ଅଜାନଂତୋ ୟାଂତି କ୍ଷୟମଵଶମନ୍ୟୋନ୍ୟକଲହୈ-
-ରମୀ ମାୟାଗ୍ରଂଥୌ ତଵ ପରିଲୁଠଂତଃ ସମୟିନଃ ।
ଜଗନ୍ମାତର୍ଜନ୍ମଜ୍ଵରଭୟତମଃ କୌମୁଦି ଵୟଂ
ନମସ୍ତେ କୁର୍ଵାଣାଃ ଶରଣମୁପୟାମୋ ଭଗଵତୀମ୍ ॥ 1 ॥
ଵଚସ୍ତର୍କାଗମ୍ୟସ୍ଵରସପରମାନଂଦଵିଭଵ-
-ପ୍ରବୋଧାକାରାୟ ଦ୍ୟୁତିତୁଲିତନୀଲୋତ୍ପଲରୁଚେ ।
ଶିଵାଦ୍ୟାରାଧ୍ୟାୟ ସ୍ତନଭରଵିନମ୍ରାୟ ସତତଂ
ନମସ୍ତସ୍ମୈ କସ୍ମୈଚନ ଭଵତୁ ମୁଗ୍ଧାୟ ମହସେ ॥ 2 ॥
ଅନାଦ୍ୟଂତାଭେଦପ୍ରଣୟରସିକାପି ପ୍ରଣୟିନୀ
ଶିଵସ୍ୟାସୀର୍ୟତ୍ତ୍ଵଂ ପରିଣୟଵିଧୌ ଦେଵି ଗୃହିଣୀ ।
ସଵିତ୍ରୀ ଭୂତାନାମପି ୟଦୁଦଭୂଃ ଶୈଲତନୟା
ତଦେତତ୍ସଂସାରପ୍ରଣୟନମହାନାଟକମୁଖମ୍ ॥ 3 ॥
ବ୍ରୁଵଂତ୍ୟେକେ ତତ୍ତ୍ଵଂ ଭଗଵତି ସଦନ୍ୟେ ଵିଦୁରସ-
-ତ୍ପରେ ମାତଃ ପ୍ରାହୁସ୍ତଵ ସଦସଦନ୍ୟେ ସୁକଵୟଃ ।
ପରେ ନୈତତ୍ସର୍ଵଂ ସମଭିଦଧତେ ଦେଵି ସୁଧିୟ-
-ସ୍ତଦେତତ୍ତ୍ଵନ୍ମାୟାଵିଲସିତମଶେଷଂ ନନୁ ଶିଵେ ॥ 4 ॥
ଲୁଠଦ୍ଗୁଂଜାହାରସ୍ତନଭରନମନ୍ମଧ୍ୟଲତିକା-
-ମୁଦଂଚଦ୍ଧର୍ମାଂଭଃ କଣଗୁଣିତଵକ୍ତ୍ରାଂବୁଜରୁଚମ୍ ।
ଶିଵଂ ପାର୍ଥତ୍ରାଣପ୍ରଵଣମୃଗୟାକାରଗୁଣିତଂ
ଶିଵାମନ୍ଵଗ୍ୟାଂତୀଂ ଶରଣମହମନ୍ଵେମି ଶବରୀମ୍ ॥ 5 ॥
ମିଥଃ କେଶାକେଶିପ୍ରଥନନିଧନାସ୍ତର୍କଘଟନାଃ
ବହୁଶ୍ରଦ୍ଧାଭକ୍ତିପ୍ରଣତିଵିଷୟାଃ ଶାସ୍ତ୍ରଵିଧୟଃ ।
ପ୍ରସୀଦ ପ୍ରତ୍ୟକ୍ଷୀଭଵ ଗିରିସୁତେ ଦେହି ଶରଣଂ
ନିରାଲଂବଂ ଚେତଃ ପରିଲୁଠତି ପାରିପ୍ଲଵମିଦମ୍ ॥ 6 ॥
ଶୁନାଂ ଵା ଵହ୍ନେର୍ଵା ଖଗପରିଷଦୋ ଵା ୟଦଶନଂ
କଦା କେନ କ୍ଵେତି କ୍ଵଚିଦପି ନ କଶ୍ଚିତ୍କଲୟତି ।
ଅମୁଷ୍ମିନ୍ଵିଶ୍ଵାସଂ ଵିଜହିହି ମମାହ୍ନାୟ ଵପୁଷି
ପ୍ରପଦ୍ୟେଥାଶ୍ଚେତଃ ସକଲଜନନୀମେଵ ଶରଣମ୍ ॥ 7 ॥
ତଟିତ୍କୋଟିଜ୍ୟୋତିର୍ଦ୍ୟୁତିଦଲିତଷଡ୍ଗ୍ରଂଥିଗହନଂ
ପ୍ରଵିଷ୍ଟଂ ସ୍ଵାଧାରଂ ପୁନରପି ସୁଧାଵୃଷ୍ଟିଵପୁଷା ।
କିମପ୍ୟଷ୍ଟାଵିଂଶତ୍କିରଣସକଲୀଭୂତମନିଶଂ
ଭଜେ ଧାମ ଶ୍ୟାମଂ କୁଚଭରନତଂ ବର୍ବରକଚମ୍ ॥ 8 ॥
ଚତୁଷ୍ପତ୍ରାଂତଃ ଷଡ୍ଦଲପୁଟଭଗାଂତସ୍ତ୍ରିଵଲୟ-
-ସ୍ଫୁରଦ୍ଵିଦ୍ୟୁଦ୍ଵହ୍ନିଦ୍ୟୁମଣିନିୟୁତାଭଦ୍ୟୁତିଲତେ ।
ଷଡଶ୍ରଂ ଭିତ୍ତ୍ଵାଦୌ ଦଶଦଲମଥ ଦ୍ଵାଦଶଦଲଂ
କଲାଶ୍ରଂ ଚ ଦ୍ଵ୍ୟଶ୍ରଂ ଗତଵତି ନମସ୍ତେ ଗିରିସୁତେ ॥ 9 ॥
କୁଲଂ କେଚିତ୍ପ୍ରାହୁର୍ଵପୁରକୁଲମନ୍ୟେ ତଵ ବୁଧାଃ
ପରେ ତତ୍ସଂଭେଦଂ ସମଭିଦଧତେ କୌଲମପରେ ।
ଚତୁର୍ଣାମପ୍ୟେଷାମୁପରି କିମପି ପ୍ରାହୁରପରେ
ମହାମାୟେ ତତ୍ତ୍ଵଂ ତଵ କଥମମୀ ନିଶ୍ଚିନୁମହେ ॥ 10 ॥
ଷଡଧ୍ଵାରଣ୍ୟାନୀଂ ପ୍ରଲୟରଵିକୋଟିପ୍ରତିରୁଚା
ରୁଚା ଭସ୍ମୀକୃତ୍ୟ ସ୍ଵପଦକମଲପ୍ରହ୍ଵଶିରସାମ୍ ।
ଵିତନ୍ଵାନଃ ଶୈଵଂ କିମପି ଵପୁରିଂଦୀଵରରୁଚିଃ
କୁଚାଭ୍ୟାମାନମ୍ରସ୍ତଵ ପୁରୁଷକାରୋ ଵିଜୟତେ ॥ 11 ॥
ପ୍ରକାଶାନଂଦାଭ୍ୟାମଵିଦିତଚରୀଂ ମଧ୍ୟପଦଵୀଂ
ପ୍ରଵିଶ୍ୟୈତଦ୍ଦ୍ଵଂଦ୍ଵଂ ରଵିଶଶିସମାଖ୍ୟଂ କବଲୟନ୍ ।
ପ୍ରପଦ୍ୟୋର୍ଧ୍ଵଂ ନାଦଂ ଲୟଦହନଭସ୍ମୀକୃତକୁଲଃ
ପ୍ରସାଦାତ୍ତେ ଜଂତୁଃ ଶିଵମକୁଲମଂବ ପ୍ରଵିଶତି ॥ 12 ॥
ମନୁଷ୍ୟାସ୍ତିର୍ୟଂଚୋ ମରୁତ ଇତି ଲୋକତ୍ରୟମିଦଂ
ଭଵାଂଭୋଧୌ ମଗ୍ନଂ ତ୍ରିଗୁଣଲହରୀକୋଟିଲୁଠିତମ୍ ।
କଟାକ୍ଷଶ୍ଚେଦ୍ୟତ୍ର କ୍ଵଚନ ତଵ ମାତଃ କରୁଣୟା
ଶରୀରୀ ସଦ୍ୟୋଽୟଂ ଵ୍ରଜତି ପରମାନଂଦତନୁତାମ୍ ॥ 13 ॥
ପ୍ରିୟଂଗୁଶ୍ୟାମାଂଗୀମରୁଣତରଵାସଂ କିସଲୟାଂ
ସମୁନ୍ମୀଲନ୍ମୁକ୍ତାଫଲଵହଲନେପଥ୍ୟସୁଭଗାମ୍ ।
ସ୍ତନଦ୍ଵଂଦ୍ଵସ୍ଫାରସ୍ତବକନମିତାଂ କଲ୍ପଲତିକାଂ
ସକୃଦ୍ଧ୍ୟାୟଂତସ୍ତ୍ଵାଂ ଦଧତି ଶିଵଚିଂତାମଣିପଦମ୍ ॥ 14 ॥
ଷଡାଧାରାଵର୍ତୈରପରିମିତମଂତ୍ରୋର୍ମିପଟଲୈଃ
ଲସନ୍ମୁଦ୍ରାଫେନୈର୍ବହୁଵିଧଲସଦ୍ଦୈଵତଝଷୈଃ ।
କ୍ରମସ୍ରୋତୋଭିସ୍ତ୍ଵଂ ଵହସି ପରନାଦାମୃତନଦୀ
ଭଵାନି ପ୍ରତ୍ୟଗ୍ରା ଶିଵଚିଦମୃତାବ୍ଧିପ୍ରଣୟିନୀ ॥ 15 ॥
ମହୀପାଥୋଵହ୍ନିଶ୍ଵସନଵିୟଦାତ୍ମେଂଦୁରଵିଭି-
-ର୍ଵପୁର୍ଭିଗ୍ରସ୍ତାଶୈରପି ତଵ କିୟାନଂବ ମହିମା ।
ଅମୂନ୍ୟାଲୋକ୍ୟଂତେ ଭଗଵତି ନ କୁତ୍ରାପ୍ୟଣୁତମା-
-ମଵସ୍ଥାଂ ପ୍ରାପ୍ତାନି ତ୍ଵୟି ତୁ ପରମଵ୍ୟୋମଵପୁଷି ॥ 16 ॥
କଲାମାଜ୍ଞାଂ ପ୍ରଜ୍ଞାଂ ସମୟମନୁଭୂତିଂ ସମରସଂ
ଗୁରୁଂ ପାରଂପର୍ୟଂ ଵିନୟମୁପଦେଶଂ ଶିଵପଦମ୍ ।
ପ୍ରମାଣଂ ନିର୍ଵାଣଂ ପ୍ରକୃତିମଭିଭୂତିଂ ପରଗୁହାଂ
ଵିଧିଂ ଵିଦ୍ୟାମାହୁଃ ସକଲଜନନୀମେଵ ମୁନୟଃ ॥ 17 ॥
ପ୍ରଲୀନେ ଶବ୍ଦୌଘେ ତଦନୁ ଵିରତେ ବିଂଦୁଵିଭଵେ
ତତସ୍ତତ୍ତ୍ଵେ ଚାଷ୍ଟଧ୍ଵନିଭିରନପାୟିନ୍ୟଧିଗତେ ।
ଶ୍ରିତେ ଶାକ୍ତେ ପର୍ଵଣ୍ୟନୁକଲିତଚିନ୍ମାତ୍ର ଗହନାଂ
ସ୍ଵସଂଵିତ୍ତିଂ ୟୋଗୀ ରସୟତି ଶିଵାଖ୍ୟାଂ ଭଗଵତୀମ୍ ॥ 18 ॥
ପରାନଂଦାକାରାଂ ନିରଵଧିଶିଵୈଶ୍ଵର୍ୟଵପୁଷଂ
ନିରାକାରାଂ ଜ୍ଞାନପ୍ରକୃତିମପରିଚ୍ଛିନ୍ନକରୁଣାମ୍ ।
ସଵିତ୍ରୀଂ ଲୋକାନାଂ ନିରତିଶୟଧାମାସ୍ପଦପଦାଂ
ଭଵୋ ଵା ମୋକ୍ଷୋ ଵା ଭଵତୁ ଭଵତୀମେଵ ଭଜତାମ୍ ॥ 19 ॥
ଜଗତ୍କାୟେ କୃତ୍ଵା ତଦପି ହୃଦୟେ ତଚ୍ଚ ପୁରୁଷେ
ପୁମାଂସଂ ବିଂଦୁସ୍ଥଂ ତଦପି ଵିୟଦାଖ୍ୟେ ଚ ଗହନେ ।
ତଦେତଦ୍ଜ୍ଞାନାଖ୍ୟେ ତଦପି ପରମାନଂଦଗହନେ
ମହାଵ୍ୟୋମାକାରେ ତ୍ଵଦନୁଭଵଶୀଲୋ ଵିଜୟତେ ॥ 20 ॥
ଵିଧେ ଵେଦ୍ୟେ ଵିଦ୍ୟେ ଵିଵିଧସମୟେ ଵେଦଗୁଲିକେ
ଵିଚିତ୍ରେ ଵିଶ୍ଵାଦ୍ୟେ ଵିନୟସୁଲଭେ ଵେଦଜନନି ।
ଶିଵଜ୍ଞେ ଶୂଲସ୍ଥେ ଶିଵପଦଵଦାନ୍ୟେ ଶିଵନିଧେ
ଶିଵେ ମାତର୍ମହ୍ୟଂ ତ୍ଵୟି ଵିତର ଭକ୍ତିଂ ନିରୁପମାମ୍ ॥ 21 ॥
ଵିଧେର୍ମୁଂଡଂ ହୃତ୍ଵା ୟଦକୁରୁତ ପାତ୍ରଂ କରତଲେ
ହରିଂ ଶୂଲପ୍ରୋତଂ ୟଦଗମୟଦଂସାଭରଣତାମ୍ ।
ଅଲଂଚକ୍ରେ କଂଠଂ ୟଦପି ଗରଲେନାଂବ ଗିରିଶଃ
ଶିଵସ୍ଥାୟାଃ ଶକ୍ତେସ୍ତଦିଦମଖିଲଂ ତେ ଵିଲସିତମ୍ ॥ 22 ॥
ଵିରିଂଚ୍ୟାଖ୍ୟା ମାତଃ ସୃଜସି ହରିସଂଜ୍ଞା ତ୍ଵମଵସି
ତ୍ରିଲୋକୀଂ ରୁଦ୍ରାଖ୍ୟା ହରସି ଵିଦଧାସୀଶ୍ଵରଦଶାମ୍ ।
ଭଵଂତୀ ନାଦାଖ୍ୟା ଵିହରସି ଚ ପାଶୌଘଦଲନୀ
ତ୍ଵମେଵୈକାଽନେକା ଭଵସି କୃତିଭେଦୈର୍ଗିରିସୁତେ ॥ 23 ॥
ମୁନୀନାଂ ଚେତୋଭିଃ ପ୍ରମୃଦିତକଷାୟୈରପି ମନା-
-ଗଶକ୍ୟଂ ସଂସ୍ପ୍ରଷ୍ଟୁଂ ଚକିତଚକିତୈରଂବ ସତତମ୍ ।
ଶ୍ରୁତୀନାଂ ମୂର୍ଧାନଃ ପ୍ରକୃତିକଠିନାଃ କୋମଲତରେ
କଥଂ ତେ ଵିଂଦଂତେ ପଦକିସଲୟେ ପାର୍ଵତି ପଦମ୍ ॥ 24 ॥
ତଟିଦ୍ଵଲ୍ଲୀଂ ନିତ୍ୟାମମୃତସରିତଂ ପାରରହିତାଂ
ମଲୋତ୍ତୀର୍ଣାଂ ଜ୍ୟୋତ୍ସ୍ନାଂ ପ୍ରକୃତିମଗୁଣଗ୍ରଂଥିଗହନାମ୍ ।
ଗିରାଂ ଦୂରାଂ ଵିଦ୍ୟାମଵିନତକୁଚାଂ ଵିଶ୍ଵଜନନୀ-
-ମପର୍ୟଂତାଂ ଲକ୍ଷ୍ମୀମଭିଦଧତି ସଂତୋ ଭଗଵତୀମ୍ ॥ 25 ॥
ଶରୀରଂ କ୍ଷିତ୍ୟଂଭଃ ପ୍ରଭୃତିରଚିତଂ କେଵଲମଚିତ୍
ସୁଖଂ ଦୁଃଖଂ ଚାୟଂ କଲୟତି ପୁମାଂଶ୍ଚେତନ ଇତି ।
ସ୍ଫୁଟଂ ଜାନାନୋଽପି ପ୍ରଭଵତି ନ ଦେହୀ ରହୟିତୁଂ
ଶରୀରାହଂକାରଂ ତଵ ସମୟବାହ୍ୟୋ ଗିରିସୁତେ ॥ 26 ॥
ପିତା ମାତା ଭ୍ରାତା ସୁହୃଦନୁଚରଃ ସଦ୍ମ ଗୃହିଣୀ
ଵପୁଃ କ୍ଷେତ୍ରଂ ମିତ୍ରଂ ଧନମପି ୟଦା ମାଂ ଵିଜହତି ।
ତଦା ମେ ଭିଂଦାନା ସପଦି ଭୟମୋହାଂଧତମସଂ
ମହାଜ୍ୟୋତ୍ସ୍ନେ ମାତର୍ଭଵ କରୁଣୟା ସନ୍ନିଧିକରୀ ॥ 27 ॥
ସୁତା ଦକ୍ଷସ୍ୟାଦୌ କିଲ ସକଲମାତସ୍ତ୍ଵମୁଦଭୂଃ
ସଦୋଷଂ ତଂ ହିତ୍ଵା ତଦନୁ ଗିରିରାଜସ୍ୟ ଦୁହିତା ।
ଅନାଦ୍ୟଂତା ଶଂଭୋରପୃଥଗପି ଶକ୍ତିର୍ଭଗଵତୀ
ଵିଵାହାଜ୍ଜାୟାସୀତ୍ୟହହ ଚରିତଂ ଵେତ୍ତି ତଵ କଃ ॥ 28 ॥
କଣାସ୍ତ୍ଵଦ୍ଦୀପ୍ତୀନାଂ ରଵିଶଶିକୃଶାନୁପ୍ରଭୃତୟଃ
ପରଂ ବ୍ରହ୍ମ କ୍ଷୁଦ୍ରଂ ତଵ ନିୟତମାନଂଦକଣିକା ।
ଶିଵାଦି କ୍ଷିତ୍ୟଂତଂ ତ୍ରିଵଲୟତନୋଃ ସର୍ଵମୁଦରେ
ତଵାସ୍ତେ ଭକ୍ତସ୍ୟ ସ୍ଫୁରସି ହୃଦି ଚିତ୍ରଂ ଭଗଵତି ॥ 29 ॥
ପୁରଃ ପଶ୍ଚାଦଂତର୍ବହିରପରିମେୟଂ ପରିମିତଂ
ପରଂ ସ୍ଥୂଲଂ ସୂକ୍ଷ୍ମଂ ସକଲମକୁଲଂ ଗୁହ୍ୟମଗୁହମ୍ ।
ଦଵୀୟୋ ନେଦୀୟଃ ସଦସଦିତି ଵିଶ୍ଵଂ ଭଗଵତୀ
ସଦା ପଶ୍ୟଂତ୍ୟାଖ୍ୟାଂ ଵହସି ଭୁଵନକ୍ଷୋଭଜନନୀମ୍ ॥ 30 ॥
ପ୍ରଵିଶ୍ୟ ତ୍ଵନ୍ମାର୍ଗଂ ସହଜଦୟୟା ଦେଶିକଦୃଶା
ଷଡଧ୍ଵଧ୍ଵାଂତୌଘଚ୍ଛିଦୁରଗଣନାତୀତକରୁଣାମ୍ ।
ପରାମାଜ୍ଞାକାରାଂ ସପଦି ଶିଵୟଂତୀଂ ଶିଵତନୁଂ
ସ୍ଵମାତ୍ମାନଂ ଧନ୍ୟାଶ୍ଚିରମୁପଲଭଂତେ ଭଗଵତୀମ୍ ॥ 31 ॥
ମୟୂଖାଃ ପୂଷ୍ଣୀଵ ଜ୍ଵଲନ ଇଵ ତଦ୍ଦୀପ୍ତିକଣିକାଃ
ପୟୋଧୌ କଲ୍ଲୋଲାଃ ପ୍ରତିହତମହିମ୍ନୀଵ ପୃଷତଃ ।
ଉଦେତ୍ୟୋଦେତ୍ୟାଂବ ତ୍ଵୟି ସହ ନିଜୈଃ ସାତ୍ତ୍ଵିକଗୁଣୈ-
-ର୍ଭଜଂତେ ତତ୍ତ୍ଵୌଘାଃ ପ୍ରଶମମନୁକଲ୍ପଂ ପରଵଶାଃ ॥ 32 ॥
ଵିଧୁର୍ଵିଷ୍ଣୁର୍ବ୍ରହ୍ମା ପ୍ରକୃତିରଣୁରାତ୍ମା ଦିନକରଃ
ସ୍ଵଭାଵୋ ଜୈନେଂଦ୍ରଃ ସୁଗତମୁନିରାକାଶମଲିନଃ ।
ଶିଵଃ ଶକ୍ତିଶ୍ଚେତି ଶ୍ରୁତିଵିଷୟତାଂ ତାମୁପଗତାଂ
ଵିକଲ୍ପୈରେଭିସ୍ତ୍ଵାମଭିଦଧତି ସଂତୋ ଭଗଵତୀମ୍ ॥ 33 ॥
ଶିଵସ୍ତ୍ଵଂ ଶକ୍ତିସ୍ତ୍ଵଂ ତ୍ଵମସି ସମୟା ତ୍ଵଂ ସମୟିନୀ
ତ୍ଵମାତ୍ମା ତ୍ଵଂ ଦୀକ୍ଷା ତ୍ଵମୟମଣିମାଦିର୍ଗୁଣଗଣଃ ।
ଅଵିଦ୍ୟା ତ୍ଵଂ ଵିଦ୍ୟା ତ୍ଵମସି ନିଖିଲଂ ତ୍ଵଂ କିମପରଂ
ପୃଥକ୍ତତ୍ତ୍ଵଂ ତ୍ଵତ୍ତୋ ଭଗଵତି ନ ଵୀକ୍ଷାମହ ଇମେ ॥ 34 ॥
ତ୍ଵୟାସୌ ଜାନୀତେ ରଚୟତି ଭଵତ୍ୟୈଵ ସତତଂ
ତ୍ଵୟୈଵେଚ୍ଛତ୍ୟଂବ ତ୍ଵମସି ନିଖିଲା ୟସ୍ୟ ତନଵଃ ।
ଜଗତ୍ସାମ୍ୟଂ ଶଂଭୋର୍ଵହସି ପରମଵ୍ୟୋମଵପୁଷଃ
ତଥାପ୍ୟର୍ଧଂ ଭୂତ୍ଵା ଵିହରସି ଶିଵସ୍ୟେତି କିମିଦମ୍ ॥ 35 ॥
ଅସଂଖ୍ୟୈଃ ପ୍ରାଚୀନୈର୍ଜନନି ଜନନୈଃ କର୍ମଵିଲୟା-
-ତ୍ସକୃଜ୍ଜନ୍ମନ୍ୟଂତେ ଗୁରୁଵପୁଷମାସାଦ୍ୟ ଗିରିଶମ୍ ।
ଅଵାପ୍ୟାଜ୍ଞାଂ ଶୈଵୀଂ ଶିଵତନୁମପି ତ୍ଵାଂ ଵିଦିତଵା-
-ନ୍ନୟେୟଂ ତ୍ଵତ୍ପୂଜାସ୍ତୁତିଵିରଚନେନୈଵ ଦିଵସାନ୍ ॥ 36 ॥
ୟତ୍ଷଟ୍ପତ୍ରଂ କମଲମୁଦିତଂ ତସ୍ୟ ୟା କର୍ଣିକାଖ୍ୟା
ୟୋନିସ୍ତସ୍ୟାଃ ପ୍ରଥିତମୁଦରେ ୟତ୍ତଦୋଂକାରପୀଠମ୍ ।
ତସ୍ୟାପ୍ୟଂତଃ କୁଚଭରନତାଂ କୁଂଡଲୀତି ପ୍ରସିଦ୍ଧାଂ
ଶ୍ୟାମାକାରାଂ ସକଲଜନନୀଂ ସଂତତଂ ଭାଵୟାମି ॥ 37 ॥
ଭୁଵି ପୟସି କୃଶାନୌ ମାରୁତେ ଖେ ଶଶାଂକେ
ସଵିତରି ୟଜମାନେଽପ୍ୟଷ୍ଟଧା ଶକ୍ତିରେକା ।
ଵହସି କୁଚଭରାଭ୍ୟାଂ ୟାଵନମ୍ରାପି ଵିଶ୍ଵଂ
ସକଲଜନନି ସା ତ୍ଵଂ ପାହି ମାମିତ୍ୟଵାଚ୍ୟମ୍ ॥ 38 ॥
ଇତି ଶ୍ରୀକାଳିଦାସ ଵିରଚିତ ପଂଚସ୍ତଵ୍ୟାଂ ପଂଚମଃ ସକଲଜନନୀସ୍ତଵଃ ।
