𑌧𑍍𑌯𑌾𑌨𑌂
𑌵𑌾𑌸𑍁𑌦𑍇𑌵𑍇𑌂𑌦𑍍𑌰𑌯𑍋𑌗𑍀𑌂𑌦𑍍𑌰𑌂 𑌨𑌤𑍍𑌵𑌾 𑌜𑍍𑌞𑌾𑌨𑌪𑍍𑌰𑌦𑌂 𑌗𑍁𑌰𑍁𑌮𑍍 ।
𑌮𑍁𑌮𑍁𑌕𑍍𑌷𑍂𑌣𑌾𑌂 𑌹𑌿𑌤𑌾𑌰𑍍𑌥𑌾𑌯 𑌤𑌤𑍍𑌤𑍍𑌵𑌬𑍋𑌧𑍋𑌭𑌿𑌧𑍀𑌯𑌤𑍇 ॥
𑌸𑌾𑌧𑌨𑌚𑌤𑍁𑌷𑍍𑌟𑌯𑌸𑌂𑌪𑌨𑍍𑌨𑌾𑌧𑌿𑌕𑌾𑌰𑌿𑌣𑌾𑌂 𑌮𑍋𑌕𑍍𑌷𑌸𑌾𑌧𑌨𑌭𑍂𑌤𑌂
𑌤𑌤𑍍𑌤𑍍𑌵𑌵𑌿𑌵𑍇𑌕𑌪𑍍𑌰𑌕𑌾𑌰𑌂 𑌵𑌕𑍍𑌷𑍍𑌯𑌾𑌮𑌃 ।
𑌸𑌾𑌧𑌨𑌚𑌤𑍁𑌷𑍍𑌟𑌯𑌮𑍍
𑌸𑌾𑌧𑌨𑌚𑌤𑍁𑌷𑍍𑌟𑌯𑌂 𑌕𑌿𑌮𑍍 ?
𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 ।
𑌇𑌹𑌾𑌮𑍁𑌤𑍍𑌰𑌾𑌰𑍍𑌥𑌫𑌲𑌭𑍋𑌗𑌵𑌿𑌰𑌾𑌗𑌃 ।
𑌶𑌮𑌾𑌦𑌿𑌷𑌟𑍍𑌕𑌸𑌂𑌪𑌤𑍍𑌤𑌿𑌃 ।
𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌚𑍇𑌤𑌿 ।
𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃
𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 𑌕𑌃 ?
𑌨𑌿𑌤𑍍𑌯𑌵𑌸𑍍𑌤𑍍𑌵𑍇𑌕𑌂 𑌬𑍍𑌰𑌹𑍍𑌮 𑌤𑌦𑍍𑌵𑍍𑌯𑌤𑌿𑌰𑌿𑌕𑍍𑌤𑌂 𑌸𑌰𑍍𑌵𑌮𑌨𑌿𑌤𑍍𑌯𑌮𑍍 ।
𑌅𑌯𑌮𑍇𑌵 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 ।
𑌵𑌿𑌰𑌾𑌗𑌃
𑌵𑌿𑌰𑌾𑌗𑌃 𑌕𑌃 ?
𑌇𑌹𑌸𑍍𑌵𑌰𑍍𑌗𑌭𑍋𑌗𑍇𑌷𑍁 𑌇𑌚𑍍𑌛𑌾𑌰𑌾𑌹𑌿𑌤𑍍𑌯𑌮𑍍 ।
𑌶𑌮𑌾𑌦𑌿𑌸𑌾𑌧𑌨𑌸𑌂𑌪𑌤𑍍𑌤𑌿𑌃
𑌶𑌮𑌾𑌦𑌿𑌸𑌾𑌧𑌨𑌸𑌂𑌪𑌤𑍍𑌤𑌿𑌃 𑌕𑌾 ?
𑌶𑌮𑍋 𑌦𑌮 𑌉𑌪𑌰𑌮𑌸𑍍𑌤𑌿𑌤𑌿𑌕𑍍𑌷𑌾 𑌶𑍍𑌰𑌦𑍍𑌧𑌾 𑌸𑌮𑌾𑌧𑌾𑌨𑌂 𑌚 𑌇𑌤𑌿 ।𑌶𑌮𑌃 𑌕𑌃 ?
𑌮𑌨𑍋𑌨𑌿𑌗𑍍𑌰𑌹𑌃 ।
𑌦𑌮𑌃 𑌕𑌃 ?
𑌚𑌕𑍍𑌷𑍁𑌰𑌾𑌦𑌿𑌬𑌾𑌹𑍍𑌯𑍇𑌂𑌦𑍍𑌰𑌿𑌯𑌨𑌿𑌗𑍍𑌰𑌹𑌃 ।
𑌉𑌪𑌰𑌮𑌃 𑌕𑌃 ?
𑌸𑍍𑌵𑌧𑌰𑍍𑌮𑌾𑌨𑍁𑌷𑍍𑌠𑌾𑌨𑌮𑍇𑌵 ।
𑌤𑌿𑌤𑌿𑌕𑍍𑌷𑌾 𑌕𑌾 ?
𑌶𑍀𑌤𑍋𑌷𑍍𑌣𑌸𑍁𑌖𑌦𑍁𑌃𑌖𑌾𑌦𑌿𑌸𑌹𑌿𑌷𑍍𑌣𑍁𑌤𑍍𑌵𑌮𑍍 ।
𑌶𑍍𑌰𑌦𑍍𑌧𑌾 𑌕𑍀𑌦𑍃𑌶𑍀 ?
𑌗𑍁𑌰𑍁𑌵𑍇𑌦𑌾𑌂𑌤𑌵𑌾𑌕𑍍𑌯𑌾𑌦𑌿𑌷𑍁 𑌵𑌿𑌶𑍍𑌵𑌾𑌸𑌃 𑌶𑍍𑌰𑌦𑍍𑌧𑌾 ।
𑌸𑌮𑌾𑌧𑌾𑌨𑌂 𑌕𑌿𑌮𑍍 ?
𑌚𑌿𑌤𑍍𑌤𑍈𑌕𑌾𑌗𑍍𑌰𑌤𑌾 ।
𑌮𑍁𑌮𑍁𑌕𑍍𑌷𑍁𑌤𑍍𑌵𑌂
𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌕𑌿𑌮𑍍 ?
𑌮𑍋𑌕𑍍𑌷𑍋 𑌮𑍇 𑌭𑍂𑌯𑌾𑌦𑍍 𑌇𑌤𑌿 𑌇𑌚𑍍𑌛𑌾 ।
𑌏𑌤𑌤𑍍 𑌸𑌾𑌧𑌨𑌚𑌤𑍁𑌷𑍍𑌟𑌯𑌮𑍍 ।
𑌤𑌤𑌸𑍍𑌤𑌤𑍍𑌤𑍍𑌵𑌵𑌿𑌵𑍇𑌕𑌸𑍍𑌯𑌾𑌧𑌿𑌕𑌾𑌰𑌿𑌣𑍋 𑌭𑌵𑌂𑌤𑌿 ।
𑌤𑌤𑍍𑌤𑍍𑌵𑌵𑌿𑌵𑍇𑌕𑌃
𑌤𑌤𑍍𑌤𑍍𑌵𑌵𑌿𑌵𑍇𑌕𑌃 𑌕𑌃 ?
𑌆𑌤𑍍𑌮𑌾 𑌸𑌤𑍍𑌯𑌂 𑌤𑌦𑌨𑍍𑌯𑌤𑍍 𑌸𑌰𑍍𑌵𑌂 𑌮𑌿𑌥𑍍𑌯𑍇𑌤𑌿 ।𑌆𑌤𑍍𑌮𑌾 𑌕𑌃 ?
𑌸𑍍𑌥𑍂𑌲𑌸𑍂𑌕𑍍𑌷𑍍𑌮𑌕𑌾𑌰𑌣𑌶𑌰𑍀𑌰𑌾𑌦𑍍𑌵𑍍𑌯𑌤𑌿𑌰𑌿𑌕𑍍𑌤𑌃 𑌪𑌂𑌚𑌕𑍋𑌶𑌾𑌤𑍀𑌤𑌃 𑌸𑌨𑍍
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍀 𑌸𑌚𑍍𑌚𑌿𑌦𑌾𑌨𑌂𑌦𑌸𑍍𑌵𑌰𑍂𑌪𑌃 𑌸𑌨𑍍
𑌯𑌸𑍍𑌤𑌿𑌷𑍍𑌠𑌤𑌿 𑌸 𑌆𑌤𑍍𑌮𑌾 ।
𑌶𑌰𑍀𑌰𑌤𑍍𑌰𑌯𑌂 (𑌸𑍍𑌥𑍂𑌲𑌶𑌰𑍀𑌰𑌮𑍍)
𑌸𑍍𑌥𑍂𑌲𑌶𑌰𑍀𑌰𑌂 𑌕𑌿𑌮𑍍 ?
𑌪𑌂𑌚𑍀𑌕𑍃𑌤𑌪𑌂𑌚𑌮𑌹𑌾𑌭𑍂𑌤𑍈𑌃 𑌕𑍃𑌤𑌂 𑌸𑌤𑍍𑌕𑌰𑍍𑌮𑌜𑌨𑍍𑌯𑌂
𑌸𑍁𑌖𑌦𑍁𑌃𑌖𑌾𑌦𑌿𑌭𑍋𑌗𑌾𑌯𑌤𑌨𑌂 𑌶𑌰𑍀𑌰𑌮𑍍
𑌅𑌸𑍍𑌤𑌿 𑌜𑌾𑌯𑌤𑍇 𑌵𑌰𑍍𑌧𑌤𑍇 𑌵𑌿𑌪𑌰𑌿𑌣𑌮𑌤𑍇 𑌅𑌪𑌕𑍍𑌷𑍀𑌯𑌤𑍇 𑌵𑌿𑌨𑌶𑍍𑌯𑌤𑍀𑌤𑌿
𑌷𑌡𑍍𑌵𑌿𑌕𑌾𑌰𑌵𑌦𑍇𑌤𑌤𑍍𑌸𑍍𑌥𑍂𑌲𑌶𑌰𑍀𑌰𑌮𑍍 ।
𑌶𑌰𑍀𑌰𑌤𑍍𑌰𑌯𑌂 (𑌸𑍂𑌕𑍍𑌷𑍍𑌮𑌶𑌰𑍀𑌰𑌮𑍍)
𑌸𑍂𑌕𑍍𑌷𑍍𑌮𑌶𑌰𑍀𑌰𑌂 𑌕𑌿𑌮𑍍 ?
𑌅𑌪𑌂𑌚𑍀𑌕𑍃𑌤𑌪𑌂𑌚𑌮𑌹𑌾𑌭𑍂𑌤𑍈𑌃 𑌕𑍃𑌤𑌂 𑌸𑌤𑍍𑌕𑌰𑍍𑌮𑌜𑌨𑍍𑌯𑌂
𑌸𑍁𑌖𑌦𑍁𑌃𑌖𑌾𑌦𑌿𑌭𑍋𑌗𑌸𑌾𑌧𑌨𑌂
𑌪𑌂𑌚𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌾𑌣𑌿 𑌪𑌂𑌚𑌕𑌰𑍍𑌮𑍇𑌂𑌦𑍍𑌰𑌿𑌯𑌾𑌣𑌿 𑌪𑌂𑌚𑌪𑍍𑌰𑌾𑌣𑌾𑌦𑌯𑌃
𑌮𑌨𑌶𑍍𑌚𑍈𑌕𑌂 𑌬𑍁𑌦𑍍𑌧𑌿𑌶𑍍𑌚𑍈𑌕𑌾
𑌏𑌵𑌂 𑌸𑌪𑍍𑌤𑌦𑌶𑌾𑌕𑌲𑌾𑌭𑌿𑌃 𑌸𑌹 𑌯𑌤𑍍𑌤𑌿𑌷𑍍𑌠𑌤𑌿 𑌤𑌤𑍍𑌸𑍂𑌕𑍍𑌷𑍍𑌮𑌶𑌰𑍀𑌰𑌮𑍍 ।
𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌾𑌣𑌿
𑌶𑍍𑌰𑍋𑌤𑍍𑌰𑌂 𑌤𑍍𑌵𑌕𑍍 𑌚𑌕𑍍𑌷𑍁𑌃 𑌰𑌸𑌨𑌾 𑌘𑍍𑌰𑌾𑌣𑌂 𑌇𑌤𑌿 𑌪𑌂𑌚 𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌾𑌣𑌿 ।
𑌶𑍍𑌰𑍋𑌤𑍍𑌰𑌸𑍍𑌯 𑌦𑌿𑌗𑍍𑌦𑍇𑌵𑌤𑌾 ।
𑌤𑍍𑌵𑌚𑍋 𑌵𑌾𑌯𑍁𑌃 ।
𑌚𑌕𑍍𑌷𑍁𑌷𑌃 𑌸𑍂𑌰𑍍𑌯𑌃 ।
𑌰𑌸𑌨𑌾𑌯𑌾 𑌵𑌰𑍁𑌣𑌃 ।
𑌘𑍍𑌰𑌾𑌣𑌸𑍍𑌯 𑌅𑌶𑍍𑌵𑌿𑌨𑍌 ।
𑌇𑌤𑌿 𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌦𑍇𑌵𑌤𑌾𑌃 ।
𑌶𑍍𑌰𑍋𑌤𑍍𑌰𑌸𑍍𑌯 𑌵𑌿𑌷𑌯𑌃 𑌶𑌬𑍍𑌦𑌗𑍍𑌰𑌹𑌣𑌮𑍍 ।
𑌤𑍍𑌵𑌚𑍋 𑌵𑌿𑌷𑌯𑌃 𑌸𑍍𑌪𑌰𑍍𑌶𑌗𑍍𑌰𑌹𑌣𑌮𑍍 ।
𑌚𑌕𑍍𑌷𑍁𑌷𑍋 𑌵𑌿𑌷𑌯𑌃 𑌰𑍂𑌪𑌗𑍍𑌰𑌹𑌣𑌮𑍍 ।
𑌰𑌸𑌨𑌾𑌯𑌾 𑌵𑌿𑌷𑌯𑌃 𑌰𑌸𑌗𑍍𑌰𑌹𑌣𑌮𑍍 ।
𑌘𑍍𑌰𑌾𑌣𑌸𑍍𑌯 𑌵𑌿𑌷𑌯𑌃 𑌗𑌂𑌧𑌗𑍍𑌰𑌹𑌣𑌂 𑌇𑌤𑌿 ।
𑌪𑌂𑌚𑌕𑌰𑍍𑌮𑍇𑌂𑌦𑍍𑌰𑌿𑌯𑌾𑌣𑌿
𑌵𑌾𑌕𑍍𑌪𑌾𑌣𑌿𑌪𑌾𑌦𑌪𑌾𑌯𑍂𑌪𑌸𑍍𑌥𑌾𑌨𑍀𑌤𑌿 𑌪𑌂𑌚𑌕𑌰𑍍𑌮𑍇𑌂𑌦𑍍𑌰𑌿𑌯𑌾𑌣𑌿 ।
𑌵𑌾𑌚𑍋 𑌦𑍇𑌵𑌤𑌾 𑌵𑌹𑍍𑌨𑌿𑌃 ।
𑌹𑌸𑍍𑌤𑌯𑍋𑌰𑌿𑌂𑌦𑍍𑌰𑌃 ।
𑌪𑌾𑌦𑌯𑍋𑌰𑍍𑌵𑌿𑌷𑍍𑌣𑍁𑌃 ।
𑌪𑌾𑌯𑍋𑌰𑍍𑌮𑍃𑌤𑍍𑌯𑍁𑌃 ।
𑌉𑌪𑌸𑍍𑌥𑌸𑍍𑌯 𑌪𑍍𑌰𑌜𑌾𑌪𑌤𑌿𑌃 ।
𑌇𑌤𑌿 𑌕𑌰𑍍𑌮𑍇𑌂𑌦𑍍𑌰𑌿𑌯𑌦𑍇𑌵𑌤𑌾𑌃 ।
𑌵𑌾𑌚𑍋 𑌵𑌿𑌷𑌯𑌃 𑌭𑌾𑌷𑌣𑌮𑍍 ।
𑌪𑌾𑌣𑍍𑌯𑍋𑌰𑍍𑌵𑌿𑌷𑌯𑌃 𑌵𑌸𑍍𑌤𑍁𑌗𑍍𑌰𑌹𑌣𑌮𑍍 ।
𑌪𑌾𑌦𑌯𑍋𑌰𑍍𑌵𑌿𑌷𑌯𑌃 𑌗𑌮𑌨𑌮𑍍 ।
𑌪𑌾𑌯𑍋𑌰𑍍𑌵𑌿𑌷𑌯𑌃 𑌮𑌲𑌤𑍍𑌯𑌾𑌗𑌃 ।
𑌉𑌪𑌸𑍍𑌥𑌸𑍍𑌯 𑌵𑌿𑌷𑌯𑌃 𑌆𑌨𑌂𑌦 𑌇𑌤𑌿 ।
𑌕𑌾𑌰𑌣𑌶𑌰𑍀𑌰𑌮𑍍
𑌕𑌾𑌰𑌣𑌶𑌰𑍀𑌰𑌂 𑌕𑌿𑌮𑍍 ?
𑌅𑌨𑌿𑌰𑍍𑌵𑌾𑌚𑍍𑌯𑌾𑌨𑌾𑌦𑍍𑌯𑌵𑌿𑌦𑍍𑌯𑌾𑌰𑍂𑌪𑌂 𑌶𑌰𑍀𑌰𑌦𑍍𑌵𑌯𑌸𑍍𑌯 𑌕𑌾𑌰𑌣𑌮𑌾𑌤𑍍𑌰𑌂
𑌸𑌤𑍍𑌸𑍍𑌵𑌰𑍂𑌪𑌾𑌽𑌜𑍍𑌞𑌾𑌨𑌂 𑌨𑌿𑌰𑍍𑌵𑌿𑌕𑌲𑍍𑌪𑌕𑌰𑍂𑌪𑌂 𑌯𑌦𑌸𑍍𑌤𑌿 𑌤𑌤𑍍𑌕𑌾𑌰𑌣𑌶𑌰𑍀𑌰𑌮𑍍 ।
𑌅𑌵𑌸𑍍𑌥𑌾𑌤𑍍𑌰𑌯𑌮𑍍
𑌅𑌵𑌸𑍍𑌥𑌾𑌤𑍍𑌰𑌯𑌂 𑌕𑌿𑌮𑍍 ?
𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑍍𑌯𑌵𑌸𑍍𑌥𑌾𑌃 ।
𑌜𑌾𑌗𑍍𑌰𑌦𑌵𑌸𑍍𑌥𑌾
𑌜𑌾𑌗𑍍𑌰𑌦𑌵𑌸𑍍𑌥𑌾 𑌕𑌾 ?
𑌶𑍍𑌰𑍋𑌤𑍍𑌰𑌾𑌦𑌿𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑍈𑌃 𑌶𑌬𑍍𑌦𑌾𑌦𑌿𑌵𑌿𑌷𑌯𑍈𑌶𑍍𑌚 𑌜𑍍𑌞𑌾𑌯𑌤𑍇 𑌇𑌤𑌿 𑌯𑌤𑍍
𑌸𑌾 𑌜𑌾𑌗𑍍𑌰𑌦𑌾𑌵𑌸𑍍𑌥𑌾 ।
𑌸𑍍𑌥𑍂𑌲 𑌶𑌰𑍀𑌰𑌾𑌭𑌿𑌮𑌾𑌨𑍀 𑌆𑌤𑍍𑌮𑌾 𑌵𑌿𑌶𑍍𑌵 𑌇𑌤𑍍𑌯𑍁𑌚𑍍𑌯𑌤𑍇 ।
𑌸𑍍𑌵𑌪𑍍𑌨𑌾𑌵𑌸𑍍𑌥𑌾
𑌸𑍍𑌵𑌪𑍍𑌨𑌾𑌵𑌸𑍍𑌥𑌾 𑌕𑍇𑌤𑌿 𑌚𑍇𑌤𑍍 ?
𑌜𑌾𑌗𑍍𑌰𑌦𑌵𑌸𑍍𑌥𑌾𑌯𑌾𑌂 𑌯𑌦𑍍𑌦𑍃𑌷𑍍𑌟𑌂 𑌯𑌦𑍍 𑌶𑍍𑌰𑍁𑌤𑌮𑍍
𑌤𑌜𑍍𑌜𑌨𑌿𑌤𑌵𑌾𑌸𑌨𑌯𑌾 𑌨𑌿𑌦𑍍𑌰𑌾𑌸𑌮𑌯𑍇 𑌯𑌃 𑌪𑍍𑌰𑌪𑌂𑌚𑌃 𑌪𑍍𑌰𑌤𑍀𑌯𑌤𑍇 𑌸𑌾
𑌸𑍍𑌵𑌪𑍍𑌨𑌾𑌵𑌸𑍍𑌥𑌾 ।
𑌸𑍂𑌕𑍍𑌷𑍍𑌮𑌶𑌰𑍀𑌰𑌾𑌭𑌿𑌮𑌾𑌨𑍀 𑌆𑌤𑍍𑌮𑌾 𑌤𑍈𑌜𑌸 𑌇𑌤𑍍𑌯𑍁𑌚𑍍𑌯𑌤𑍇 ।
𑌸𑍁𑌷𑍁𑌪𑍍𑌤𑍍𑌯𑌵𑌸𑍍𑌥𑌾
𑌅𑌤𑌃 𑌸𑍁𑌷𑍁𑌪𑍍𑌤𑍍𑌯𑌵𑌸𑍍𑌥𑌾 𑌕𑌾 ?
𑌅𑌹𑌂 𑌕𑌿𑌮𑌪𑌿 𑌨 𑌜𑌾𑌨𑌾𑌮𑌿 𑌸𑍁𑌖𑍇𑌨 𑌮𑌯𑌾 𑌨𑌿𑌦𑍍𑌰𑌾𑌽𑌨𑍁𑌭𑍂𑌯𑌤 𑌇𑌤𑌿
𑌸𑍁𑌷𑍁𑌪𑍍𑌤𑍍𑌯𑌵𑌸𑍍𑌥𑌾 ।
𑌕𑌾𑌰𑌣𑌶𑌰𑍀𑌰𑌾𑌭𑌿𑌮𑌾𑌨𑍀 𑌆𑌤𑍍𑌮𑌾 𑌪𑍍𑌰𑌾𑌜𑍍𑌞 𑌇𑌤𑍍𑌯𑍁𑌚𑍍𑌯𑌤𑍇 ।
𑌪𑌂𑌚 𑌕𑍋𑌶𑌾𑌃
𑌪𑌂𑌚 𑌕𑍋𑌶𑌾𑌃 𑌕𑍇 ?
𑌅𑌨𑍍𑌨𑌮𑌯𑌃 𑌪𑍍𑌰𑌾𑌣𑌮𑌯𑌃 𑌮𑌨𑍋𑌮𑌯𑌃 𑌵𑌿𑌜𑍍𑌞𑌾𑌨𑌮𑌯𑌃 𑌆𑌨𑌂𑌦𑌮𑌯𑌶𑍍𑌚𑍇𑌤𑌿 ।
𑌅𑌨𑍍𑌨𑌮𑌯𑌕𑍋𑌶𑌃
𑌅𑌨𑍍𑌨𑌮𑌯𑌃 𑌕𑌃 ?
𑌅𑌨𑍍𑌨𑌰𑌸𑍇𑌨𑍈𑌵 𑌭𑍂𑌤𑍍𑌵𑌾 𑌅𑌨𑍍𑌨𑌰𑌸𑍇𑌨𑍈𑌵 𑌵𑍃𑌦𑍍𑌧𑌿𑌂 𑌪𑍍𑌰𑌾𑌪𑍍𑌯 𑌅𑌨𑍍𑌨𑌰𑍂𑌪𑌪𑍃𑌥𑌿𑌵𑍍𑌯𑌾𑌂
𑌯𑌦𑍍𑌵𑌿𑌲𑍀𑌯𑌤𑍇 𑌤𑌦𑌨𑍍𑌨𑌮𑌯𑌃 𑌕𑍋𑌶𑌃 𑌸𑍍𑌥𑍂𑌲𑌶𑌰𑍀𑌰𑌮𑍍 ।
𑌪𑍍𑌰𑌾𑌣𑌮𑌯𑌕𑍋𑌶𑌃
𑌪𑍍𑌰𑌾𑌣𑌮𑌯𑌃 𑌕𑌃 ?
𑌪𑍍𑌰𑌾𑌣𑌾𑌦𑍍𑌯𑌾𑌃 𑌪𑌂𑌚𑌵𑌾𑌯𑌵𑌃 𑌵𑌾𑌗𑌾𑌦𑍀𑌂𑌦𑍍𑌰𑌿𑌯𑌪𑌂𑌚𑌕𑌂 𑌪𑍍𑌰𑌾𑌣𑌮𑌯𑌃 𑌕𑍋𑌶𑌃 ।
𑌮𑌨𑍋𑌮𑌯𑌕𑍋𑌶𑌃
𑌮𑌨𑍋𑌮𑌯𑌃 𑌕𑍋𑌶𑌃 𑌕𑌃 ?
𑌮𑌨𑌶𑍍𑌚 𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌪𑌂𑌚𑌕𑌂 𑌮𑌿𑌲𑌿𑌤𑍍𑌵𑌾 𑌯𑍋 𑌭𑌵𑌤𑌿 𑌸 𑌮𑌨𑍋𑌮𑌯𑌃 𑌕𑍋𑌶𑌃 ।
𑌵𑌿𑌜𑍍𑌞𑌾𑌨𑌮𑌯𑌕𑍋𑌶𑌃
𑌵𑌿𑌜𑍍𑌞𑌾𑌨𑌮𑌯𑌃 𑌕𑌃 ?
𑌬𑍁𑌦𑍍𑌧𑌿𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌪𑌂𑌚𑌕𑌂 𑌮𑌿𑌲𑌿𑌤𑍍𑌵𑌾 𑌯𑍋 𑌭𑌵𑌤𑌿 𑌸 𑌵𑌿𑌜𑍍𑌞𑌾𑌨𑌮𑌯𑌃 𑌕𑍋𑌶𑌃
𑌆𑌨𑌂𑌦𑌮𑌯𑌕𑍋𑌶𑌃
𑌆𑌨𑌂𑌦𑌮𑌯𑌃 𑌕𑌃 ?
𑌏𑌵𑌮𑍇𑌵 𑌕𑌾𑌰𑌣𑌶𑌰𑍀𑌰𑌭𑍂𑌤𑌾𑌵𑌿𑌦𑍍𑌯𑌾𑌸𑍍𑌥𑌮𑌲𑌿𑌨𑌸𑌤𑍍𑌤𑍍𑌵𑌂
𑌪𑍍𑌰𑌿𑌯𑌾𑌦𑌿𑌵𑍃𑌤𑍍𑌤𑌿𑌸𑌹𑌿𑌤𑌂 𑌸𑌤𑍍 𑌆𑌨𑌂𑌦𑌮𑌯𑌃 𑌕𑍋𑌶𑌃 ।
𑌏𑌤𑌤𑍍𑌕𑍋𑌶𑌪𑌂𑌚𑌕𑌮𑍍 ।
𑌪𑌂𑌚𑌕𑍋𑌶𑌾𑌤𑍀𑌤
𑌮𑌦𑍀𑌯𑌂 𑌶𑌰𑍀𑌰𑌂 𑌮𑌦𑍀𑌯𑌾𑌃 𑌪𑍍𑌰𑌾𑌣𑌾𑌃 𑌮𑌦𑍀𑌯𑌂 𑌮𑌨𑌶𑍍𑌚
𑌮𑌦𑍀𑌯𑌾 𑌬𑍁𑌦𑍍𑌧𑌿𑌰𑍍𑌮𑌦𑍀𑌯𑌂 𑌅𑌜𑍍𑌞𑌾𑌨𑌮𑌿𑌤𑌿 𑌸𑍍𑌵𑍇𑌨𑍈𑌵 𑌜𑍍𑌞𑌾𑌯𑌤𑍇
𑌤𑌦𑍍𑌯𑌥𑌾 𑌮𑌦𑍀𑌯𑌤𑍍𑌵𑍇𑌨 𑌜𑍍𑌞𑌾𑌤𑌂 𑌕𑌟𑌕𑌕𑍁𑌂𑌡𑌲 𑌗𑍃𑌹𑌾𑌦𑌿𑌕𑌂
𑌸𑍍𑌵𑌸𑍍𑌮𑌾𑌦𑍍𑌭𑌿𑌨𑍍𑌨𑌂 𑌤𑌥𑌾 𑌪𑌂𑌚𑌕𑍋𑌶𑌾𑌦𑌿𑌕𑌂 𑌸𑍍𑌵𑌸𑍍𑌮𑌾𑌦𑍍𑌭𑌿𑌨𑍍𑌨𑌮𑍍
𑌮𑌦𑍀𑌯𑌤𑍍𑌵𑍇𑌨 𑌜𑍍𑌞𑌾𑌤𑌮𑌾𑌤𑍍𑌮𑌾 𑌨 𑌭𑌵𑌤𑌿 ॥
𑌆𑌤𑍍𑌮𑌨𑍍
𑌆𑌤𑍍𑌮𑌾 𑌤𑌰𑍍𑌹𑌿 𑌕𑌃 ?
𑌸𑌚𑍍𑌚𑌿𑌦𑌾𑌨𑌂𑌦𑌸𑍍𑌵𑌰𑍂𑌪𑌃 ।
𑌸𑌤𑍍𑌕𑌿𑌮𑍍 ?
𑌕𑌾𑌲𑌤𑍍𑌰𑌯𑍇𑌽𑌪𑌿 𑌤𑌿𑌷𑍍𑌠𑌤𑍀𑌤𑌿 𑌸𑌤𑍍 ।
𑌚𑌿𑌤𑍍𑌕𑌿𑌮𑍍 ?
𑌜𑍍𑌞𑌾𑌨𑌸𑍍𑌵𑌰𑍂𑌪𑌃 ।
𑌆𑌨𑌂𑌦𑌃 𑌕𑌃 ?
𑌸𑍁𑌖𑌸𑍍𑌵𑌰𑍂𑌪𑌃 ।
𑌏𑌵𑌂 𑌸𑌚𑍍𑌚𑌿𑌦𑌾𑌨𑌂𑌦𑌸𑍍𑌵𑌰𑍂𑌪𑌂 𑌸𑍍𑌵𑌾𑌤𑍍𑌮𑌾𑌨𑌂 𑌵𑌿𑌜𑌾𑌨𑍀𑌯𑌾𑌤𑍍 ।
𑌜𑌗𑌤𑍍
𑌅𑌥 𑌚𑌤𑍁𑌰𑍍𑌵𑌿𑌂𑌶𑌤𑌿𑌤𑌤𑍍𑌤𑍍𑌵𑍋𑌤𑍍𑌪𑌤𑍍𑌤𑌿𑌪𑍍𑌰𑌕𑌾𑌰𑌂 𑌵𑌕𑍍𑌷𑍍𑌯𑌾𑌮𑌃 ।
𑌮𑌾𑌯𑌾
𑌬𑍍𑌰𑌹𑍍𑌮𑌾𑌶𑍍𑌰𑌯𑌾 𑌸𑌤𑍍𑌤𑍍𑌵𑌰𑌜𑌸𑍍𑌤𑌮𑍋𑌗𑍁𑌣𑌾𑌤𑍍𑌮𑌿𑌕𑌾 𑌮𑌾𑌯𑌾 𑌅𑌸𑍍𑌤𑌿 ।
𑌪𑌂𑌚𑌭𑍂𑌤𑌾𑌃
𑌤𑌤𑌃 𑌆𑌕𑌾𑌶𑌃 𑌸𑌂𑌭𑍂𑌤𑌃 ।
𑌆𑌕𑌾𑌶𑌾𑌦𑍍 𑌵𑌾𑌯𑍁𑌃 ।
𑌵𑌾𑌯𑍋𑌸𑍍𑌤𑍇𑌜𑌃 ।
𑌤𑍇𑌜𑌸 𑌆𑌪𑌃 ।
𑌅𑌭𑍍𑌧𑌯𑌃 𑌪𑍃𑌥𑌿𑌵𑍀 ।
𑌸𑌤𑍍𑌤𑍍𑌵𑌗𑍁𑌣𑌃
𑌏𑌤𑍇𑌷𑌾𑌂 𑌪𑌂𑌚𑌤𑌤𑍍𑌤𑍍𑌵𑌾𑌨𑌾𑌂 𑌮𑌧𑍍𑌯𑍇
𑌆𑌕𑌾𑌶𑌸𑍍𑌯 𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍 𑌶𑍍𑌰𑍋𑌤𑍍𑌰𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌵𑌾𑌯𑍋𑌃 𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍 𑌤𑍍𑌵𑌗𑌿𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌅𑌗𑍍𑌨𑍇𑌃 𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍 𑌚𑌕𑍍𑌷𑍁𑌰𑌿𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌜𑌲𑌸𑍍𑌯 𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍 𑌰𑌸𑌨𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌪𑍃𑌥𑌿𑌵𑍍𑌯𑌾𑌃 𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍 𑌘𑍍𑌰𑌾𑌣𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌅𑌂𑌤𑌃𑌕𑌰𑌣
𑌏𑌤𑍇𑌷𑌾𑌂 𑌪𑌂𑌚𑌤𑌤𑍍𑌤𑍍𑌵𑌾𑌨𑌾𑌂 𑌸𑌮𑌷𑍍𑌟𑌿𑌸𑌾𑌤𑍍𑌵𑌿𑌕𑌾𑌂𑌶𑌾𑌤𑍍
𑌮𑌨𑍋𑌬𑍁𑌦𑍍𑌧𑍍𑌯𑌹𑌂𑌕𑌾𑌰 𑌚𑌿𑌤𑍍𑌤𑌾𑌂𑌤𑌃𑌕𑌰𑌣𑌾𑌨𑌿 𑌸𑌂𑌭𑍂𑌤𑌾𑌨𑌿 ।
𑌸𑌂𑌕𑌲𑍍𑌪𑌵𑌿𑌕𑌲𑍍𑌪𑌾𑌤𑍍𑌮𑌕𑌂 𑌮𑌨𑌃 ।
𑌨𑌿𑌶𑍍𑌚𑌯𑌾𑌤𑍍𑌮𑌿𑌕𑌾 𑌬𑍁𑌦𑍍𑌧𑌿𑌃 ।
𑌅𑌹𑌂𑌕𑌰𑍍𑌤𑌾 𑌅𑌹𑌂𑌕𑌾𑌰𑌃 ।
𑌚𑌿𑌂𑌤𑌨𑌕𑌰𑍍𑌤𑍃 𑌚𑌿𑌤𑍍𑌤𑌮𑍍 ।
𑌮𑌨𑌸𑍋 𑌦𑍇𑌵𑌤𑌾 𑌚𑌂𑌦𑍍𑌰𑌮𑌾𑌃 ।
𑌬𑍁𑌦𑍍𑌧𑍇 𑌬𑍍𑌰𑌹𑍍𑌮𑌾 ।
𑌅𑌹𑌂𑌕𑌾𑌰𑌸𑍍𑌯 𑌰𑍁𑌦𑍍𑌰𑌃 ।
𑌚𑌿𑌤𑍍𑌤𑌸𑍍𑌯 𑌵𑌾𑌸𑍁𑌦𑍇𑌵𑌃 ।
𑌰𑌜𑍋𑌗𑍁𑌣𑌃
𑌏𑌤𑍇𑌷𑌾𑌂 𑌪𑌂𑌚𑌤𑌤𑍍𑌤𑍍𑌵𑌾𑌨𑌾𑌂 𑌮𑌧𑍍𑌯𑍇
𑌆𑌕𑌾𑌶𑌸𑍍𑌯 𑌰𑌾𑌜𑌸𑌾𑌂𑌶𑌾𑌤𑍍 𑌵𑌾𑌗𑌿𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌵𑌾𑌯𑍋𑌃 𑌰𑌾𑌜𑌸𑌾𑌂𑌶𑌾𑌤𑍍 𑌪𑌾𑌣𑍀𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌵𑌨𑍍𑌹𑍇𑌃 𑌰𑌾𑌜𑌸𑌾𑌂𑌶𑌾𑌤𑍍 𑌪𑌾𑌦𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌜𑌲𑌸𑍍𑌯 𑌰𑌾𑌜𑌸𑌾𑌂𑌶𑌾𑌤𑍍 𑌉𑌪𑌸𑍍𑌥𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌪𑍃𑌥𑌿𑌵𑍍𑌯𑌾 𑌰𑌾𑌜𑌸𑌾𑌂𑌶𑌾𑌤𑍍 𑌗𑍁𑌦𑍇𑌂𑌦𑍍𑌰𑌿𑌯𑌂 𑌸𑌂𑌭𑍂𑌤𑌮𑍍 ।
𑌏𑌤𑍇𑌷𑌾𑌂 𑌸𑌮𑌷𑍍𑌟𑌿𑌰𑌾𑌜𑌸𑌾𑌂𑌶𑌾𑌤𑍍 𑌪𑌂𑌚𑌪𑍍𑌰𑌾𑌣𑌾𑌃 𑌸𑌂𑌭𑍂𑌤𑌾𑌃 ।
𑌤𑌮𑍋𑌗𑍁𑌣𑌃
𑌏𑌤𑍇𑌷𑌾𑌂 𑌪𑌂𑌚𑌤𑌤𑍍𑌤𑍍𑌵𑌾𑌨𑌾𑌂 𑌤𑌾𑌮𑌸𑌾𑌂𑌶𑌾𑌤𑍍
𑌪𑌂𑌚𑍀𑌕𑍃𑌤𑌪𑌂𑌚𑌤𑌤𑍍𑌤𑍍𑌵𑌾𑌨𑌿 𑌭𑌵𑌂𑌤𑌿 ।
𑌪𑌂𑌚𑍀𑌕𑌰𑌣𑌂 𑌕𑌥𑌂 𑌇𑌤𑌿 𑌚𑍇𑌤𑍍 ।
𑌏𑌤𑍇𑌷𑌾𑌂 𑌪𑌂𑌚𑌮𑌹𑌾𑌭𑍂𑌤𑌾𑌨𑌾𑌂 𑌤𑌾𑌮𑌸𑌾𑌂𑌶𑌸𑍍𑌵𑌰𑍂𑌪𑌮𑍍
𑌏𑌕𑌮𑍇𑌕𑌂 𑌭𑍂𑌤𑌂 𑌦𑍍𑌵𑌿𑌧𑌾 𑌵𑌿𑌭𑌜𑍍𑌯 𑌏𑌕𑌮𑍇𑌕𑌮𑌰𑍍𑌧𑌂 𑌪𑍃𑌥𑌕𑍍
𑌤𑍂𑌷𑍍𑌣𑍀𑌂 𑌵𑍍𑌯𑌵𑌸𑍍𑌥𑌾𑌪𑍍𑌯 𑌅𑌪𑌰𑌮𑌪𑌰𑌮𑌰𑍍𑌧𑌂 𑌚𑌤𑍁𑌰𑍍𑌧𑌾𑌂 𑌵𑌿𑌭𑌜𑍍𑌯
𑌸𑍍𑌵𑌾𑌰𑍍𑌧𑌮𑌨𑍍𑌯𑍇𑌷𑍁 𑌅𑌰𑍍𑌧𑍇𑌷𑍁 𑌸𑍍𑌵𑌭𑌾𑌗𑌚𑌤𑍁𑌷𑍍𑌟𑌯𑌸𑌂𑌯𑍋𑌜𑌨𑌂 𑌕𑌾𑌰𑍍𑌯𑌮𑍍 ।
𑌤𑌦𑌾 𑌪𑌂𑌚𑍀𑌕𑌰𑌣𑌂 𑌭𑌵𑌤𑌿 ।
𑌏𑌤𑍇𑌭𑍍𑌯𑌃 𑌪𑌂𑌚𑍀𑌕𑍃𑌤𑌪𑌂𑌚𑌮𑌹𑌾𑌭𑍂𑌤𑍇𑌭𑍍𑌯𑌃 𑌸𑍍𑌥𑍂𑌲𑌶𑌰𑍀𑌰𑌂 𑌭𑌵𑌤𑌿 ।
𑌏𑌵𑌂 𑌪𑌿𑌂𑌡𑌬𑍍𑌰𑌹𑍍𑌮𑌾𑌂𑌡𑌯𑍋𑌰𑍈𑌕𑍍𑌯𑌂 𑌸𑌂𑌭𑍂𑌤𑌮𑍍 ।
𑌜𑍀𑌵𑌃, 𑌈𑌶𑍍𑌵𑌰𑌃 𑌚
𑌸𑍍𑌥𑍂𑌲𑌶𑌰𑍀𑌰𑌾𑌭𑌿𑌮𑌾𑌨𑌿 𑌜𑍀𑌵𑌨𑌾𑌮𑌕𑌂 𑌬𑍍𑌰𑌹𑍍𑌮𑌪𑍍𑌰𑌤𑌿𑌬𑌿𑌂𑌬𑌂 𑌭𑌵𑌤𑌿 ।
𑌸 𑌏𑌵 𑌜𑍀𑌵𑌃 𑌪𑍍𑌰𑌕𑍃𑌤𑍍𑌯𑌾 𑌸𑍍𑌵𑌸𑍍𑌮𑌾𑌤𑍍 𑌈𑌶𑍍𑌵𑌰𑌂 𑌭𑌿𑌨𑍍𑌨𑌤𑍍𑌵𑍇𑌨 𑌜𑌾𑌨𑌾𑌤𑌿 ।
𑌅𑌵𑌿𑌦𑍍𑌯𑍋𑌪𑌾𑌧𑌿𑌃 𑌸𑌨𑍍 𑌆𑌤𑍍𑌮𑌾 𑌜𑍀𑌵 𑌇𑌤𑍍𑌯𑍁𑌚𑍍𑌯𑌤𑍇 ।
𑌮𑌾𑌯𑍋𑌪𑌾𑌧𑌿𑌃 𑌸𑌨𑍍 𑌈𑌶𑍍𑌵𑌰 𑌇𑌤𑍍𑌯𑍁𑌚𑍍𑌯𑌤𑍇 ।
𑌏𑌵𑌂 𑌉𑌪𑌾𑌧𑌿𑌭𑍇𑌦𑌾𑌤𑍍 𑌜𑍀𑌵𑍇𑌶𑍍𑌵𑌰𑌭𑍇𑌦𑌦𑍃𑌷𑍍𑌟𑌿𑌃 𑌯𑌾𑌵𑌤𑍍𑌪𑌰𑍍𑌯𑌂𑌤𑌂 𑌤𑌿𑌷𑍍𑌠𑌤𑌿
𑌤𑌾𑌵𑌤𑍍𑌪𑌰𑍍𑌯𑌂𑌤𑌂 𑌜𑌨𑍍𑌮𑌮𑌰𑌣𑌾𑌦𑌿𑌰𑍂𑌪𑌸𑌂𑌸𑌾𑌰𑍋 𑌨 𑌨𑌿𑌵𑌰𑍍𑌤𑌤𑍇 ।
𑌤𑌸𑍍𑌮𑌾𑌤𑍍𑌕𑌾𑌰𑌣𑌾𑌨𑍍𑌨 𑌜𑍀𑌵𑍇𑌶𑍍𑌵𑌰𑌯𑍋𑌰𑍍𑌭𑍇𑌦𑌬𑍁𑌦𑍍𑌧𑌿𑌃 𑌸𑍍𑌵𑍀𑌕𑌾𑌰𑍍𑌯𑌾 ।
𑌤𑌤𑍍 𑌤𑍍𑌵𑌂 𑌅𑌸𑌿
𑌨𑌨𑍁 𑌸𑌾𑌹𑌂𑌕𑌾𑌰𑌸𑍍𑌯 𑌕𑌿𑌂𑌚𑌿𑌜𑍍𑌜𑍍𑌞𑌸𑍍𑌯 𑌜𑍀𑌵𑌸𑍍𑌯 𑌨𑌿𑌰𑌹𑌂𑌕𑌾𑌰𑌸𑍍𑌯 𑌸𑌰𑍍𑌵𑌜𑍍𑌞𑌸𑍍𑌯
𑌈𑌶𑍍𑌵𑌰𑌸𑍍𑌯 𑌤𑌤𑍍𑌤𑍍𑌵𑌮𑌸𑍀𑌤𑌿 𑌮𑌹𑌾𑌵𑌾𑌕𑍍𑌯𑌾𑌤𑍍 𑌕𑌥𑌮𑌭𑍇𑌦𑌬𑍁𑌦𑍍𑌧𑌿𑌃 𑌸𑍍𑌯𑌾𑌦𑍁𑌭𑌯𑍋𑌃
𑌵𑌿𑌰𑍁𑌦𑍍𑌧𑌧𑌰𑍍𑌮𑌾𑌕𑍍𑌰𑌾𑌂𑌤𑌤𑍍𑌵𑌾𑌤𑍍 ।
𑌇𑌤𑌿 𑌚𑍇𑌨𑍍𑌨 । 𑌸𑍍𑌥𑍂𑌲𑌸𑍂𑌕𑍍𑌷𑍍𑌮𑌶𑌰𑍀𑌰𑌾𑌭𑌿𑌮𑌾𑌨𑍀 𑌤𑍍𑌵𑌂𑌪𑌦𑌵𑌾𑌚𑍍𑌯𑌾𑌰𑍍𑌥𑌃 ।
𑌉𑌪𑌾𑌧𑌿𑌵𑌿𑌨𑌿𑌰𑍍𑌮𑍁𑌕𑍍𑌤𑌂 𑌸𑌮𑌾𑌧𑌿𑌦𑌶𑌾𑌸𑌂𑌪𑌨𑍍𑌨𑌂 𑌶𑍁𑌦𑍍𑌧𑌂 𑌚𑍈𑌤𑌨𑍍𑌯𑌂
𑌤𑍍𑌵𑌂𑌪𑌦𑌲𑌕𑍍𑌷𑍍𑌯𑌾𑌰𑍍𑌥𑌃 ।
𑌏𑌵𑌂 𑌸𑌰𑍍𑌵𑌜𑍍𑌞𑌤𑍍𑌵𑌾𑌦𑌿𑌵𑌿𑌶𑌿𑌷𑍍𑌟 𑌈𑌶𑍍𑌵𑌰𑌃 𑌤𑌤𑍍𑌪𑌦𑌵𑌾𑌚𑍍𑌯𑌾𑌰𑍍𑌥𑌃 ।
𑌉𑌪𑌾𑌧𑌿𑌶𑍂𑌨𑍍𑌯𑌂 𑌶𑍁𑌦𑍍𑌧𑌚𑍈𑌤𑌨𑍍𑌯𑌂 𑌤𑌤𑍍𑌪𑌦𑌲𑌕𑍍𑌷𑍍𑌯𑌾𑌰𑍍𑌥𑌃 ।
𑌏𑌵𑌂 𑌚 𑌜𑍀𑌵𑍇𑌶𑍍𑌵𑌰𑌯𑍋 𑌚𑍈𑌤𑌨𑍍𑌯𑌰𑍂𑌪𑍇𑌣𑌾𑌽𑌭𑍇𑌦𑍇 𑌬𑌾𑌧𑌕𑌾𑌭𑌾𑌵𑌃 ।
𑌜𑍀𑌵𑌨𑍍𑌮𑍁𑌕𑍍𑌤𑌃
𑌏𑌵𑌂 𑌚 𑌵𑍇𑌦𑌾𑌂𑌤𑌵𑌾𑌕𑍍𑌯𑍈𑌃 𑌸𑌦𑍍𑌗𑍁𑌰𑍂𑌪𑌦𑍇𑌶𑍇𑌨 𑌚 𑌸𑌰𑍍𑌵𑍇𑌷𑍍𑌵𑌪𑌿
𑌭𑍂𑌤𑍇𑌷𑍁 𑌯𑍇𑌷𑌾𑌂
𑌬𑍍𑌰𑌹𑍍𑌮𑌬𑍁𑌦𑍍𑌧𑌿𑌰𑍁𑌤𑍍𑌪𑌨𑍍𑌨𑌾 𑌤𑍇 𑌜𑍀𑌵𑌨𑍍𑌮𑍁𑌕𑍍𑌤𑌾𑌃 𑌇𑌤𑍍𑌯𑌰𑍍𑌥𑌃 ।𑌨𑌨𑍁 𑌜𑍀𑌵𑌨𑍍𑌮𑍁𑌕𑍍𑌤𑌃 𑌕𑌃 ?
𑌯𑌥𑌾 𑌦𑍇𑌹𑍋𑌽𑌹𑌂 𑌪𑍁𑌰𑍁𑌷𑍋𑌽𑌹𑌂 𑌬𑍍𑌰𑌾𑌹𑍍𑌮𑌣𑍋𑌽𑌹𑌂 𑌶𑍂𑌦𑍍𑌰𑍋𑌽𑌹𑌮𑌸𑍍𑌮𑍀𑌤𑌿
𑌦𑍃𑌢𑌨𑌿𑌶𑍍𑌚𑌯𑌸𑍍𑌤𑌥𑌾 𑌨𑌾𑌹𑌂 𑌬𑍍𑌰𑌾𑌹𑍍𑌮𑌣𑌃 𑌨 𑌶𑍂𑌦𑍍𑌰𑌃 𑌨 𑌪𑍁𑌰𑍁𑌷𑌃
𑌕𑌿𑌂𑌤𑍁 𑌅𑌸𑌂𑌗𑌃 𑌸𑌚𑍍𑌚𑌿𑌦𑌾𑌨𑌂𑌦 𑌸𑍍𑌵𑌰𑍂𑌪𑌃 𑌪𑍍𑌰𑌕𑌾𑌶𑌰𑍂𑌪𑌃 𑌸𑌰𑍍𑌵𑌾𑌂𑌤𑌰𑍍𑌯𑌾𑌮𑍀
𑌚𑌿𑌦𑌾𑌕𑌾𑌶𑌰𑍂𑌪𑍋𑌽𑌸𑍍𑌮𑍀𑌤𑌿 𑌦𑍃𑌢𑌨𑌿𑌶𑍍𑌚𑌯
𑌰𑍂𑌪𑍋𑌽𑌪𑌰𑍋𑌕𑍍𑌷𑌜𑍍𑌞𑌾𑌨𑌵𑌾𑌨𑍍 𑌜𑍀𑌵𑌨𑍍𑌮𑍁𑌕𑍍𑌤𑌃 ॥𑌬𑍍𑌰𑌹𑍍𑌮𑍈𑌵𑌾𑌹𑌮𑌸𑍍𑌮𑍀𑌤𑍍𑌯𑌪𑌰𑍋𑌕𑍍𑌷𑌜𑍍𑌞𑌾𑌨𑍇𑌨 𑌨𑌿𑌖𑌿𑌲𑌕𑌰𑍍𑌮𑌬𑌂𑌧𑌵𑌿𑌨𑌿𑌰𑍍𑌮𑍁𑌕𑍍𑌤𑌃
𑌸𑍍𑌯𑌾𑌤𑍍 ।
𑌕𑌰𑍍𑌮𑌾𑌣𑌿
𑌕𑌰𑍍𑌮𑌾𑌣𑌿 𑌕𑌤𑌿𑌵𑌿𑌧𑌾𑌨𑌿 𑌸𑌂𑌤𑍀𑌤𑌿 𑌚𑍇𑌤𑍍
𑌆𑌗𑌾𑌮𑌿𑌸𑌂𑌚𑌿𑌤𑌪𑍍𑌰𑌾𑌰𑌬𑍍𑌧𑌭𑍇𑌦𑍇𑌨 𑌤𑍍𑌰𑌿𑌵𑌿𑌧𑌾𑌨𑌿 𑌸𑌂𑌤𑌿 ।
𑌆𑌗𑌾𑌮𑌿 𑌕𑌰𑍍𑌮
𑌜𑍍𑌞𑌾𑌨𑍋𑌤𑍍𑌪𑌤𑍍𑌤𑍍𑌯𑌨𑌂𑌤𑌰𑌂 𑌜𑍍𑌞𑌾𑌨𑌿𑌦𑍇𑌹𑌕𑍃𑌤𑌂 𑌪𑍁𑌣𑍍𑌯𑌪𑌾𑌪𑌰𑍂𑌪𑌂 𑌕𑌰𑍍𑌮
𑌯𑌦𑌸𑍍𑌤𑌿 𑌤𑌦𑌾𑌗𑌾𑌮𑍀𑌤𑍍𑌯𑌭𑌿𑌧𑍀𑌯𑌤𑍇 ।
𑌸𑌂𑌚𑌿𑌤 𑌕𑌰𑍍𑌮
𑌸𑌂𑌚𑌿𑌤𑌂 𑌕𑌰𑍍𑌮 𑌕𑌿𑌮𑍍 ?
𑌅𑌨𑌂𑌤𑌕𑍋𑌟𑌿𑌜𑌨𑍍𑌮𑌨𑌾𑌂 𑌬𑍀𑌜𑌭𑍂𑌤𑌂 𑌸𑌤𑍍 𑌯𑌤𑍍𑌕𑌰𑍍𑌮𑌜𑌾𑌤𑌂 𑌪𑍂𑌰𑍍𑌵𑌾𑌰𑍍𑌜𑌿𑌤𑌂
𑌤𑌿𑌷𑍍𑌠𑌤𑌿 𑌤𑌤𑍍 𑌸𑌂𑌚𑌿𑌤𑌂 𑌜𑍍𑌞𑍇𑌯𑌮𑍍 ।
𑌪𑍍𑌰𑌾𑌰𑌬𑍍𑌧 𑌕𑌰𑍍𑌮
𑌪𑍍𑌰𑌾𑌰𑌬𑍍𑌧𑌂 𑌕𑌰𑍍𑌮 𑌕𑌿𑌮𑌿𑌤𑌿 𑌚𑍇𑌤𑍍 ।
𑌇𑌦𑌂 𑌶𑌰𑍀𑌰𑌮𑍁𑌤𑍍𑌪𑌾𑌦𑍍𑌯 𑌇𑌹 𑌲𑍋𑌕𑍇 𑌏𑌵𑌂 𑌸𑍁𑌖𑌦𑍁𑌃𑌖𑌾𑌦𑌿𑌪𑍍𑌰𑌦𑌂 𑌯𑌤𑍍𑌕𑌰𑍍𑌮
𑌤𑌤𑍍𑌪𑍍𑌰𑌾𑌰𑌬𑍍𑌧𑌂
𑌭𑍋𑌗𑍇𑌨 𑌨𑌷𑍍𑌟𑌂 𑌭𑌵𑌤𑌿 𑌪𑍍𑌰𑌾𑌰𑌬𑍍𑌧𑌕𑌰𑍍𑌮𑌣𑌾𑌂 𑌭𑍋𑌗𑌾𑌦𑍇𑌵 𑌕𑍍𑌷𑌯 𑌇𑌤𑌿 ।
𑌕𑌰𑍍𑌮 𑌮𑍁𑌕𑍍𑌤𑌃
𑌸𑌂𑌚𑌿𑌤𑌂 𑌕𑌰𑍍𑌮 𑌬𑍍𑌰𑌹𑍍𑌮𑍈𑌵𑌾𑌹𑌮𑌿𑌤𑌿 𑌨𑌿𑌶𑍍𑌚𑌯𑌾𑌤𑍍𑌮𑌕𑌜𑍍𑌞𑌾𑌨𑍇𑌨 𑌨𑌶𑍍𑌯𑌤𑌿 ।𑌆𑌗𑌾𑌮𑌿 𑌕𑌰𑍍𑌮 𑌅𑌪𑌿 𑌜𑍍𑌞𑌾𑌨𑍇𑌨 𑌨𑌶𑍍𑌯𑌤𑌿 𑌕𑌿𑌂𑌚 𑌆𑌗𑌾𑌮𑌿 𑌕𑌰𑍍𑌮𑌣𑌾𑌂
𑌨𑌲𑌿𑌨𑍀𑌦𑌲𑌗𑌤𑌜𑌲𑌵𑌤𑍍 𑌜𑍍𑌞𑌾𑌨𑌿𑌨𑌾𑌂 𑌸𑌂𑌬𑌂𑌧𑍋 𑌨𑌾𑌸𑍍𑌤𑌿 ।
𑌜𑍍𑌞𑌾𑌨𑌿𑌃
𑌕𑌿𑌂𑌚 𑌯𑍇 𑌜𑍍𑌞𑌾𑌨𑌿𑌨𑌂 𑌸𑍍𑌤𑍁𑌵𑌂𑌤𑌿 𑌭𑌜𑌂𑌤𑌿 𑌅𑌰𑍍𑌚𑌯𑌂𑌤𑌿 𑌤𑌾𑌨𑍍𑌪𑍍𑌰𑌤𑌿
𑌜𑍍𑌞𑌾𑌨𑌿𑌕𑍃𑌤𑌂 𑌆𑌗𑌾𑌮𑌿 𑌪𑍁𑌣𑍍𑌯𑌂 𑌗𑌚𑍍𑌛𑌤𑌿 ।
𑌯𑍇 𑌜𑍍𑌞𑌾𑌨𑌿𑌨𑌂 𑌨𑌿𑌂𑌦𑌂𑌤𑌿 𑌦𑍍𑌵𑌿𑌷𑌂𑌤𑌿 𑌦𑍁𑌃𑌖𑌪𑍍𑌰𑌦𑌾𑌨𑌂 𑌕𑍁𑌰𑍍𑌵𑌂𑌤𑌿 𑌤𑌾𑌨𑍍𑌪𑍍𑌰𑌤𑌿
𑌜𑍍𑌞𑌾𑌨𑌿𑌕𑍃𑌤𑌂 𑌸𑌰𑍍𑌵𑌮𑌾𑌗𑌾𑌮𑌿 𑌕𑍍𑌰𑌿𑌯𑌮𑌾𑌣𑌂 𑌯𑌦𑌵𑌾𑌚𑍍𑌯𑌂 𑌕𑌰𑍍𑌮
𑌪𑌾𑌪𑌾𑌤𑍍𑌮𑌕𑌂 𑌤𑌦𑍍𑌗𑌚𑍍𑌛𑌤𑌿 ।
𑌸𑍁𑌹𑍃𑌦𑌃 𑌪𑍁𑌣𑍍𑌯𑌕𑍃𑌤𑌂 𑌦𑍁𑌰𑍍𑌹𑍃𑌦𑌃 𑌪𑌾𑌪𑌕𑍃𑌤𑍍𑌯𑌂 𑌗𑍃𑌹𑍍𑌣𑌂𑌤𑌿 ।
𑌬𑍍𑌰𑌹𑍍𑌮𑌾𑌨𑌂𑌦𑌮𑍍
𑌤𑌥𑌾 𑌚𑌾𑌤𑍍𑌮𑌵𑌿𑌤𑍍𑌸𑌂𑌸𑌾𑌰𑌂 𑌤𑍀𑌰𑍍𑌤𑍍𑌵𑌾 𑌬𑍍𑌰𑌹𑍍𑌮𑌾𑌨𑌂𑌦𑌮𑌿𑌹𑍈𑌵 𑌪𑍍𑌰𑌾𑌪𑍍𑌨𑍋𑌤𑌿 ।
𑌤𑌰𑌤𑌿 𑌶𑍋𑌕𑌮𑌾𑌤𑍍𑌮𑌵𑌿𑌤𑍍 𑌇𑌤𑌿 𑌶𑍍𑌰𑍁𑌤𑍇𑌃 ।
𑌤𑌨𑍁𑌂 𑌤𑍍𑌯𑌜𑌤𑍁 𑌵𑌾 𑌕𑌾𑌶𑍍𑌯𑌾𑌂 𑌶𑍍𑌵𑌪𑌚𑌸𑍍𑌯 𑌗𑍃𑌹𑍇𑌽𑌥 𑌵𑌾 ।
𑌜𑍍𑌞𑌾𑌨𑌸𑌂𑌪𑍍𑌰𑌾𑌪𑍍𑌤𑌿𑌸𑌮𑌯𑍇 𑌮𑍁𑌕𑍍𑌤𑌾𑌽𑌸𑍌 𑌵𑌿𑌗𑌤𑌾𑌶𑌯𑌃 । 𑌇𑌤𑌿 𑌸𑍍𑌮𑍃𑌤𑍇𑌶𑍍𑌚 ।𑌇𑌤𑌿 𑌶𑍍𑌰𑍀𑌶𑌂𑌕𑌰𑌭𑌗𑌵𑌤𑍍𑌪𑌾𑌦𑌾𑌚𑌾𑌰𑍍𑌯𑌪𑍍𑌰𑌣𑍀𑌤𑌃 𑌤𑌤𑍍𑌤𑍍𑌵𑌬𑍋𑌧𑌪𑍍𑌰𑌕𑌰𑌣𑌂 𑌸𑌮𑌾𑌪𑍍𑌤𑌮𑍍 ।
