ନାରଦ ଉଵାଚ
ଭଗଵନ୍ ଦେଵଦେଵେଶ ଭୂତଭଵ୍ୟଜଗତ୍ପ୍ରଭୋ ।
କଵଚଂ ଚ ଶ୍ରୁତଂ ଦିଵ୍ୟଂ ଗାୟତ୍ରୀମଂତ୍ରଵିଗ୍ରହମ୍ ॥ 1 ॥
ଅଧୁନା ଶ୍ରୋତୁମିଚ୍ଛାମି ଗାୟତ୍ରୀହୃଦୟଂ ପରମ୍ ।
ୟଦ୍ଧାରଣାଦ୍ଭଵେତ୍ପୁଣ୍ୟଂ ଗାୟତ୍ରୀଜପତୋଽଖିଲମ୍ ॥ 2 ॥
ଶ୍ରୀନାରାୟଣ ଉଵାଚ
ଦେଵ୍ୟାଶ୍ଚ ହୃଦୟଂ ପ୍ରୋକ୍ତଂ ନାରଦାଥର୍ଵଣେ ସ୍ଫୁଟମ୍ ।
ତଦେଵାହଂ ପ୍ରଵକ୍ଷ୍ୟାମି ରହସ୍ୟାତିରହସ୍ୟକମ୍ ॥ 3 ॥
ଵିରାଡ୍ରୂପାଂ ମହାଦେଵୀଂ ଗାୟତ୍ରୀଂ ଵେଦମାତରମ୍ ।
ଧ୍ୟାତ୍ଵା ତସ୍ୟାସ୍ତ୍ଵଥାଂଗେଷୁ ଧ୍ୟାୟେଦେତାଶ୍ଚ ଦେଵତାଃ ॥ 4 ॥
ପିଂଡବ୍ରହ୍ମଂଡୟୋରୈକ୍ୟାଦ୍ଭାଵୟେତ୍ସ୍ଵତନୌ ତଥା ।
ଦେଵୀରୂପେ ନିଜେ ଦେହେ ତନ୍ମୟତ୍ଵାୟ ସାଧକଃ ॥ 5 ॥
ନାଦେଵୋଽଭ୍ୟର୍ଚୟେଦ୍ଦେଵମିତି ଵେଦଵିଦୋ ଵିଦୁଃ ।
ତତୋଽଭେଦାୟ କାୟେ ସ୍ଵେ ଭାଵୟେଦ୍ଦେଵତା ଇମାଃ ॥ 6 ॥
ଅଥ ତତ୍ସଂପ୍ରଵକ୍ଷ୍ୟାମି ତନ୍ମୟତ୍ଵମଥୋ ଭଵେତ୍ ।
ଗାୟତ୍ରୀହୃଦୟସ୍ୟାଽସ୍ୟାଽପ୍ୟହମେଵ ଋଷିଃ ସ୍ମୃତଃ ॥ 7 ॥
ଗାୟତ୍ରୀଛଂଦ ଉଦ୍ଦିଷ୍ଟଂ ଦେଵତା ପରମେଶ୍ଵରୀ ।
ପୂର୍ଵୋକ୍ତେନ ପ୍ରକାରେଣ କୁର୍ୟାଦଂଗାନି ଷଟ୍କ୍ରମାତ୍ ।
ଆସନେ ଵିଜନେ ଦେଶେ ଧ୍ୟାୟେଦେକାଗ୍ରମାନସଃ ॥ 8 ॥
ଅଥାର୍ଥନ୍ୟାସଃ । ଦ୍ୟୌମୂର୍ଧ୍ନି ଦୈଵତମ୍ । ଦଂତପଂକ୍ତାଵଶ୍ଵିନୌ । ଉଭେ ସଂଧ୍ୟେ ଚୌଷ୍ଠୌ । ମୁଖମଗ୍ନିଃ । ଜିହ୍ଵା ସରସ୍ଵତୀ । ଗ୍ରୀଵାୟାଂ ତୁ ବୃହସ୍ପତିଃ । ସ୍ତନୟୋର୍ଵସଵୋଽଷ୍ଟୌ । ବାହ୍ଵୋର୍ମରୁତଃ । ହୃଦୟେ ପର୍ଜନ୍ୟଃ । ଆକାଶମୁଦରମ୍ । ନାଭାଵଂତରିକ୍ଷମ୍ । କଟ୍ୟୋରିଂଦ୍ରାଗ୍ନୀ । ଜଘନେ ଵିଜ୍ଞାନଘନଃ ପ୍ରଜାପତିଃ । କୈଲାସମଲୟେ ଊରୂ । ଵିଶ୍ଵେଦେଵା ଜାନ୍ଵୋଃ । ଜଂଘାୟାଂ କୌଶିକଃ । ଗୁହ୍ୟମୟନେ । ଊରୂ ପିତରଃ । ପାଦୌ ପୃଥିଵୀ । ଵନସ୍ପତୟୋଽଂଗୁଲୀଷୁ । ଋଷୟୋ ରୋମାଣି । ନଖାନି ମୁହୂର୍ତାନି । ଅସ୍ଥିଷୁ ଗ୍ରହାଃ । ଅସୃଙ୍ମାଂସମୃତଵଃ ॥ ସଂଵତ୍ସରା ଵୈ ନିମିଷମ୍ । ଅହୋରାତ୍ରାଵାଦିତ୍ୟଶ୍ଚଂଦ୍ରମାଃ । ପ୍ରଵରାଂ ଦିଵ୍ୟାଂ ଗାୟତ୍ରୀଂ ସହସ୍ରନେତ୍ରାଂ ଶରଣମହଂ ପ୍ରପଦ୍ୟେ ॥
ଓଂ ତତ୍ସଵିତୁର୍ଵରେଣ୍ୟାୟ ନମଃ । ଓଂ ତତ୍ପୂର୍ଵାଜୟାୟ ନମଃ । ତତ୍ପ୍ରାତରାଦିତ୍ୟାୟ ନମଃ । ତତ୍ପ୍ରାତରାଦିତ୍ୟପ୍ରତିଷ୍ଠାୟୈ ନମଃ ॥
ପ୍ରାତରଧୀୟାନୋ ରାତ୍ରିକୃତଂ ପାପଂ ନାଶୟତି । ସାୟମଧୀୟାନୋ ଦିଵସକୃତଂ ପାପଂ ନାଶୟତି । ସାୟଂ ପ୍ରାତରଧୀୟାନୋ ଅପାପୋ ଭଵତି । ସର୍ଵତୀର୍ଥେଷୁ ସ୍ନାତୋ ଭଵତି । ସର୍ଵୈର୍ଦେଵୈର୍ଜ୍ଞାତୋ ଭଵତି । ଅଵାଚ୍ୟଵଚନାତ୍ପୂତୋ ଭଵତି । ଅଭକ୍ଷ୍ୟଭକ୍ଷଣାତ୍ପୂତୋ ଭଵତି । ଅଭୋଜ୍ୟଭୋଜନାତ୍ପୂତୋ ଭଵତି । ଅଚୋଷ୍ୟଚୋଷଣାତ୍ପୂତୋ ଭଵତି । ଅସାଧ୍ୟସାଧନାତ୍ପୂତୋ ଭଵତି । ଦୁଷ୍ପ୍ରତିଗ୍ରହଶତସହସ୍ରାତ୍ପୂତୋ ଭଵତି । ସର୍ଵପ୍ରତିଗ୍ରହାତ୍ପୂତୋ ଭଵତି । ପଂକ୍ତିଦୂଷଣାତ୍ପୂତୋ ଭଵତି । ଅନୃତଵଚନାତ୍ପୂତୋ ଭଵତି । ଅଥାଽବ୍ରହ୍ମଚାରୀ ବ୍ରହ୍ମଚାରୀ ଭଵତୀ । ଅନେନ ହୃଦୟେନାଧୀତେନ କ୍ରତୁସହସ୍ରେଣେଷ୍ଟଂ ଭଵତି । ଷଷ୍ଟିଶତସହସ୍ରଗାୟତ୍ର୍ୟା ଜପ୍ୟାନି ଫଲାନି ଭଵଂତି । ଅଷ୍ଟୌ ବ୍ରାହ୍ମଣାନ୍ ସମ୍ୟଗ୍ଗ୍ରାହୟେତ୍ । ତସ୍ୟ ସିଦ୍ଧିର୍ଭଵତି । ୟ ଇଦଂ ନିତ୍ୟମଧୀୟାନୋ ବ୍ରାହ୍ମଣଃ ପ୍ରାତଃ ଶୁଚିଃ ସର୍ଵପାପୈଃ ପ୍ରମୁଚ୍ୟତ ଇତି । ବ୍ରହ୍ମଲୋକେ ମହୀୟତେ ॥
ଇତ୍ୟାହ ଭଗଵାନ୍ ଶ୍ରୀନାରାୟଣଃ ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ଶ୍ରୀ ଗାୟତ୍ରୀ ହୃଦୟଂ ନାମ ଚତୁର୍ଥୋଽଧ୍ୟାୟଃ ॥
