𑌅𑌜𑌾𑌨𑌂𑌤𑍋 𑌯𑌾𑌂𑌤𑌿 𑌕𑍍𑌷𑌯𑌮𑌵𑌶𑌮𑌨𑍍𑌯𑍋𑌨𑍍𑌯𑌕𑌲𑌹𑍈-
-𑌰𑌮𑍀 𑌮𑌾𑌯𑌾𑌗𑍍𑌰𑌂𑌥𑍌 𑌤𑌵 𑌪𑌰𑌿𑌲𑍁𑌠𑌂𑌤𑌃 𑌸𑌮𑌯𑌿𑌨𑌃 ।
𑌜𑌗𑌨𑍍𑌮𑌾𑌤𑌰𑍍𑌜𑌨𑍍𑌮𑌜𑍍𑌵𑌰𑌭𑌯𑌤𑌮𑌃 𑌕𑍌𑌮𑍁𑌦𑌿 𑌵𑌯𑌂
𑌨𑌮𑌸𑍍𑌤𑍇 𑌕𑍁𑌰𑍍𑌵𑌾𑌣𑌾𑌃 𑌶𑌰𑌣𑌮𑍁𑌪𑌯𑌾𑌮𑍋 𑌭𑌗𑌵𑌤𑍀𑌮𑍍 ॥ 1 ॥

𑌵𑌚𑌸𑍍𑌤𑌰𑍍𑌕𑌾𑌗𑌮𑍍𑌯𑌸𑍍𑌵𑌰𑌸𑌪𑌰𑌮𑌾𑌨𑌂𑌦𑌵𑌿𑌭𑌵-
-𑌪𑍍𑌰𑌬𑍋𑌧𑌾𑌕𑌾𑌰𑌾𑌯 𑌦𑍍𑌯𑍁𑌤𑌿𑌤𑍁𑌲𑌿𑌤𑌨𑍀𑌲𑍋𑌤𑍍𑌪𑌲𑌰𑍁𑌚𑍇 ।
𑌶𑌿𑌵𑌾𑌦𑍍𑌯𑌾𑌰𑌾𑌧𑍍𑌯𑌾𑌯 𑌸𑍍𑌤𑌨𑌭𑌰𑌵𑌿𑌨𑌮𑍍𑌰𑌾𑌯 𑌸𑌤𑌤𑌂
𑌨𑌮𑌸𑍍𑌤𑌸𑍍𑌮𑍈 𑌕𑌸𑍍𑌮𑍈𑌚𑌨 𑌭𑌵𑌤𑍁 𑌮𑍁𑌗𑍍𑌧𑌾𑌯 𑌮𑌹𑌸𑍇 ॥ 2 ॥

𑌅𑌨𑌾𑌦𑍍𑌯𑌂𑌤𑌾𑌭𑍇𑌦𑌪𑍍𑌰𑌣𑌯𑌰𑌸𑌿𑌕𑌾𑌪𑌿 𑌪𑍍𑌰𑌣𑌯𑌿𑌨𑍀
𑌶𑌿𑌵𑌸𑍍𑌯𑌾𑌸𑍀𑌰𑍍𑌯𑌤𑍍𑌤𑍍𑌵𑌂 𑌪𑌰𑌿𑌣𑌯𑌵𑌿𑌧𑍌 𑌦𑍇𑌵𑌿 𑌗𑍃𑌹𑌿𑌣𑍀 ।
𑌸𑌵𑌿𑌤𑍍𑌰𑍀 𑌭𑍂𑌤𑌾𑌨𑌾𑌮𑌪𑌿 𑌯𑌦𑍁𑌦𑌭𑍂𑌃 𑌶𑍈𑌲𑌤𑌨𑌯𑌾
𑌤𑌦𑍇𑌤𑌤𑍍𑌸𑌂𑌸𑌾𑌰𑌪𑍍𑌰𑌣𑌯𑌨𑌮𑌹𑌾𑌨𑌾𑌟𑌕𑌮𑍁𑌖𑌮𑍍 ॥ 3 ॥

𑌬𑍍𑌰𑍁𑌵𑌂𑌤𑍍𑌯𑍇𑌕𑍇 𑌤𑌤𑍍𑌤𑍍𑌵𑌂 𑌭𑌗𑌵𑌤𑌿 𑌸𑌦𑌨𑍍𑌯𑍇 𑌵𑌿𑌦𑍁𑌰𑌸-
-𑌤𑍍𑌪𑌰𑍇 𑌮𑌾𑌤𑌃 𑌪𑍍𑌰𑌾𑌹𑍁𑌸𑍍𑌤𑌵 𑌸𑌦𑌸𑌦𑌨𑍍𑌯𑍇 𑌸𑍁𑌕𑌵𑌯𑌃 ।
𑌪𑌰𑍇 𑌨𑍈𑌤𑌤𑍍𑌸𑌰𑍍𑌵𑌂 𑌸𑌮𑌭𑌿𑌦𑌧𑌤𑍇 𑌦𑍇𑌵𑌿 𑌸𑍁𑌧𑌿𑌯-
-𑌸𑍍𑌤𑌦𑍇𑌤𑌤𑍍𑌤𑍍𑌵𑌨𑍍𑌮𑌾𑌯𑌾𑌵𑌿𑌲𑌸𑌿𑌤𑌮𑌶𑍇𑌷𑌂 𑌨𑌨𑍁 𑌶𑌿𑌵𑍇 ॥ 4 ॥

𑌲𑍁𑌠𑌦𑍍𑌗𑍁𑌂𑌜𑌾𑌹𑌾𑌰𑌸𑍍𑌤𑌨𑌭𑌰𑌨𑌮𑌨𑍍𑌮𑌧𑍍𑌯𑌲𑌤𑌿𑌕𑌾-
-𑌮𑍁𑌦𑌂𑌚𑌦𑍍𑌧𑌰𑍍𑌮𑌾𑌂𑌭𑌃 𑌕𑌣𑌗𑍁𑌣𑌿𑌤𑌵𑌕𑍍𑌤𑍍𑌰𑌾𑌂𑌬𑍁𑌜𑌰𑍁𑌚𑌮𑍍 ।
𑌶𑌿𑌵𑌂 𑌪𑌾𑌰𑍍𑌥𑌤𑍍𑌰𑌾𑌣𑌪𑍍𑌰𑌵𑌣𑌮𑍃𑌗𑌯𑌾𑌕𑌾𑌰𑌗𑍁𑌣𑌿𑌤𑌂
𑌶𑌿𑌵𑌾𑌮𑌨𑍍𑌵𑌗𑍍𑌯𑌾𑌂𑌤𑍀𑌂 𑌶𑌰𑌣𑌮𑌹𑌮𑌨𑍍𑌵𑍇𑌮𑌿 𑌶𑌬𑌰𑍀𑌮𑍍 ॥ 5 ॥

𑌮𑌿𑌥𑌃 𑌕𑍇𑌶𑌾𑌕𑍇𑌶𑌿𑌪𑍍𑌰𑌥𑌨𑌨𑌿𑌧𑌨𑌾𑌸𑍍𑌤𑌰𑍍𑌕𑌘𑌟𑌨𑌾𑌃
𑌬𑌹𑍁𑌶𑍍𑌰𑌦𑍍𑌧𑌾𑌭𑌕𑍍𑌤𑌿𑌪𑍍𑌰𑌣𑌤𑌿𑌵𑌿𑌷𑌯𑌾𑌃 𑌶𑌾𑌸𑍍𑌤𑍍𑌰𑌵𑌿𑌧𑌯𑌃 ।
𑌪𑍍𑌰𑌸𑍀𑌦 𑌪𑍍𑌰𑌤𑍍𑌯𑌕𑍍𑌷𑍀𑌭𑌵 𑌗𑌿𑌰𑌿𑌸𑍁𑌤𑍇 𑌦𑍇𑌹𑌿 𑌶𑌰𑌣𑌂
𑌨𑌿𑌰𑌾𑌲𑌂𑌬𑌂 𑌚𑍇𑌤𑌃 𑌪𑌰𑌿𑌲𑍁𑌠𑌤𑌿 𑌪𑌾𑌰𑌿𑌪𑍍𑌲𑌵𑌮𑌿𑌦𑌮𑍍 ॥ 6 ॥

𑌶𑍁𑌨𑌾𑌂 𑌵𑌾 𑌵𑌹𑍍𑌨𑍇𑌰𑍍𑌵𑌾 𑌖𑌗𑌪𑌰𑌿𑌷𑌦𑍋 𑌵𑌾 𑌯𑌦𑌶𑌨𑌂
𑌕𑌦𑌾 𑌕𑍇𑌨 𑌕𑍍𑌵𑍇𑌤𑌿 𑌕𑍍𑌵𑌚𑌿𑌦𑌪𑌿 𑌨 𑌕𑌶𑍍𑌚𑌿𑌤𑍍𑌕𑌲𑌯𑌤𑌿 ।
𑌅𑌮𑍁𑌷𑍍𑌮𑌿𑌨𑍍𑌵𑌿𑌶𑍍𑌵𑌾𑌸𑌂 𑌵𑌿𑌜𑌹𑌿𑌹𑌿 𑌮𑌮𑌾𑌹𑍍𑌨𑌾𑌯 𑌵𑌪𑍁𑌷𑌿
𑌪𑍍𑌰𑌪𑌦𑍍𑌯𑍇𑌥𑌾𑌶𑍍𑌚𑍇𑌤𑌃 𑌸𑌕𑌲𑌜𑌨𑌨𑍀𑌮𑍇𑌵 𑌶𑌰𑌣𑌮𑍍 ॥ 𑍭 ॥

𑌤𑌟𑌿𑌤𑍍𑌕𑍋𑌟𑌿𑌜𑍍𑌯𑍋𑌤𑌿𑌰𑍍𑌦𑍍𑌯𑍁𑌤𑌿𑌦𑌲𑌿𑌤𑌷𑌡𑍍𑌗𑍍𑌰𑌂𑌥𑌿𑌗𑌹𑌨𑌂
𑌪𑍍𑌰𑌵𑌿𑌷𑍍𑌟𑌂 𑌸𑍍𑌵𑌾𑌧𑌾𑌰𑌂 𑌪𑍁𑌨𑌰𑌪𑌿 𑌸𑍁𑌧𑌾𑌵𑍃𑌷𑍍𑌟𑌿𑌵𑌪𑍁𑌷𑌾 ।
𑌕𑌿𑌮𑌪𑍍𑌯𑌷𑍍𑌟𑌾𑌵𑌿𑌂𑌶𑌤𑍍𑌕𑌿𑌰𑌣𑌸𑌕𑌲𑍀𑌭𑍂𑌤𑌮𑌨𑌿𑌶𑌂
𑌭𑌜𑍇 𑌧𑌾𑌮 𑌶𑍍𑌯𑌾𑌮𑌂 𑌕𑍁𑌚𑌭𑌰𑌨𑌤𑌂 𑌬𑌰𑍍𑌬𑌰𑌕𑌚𑌮𑍍 ॥ 𑍮 ॥

𑌚𑌤𑍁𑌷𑍍𑌪𑌤𑍍𑌰𑌾𑌂𑌤𑌃 𑌷𑌡𑍍𑌦𑌲𑌪𑍁𑌟𑌭𑌗𑌾𑌂𑌤𑌸𑍍𑌤𑍍𑌰𑌿𑌵𑌲𑌯-
-𑌸𑍍𑌫𑍁𑌰𑌦𑍍𑌵𑌿𑌦𑍍𑌯𑍁𑌦𑍍𑌵𑌹𑍍𑌨𑌿𑌦𑍍𑌯𑍁𑌮𑌣𑌿𑌨𑌿𑌯𑍁𑌤𑌾𑌭𑌦𑍍𑌯𑍁𑌤𑌿𑌲𑌤𑍇 ।
𑌷𑌡𑌶𑍍𑌰𑌂 𑌭𑌿𑌤𑍍𑌤𑍍𑌵𑌾𑌦𑍌 𑌦𑌶𑌦𑌲𑌮𑌥 𑌦𑍍𑌵𑌾𑌦𑌶𑌦𑌲𑌂
𑌕𑌲𑌾𑌶𑍍𑌰𑌂 𑌚 𑌦𑍍𑌵𑍍𑌯𑌶𑍍𑌰𑌂 𑌗𑌤𑌵𑌤𑌿 𑌨𑌮𑌸𑍍𑌤𑍇 𑌗𑌿𑌰𑌿𑌸𑍁𑌤𑍇 ॥ 𑍯 ॥

𑌕𑍁𑌲𑌂 𑌕𑍇𑌚𑌿𑌤𑍍𑌪𑍍𑌰𑌾𑌹𑍁𑌰𑍍𑌵𑌪𑍁𑌰𑌕𑍁𑌲𑌮𑌨𑍍𑌯𑍇 𑌤𑌵 𑌬𑍁𑌧𑌾𑌃
𑌪𑌰𑍇 𑌤𑌤𑍍𑌸𑌂𑌭𑍇𑌦𑌂 𑌸𑌮𑌭𑌿𑌦𑌧𑌤𑍇 𑌕𑍌𑌲𑌮𑌪𑌰𑍇 ।
𑌚𑌤𑍁𑌰𑍍𑌣𑌾𑌮𑌪𑍍𑌯𑍇𑌷𑌾𑌮𑍁𑌪𑌰𑌿 𑌕𑌿𑌮𑌪𑌿 𑌪𑍍𑌰𑌾𑌹𑍁𑌰𑌪𑌰𑍇
𑌮𑌹𑌾𑌮𑌾𑌯𑍇 𑌤𑌤𑍍𑌤𑍍𑌵𑌂 𑌤𑌵 𑌕𑌥𑌮𑌮𑍀 𑌨𑌿𑌶𑍍𑌚𑌿𑌨𑍁𑌮𑌹𑍇 ॥ 10 ॥

𑌷𑌡𑌧𑍍𑌵𑌾𑌰𑌣𑍍𑌯𑌾𑌨𑍀𑌂 𑌪𑍍𑌰𑌲𑌯𑌰𑌵𑌿𑌕𑍋𑌟𑌿𑌪𑍍𑌰𑌤𑌿𑌰𑍁𑌚𑌾
𑌰𑍁𑌚𑌾 𑌭𑌸𑍍𑌮𑍀𑌕𑍃𑌤𑍍𑌯 𑌸𑍍𑌵𑌪𑌦𑌕𑌮𑌲𑌪𑍍𑌰𑌹𑍍𑌵𑌶𑌿𑌰𑌸𑌾𑌮𑍍 ।
𑌵𑌿𑌤𑌨𑍍𑌵𑌾𑌨𑌃 𑌶𑍈𑌵𑌂 𑌕𑌿𑌮𑌪𑌿 𑌵𑌪𑍁𑌰𑌿𑌂𑌦𑍀𑌵𑌰𑌰𑍁𑌚𑌿𑌃
𑌕𑍁𑌚𑌾𑌭𑍍𑌯𑌾𑌮𑌾𑌨𑌮𑍍𑌰𑌸𑍍𑌤𑌵 𑌪𑍁𑌰𑍁𑌷𑌕𑌾𑌰𑍋 𑌵𑌿𑌜𑌯𑌤𑍇 ॥ 11 ॥

𑌪𑍍𑌰𑌕𑌾𑌶𑌾𑌨𑌂𑌦𑌾𑌭𑍍𑌯𑌾𑌮𑌵𑌿𑌦𑌿𑌤𑌚𑌰𑍀𑌂 𑌮𑌧𑍍𑌯𑌪𑌦𑌵𑍀𑌂
𑌪𑍍𑌰𑌵𑌿𑌶𑍍𑌯𑍈𑌤𑌦𑍍𑌦𑍍𑌵𑌂𑌦𑍍𑌵𑌂 𑌰𑌵𑌿𑌶𑌶𑌿𑌸𑌮𑌾𑌖𑍍𑌯𑌂 𑌕𑌬𑌲𑌯𑌨𑍍 ।
𑌪𑍍𑌰𑌪𑌦𑍍𑌯𑍋𑌰𑍍𑌧𑍍𑌵𑌂 𑌨𑌾𑌦𑌂 𑌲𑌯𑌦𑌹𑌨𑌭𑌸𑍍𑌮𑍀𑌕𑍃𑌤𑌕𑍁𑌲𑌃
𑌪𑍍𑌰𑌸𑌾𑌦𑌾𑌤𑍍𑌤𑍇 𑌜𑌂𑌤𑍁𑌃 𑌶𑌿𑌵𑌮𑌕𑍁𑌲𑌮𑌂𑌬 𑌪𑍍𑌰𑌵𑌿𑌶𑌤𑌿 ॥ 12 ॥

𑌮𑌨𑍁𑌷𑍍𑌯𑌾𑌸𑍍𑌤𑌿𑌰𑍍𑌯𑌂𑌚𑍋 𑌮𑌰𑍁𑌤 𑌇𑌤𑌿 𑌲𑍋𑌕𑌤𑍍𑌰𑌯𑌮𑌿𑌦𑌂
𑌭𑌵𑌾𑌂𑌭𑍋𑌧𑍌 𑌮𑌗𑍍𑌨𑌂 𑌤𑍍𑌰𑌿𑌗𑍁𑌣𑌲𑌹𑌰𑍀𑌕𑍋𑌟𑌿𑌲𑍁𑌠𑌿𑌤𑌮𑍍 ।
𑌕𑌟𑌾𑌕𑍍𑌷𑌶𑍍𑌚𑍇𑌦𑍍𑌯𑌤𑍍𑌰 𑌕𑍍𑌵𑌚𑌨 𑌤𑌵 𑌮𑌾𑌤𑌃 𑌕𑌰𑍁𑌣𑌯𑌾
𑌶𑌰𑍀𑌰𑍀 𑌸𑌦𑍍𑌯𑍋𑌽𑌯𑌂 𑌵𑍍𑌰𑌜𑌤𑌿 𑌪𑌰𑌮𑌾𑌨𑌂𑌦𑌤𑌨𑍁𑌤𑌾𑌮𑍍 ॥ 13 ॥

𑌪𑍍𑌰𑌿𑌯𑌂𑌗𑍁𑌶𑍍𑌯𑌾𑌮𑌾𑌂𑌗𑍀𑌮𑌰𑍁𑌣𑌤𑌰𑌵𑌾𑌸𑌂 𑌕𑌿𑌸𑌲𑌯𑌾𑌂
𑌸𑌮𑍁𑌨𑍍𑌮𑍀𑌲𑌨𑍍𑌮𑍁𑌕𑍍𑌤𑌾𑌫𑌲𑌵𑌹𑌲𑌨𑍇𑌪𑌥𑍍𑌯𑌸𑍁𑌭𑌗𑌾𑌮𑍍 ।
𑌸𑍍𑌤𑌨𑌦𑍍𑌵𑌂𑌦𑍍𑌵𑌸𑍍𑌫𑌾𑌰𑌸𑍍𑌤𑌬𑌕𑌨𑌮𑌿𑌤𑌾𑌂 𑌕𑌲𑍍𑌪𑌲𑌤𑌿𑌕𑌾𑌂
𑌸𑌕𑍃𑌦𑍍𑌧𑍍𑌯𑌾𑌯𑌂𑌤𑌸𑍍𑌤𑍍𑌵𑌾𑌂 𑌦𑌧𑌤𑌿 𑌶𑌿𑌵𑌚𑌿𑌂𑌤𑌾𑌮𑌣𑌿𑌪𑌦𑌮𑍍 ॥ 14 ॥

𑌷𑌡𑌾𑌧𑌾𑌰𑌾𑌵𑌰𑍍𑌤𑍈𑌰𑌪𑌰𑌿𑌮𑌿𑌤𑌮𑌂𑌤𑍍𑌰𑍋𑌰𑍍𑌮𑌿𑌪𑌟𑌲𑍈𑌃
𑌲𑌸𑌨𑍍𑌮𑍁𑌦𑍍𑌰𑌾𑌫𑍇𑌨𑍈𑌰𑍍𑌬𑌹𑍁𑌵𑌿𑌧𑌲𑌸𑌦𑍍𑌦𑍈𑌵𑌤𑌝𑌷𑍈𑌃 ।
𑌕𑍍𑌰𑌮𑌸𑍍𑌰𑍋𑌤𑍋𑌭𑌿𑌸𑍍𑌤𑍍𑌵𑌂 𑌵𑌹𑌸𑌿 𑌪𑌰𑌨𑌾𑌦𑌾𑌮𑍃𑌤𑌨𑌦𑍀
𑌭𑌵𑌾𑌨𑌿 𑌪𑍍𑌰𑌤𑍍𑌯𑌗𑍍𑌰𑌾 𑌶𑌿𑌵𑌚𑌿𑌦𑌮𑍃𑌤𑌾𑌬𑍍𑌧𑌿𑌪𑍍𑌰𑌣𑌯𑌿𑌨𑍀 ॥ 15 ॥

𑌮𑌹𑍀𑌪𑌾𑌥𑍋𑌵𑌹𑍍𑌨𑌿𑌶𑍍𑌵𑌸𑌨𑌵𑌿𑌯𑌦𑌾𑌤𑍍𑌮𑍇𑌂𑌦𑍁𑌰𑌵𑌿𑌭𑌿-
-𑌰𑍍𑌵𑌪𑍁𑌰𑍍𑌭𑌿𑌗𑍍𑌰𑌸𑍍𑌤𑌾𑌶𑍈𑌰𑌪𑌿 𑌤𑌵 𑌕𑌿𑌯𑌾𑌨𑌂𑌬 𑌮𑌹𑌿𑌮𑌾 ।
𑌅𑌮𑍂𑌨𑍍𑌯𑌾𑌲𑍋𑌕𑍍𑌯𑌂𑌤𑍇 𑌭𑌗𑌵𑌤𑌿 𑌨 𑌕𑍁𑌤𑍍𑌰𑌾𑌪𑍍𑌯𑌣𑍁𑌤𑌮𑌾-
-𑌮𑌵𑌸𑍍𑌥𑌾𑌂 𑌪𑍍𑌰𑌾𑌪𑍍𑌤𑌾𑌨𑌿 𑌤𑍍𑌵𑌯𑌿 𑌤𑍁 𑌪𑌰𑌮𑌵𑍍𑌯𑍋𑌮𑌵𑌪𑍁𑌷𑌿 ॥ 16 ॥

𑌕𑌲𑌾𑌮𑌾𑌜𑍍𑌞𑌾𑌂 𑌪𑍍𑌰𑌜𑍍𑌞𑌾𑌂 𑌸𑌮𑌯𑌮𑌨𑍁𑌭𑍂𑌤𑌿𑌂 𑌸𑌮𑌰𑌸𑌂
𑌗𑍁𑌰𑍁𑌂 𑌪𑌾𑌰𑌂𑌪𑌰𑍍𑌯𑌂 𑌵𑌿𑌨𑌯𑌮𑍁𑌪𑌦𑍇𑌶𑌂 𑌶𑌿𑌵𑌪𑌦𑌮𑍍 ।
𑌪𑍍𑌰𑌮𑌾𑌣𑌂 𑌨𑌿𑌰𑍍𑌵𑌾𑌣𑌂 𑌪𑍍𑌰𑌕𑍃𑌤𑌿𑌮𑌭𑌿𑌭𑍂𑌤𑌿𑌂 𑌪𑌰𑌗𑍁𑌹𑌾𑌂
𑌵𑌿𑌧𑌿𑌂 𑌵𑌿𑌦𑍍𑌯𑌾𑌮𑌾𑌹𑍁𑌃 𑌸𑌕𑌲𑌜𑌨𑌨𑍀𑌮𑍇𑌵 𑌮𑍁𑌨𑌯𑌃 ॥ 1𑍭 ॥

𑌪𑍍𑌰𑌲𑍀𑌨𑍇 𑌶𑌬𑍍𑌦𑍌𑌘𑍇 𑌤𑌦𑌨𑍁 𑌵𑌿𑌰𑌤𑍇 𑌬𑌿𑌂𑌦𑍁𑌵𑌿𑌭𑌵𑍇
𑌤𑌤𑌸𑍍𑌤𑌤𑍍𑌤𑍍𑌵𑍇 𑌚𑌾𑌷𑍍𑌟𑌧𑍍𑌵𑌨𑌿𑌭𑌿𑌰𑌨𑌪𑌾𑌯𑌿𑌨𑍍𑌯𑌧𑌿𑌗𑌤𑍇 ।
𑌶𑍍𑌰𑌿𑌤𑍇 𑌶𑌾𑌕𑍍𑌤𑍇 𑌪𑌰𑍍𑌵𑌣𑍍𑌯𑌨𑍁𑌕𑌲𑌿𑌤𑌚𑌿𑌨𑍍𑌮𑌾𑌤𑍍𑌰 𑌗𑌹𑌨𑌾𑌂
𑌸𑍍𑌵𑌸𑌂𑌵𑌿𑌤𑍍𑌤𑌿𑌂 𑌯𑍋𑌗𑍀 𑌰𑌸𑌯𑌤𑌿 𑌶𑌿𑌵𑌾𑌖𑍍𑌯𑌾𑌂 𑌭𑌗𑌵𑌤𑍀𑌮𑍍 ॥ 1𑍮 ॥

𑌪𑌰𑌾𑌨𑌂𑌦𑌾𑌕𑌾𑌰𑌾𑌂 𑌨𑌿𑌰𑌵𑌧𑌿𑌶𑌿𑌵𑍈𑌶𑍍𑌵𑌰𑍍𑌯𑌵𑌪𑍁𑌷𑌂
𑌨𑌿𑌰𑌾𑌕𑌾𑌰𑌾𑌂 𑌜𑍍𑌞𑌾𑌨𑌪𑍍𑌰𑌕𑍃𑌤𑌿𑌮𑌪𑌰𑌿𑌚𑍍𑌛𑌿𑌨𑍍𑌨𑌕𑌰𑍁𑌣𑌾𑌮𑍍 ।
𑌸𑌵𑌿𑌤𑍍𑌰𑍀𑌂 𑌲𑍋𑌕𑌾𑌨𑌾𑌂 𑌨𑌿𑌰𑌤𑌿𑌶𑌯𑌧𑌾𑌮𑌾𑌸𑍍𑌪𑌦𑌪𑌦𑌾𑌂
𑌭𑌵𑍋 𑌵𑌾 𑌮𑍋𑌕𑍍𑌷𑍋 𑌵𑌾 𑌭𑌵𑌤𑍁 𑌭𑌵𑌤𑍀𑌮𑍇𑌵 𑌭𑌜𑌤𑌾𑌮𑍍 ॥ 1𑍯 ॥

𑌜𑌗𑌤𑍍𑌕𑌾𑌯𑍇 𑌕𑍃𑌤𑍍𑌵𑌾 𑌤𑌦𑌪𑌿 𑌹𑍃𑌦𑌯𑍇 𑌤𑌚𑍍𑌚 𑌪𑍁𑌰𑍁𑌷𑍇
𑌪𑍁𑌮𑌾𑌂𑌸𑌂 𑌬𑌿𑌂𑌦𑍁𑌸𑍍𑌥𑌂 𑌤𑌦𑌪𑌿 𑌵𑌿𑌯𑌦𑌾𑌖𑍍𑌯𑍇 𑌚 𑌗𑌹𑌨𑍇 ।
𑌤𑌦𑍇𑌤𑌦𑍍𑌜𑍍𑌞𑌾𑌨𑌾𑌖𑍍𑌯𑍇 𑌤𑌦𑌪𑌿 𑌪𑌰𑌮𑌾𑌨𑌂𑌦𑌗𑌹𑌨𑍇
𑌮𑌹𑌾𑌵𑍍𑌯𑍋𑌮𑌾𑌕𑌾𑌰𑍇 𑌤𑍍𑌵𑌦𑌨𑍁𑌭𑌵𑌶𑍀𑌲𑍋 𑌵𑌿𑌜𑌯𑌤𑍇 ॥ 20 ॥

𑌵𑌿𑌧𑍇 𑌵𑍇𑌦𑍍𑌯𑍇 𑌵𑌿𑌦𑍍𑌯𑍇 𑌵𑌿𑌵𑌿𑌧𑌸𑌮𑌯𑍇 𑌵𑍇𑌦𑌗𑍁𑌲𑌿𑌕𑍇
𑌵𑌿𑌚𑌿𑌤𑍍𑌰𑍇 𑌵𑌿𑌶𑍍𑌵𑌾𑌦𑍍𑌯𑍇 𑌵𑌿𑌨𑌯𑌸𑍁𑌲𑌭𑍇 𑌵𑍇𑌦𑌜𑌨𑌨𑌿 ।
𑌶𑌿𑌵𑌜𑍍𑌞𑍇 𑌶𑍂𑌲𑌸𑍍𑌥𑍇 𑌶𑌿𑌵𑌪𑌦𑌵𑌦𑌾𑌨𑍍𑌯𑍇 𑌶𑌿𑌵𑌨𑌿𑌧𑍇
𑌶𑌿𑌵𑍇 𑌮𑌾𑌤𑌰𑍍𑌮𑌹𑍍𑌯𑌂 𑌤𑍍𑌵𑌯𑌿 𑌵𑌿𑌤𑌰 𑌭𑌕𑍍𑌤𑌿𑌂 𑌨𑌿𑌰𑍁𑌪𑌮𑌾𑌮𑍍 ॥ 21 ॥

𑌵𑌿𑌧𑍇𑌰𑍍𑌮𑍁𑌂𑌡𑌂 𑌹𑍃𑌤𑍍𑌵𑌾 𑌯𑌦𑌕𑍁𑌰𑍁𑌤 𑌪𑌾𑌤𑍍𑌰𑌂 𑌕𑌰𑌤𑌲𑍇
𑌹𑌰𑌿𑌂 𑌶𑍂𑌲𑌪𑍍𑌰𑍋𑌤𑌂 𑌯𑌦𑌗𑌮𑌯𑌦𑌂𑌸𑌾𑌭𑌰𑌣𑌤𑌾𑌮𑍍 ।
𑌅𑌲𑌂𑌚𑌕𑍍𑌰𑍇 𑌕𑌂𑌠𑌂 𑌯𑌦𑌪𑌿 𑌗𑌰𑌲𑍇𑌨𑌾𑌂𑌬 𑌗𑌿𑌰𑌿𑌶𑌃
𑌶𑌿𑌵𑌸𑍍𑌥𑌾𑌯𑌾𑌃 𑌶𑌕𑍍𑌤𑍇𑌸𑍍𑌤𑌦𑌿𑌦𑌮𑌖𑌿𑌲𑌂 𑌤𑍇 𑌵𑌿𑌲𑌸𑌿𑌤𑌮𑍍 ॥ 22 ॥

𑌵𑌿𑌰𑌿𑌂𑌚𑍍𑌯𑌾𑌖𑍍𑌯𑌾 𑌮𑌾𑌤𑌃 𑌸𑍃𑌜𑌸𑌿 𑌹𑌰𑌿𑌸𑌂𑌜𑍍𑌞𑌾 𑌤𑍍𑌵𑌮𑌵𑌸𑌿
𑌤𑍍𑌰𑌿𑌲𑍋𑌕𑍀𑌂 𑌰𑍁𑌦𑍍𑌰𑌾𑌖𑍍𑌯𑌾 𑌹𑌰𑌸𑌿 𑌵𑌿𑌦𑌧𑌾𑌸𑍀𑌶𑍍𑌵𑌰𑌦𑌶𑌾𑌮𑍍 ।
𑌭𑌵𑌂𑌤𑍀 𑌨𑌾𑌦𑌾𑌖𑍍𑌯𑌾 𑌵𑌿𑌹𑌰𑌸𑌿 𑌚 𑌪𑌾𑌶𑍌𑌘𑌦𑌲𑌨𑍀
𑌤𑍍𑌵𑌮𑍇𑌵𑍈𑌕𑌾𑌽𑌨𑍇𑌕𑌾 𑌭𑌵𑌸𑌿 𑌕𑍃𑌤𑌿𑌭𑍇𑌦𑍈𑌰𑍍𑌗𑌿𑌰𑌿𑌸𑍁𑌤𑍇 ॥ 23 ॥

𑌮𑍁𑌨𑍀𑌨𑌾𑌂 𑌚𑍇𑌤𑍋𑌭𑌿𑌃 𑌪𑍍𑌰𑌮𑍃𑌦𑌿𑌤𑌕𑌷𑌾𑌯𑍈𑌰𑌪𑌿 𑌮𑌨𑌾-
-𑌗𑌶𑌕𑍍𑌯𑌂 𑌸𑌂𑌸𑍍𑌪𑍍𑌰𑌷𑍍𑌟𑍁𑌂 𑌚𑌕𑌿𑌤𑌚𑌕𑌿𑌤𑍈𑌰𑌂𑌬 𑌸𑌤𑌤𑌮𑍍 ।
𑌶𑍍𑌰𑍁𑌤𑍀𑌨𑌾𑌂 𑌮𑍂𑌰𑍍𑌧𑌾𑌨𑌃 𑌪𑍍𑌰𑌕𑍃𑌤𑌿𑌕𑌠𑌿𑌨𑌾𑌃 𑌕𑍋𑌮𑌲𑌤𑌰𑍇
𑌕𑌥𑌂 𑌤𑍇 𑌵𑌿𑌂𑌦𑌂𑌤𑍇 𑌪𑌦𑌕𑌿𑌸𑌲𑌯𑍇 𑌪𑌾𑌰𑍍𑌵𑌤𑌿 𑌪𑌦𑌮𑍍 ॥ 24 ॥

𑌤𑌟𑌿𑌦𑍍𑌵𑌲𑍍𑌲𑍀𑌂 𑌨𑌿𑌤𑍍𑌯𑌾𑌮𑌮𑍃𑌤𑌸𑌰𑌿𑌤𑌂 𑌪𑌾𑌰𑌰𑌹𑌿𑌤𑌾𑌂
𑌮𑌲𑍋𑌤𑍍𑌤𑍀𑌰𑍍𑌣𑌾𑌂 𑌜𑍍𑌯𑍋𑌤𑍍𑌸𑍍𑌨𑌾𑌂 𑌪𑍍𑌰𑌕𑍃𑌤𑌿𑌮𑌗𑍁𑌣𑌗𑍍𑌰𑌂𑌥𑌿𑌗𑌹𑌨𑌾𑌮𑍍 ।
𑌗𑌿𑌰𑌾𑌂 𑌦𑍂𑌰𑌾𑌂 𑌵𑌿𑌦𑍍𑌯𑌾𑌮𑌵𑌿𑌨𑌤𑌕𑍁𑌚𑌾𑌂 𑌵𑌿𑌶𑍍𑌵𑌜𑌨𑌨𑍀-
-𑌮𑌪𑌰𑍍𑌯𑌂𑌤𑌾𑌂 𑌲𑌕𑍍𑌷𑍍𑌮𑍀𑌮𑌭𑌿𑌦𑌧𑌤𑌿 𑌸𑌂𑌤𑍋 𑌭𑌗𑌵𑌤𑍀𑌮𑍍 ॥ 25 ॥

𑌶𑌰𑍀𑌰𑌂 𑌕𑍍𑌷𑌿𑌤𑍍𑌯𑌂𑌭𑌃 𑌪𑍍𑌰𑌭𑍃𑌤𑌿𑌰𑌚𑌿𑌤𑌂 𑌕𑍇𑌵𑌲𑌮𑌚𑌿𑌤𑍍
𑌸𑍁𑌖𑌂 𑌦𑍁𑌃𑌖𑌂 𑌚𑌾𑌯𑌂 𑌕𑌲𑌯𑌤𑌿 𑌪𑍁𑌮𑌾𑌂𑌶𑍍𑌚𑍇𑌤𑌨 𑌇𑌤𑌿 ।
𑌸𑍍𑌫𑍁𑌟𑌂 𑌜𑌾𑌨𑌾𑌨𑍋𑌽𑌪𑌿 𑌪𑍍𑌰𑌭𑌵𑌤𑌿 𑌨 𑌦𑍇𑌹𑍀 𑌰𑌹𑌯𑌿𑌤𑍁𑌂
𑌶𑌰𑍀𑌰𑌾𑌹𑌂𑌕𑌾𑌰𑌂 𑌤𑌵 𑌸𑌮𑌯𑌬𑌾𑌹𑍍𑌯𑍋 𑌗𑌿𑌰𑌿𑌸𑍁𑌤𑍇 ॥ 26 ॥

𑌪𑌿𑌤𑌾 𑌮𑌾𑌤𑌾 𑌭𑍍𑌰𑌾𑌤𑌾 𑌸𑍁𑌹𑍃𑌦𑌨𑍁𑌚𑌰𑌃 𑌸𑌦𑍍𑌮 𑌗𑍃𑌹𑌿𑌣𑍀
𑌵𑌪𑍁𑌃 𑌕𑍍𑌷𑍇𑌤𑍍𑌰𑌂 𑌮𑌿𑌤𑍍𑌰𑌂 𑌧𑌨𑌮𑌪𑌿 𑌯𑌦𑌾 𑌮𑌾𑌂 𑌵𑌿𑌜𑌹𑌤𑌿 ।
𑌤𑌦𑌾 𑌮𑍇 𑌭𑌿𑌂𑌦𑌾𑌨𑌾 𑌸𑌪𑌦𑌿 𑌭𑌯𑌮𑍋𑌹𑌾𑌂𑌧𑌤𑌮𑌸𑌂
𑌮𑌹𑌾𑌜𑍍𑌯𑍋𑌤𑍍𑌸𑍍𑌨𑍇 𑌮𑌾𑌤𑌰𑍍𑌭𑌵 𑌕𑌰𑍁𑌣𑌯𑌾 𑌸𑌨𑍍𑌨𑌿𑌧𑌿𑌕𑌰𑍀 ॥ 2𑍭 ॥

𑌸𑍁𑌤𑌾 𑌦𑌕𑍍𑌷𑌸𑍍𑌯𑌾𑌦𑍌 𑌕𑌿𑌲 𑌸𑌕𑌲𑌮𑌾𑌤𑌸𑍍𑌤𑍍𑌵𑌮𑍁𑌦𑌭𑍂𑌃
𑌸𑌦𑍋𑌷𑌂 𑌤𑌂 𑌹𑌿𑌤𑍍𑌵𑌾 𑌤𑌦𑌨𑍁 𑌗𑌿𑌰𑌿𑌰𑌾𑌜𑌸𑍍𑌯 𑌦𑍁𑌹𑌿𑌤𑌾 ।
𑌅𑌨𑌾𑌦𑍍𑌯𑌂𑌤𑌾 𑌶𑌂𑌭𑍋𑌰𑌪𑍃𑌥𑌗𑌪𑌿 𑌶𑌕𑍍𑌤𑌿𑌰𑍍𑌭𑌗𑌵𑌤𑍀
𑌵𑌿𑌵𑌾𑌹𑌾𑌜𑍍𑌜𑌾𑌯𑌾𑌸𑍀𑌤𑍍𑌯𑌹𑌹 𑌚𑌰𑌿𑌤𑌂 𑌵𑍇𑌤𑍍𑌤𑌿 𑌤𑌵 𑌕𑌃 ॥ 2𑍮 ॥

𑌕𑌣𑌾𑌸𑍍𑌤𑍍𑌵𑌦𑍍𑌦𑍀𑌪𑍍𑌤𑍀𑌨𑌾𑌂 𑌰𑌵𑌿𑌶𑌶𑌿𑌕𑍃𑌶𑌾𑌨𑍁𑌪𑍍𑌰𑌭𑍃𑌤𑌯𑌃
𑌪𑌰𑌂 𑌬𑍍𑌰𑌹𑍍𑌮 𑌕𑍍𑌷𑍁𑌦𑍍𑌰𑌂 𑌤𑌵 𑌨𑌿𑌯𑌤𑌮𑌾𑌨𑌂𑌦𑌕𑌣𑌿𑌕𑌾 ।
𑌶𑌿𑌵𑌾𑌦𑌿 𑌕𑍍𑌷𑌿𑌤𑍍𑌯𑌂𑌤𑌂 𑌤𑍍𑌰𑌿𑌵𑌲𑌯𑌤𑌨𑍋𑌃 𑌸𑌰𑍍𑌵𑌮𑍁𑌦𑌰𑍇
𑌤𑌵𑌾𑌸𑍍𑌤𑍇 𑌭𑌕𑍍𑌤𑌸𑍍𑌯 𑌸𑍍𑌫𑍁𑌰𑌸𑌿 𑌹𑍃𑌦𑌿 𑌚𑌿𑌤𑍍𑌰𑌂 𑌭𑌗𑌵𑌤𑌿 ॥ 2𑍯 ॥

𑌪𑍁𑌰𑌃 𑌪𑌶𑍍𑌚𑌾𑌦𑌂𑌤𑌰𑍍𑌬𑌹𑌿𑌰𑌪𑌰𑌿𑌮𑍇𑌯𑌂 𑌪𑌰𑌿𑌮𑌿𑌤𑌂
𑌪𑌰𑌂 𑌸𑍍𑌥𑍂𑌲𑌂 𑌸𑍂𑌕𑍍𑌷𑍍𑌮𑌂 𑌸𑌕𑌲𑌮𑌕𑍁𑌲𑌂 𑌗𑍁𑌹𑍍𑌯𑌮𑌗𑍁𑌹𑌮𑍍 ।
𑌦𑌵𑍀𑌯𑍋 𑌨𑍇𑌦𑍀𑌯𑌃 𑌸𑌦𑌸𑌦𑌿𑌤𑌿 𑌵𑌿𑌶𑍍𑌵𑌂 𑌭𑌗𑌵𑌤𑍀
𑌸𑌦𑌾 𑌪𑌶𑍍𑌯𑌂𑌤𑍍𑌯𑌾𑌖𑍍𑌯𑌾𑌂 𑌵𑌹𑌸𑌿 𑌭𑍁𑌵𑌨𑌕𑍍𑌷𑍋𑌭𑌜𑌨𑌨𑍀𑌮𑍍 ॥ 30 ॥

𑌪𑍍𑌰𑌵𑌿𑌶𑍍𑌯 𑌤𑍍𑌵𑌨𑍍𑌮𑌾𑌰𑍍𑌗𑌂 𑌸𑌹𑌜𑌦𑌯𑌯𑌾 𑌦𑍇𑌶𑌿𑌕𑌦𑍃𑌶𑌾
𑌷𑌡𑌧𑍍𑌵𑌧𑍍𑌵𑌾𑌂𑌤𑍌𑌘𑌚𑍍𑌛𑌿𑌦𑍁𑌰𑌗𑌣𑌨𑌾𑌤𑍀𑌤𑌕𑌰𑍁𑌣𑌾𑌮𑍍 ।
𑌪𑌰𑌾𑌮𑌾𑌜𑍍𑌞𑌾𑌕𑌾𑌰𑌾𑌂 𑌸𑌪𑌦𑌿 𑌶𑌿𑌵𑌯𑌂𑌤𑍀𑌂 𑌶𑌿𑌵𑌤𑌨𑍁𑌂
𑌸𑍍𑌵𑌮𑌾𑌤𑍍𑌮𑌾𑌨𑌂 𑌧𑌨𑍍𑌯𑌾𑌶𑍍𑌚𑌿𑌰𑌮𑍁𑌪𑌲𑌭𑌂𑌤𑍇 𑌭𑌗𑌵𑌤𑍀𑌮𑍍 ॥ 31 ॥

𑌮𑌯𑍂𑌖𑌾𑌃 𑌪𑍂𑌷𑍍𑌣𑍀𑌵 𑌜𑍍𑌵𑌲𑌨 𑌇𑌵 𑌤𑌦𑍍𑌦𑍀𑌪𑍍𑌤𑌿𑌕𑌣𑌿𑌕𑌾𑌃
𑌪𑌯𑍋𑌧𑍌 𑌕𑌲𑍍𑌲𑍋𑌲𑌾𑌃 𑌪𑍍𑌰𑌤𑌿𑌹𑌤𑌮𑌹𑌿𑌮𑍍𑌨𑍀𑌵 𑌪𑍃𑌷𑌤𑌃 ।
𑌉𑌦𑍇𑌤𑍍𑌯𑍋𑌦𑍇𑌤𑍍𑌯𑌾𑌂𑌬 𑌤𑍍𑌵𑌯𑌿 𑌸𑌹 𑌨𑌿𑌜𑍈𑌃 𑌸𑌾𑌤𑍍𑌤𑍍𑌵𑌿𑌕𑌗𑍁𑌣𑍈-
-𑌰𑍍𑌭𑌜𑌂𑌤𑍇 𑌤𑌤𑍍𑌤𑍍𑌵𑍌𑌘𑌾𑌃 𑌪𑍍𑌰𑌶𑌮𑌮𑌨𑍁𑌕𑌲𑍍𑌪𑌂 𑌪𑌰𑌵𑌶𑌾𑌃 ॥ 32 ॥

𑌵𑌿𑌧𑍁𑌰𑍍𑌵𑌿𑌷𑍍𑌣𑍁𑌰𑍍𑌬𑍍𑌰𑌹𑍍𑌮𑌾 𑌪𑍍𑌰𑌕𑍃𑌤𑌿𑌰𑌣𑍁𑌰𑌾𑌤𑍍𑌮𑌾 𑌦𑌿𑌨𑌕𑌰𑌃
𑌸𑍍𑌵𑌭𑌾𑌵𑍋 𑌜𑍈𑌨𑍇𑌂𑌦𑍍𑌰𑌃 𑌸𑍁𑌗𑌤𑌮𑍁𑌨𑌿𑌰𑌾𑌕𑌾𑌶𑌮𑌲𑌿𑌨𑌃 ।
𑌶𑌿𑌵𑌃 𑌶𑌕𑍍𑌤𑌿𑌶𑍍𑌚𑍇𑌤𑌿 𑌶𑍍𑌰𑍁𑌤𑌿𑌵𑌿𑌷𑌯𑌤𑌾𑌂 𑌤𑌾𑌮𑍁𑌪𑌗𑌤𑌾𑌂
𑌵𑌿𑌕𑌲𑍍𑌪𑍈𑌰𑍇𑌭𑌿𑌸𑍍𑌤𑍍𑌵𑌾𑌮𑌭𑌿𑌦𑌧𑌤𑌿 𑌸𑌂𑌤𑍋 𑌭𑌗𑌵𑌤𑍀𑌮𑍍 ॥ 33 ॥

𑌶𑌿𑌵𑌸𑍍𑌤𑍍𑌵𑌂 𑌶𑌕𑍍𑌤𑌿𑌸𑍍𑌤𑍍𑌵𑌂 𑌤𑍍𑌵𑌮𑌸𑌿 𑌸𑌮𑌯𑌾 𑌤𑍍𑌵𑌂 𑌸𑌮𑌯𑌿𑌨𑍀
𑌤𑍍𑌵𑌮𑌾𑌤𑍍𑌮𑌾 𑌤𑍍𑌵𑌂 𑌦𑍀𑌕𑍍𑌷𑌾 𑌤𑍍𑌵𑌮𑌯𑌮𑌣𑌿𑌮𑌾𑌦𑌿𑌰𑍍𑌗𑍁𑌣𑌗𑌣𑌃 ।
𑌅𑌵𑌿𑌦𑍍𑌯𑌾 𑌤𑍍𑌵𑌂 𑌵𑌿𑌦𑍍𑌯𑌾 𑌤𑍍𑌵𑌮𑌸𑌿 𑌨𑌿𑌖𑌿𑌲𑌂 𑌤𑍍𑌵𑌂 𑌕𑌿𑌮𑌪𑌰𑌂
𑌪𑍃𑌥𑌕𑍍𑌤𑌤𑍍𑌤𑍍𑌵𑌂 𑌤𑍍𑌵𑌤𑍍𑌤𑍋 𑌭𑌗𑌵𑌤𑌿 𑌨 𑌵𑍀𑌕𑍍𑌷𑌾𑌮𑌹 𑌇𑌮𑍇 ॥ 34 ॥

𑌤𑍍𑌵𑌯𑌾𑌸𑍌 𑌜𑌾𑌨𑍀𑌤𑍇 𑌰𑌚𑌯𑌤𑌿 𑌭𑌵𑌤𑍍𑌯𑍈𑌵 𑌸𑌤𑌤𑌂
𑌤𑍍𑌵𑌯𑍈𑌵𑍇𑌚𑍍𑌛𑌤𑍍𑌯𑌂𑌬 𑌤𑍍𑌵𑌮𑌸𑌿 𑌨𑌿𑌖𑌿𑌲𑌾 𑌯𑌸𑍍𑌯 𑌤𑌨𑌵𑌃 ।
𑌜𑌗𑌤𑍍𑌸𑌾𑌮𑍍𑌯𑌂 𑌶𑌂𑌭𑍋𑌰𑍍𑌵𑌹𑌸𑌿 𑌪𑌰𑌮𑌵𑍍𑌯𑍋𑌮𑌵𑌪𑍁𑌷𑌃
𑌤𑌥𑌾𑌪𑍍𑌯𑌰𑍍𑌧𑌂 𑌭𑍂𑌤𑍍𑌵𑌾 𑌵𑌿𑌹𑌰𑌸𑌿 𑌶𑌿𑌵𑌸𑍍𑌯𑍇𑌤𑌿 𑌕𑌿𑌮𑌿𑌦𑌮𑍍 ॥ 35 ॥

𑌅𑌸𑌂𑌖𑍍𑌯𑍈𑌃 𑌪𑍍𑌰𑌾𑌚𑍀𑌨𑍈𑌰𑍍𑌜𑌨𑌨𑌿 𑌜𑌨𑌨𑍈𑌃 𑌕𑌰𑍍𑌮𑌵𑌿𑌲𑌯𑌾-
-𑌤𑍍𑌸𑌕𑍃𑌜𑍍𑌜𑌨𑍍𑌮𑌨𑍍𑌯𑌂𑌤𑍇 𑌗𑍁𑌰𑍁𑌵𑌪𑍁𑌷𑌮𑌾𑌸𑌾𑌦𑍍𑌯 𑌗𑌿𑌰𑌿𑌶𑌮𑍍 ।
𑌅𑌵𑌾𑌪𑍍𑌯𑌾𑌜𑍍𑌞𑌾𑌂 𑌶𑍈𑌵𑍀𑌂 𑌶𑌿𑌵𑌤𑌨𑍁𑌮𑌪𑌿 𑌤𑍍𑌵𑌾𑌂 𑌵𑌿𑌦𑌿𑌤𑌵𑌾-
-𑌨𑍍𑌨𑌯𑍇𑌯𑌂 𑌤𑍍𑌵𑌤𑍍𑌪𑍂𑌜𑌾𑌸𑍍𑌤𑍁𑌤𑌿𑌵𑌿𑌰𑌚𑌨𑍇𑌨𑍈𑌵 𑌦𑌿𑌵𑌸𑌾𑌨𑍍 ॥ 36 ॥

𑌯𑌤𑍍𑌷𑌟𑍍𑌪𑌤𑍍𑌰𑌂 𑌕𑌮𑌲𑌮𑍁𑌦𑌿𑌤𑌂 𑌤𑌸𑍍𑌯 𑌯𑌾 𑌕𑌰𑍍𑌣𑌿𑌕𑌾𑌖𑍍𑌯𑌾
𑌯𑍋𑌨𑌿𑌸𑍍𑌤𑌸𑍍𑌯𑌾𑌃 𑌪𑍍𑌰𑌥𑌿𑌤𑌮𑍁𑌦𑌰𑍇 𑌯𑌤𑍍𑌤𑌦𑍋𑌂𑌕𑌾𑌰𑌪𑍀𑌠𑌮𑍍 ।
𑌤𑌸𑍍𑌯𑌾𑌪𑍍𑌯𑌂𑌤𑌃 𑌕𑍁𑌚𑌭𑌰𑌨𑌤𑌾𑌂 𑌕𑍁𑌂𑌡𑌲𑍀𑌤𑌿 𑌪𑍍𑌰𑌸𑌿𑌦𑍍𑌧𑌾𑌂
𑌶𑍍𑌯𑌾𑌮𑌾𑌕𑌾𑌰𑌾𑌂 𑌸𑌕𑌲𑌜𑌨𑌨𑍀𑌂 𑌸𑌂𑌤𑌤𑌂 𑌭𑌾𑌵𑌯𑌾𑌮𑌿 ॥ 3𑍭 ॥

𑌭𑍁𑌵𑌿 𑌪𑌯𑌸𑌿 𑌕𑍃𑌶𑌾𑌨𑍌 𑌮𑌾𑌰𑍁𑌤𑍇 𑌖𑍇 𑌶𑌶𑌾𑌂𑌕𑍇
𑌸𑌵𑌿𑌤𑌰𑌿 𑌯𑌜𑌮𑌾𑌨𑍇𑌽𑌪𑍍𑌯𑌷𑍍𑌟𑌧𑌾 𑌶𑌕𑍍𑌤𑌿𑌰𑍇𑌕𑌾 ।
𑌵𑌹𑌸𑌿 𑌕𑍁𑌚𑌭𑌰𑌾𑌭𑍍𑌯𑌾𑌂 𑌯𑌾𑌵𑌨𑌮𑍍𑌰𑌾𑌪𑌿 𑌵𑌿𑌶𑍍𑌵𑌂
𑌸𑌕𑌲𑌜𑌨𑌨𑌿 𑌸𑌾 𑌤𑍍𑌵𑌂 𑌪𑌾𑌹𑌿 𑌮𑌾𑌮𑌿𑌤𑍍𑌯𑌵𑌾𑌚𑍍𑌯𑌮𑍍 ॥ 3𑍮 ॥

𑌇𑌤𑌿 𑌶𑍍𑌰𑍀𑌕𑌾𑌳𑌿𑌦𑌾𑌸 𑌵𑌿𑌰𑌚𑌿𑌤 𑌪𑌂𑌚𑌸𑍍𑌤𑌵𑍍𑌯𑌾𑌂 𑌪𑌂𑌚𑌮𑌃 𑌸𑌕𑌲𑌜𑌨𑌨𑍀𑌸𑍍𑌤𑌵𑌃 ।