ଵିଷ୍ଣୋର୍ଵୀର୍ୟାଣି କୋ ଵା କଥୟତୁ ଧରଣେଃ କଶ୍ଚ ରେଣୂନ୍ମିମୀତେ
ୟସ୍ୟୈଵାଂଘ୍ରିତ୍ରୟେଣ ତ୍ରିଜଗଦଭିମିତଂ ମୋଦତେ ପୂର୍ଣସଂପତ୍
ୟୋସୌ ଵିଶ୍ଵାନି ଧତ୍ତେ ପ୍ରିୟମିହ ପରମଂ ଧାମ ତସ୍ୟାଭିୟାୟାଂ
ତ୍ଵଦ୍ଭକ୍ତା ୟତ୍ର ମାଦ୍ୟଂତ୍ୟମୃତରସମରଂଦସ୍ୟ ୟତ୍ର ପ୍ରଵାହଃ ॥1॥
ଆଦ୍ୟାୟାଶେଷକର୍ତ୍ରେ ପ୍ରତିନିମିଷନଵୀନାୟ ଭର୍ତ୍ରେ ଵିଭୂତେ-
ର୍ଭକ୍ତାତ୍ମା ଵିଷ୍ଣଵେ ୟଃ ପ୍ରଦିଶତି ହଵିରାଦୀନି ୟଜ୍ଞାର୍ଚନାଦୌ ।
କୃଷ୍ଣାଦ୍ୟଂ ଜନ୍ମ ୟୋ ଵା ମହଦିହ ମହତୋ ଵର୍ଣୟେତ୍ସୋଽୟମେଵ
ପ୍ରୀତଃ ପୂର୍ଣୋ ୟଶୋଭିସ୍ତ୍ଵରିତମଭିସରେତ୍ ପ୍ରାପ୍ୟମଂତେ ପଦଂ ତେ ॥2॥
ହେ ସ୍ତୋତାରଃ କଵୀଂଦ୍ରାସ୍ତମିହ ଖଲୁ ୟଥା ଚେତୟଧ୍ଵେ ତଥୈଵ
ଵ୍ୟକ୍ତଂ ଵେଦସ୍ୟ ସାରଂ ପ୍ରଣୁଵତ ଜନନୋପାତ୍ତଲୀଲାକଥାଭିଃ ।
ଜାନଂତଶ୍ଚାସ୍ୟ ନାମାନ୍ୟଖିଲସୁଖକରାଣୀତି ସଂକୀର୍ତୟଧ୍ଵଂ
ହେ ଵିଷ୍ଣୋ କୀର୍ତନାଦ୍ୟୈସ୍ତଵ ଖଲୁ ମହତସ୍ତତ୍ତ୍ଵବୋଧଂ ଭଜେୟମ୍ ॥3॥
ଵିଷ୍ଣୋଃ କର୍ମାଣି ସଂପଶ୍ୟତ ମନସି ସଦା ୟୈଃ ସ ଧର୍ମାନବଧ୍ନାଦ୍
ୟାନୀଂଦ୍ରସ୍ୟୈଷ ଭୃତ୍ୟଃ ପ୍ରିୟସଖ ଇଵ ଚ ଵ୍ୟାତନୋତ୍ କ୍ଷେମକାରୀ ।
ଵୀକ୍ଷଂତେ ୟୋଗସିଦ୍ଧାଃ ପରପଦମନିଶଂ ୟସ୍ୟ ସମ୍ୟକ୍ପ୍ରକାଶଂ
ଵିପ୍ରେଂଦ୍ରା ଜାଗରୂକାଃ କୃତବହୁନୁତୟୋ ୟଚ୍ଚ ନିର୍ଭାସୟଂତେ ॥4॥
ନୋ ଜାତୋ ଜାୟମାନୋଽପି ଚ ସମଧିଗତସ୍ତ୍ଵନ୍ମହିମ୍ନୋଽଵସାନଂ
ଦେଵ ଶ୍ରେୟାଂସି ଵିଦ୍ଵାନ୍ ପ୍ରତିମୁହୁରପି ତେ ନାମ ଶଂସାମି ଵିଷ୍ଣୋ ।
ତଂ ତ୍ଵାଂ ସଂସ୍ତୌମି ନାନାଵିଧନୁତିଵଚନୈରସ୍ୟ ଲୋକତ୍ରୟସ୍ୟା-
ପ୍ୟୂର୍ଧ୍ଵଂ ଵିଭ୍ରାଜମାନେ ଵିରଚିତଵସତିଂ ତତ୍ର ଵୈକୁଂଠଲୋକେ ॥5॥
ଆପଃ ସୃଷ୍ଟ୍ୟାଦିଜନ୍ୟାଃ ପ୍ରଥମମୟି ଵିଭୋ ଗର୍ଭଦେଶେ ଦଧୁସ୍ତ୍ଵାଂ
ୟତ୍ର ତ୍ଵୟ୍ୟେଵ ଜୀଵା ଜଲଶୟନ ହରେ ସଂଗତା ଐକ୍ୟମାପନ୍ ।
ତସ୍ୟାଜସ୍ୟ ପ୍ରଭୋ ତେ ଵିନିହିତମଭଵତ୍ ପଦ୍ମମେକଂ ହି ନାଭୌ
ଦିକ୍ପତ୍ରଂ ୟତ୍ କିଲାହୁଃ କନକଧରଣିଭୃତ୍ କର୍ଣିକଂ ଲୋକରୂପମ୍ ॥6॥
ହେ ଲୋକା ଵିଷ୍ଣୁରେତଦ୍ଭୁଵନମଜନୟତ୍ତନ୍ନ ଜାନୀଥ ୟୂୟଂ
ୟୁଷ୍ମାକଂ ହ୍ୟଂତରସ୍ଥଂ କିମପି ତଦପରଂ ଵିଦ୍ୟତେ ଵିଷ୍ଣୁରୂପମ୍ ।
ନୀହାରପ୍ରଖ୍ୟମାୟାପରିଵୃତମନସୋ ମୋହିତା ନାମରୂପୈଃ
ପ୍ରାଣପ୍ରୀତ୍ୟେକତୃପ୍ତାଶ୍ଚରଥ ମଖପରା ହଂତ ନେଚ୍ଛା ମୁକୁଂଦେ ॥7॥
ମୂର୍ଧ୍ନାମକ୍ଷ୍ଣାଂ ପଦାନାଂ ଵହସି ଖଲୁ ସହସ୍ରାଣି ସଂପୂର୍ୟ ଵିଶ୍ଵଂ
ତତ୍ପ୍ରୋତ୍କ୍ରମ୍ୟାପି ତିଷ୍ଠନ୍ ପରିମିତଵିଵରେ ଭାସି ଚିତ୍ତାଂତରେଽପି ।
ଭୂତଂ ଭଵ୍ୟଂ ଚ ସର୍ଵଂ ପରପୁରୁଷ ଭଵାନ୍ କିଂଚ ଦେହେଂଦ୍ରିୟାଦି-
ଷ୍ଵାଵିଷ୍ଟୋଽପ୍ୟୁଦ୍ଗତତ୍ଵାଦମୃତସୁଖରସଂ ଚାନୁଭୁଂକ୍ଷେ ତ୍ଵମେଵ ॥8॥
ୟତ୍ତୁ ତ୍ରୈଲୋକ୍ୟରୂପଂ ଦଧଦପି ଚ ତତୋ ନିର୍ଗତୋଽନଂତଶୁଦ୍ଧ-
ଜ୍ଞାନାତ୍ମା ଵର୍ତସେ ତ୍ଵଂ ତଵ ଖଲୁ ମହିମା ସୋଽପି ତାଵାନ୍ କିମନ୍ୟତ୍ ।
ସ୍ତୋକସ୍ତେ ଭାଗ ଏଵାଖିଲଭୁଵନତୟା ଦୃଶ୍ୟତେ ତ୍ର୍ୟଂଶକଲ୍ପଂ
ଭୂୟିଷ୍ଠଂ ସାଂଦ୍ରମୋଦାତ୍ମକମୁପରି ତତୋ ଭାତି ତସ୍ମୈ ନମସ୍ତେ ॥9॥
ଅଵ୍ୟକ୍ତଂ ତେ ସ୍ଵରୂପଂ ଦୁରଧିଗମତମଂ ତତ୍ତୁ ଶୁଦ୍ଧୈକସତ୍ତ୍ଵଂ
ଵ୍ୟକ୍ତଂ ଚାପ୍ୟେତଦେଵ ସ୍ଫୁଟମମୃତରସାଂଭୋଧିକଲ୍ଲୋଲତୁଲ୍ୟମ୍ ।
ସର୍ଵୋତ୍କୃଷ୍ଟାମଭୀଷ୍ଟାଂ ତଦିହ ଗୁଣରସେନୈଵ ଚିତ୍ତଂ ହରଂତୀଂ
ମୂର୍ତିଂ ତେ ସଂଶ୍ରୟେଽହଂ ପଵନପୁରପତେ ପାହି ମାଂ କୃଷ୍ଣ ରୋଗାତ୍ ॥10॥
