𑌯𑌸𑍍𑌯 𑌚𑌿𑌤𑍍𑌤𑌂 𑌦𑍍𑌰𑌵𑍀𑌭𑍂𑌤𑌂 𑌕𑍃𑌪𑌯𑌾 𑌸𑌰𑍍𑌵𑌜𑌂𑌤𑍁𑌷𑍁 ।
𑌤𑌸𑍍𑌯 𑌜𑍍𑌞𑌾𑌨𑍇𑌨 𑌮𑍋𑌕𑍍𑌷𑍇𑌣 𑌕𑌿𑌂 𑌜𑌟𑌾𑌭𑌸𑍍𑌮𑌲𑍇𑌪𑌨𑍈𑌃 ॥ 01 ॥

𑌏𑌕𑌮𑌪𑍍𑌯𑌕𑍍𑌷𑌰𑌂 𑌯𑌸𑍍𑌤𑍁 𑌗𑍁𑌰𑍁𑌃 𑌶𑌿𑌷𑍍𑌯𑌂 𑌪𑍍𑌰𑌬𑍋𑌧𑌯𑍇𑌤𑍍 ।
𑌪𑍃𑌥𑌿𑌵𑍍𑌯𑌾𑌂 𑌨𑌾𑌸𑍍𑌤𑌿 𑌤𑌦𑍍𑌦𑍍𑌰𑌵𑍍𑌯𑌂 𑌯𑌦𑍍𑌦𑌤𑍍𑌤𑍍𑌵𑌾 𑌸𑍋𑌽𑌨𑍃𑌣𑍀 𑌭𑌵𑍇𑌤𑍍 ॥ 02 ॥

𑌖𑌲𑌾𑌨𑌾𑌂 𑌕𑌂𑌟𑌕𑌾𑌨𑌾𑌂 𑌚 𑌦𑍍𑌵𑌿𑌵𑌿𑌧𑍈𑌵 𑌪𑍍𑌰𑌤𑌿𑌕𑍍𑌰𑌿𑌯𑌾 ।
𑌉𑌪𑌾𑌨𑌨𑍍𑌮𑍁𑌖𑌭𑌂𑌗𑍋 𑌵𑌾 𑌦𑍂𑌰𑌤𑍋 𑌵𑌾 𑌵𑌿𑌸𑌰𑍍𑌜𑌨𑌮𑍍 ॥ 02 ॥

𑌕𑍁𑌚𑍈𑌲𑌿𑌨𑌂 𑌦𑌂𑌤𑌮𑌲𑍋𑌪𑌧𑌾𑌰𑌿𑌣𑌂
𑌬𑌹𑍍𑌵𑌾𑌶𑌿𑌨𑌂 𑌨𑌿𑌷𑍍𑌠𑍁𑌰𑌭𑌾𑌷𑌿𑌣𑌂 𑌚 ।
𑌸𑍂𑌰𑍍𑌯𑍋𑌦𑌯𑍇 𑌚𑌾𑌸𑍍𑌤𑌮𑌿𑌤𑍇 𑌶𑌯𑌾𑌨𑌂
𑌵𑌿𑌮𑍁𑌂𑌚𑌤𑌿 𑌶𑍍𑌰𑍀𑌰𑍍𑌯𑌦𑌿 𑌚𑌕𑍍𑌰𑌪𑌾𑌣𑌿𑌃 ॥ 04 ॥

𑌤𑍍𑌯𑌜𑌂𑌤𑌿 𑌮𑌿𑌤𑍍𑌰𑌾𑌣𑌿 𑌧𑌨𑍈𑌰𑍍𑌵𑌿𑌹𑍀𑌨𑌂
𑌪𑍁𑌤𑍍𑌰𑌾𑌶𑍍𑌚 𑌦𑌾𑌰𑌾𑌶𑍍𑌚 𑌸𑍁𑌹𑍃𑌜𑍍𑌜𑌨𑌾𑌶𑍍𑌚 ।
𑌤𑌮𑌰𑍍𑌥𑌵𑌂𑌤𑌂 𑌪𑍁𑌨𑌰𑌾𑌶𑍍𑌰𑌯𑌂𑌤𑌿
𑌅𑌰𑍍𑌥𑍋 𑌹𑌿 𑌲𑍋𑌕𑍇 𑌮𑌨𑍁𑌷𑍍𑌯𑌸𑍍𑌯 𑌬𑌂𑌧𑍁𑌃 ॥ 05 ॥

𑌅𑌨𑍍𑌯𑌾𑌯𑍋𑌪𑌾𑌰𑍍𑌜𑌿𑌤𑌂 𑌦𑍍𑌰𑌵𑍍𑌯𑌂 𑌦𑌶 𑌵𑌰𑍍𑌷𑌾𑌣𑌿 𑌤𑌿𑌷𑍍𑌠𑌤𑌿 ।
𑌪𑍍𑌰𑌾𑌪𑍍𑌤𑍇 𑌚𑍈𑌕𑌾𑌦𑌶𑍇 𑌵𑌰𑍍𑌷𑍇 𑌸𑌮𑍂𑌲𑌂 𑌤𑌦𑍍𑌵𑌿𑌨𑌶𑍍𑌯𑌤𑌿 ॥ 06 ॥

𑌅𑌯𑍁𑌕𑍍𑌤𑌂 𑌸𑍍𑌵𑌾𑌮𑌿𑌨𑍋 𑌯𑍁𑌕𑍍𑌤𑌂 𑌯𑍁𑌕𑍍𑌤𑌂 𑌨𑍀𑌚𑌸𑍍𑌯 𑌦𑍂𑌷𑌣𑌮𑍍 ।
𑌅𑌮𑍃𑌤𑌂 𑌰𑌾𑌹𑌵𑍇 𑌮𑍃𑌤𑍍𑌯𑍁𑌰𑍍𑌵𑌿𑌷𑌂 𑌶𑌂𑌕𑌰𑌭𑍂𑌷𑌣𑌮𑍍 ॥ 0𑍭 ॥

𑌤𑌦𑍍𑌭𑍋𑌜𑌨𑌂 𑌯𑌦𑍍𑌦𑍍𑌵𑌿𑌜𑌭𑍁𑌕𑍍𑌤𑌶𑍇𑌷𑌂
𑌤𑌤𑍍𑌸𑍌𑌹𑍃𑌦𑌂 𑌯𑌤𑍍𑌕𑍍𑌰𑌿𑌯𑌤𑍇 𑌪𑌰𑌸𑍍𑌮𑌿𑌨𑍍 ।
𑌸𑌾 𑌪𑍍𑌰𑌾𑌜𑍍𑌞𑌤𑌾 𑌯𑌾 𑌨 𑌕𑌰𑍋𑌤𑌿 𑌪𑌾𑌪𑌂
𑌦𑌂𑌭𑌂 𑌵𑌿𑌨𑌾 𑌯𑌃 𑌕𑍍𑌰𑌿𑌯𑌤𑍇 𑌸 𑌧𑌰𑍍𑌮𑌃 ॥ 0𑍮 ॥

𑌮𑌣𑌿𑌰𑍍𑌲𑍁𑌂𑌠𑌤𑌿 𑌪𑌾𑌦𑌾𑌗𑍍𑌰𑍇 𑌕𑌾𑌚𑌃 𑌶𑌿𑌰𑌸𑌿 𑌧𑌾𑌰𑍍𑌯𑌤𑍇 ।
𑌕𑍍𑌰𑌯𑌵𑌿𑌕𑍍𑌰𑌯𑌵𑍇𑌲𑌾𑌯𑌾𑌂 𑌕𑌾𑌚𑌃 𑌕𑌾𑌚𑍋 𑌮𑌣𑌿𑌰𑍍𑌮𑌣𑌿𑌃 ॥ 0𑍯 ॥

𑌅𑌨𑌂𑌤𑌶𑌾𑌸𑍍𑌤𑍍𑌰𑌂 𑌬𑌹𑍁𑌲𑌾𑌶𑍍𑌚 𑌵𑌿𑌦𑍍𑌯𑌾𑌃
𑌸𑍍𑌵𑌲𑍍𑌪𑌶𑍍𑌚 𑌕𑌾𑌲𑍋 𑌬𑌹𑍁𑌵𑌿𑌘𑍍𑌨𑌤𑌾 𑌚 ।
𑌯𑌤𑍍𑌸𑌾𑌰𑌭𑍂𑌤𑌂 𑌤𑌦𑍁𑌪𑌾𑌸𑌨𑍀𑌯𑌾𑌂
𑌹𑌂𑌸𑍋 𑌯𑌥𑌾 𑌕𑍍𑌷𑍀𑌰𑌮𑌿𑌵𑌾𑌂𑌬𑍁𑌮𑌧𑍍𑌯𑌾𑌤𑍍 ॥ 10 ॥

𑌦𑍂𑌰𑌾𑌗𑌤𑌂 𑌪𑌥𑌿 𑌶𑍍𑌰𑌾𑌂𑌤𑌂 𑌵𑍃𑌥𑌾 𑌚 𑌗𑍃𑌹𑌮𑌾𑌗𑌤𑌮𑍍 ।
𑌅𑌨𑌰𑍍𑌚𑌯𑌿𑌤𑍍𑌵𑌾 𑌯𑍋 𑌭𑍁𑌂𑌕𑍍𑌤𑍇 𑌸 𑌵𑍈 𑌚𑌾𑌂𑌡𑌾𑌲 𑌉𑌚𑍍𑌯𑌤𑍇 ॥ 11 ॥

𑌪𑌠𑌂𑌤𑌿 𑌚𑌤𑍁𑌰𑍋 𑌵𑍇𑌦𑌾𑌂𑌧𑌰𑍍𑌮𑌶𑌾𑌸𑍍𑌤𑍍𑌰𑌾𑌣𑍍𑌯𑌨𑍇𑌕𑌶𑌃 ।
𑌆𑌤𑍍𑌮𑌾𑌨𑌂 𑌨𑍈𑌵 𑌜𑌾𑌨𑌂𑌤𑌿 𑌦𑌰𑍍𑌵𑍀 𑌪𑌾𑌕𑌰𑌸𑌂 𑌯𑌥𑌾 ॥ 12 ॥

𑌧𑌨𑍍𑌯𑌾 𑌦𑍍𑌵𑌿𑌜𑌮𑌯𑍀 𑌨𑍌𑌕𑌾 𑌵𑌿𑌪𑌰𑍀𑌤𑌾 𑌭𑌵𑌾𑌰𑍍𑌣𑌵𑍇 ।
𑌤𑌰𑌂𑌤𑍍𑌯𑌧𑍋𑌗𑌤𑌾𑌃 𑌸𑌰𑍍𑌵𑍇 𑌉𑌪𑌰𑌿𑌷𑍍𑌠𑌾𑌃 𑌪𑌤𑌂𑌤𑍍𑌯𑌧𑌃 ॥ 13 ॥

𑌅𑌯𑌮𑌮𑍃𑌤𑌨𑌿𑌧𑌾𑌨𑌂 𑌨𑌾𑌯𑌕𑍋𑌽𑌪𑍍𑌯𑍋𑌷𑌧𑍀𑌨𑌾𑌮𑍍
𑌅𑌮𑍃𑌤𑌮𑌯𑌶𑌰𑍀𑌰𑌃 𑌕𑌾𑌂𑌤𑌿𑌯𑍁𑌕𑍍𑌤𑍋𑌽𑌪𑌿 𑌚𑌂𑌦𑍍𑌰𑌃 ।
𑌭𑌵𑌤𑌿𑌵𑌿𑌗𑌤𑌰𑌶𑍍𑌮𑌿𑌰𑍍𑌮𑌂𑌡𑌲𑌂 𑌪𑍍𑌰𑌾𑌪𑍍𑌯 𑌭𑌾𑌨𑍋𑌃
𑌪𑌰𑌸𑌦𑌨𑌨𑌿𑌵𑌿𑌷𑍍𑌟𑌃 𑌕𑍋 𑌲𑌘𑍁𑌤𑍍𑌵𑌂 𑌨 𑌯𑌾𑌤𑌿 ॥ 14 ॥

𑌅𑌲𑌿𑌰𑌯𑌂 𑌨𑌲𑌿𑌨𑍀𑌦𑌲𑌮𑌧𑍍𑌯𑌗𑌃
𑌕𑌮𑌲𑌿𑌨𑍀𑌮𑌕𑌰𑌂𑌦𑌮𑌦𑌾𑌲𑌸𑌃 ।
𑌵𑌿𑌧𑌿𑌵𑌶𑌾𑌤𑍍𑌪𑌰𑌦𑍇𑌶𑌮𑍁𑌪𑌾𑌗𑌤𑌃
𑌕𑍁𑌟𑌜𑌪𑍁𑌷𑍍𑌪𑌰𑌸𑌂 𑌬𑌹𑍁 𑌮𑌨𑍍𑌯𑌤𑍇 ॥ 15 ॥

𑌪𑍀𑌤𑌃 𑌕𑍍𑌰𑍁𑌦𑍍𑌧𑍇𑌨 𑌤𑌾𑌤𑌶𑍍𑌚𑌰𑌣𑌤𑌲𑌹𑌤𑍋 𑌵𑌲𑍍𑌲𑌭𑍋 𑌯𑍇𑌨 𑌰𑍋𑌷𑌾
𑌦𑌾𑌬𑌾𑌲𑍍𑌯𑌾𑌦𑍍𑌵𑌿𑌪𑍍𑌰𑌵𑌰𑍍𑌯𑍈𑌃 𑌸𑍍𑌵𑌵𑌦𑌨𑌵𑌿𑌵𑌰𑍇 𑌧𑌾𑌰𑍍𑌯𑌤𑍇 𑌵𑍈𑌰𑌿𑌣𑍀 𑌮𑍇 ।
𑌗𑍇𑌹𑌂 𑌮𑍇 𑌛𑍇𑌦𑌯𑌂𑌤𑌿 𑌪𑍍𑌰𑌤𑌿𑌦𑌿𑌵𑌸𑌮𑍁𑌮𑌾𑌕𑌾𑌂𑌤𑌪𑍂𑌜𑌾𑌨𑌿𑌮𑌿𑌤𑍍𑌤𑌂
𑌤𑌸𑍍𑌮𑌾𑌤𑍍𑌖𑌿𑌨𑍍𑌨𑌾 𑌸𑌦𑌾𑌹𑌂 𑌦𑍍𑌵𑌿𑌜𑌕𑍁𑌲𑌨𑌿𑌲𑌯𑌂 𑌨𑌾𑌥 𑌯𑍁𑌕𑍍𑌤𑌂 𑌤𑍍𑌯𑌜𑌾𑌮𑌿 ॥ 16 ॥

𑌬𑌂𑌧𑌨𑌾𑌨𑌿 𑌖𑌲𑍁 𑌸𑌂𑌤𑌿 𑌬𑌹𑍂𑌨𑌿
𑌪𑍍𑌰𑍇𑌮𑌰𑌜𑍍𑌜𑍁𑌕𑍃𑌤𑌬𑌂𑌧𑌨𑌮𑌨𑍍𑌯𑌤𑍍 ।
𑌦𑌾𑌰𑍁𑌭𑍇𑌦𑌨𑌿𑌪𑍁𑌣𑍋𑌽𑌪𑌿 𑌷𑌡𑌂𑌘𑍍𑌰𑌿-
𑌰𑍍𑌨𑌿𑌷𑍍𑌕𑍍𑌰𑌿𑌯𑍋 𑌭𑌵𑌤𑌿 𑌪𑌂𑌕𑌜𑌕𑍋𑌶𑍇𑌃 ॥ 1𑍭 ॥

𑌛𑌿𑌨𑍍𑌨𑍋𑌽𑌪𑌿 𑌚𑌂𑌦𑌨 𑌤𑌰𑍁𑌰𑍍𑌨 𑌜𑌹𑌾𑌤𑌿 𑌗𑌂𑌧𑌂
𑌵𑍃𑌦𑍍𑌧𑍋𑌽𑌪𑌿 𑌵𑌾𑌰𑌣𑌪𑌤𑌿-𑌰𑍍𑌨𑌜𑌹𑌾𑌤𑌿 𑌲𑍀𑌲𑌾𑌮𑍍 ।
𑌹𑌂𑌤𑍍𑌰𑌾𑌰𑍍𑌪𑌿𑌤𑍋 𑌮𑌧𑍁𑌰𑌤𑌾𑌂 𑌨 𑌜𑌹𑌾𑌤𑌿 𑌚𑍇𑌕𑍍𑌷𑍁𑌃
𑌕𑍍𑌷𑍀𑌣𑍋𑌽𑌪𑌿 𑌨 𑌤𑍍𑌯𑌜𑌤𑌿 𑌶𑌿𑌲𑌗𑍁𑌣𑌾𑌨𑍍 𑌕𑍁𑌲𑍀𑌨𑌃 ॥ 1𑍮 ॥