ।
𑌤𑌸𑍍𑌯𑌾𑌂 𑌸𑍍𑌨𑌾𑌤𑌃 𑌪𑍂𑌯𑌤𑍇 𑌪𑍁𑌣𑍍𑌯𑌕𑌰𑍍𑌮𑌾
𑌪𑍁𑌣𑍍𑌯𑍋 𑌹𑍍𑌯𑌾𑌤𑍍𑌮𑌾 𑌨𑌿𑌤𑍍𑌯𑌮𑌂𑌭𑍋𑌽𑌂𑌭 𑌏𑌵 ॥ 1𑍯॥

𑌕𑌾𑌮𑌕𑍍𑌰𑍋𑌧𑌗𑍍𑌰𑌾𑌹𑌵𑌤𑍀𑌂 𑌪𑌂𑌚𑍇𑌂𑌦𑍍𑌰𑌿𑌯 𑌜𑌲𑌾𑌂 𑌨𑌦𑍀𑌮𑍍 ।
𑌕𑍃𑌤𑍍𑌵𑌾 𑌧𑍃𑌤𑌿𑌮𑌯𑍀𑌂 𑌨𑌾𑌵𑌂 𑌜𑌨𑍍𑌮 𑌦𑍁𑌰𑍍𑌗𑌾𑌣𑌿 𑌸𑌂𑌤𑌰 ॥ 20॥

𑌪𑍍𑌰𑌜𑍍𑌞𑌾 𑌵𑍃𑌦𑍍𑌧𑌂 𑌧𑌰𑍍𑌮𑌵𑍃𑌦𑍍𑌧𑌂 𑌸𑍍𑌵𑌬𑌂𑌧𑍁𑌂
𑌵𑌿𑌦𑍍𑌯𑌾 𑌵𑍃𑌦𑍍𑌧𑌂 𑌵𑌯𑌸𑌾 𑌚𑌾𑌪𑌿 𑌵𑍃𑌦𑍍𑌧𑌮𑍍 ।
𑌕𑌾𑌰𑍍𑌯𑌾𑌕𑌾𑌰𑍍𑌯𑍇 𑌪𑍂𑌜𑌯𑌿𑌤𑍍𑌵𑌾 𑌪𑍍𑌰𑌸𑌾𑌦𑍍𑌯
𑌯𑌃 𑌸𑌂𑌪𑍃𑌚𑍍𑌛𑍇𑌨𑍍𑌨 𑌸 𑌮𑍁𑌹𑍍𑌯𑍇𑌤𑍍𑌕𑌦𑌾 𑌚𑌿𑌤𑍍 ॥ 21॥

𑌧𑍃𑌤𑍍𑌯𑌾 𑌶𑌿𑌶𑍍𑌨𑍋𑌦𑌰𑌂 𑌰𑌕𑍍𑌷𑍇𑌤𑍍𑌪𑌾𑌣𑌿𑌪𑌾𑌦𑌂 𑌚 𑌚𑌕𑍍𑌷𑍁𑌷𑌾 ।
𑌚𑌕𑍍𑌷𑍁𑌃 𑌶𑍍𑌰𑍋𑌤𑍍𑌰𑍇 𑌚 𑌮𑌨𑌸𑌾 𑌮𑌨𑍋 𑌵𑌾𑌚𑌂 𑌚 𑌕𑌰𑍍𑌮𑌣𑌾 ॥ 22॥

𑌨𑌿𑌤𑍍𑌯𑍋𑌦𑌕𑍀 𑌨𑌿𑌤𑍍𑌯𑌯𑌜𑍍𑌞𑍋𑌪𑌵𑍀𑌤𑍀
𑌨𑌿𑌤𑍍𑌯𑌸𑍍𑌵𑌾𑌧𑍍𑌯𑌾𑌯𑍀 𑌪𑌤𑌿𑌤𑌾𑌨𑍍𑌨 𑌵𑌰𑍍𑌜𑍀 ।
𑌋𑌤𑌂 𑌬𑍍𑌰𑍁𑌵𑌨𑍍𑌗𑍁𑌰𑌵𑍇 𑌕𑌰𑍍𑌮 𑌕𑍁𑌰𑍍𑌵𑌨𑍍
𑌨 𑌬𑍍𑌰𑌾𑌹𑍍𑌮𑌣𑌶𑍍𑌚𑍍𑌯𑌵𑌤𑍇 𑌬𑍍𑌰𑌹𑍍𑌮𑌲𑍋𑌕𑌾𑌤𑍍 ॥ 23॥

𑌅𑌧𑍀𑌤𑍍𑌯 𑌵𑍇𑌦𑌾𑌨𑍍𑌪𑌰𑌿𑌸𑌂𑌸𑍍𑌤𑍀𑌰𑍍𑌯 𑌚𑌾𑌗𑍍𑌨𑍀𑌨𑍍
𑌇𑌷𑍍𑌟𑍍𑌵𑌾 𑌯𑌜𑍍𑌞𑍈𑌃 𑌪𑌾𑌲𑌯𑌿𑌤𑍍𑌵𑌾 𑌪𑍍𑌰𑌜𑌾𑌶𑍍 𑌚 ।
𑌗𑍋𑌬𑍍𑌰𑌾𑌹𑍍𑌮𑌣𑌾𑌰𑍍𑌥𑍇 𑌶𑌸𑍍𑌤𑍍𑌰𑌪𑍂𑌤𑌾𑌂𑌤𑌰𑌾𑌤𑍍𑌮𑌾
𑌹𑌤𑌃 𑌸𑌂𑌗𑍍𑌰𑌾𑌮𑍇 𑌕𑍍𑌷𑌤𑍍𑌰𑌿𑌯𑌃 𑌸𑍍𑌵𑌰𑍍𑌗𑌮𑍇𑌤𑌿 ॥ 24॥

𑌵𑍈𑌶𑍍𑌯𑍋𑌽𑌧𑍀𑌤𑍍𑌯 𑌬𑍍𑌰𑌾𑌹𑍍𑌮𑌣𑌾𑌨𑍍𑌕𑍍𑌷𑌤𑍍𑌰𑌿𑌯𑌾𑌂𑌶𑍍 𑌚
𑌧𑌨𑍈𑌃 𑌕𑌾𑌲𑍇 𑌸𑌂𑌵𑌿𑌭𑌜𑍍𑌯𑌾𑌶𑍍𑌰𑌿𑌤𑌾𑌂𑌶𑍍 𑌚 ।
𑌤𑍍𑌰𑍇𑌤𑌾 𑌪𑍂𑌤𑌂 𑌧𑍂𑌮𑌮𑌾𑌘𑍍𑌰𑌾𑌯 𑌪𑍁𑌣𑍍𑌯𑌂
𑌪𑍍𑌰𑍇𑌤𑍍𑌯 𑌸𑍍𑌵𑌰𑍍𑌗𑍇 𑌦𑍇𑌵 𑌸𑍁𑌖𑌾𑌨𑌿 𑌭𑍁𑌂𑌕𑍍𑌤𑍇 ॥ 25॥

𑌬𑍍𑌰𑌹𑍍𑌮𑌕𑍍𑌷𑌤𑍍𑌰𑌂 𑌵𑍈𑌶𑍍𑌯 𑌵𑌰𑍍𑌣𑌂 𑌚 𑌶𑍂𑌦𑍍𑌰𑌃
𑌕𑍍𑌰𑌮𑍇𑌣𑍈𑌤𑌾𑌨𑍍𑌨𑍍𑌯𑌾𑌯𑌤𑌃 𑌪𑍂𑌜𑌯𑌾𑌨𑌃 ।
𑌤𑍁𑌷𑍍𑌟𑍇𑌷𑍍𑌵𑍇𑌤𑍇𑌷𑍍𑌵𑌵𑍍𑌯𑌥𑍋 𑌦𑌗𑍍𑌧𑌪𑌾𑌪𑌸𑍍
𑌤𑍍𑌯𑌕𑍍𑌤𑍍𑌵𑌾 𑌦𑍇𑌹𑌂 𑌸𑍍𑌵𑌰𑍍𑌗𑌸𑍁𑌖𑌾𑌨𑌿 𑌭𑍁𑌂𑌕𑍍𑌤𑍇 ॥ 26॥

𑌚𑌾𑌤𑍁𑌰𑍍𑌵𑌰𑍍𑌣𑍍𑌯𑌸𑍍𑌯𑍈𑌷 𑌧𑌰𑍍𑌮𑌸𑍍𑌤𑌵𑍋𑌕𑍍𑌤𑍋
𑌹𑍇𑌤𑍁𑌂 𑌚𑌾𑌤𑍍𑌰 𑌬𑍍𑌰𑍁𑌵𑌤𑍋 𑌮𑍇 𑌨𑌿𑌬𑍋𑌧 ।
𑌕𑍍𑌷𑌾𑌤𑍍𑌰𑌾𑌦𑍍𑌧𑌰𑍍𑌮𑌾𑌦𑍍𑌧𑍀𑌯𑌤𑍇 𑌪𑌾𑌂𑌡𑍁𑌪𑍁𑌤𑍍𑌰𑌸𑍍
𑌤𑌂 𑌤𑍍𑌵𑌂 𑌰𑌾𑌜𑌨𑍍𑌰𑌾𑌜𑌧𑌰𑍍𑌮𑍇 𑌨𑌿𑌯𑍁𑌂𑌕𑍍𑌷𑍍𑌵 ॥ 2𑍭॥

𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।

𑌏𑌵𑌮𑍇𑌤𑌦𑍍𑌯𑌥𑌾 𑌮𑌾𑌂 𑌤𑍍𑌵𑌮𑌨𑍁𑌶𑌾𑌸𑌤𑌿 𑌨𑌿𑌤𑍍𑌯𑌦𑌾 ।
𑌮𑌮𑌾𑌪𑌿 𑌚 𑌮𑌤𑌿𑌃 𑌸𑍌𑌮𑍍𑌯 𑌭𑌵𑌤𑍍𑌯𑍇𑌵𑌂 𑌯𑌥𑌾𑌤𑍍𑌥 𑌮𑌾𑌮𑍍 ॥ 2𑍮॥

𑌸𑌾 𑌤𑍁 𑌬𑍁𑌦𑍍𑌦𑌿𑌃 𑌕𑍃𑌤𑌾𑌪𑍍𑌯𑍇𑌵𑌂 𑌪𑌾𑌂𑌡𑌵𑌾𑌨𑍍𑌰𑌪𑍍𑌤𑌿 𑌮𑍇 𑌸𑌦𑌾 ।
𑌦𑍁𑌰𑍍𑌯𑍋𑌧𑌨𑌂 𑌸𑌮𑌾𑌸𑌾𑌦𑍍𑌯 𑌪𑍁𑌨𑌰𑍍𑌵𑌿𑌪𑌰𑌿𑌵𑌰𑍍𑌤𑌤𑍇 ॥ 2𑍯॥

𑌨 𑌦𑌿𑌷𑍍𑌟𑌮𑌭𑍍𑌯𑌤𑌿𑌕𑍍𑌰𑌾𑌂𑌤𑍁𑌂 𑌶𑌕𑍍𑌯𑌂 𑌮𑌰𑍍𑌤𑍍𑌯𑍇𑌨 𑌕𑍇𑌨 𑌚𑌿𑌤𑍍 ।
𑌦𑌿𑌷𑍍𑌟𑌮𑍇𑌵 𑌕𑍃𑌤𑌂 𑌮𑌨𑍍𑌯𑍇 𑌪𑍌𑌰𑍁𑌷𑌂 𑌤𑍁 𑌨𑌿𑌰𑌰𑍍𑌥𑌕𑌮𑍍 ॥ 30॥

॥ 𑌇𑌤𑌿 𑌶𑍍𑌰𑍀𑌮𑌾𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿 𑌵𑌿𑌦𑍁𑌰𑌵𑌾𑌕𑍍𑌯𑍇 𑌚𑌤𑍍𑌵𑌾𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥ 40॥

𑌇𑌤𑌿 𑌵𑌿𑌦𑍁𑌰 𑌨𑍀𑌤𑌿 𑌸𑌮𑌾𑌪𑍍𑌤𑌾 ॥