॥ ଶ୍ରୀ ଗଣେଶାୟ ନମଃ ॥
॥ ଶ୍ରୀପରମାତ୍ମନେ ନମଃ ॥
ଅଥ କଥା ପ୍ରାରଂଭଃ ।

ଅଥ ପ୍ରଥମୋଽଧ୍ୟାୟଃ

ଶ୍ରୀଵ୍ୟାସ ଉଵାଚ ।
ଏକଦା ନୈମିଷାରଣ୍ୟେ ଋଷୟଃ ଶୌନକାଦୟଃ ।
ପପ୍ରଚ୍ଛୁର୍ମୁନୟଃ ସର୍ଵେ ସୂତଂ ପୌରାଣିକଂ ଖଲୁ ॥ 1॥

ଋଷୟ ଊଚୁଃ ।
ଵ୍ରତେନ ତପସା କିଂ ଵା ପ୍ରାପ୍ୟତେ ଵାଂଛିତଂ ଫଲମ୍ ।
ତତ୍ସର୍ଵଂ ଶ୍ରୋତୁମିଚ୍ଛାମଃ କଥୟସ୍ଵ ମହାମୁନେ ॥ 2॥

ସୂତ ଉଵାଚ ।
ନାରଦେନୈଵ ସଂପୃଷ୍ଟୋ ଭଗଵାନ୍ କମଲାପତିଃ ।
ସୁରର୍ଷୟେ ୟଥୈଵାହ ତଚ୍ଛୃଣୁଧ୍ଵଂ ସମାହିତାଃ ॥ 3॥

ଏକଦା ନାରଦୋ ୟୋଗୀ ପରାନୁଗ୍ରହକାଂକ୍ଷୟା ।
ପର୍ୟଟନ୍ ଵିଵିଧାନ୍ ଲୋକାନ୍ ମର୍ତ୍ୟଲୋକମୁପାଗତଃ ॥ 4॥

ତତୋଦୃଷ୍ଟ୍ଵା ଜନାନ୍ସର୍ଵାନ୍ ନାନାକ୍ଲେଶସମନ୍ଵିତାନ୍ ।
ନାନାୟୋନିସମୁତ୍ପନ୍ନାନ୍ କ୍ଲିଶ୍ୟମାନାନ୍ ସ୍ଵକର୍ମଭିଃ ॥ 5॥

କେନୋପାୟେନ ଚୈତେଷାଂ ଦୁଃଖନାଶୋ ଭଵେଦ୍ ଧ୍ରୁଵମ୍ ।
ଇତି ସଂଚିଂତ୍ୟ ମନସା ଵିଷ୍ଣୁଲୋକଂ ଗତସ୍ତଦା ॥ 6॥

ତତ୍ର ନାରାୟଣଂ ଦେଵଂ ଶୁକ୍ଲଵର୍ଣଂ ଚତୁର୍ଭୁଜମ୍ ।
ଶଂଖ-ଚକ୍ର-ଗଦା-ପଦ୍ମ-ଵନମାଲା-ଵିଭୂଷିତମ୍ ॥ 7॥

ଦୃଷ୍ଟ୍ଵା ତଂ ଦେଵଦେଵେଶଂ ସ୍ତୋତୁଂ ସମୁପଚକ୍ରମେ ।
ନାରଦ ଉଵାଚ ।
ନମୋ ଵାଂଗମନସାତୀତରୂପାୟାନଂତଶକ୍ତୟେ ।
ଆଦିମଧ୍ୟାଂତହୀନାୟ ନିର୍ଗୁଣାୟ ଗୁଣାତ୍ମନେ ॥ 8॥

ସର୍ଵେଷାମାଦିଭୂତାୟ ଭକ୍ତାନାମାର୍ତିନାଶିନେ ।
ଶ୍ରୁତ୍ଵା ସ୍ତୋତ୍ରଂ ତତୋ ଵିଷ୍ଣୁର୍ନାରଦଂ ପ୍ରତ୍ୟଭାଷତ ॥ 9॥

ଶ୍ରୀଭଗଵାନୁଵାଚ ।
କିମର୍ଥମାଗତୋଽସି ତ୍ଵଂ କିଂ ତେ ମନସି ଵର୍ତତେ ।
କଥୟସ୍ଵ ମହାଭାଗ ତତ୍ସର୍ଵଂ କଥାୟାମି ତେ ॥ 10॥

ନାରଦ ଉଵାଚ ।
ମର୍ତ୍ୟଲୋକେ ଜନାଃ ସର୍ଵେ ନାନାକ୍ଲେଶସମନ୍ଵିତାଃ ।
ନନାୟୋନିସମୁତ୍ପନ୍ନାଃ ପଚ୍ୟଂତେ ପାପକର୍ମଭିଃ ॥ 11॥

ତତ୍କଥଂ ଶମୟେନ୍ନାଥ ଲଘୂପାୟେନ ତଦ୍ଵଦ ।
ଶ୍ରୋତୁମିଚ୍ଛାମି ତତ୍ସର୍ଵଂ କୃପାସ୍ତି ୟଦି ତେ ମୟି ॥ 12॥

ଶ୍ରୀଭଗଵାନୁଵାଚ ।
ସାଧୁ ପୃଷ୍ଟଂ ତ୍ଵୟା ଵତ୍ସ ଲୋକାନୁଗ୍ରହକାଂକ୍ଷୟା ।
ୟତ୍କୃତ୍ଵା ମୁଚ୍ୟତେ ମୋହତ୍ ତଚ୍ଛୃଣୁଷ୍ଵ ଵଦାମି ତେ ॥ 13॥

ଵ୍ରତମସ୍ତି ମହତ୍ପୁଣ୍ୟଂ ସ୍ଵର୍ଗେ ମର୍ତ୍ୟେ ଚ ଦୁର୍ଲଭମ୍ ।
ତଵ ସ୍ନେହାନ୍ମୟା ଵତ୍ସ ପ୍ରକାଶଃ କ୍ରିୟତେଽଧୁନା ॥ 14॥

ସତ୍ୟନାରାୟଣସ୍ୟୈଵ ଵ୍ରତଂ ସମ୍ୟଗ୍ଵିଧାନତଃ । (ସତ୍ୟନାରାୟଣସ୍ୟୈଵଂ)
କୃତ୍ଵା ସଦ୍ୟଃ ସୁଖଂ ଭୁକ୍ତ୍ଵା ପରତ୍ର ମୋକ୍ଷମାପ୍ନୁୟାତ୍ ।
ତଚ୍ଛ୍ରୁତ୍ଵା ଭଗଵଦ୍ଵାକ୍ୟଂ ନାରଦୋ ମୁନିରବ୍ରଵୀତ୍ ॥ 15॥

ନାରଦ ଉଵାଚ ।
କିଂ ଫଲଂ କିଂ ଵିଧାନଂ ଚ କୃତଂ କେନୈଵ ତଦ୍ ଵ୍ରତମ୍ ।
ତତ୍ସର୍ଵଂ ଵିସ୍ତରାଦ୍ ବ୍ରୂହି କଦା କାର୍ୟଂ ଵ୍ରତଂ ପ୍ରଭୋ ॥ 16॥ (କାର୍ୟଂହିତଦ୍ଵ୍ରତମ୍)

ଶ୍ରୀଭଗଵାନୁଵାଚ ।
ଦୁଃଖଶୋକାଦିଶମନଂ ଧନଧାନ୍ୟପ୍ରଵର୍ଧନମ୍ ॥ 17॥

ସୌଭାଗ୍ୟସଂତତିକରଂ ସର୍ଵତ୍ର ଵିଜୟପ୍ରଦମ୍ ।
ୟସ୍ମିନ୍ କସ୍ମିନ୍ ଦିନେ ମର୍ତ୍ୟୋ ଭକ୍ତିଶ୍ରଦ୍ଧାସମନ୍ଵିତଃ ॥ 18॥

ସତ୍ୟନାରାୟଣଂ ଦେଵଂ ୟଜେଚ୍ଚୈଵ ନିଶାମୁଖେ ।
ବ୍ରାହ୍ମଣୈର୍ବାଂଧଵୈଶ୍ଚୈଵ ସହିତୋ ଧର୍ମତତ୍ପରଃ ॥ 19॥

ନୈଵେଦ୍ୟଂ ଭକ୍ତିତୋ ଦଦ୍ୟାତ୍ ସପାଦଂ ଭକ୍ଷ୍ୟମୁତ୍ତମମ୍ ।
ରଂଭାଫଲଂ ଘୃତଂ କ୍ଷୀରଂ ଗୋଧୂମସ୍ୟ ଚ ଚୂର୍ଣକମ୍ ॥ 20॥

ଅଭାଵେ ଶାଲିଚୂର୍ଣଂ ଵା ଶର୍କରା ଵା ଗୁଡସ୍ତଥା ।
ସପାଦଂ ସର୍ଵଭକ୍ଷ୍ୟାଣି ଚୈକୀକୃତ୍ୟ ନିଵେଦୟେତ୍ ॥ 21॥

ଵିପ୍ରାୟ ଦକ୍ଷିଣାଂ ଦଦ୍ୟାତ୍ କଥାଂ ଶ୍ରୁତ୍ଵା ଜନୈଃ ସହ ।
ତତଶ୍ଚ ବଂଧୁଭିଃ ସାର୍ଧଂ ଵିପ୍ରାଂଶ୍ଚ ପ୍ରତିଭୋଜୟେତ୍ ॥ 22॥

ପ୍ରସାଦଂ ଭକ୍ଷୟେଦ୍ ଭକ୍ତ୍ୟା ନୃତ୍ୟଗୀତାଦିକଂ ଚରେତ୍ ।
ତତଶ୍ଚ ସ୍ଵଗୃହଂ ଗଚ୍ଛେତ୍ ସତ୍ୟନାରାୟଣଂ ସ୍ମରନ୍ ॥ 23॥

ଏଵଂ କୃତେ ମନୁଷ୍ୟାଣାଂ ଵାଂଛାସିଦ୍ଧିର୍ଭଵେଦ୍ ଧ୍ରୁଵମ୍ ।
ଵିଶେଷତଃ କଲିୟୁଗେ ଲଘୂପାୟୋଽସ୍ତି ଭୂତଲେ ॥ 24॥ (ଲଘୂପାୟୋସ୍ତି)

॥ ଇତି ଶ୍ରୀସ୍କଂଦପୁରାଣେ ରେଵାଖଂଡେ ଶ୍ରୀସତ୍ୟନାରାୟଣ ଵ୍ରତକଥାୟାଂ ପ୍ରଥମୋଽଧ୍ୟାୟଃ ॥ 1 ॥

ଅଥ ଦ୍ଵିତୀୟୋଽଧ୍ୟାୟଃ

ସୂତ ଉଵାଚ ।
ଅଥାନ୍ୟତ୍ ସଂପ୍ରଵକ୍ଷ୍ୟାମି କୃତଂ ୟେନ ପୁରା ଦ୍ଵିଜାଃ ।
କଶ୍ଚିତ୍ କାଶୀପୁରେ ରମ୍ୟେ ହ୍ୟାସୀଦ୍ଵିପ୍ରୋଽତିନିର୍ଧନଃ ॥ 1॥ (ହ୍ୟାସୀଦ୍ଵିପ୍ରୋତିନିର୍ଧନଃ)

କ୍ଷୁତ୍ତୃଡ୍ଭ୍ୟାଂ ଵ୍ୟାକୁଲୋଭୂତ୍ଵା ନିତ୍ୟଂ ବଭ୍ରାମ ଭୂତଲେ ।
ଦୁଃଖିତଂ ବ୍ରାହ୍ମଣଂ ଦୃଷ୍ଟ୍ଵା ଭଗଵାନ୍ ବ୍ରାହ୍ମଣପ୍ରିୟଃ ॥ 2॥

ଵୃଦ୍ଧବ୍ରାହ୍ମଣ ରୂପସ୍ତଂ ପପ୍ରଚ୍ଛ ଦ୍ଵିଜମାଦରାତ୍ ।
କିମର୍ଥଂ ଭ୍ରମସେ ଵିପ୍ର ମହୀଂ ନିତ୍ୟଂ ସୁଦୁଃଖିତଃ ।
ତତ୍ସର୍ଵଂ ଶ୍ରୋତୁମିଚ୍ଛାମି କଥ୍ୟତାଂ ଦ୍ଵିଜ ସତ୍ତମ ॥ 3॥

ବ୍ରାହ୍ମଣ ଉଵାଚ ।
ବ୍ରାହ୍ମଣୋଽତି ଦରିଦ୍ରୋଽହଂ ଭିକ୍ଷାର୍ଥଂ ଵୈ ଭ୍ରମେ ମହୀମ୍ ॥ 4॥ (ବ୍ରାହ୍ମଣୋତି)

ଉପାୟଂ ୟଦି ଜାନାସି କୃପୟା କଥୟ ପ୍ରଭୋ ।
ଵୃଦ୍ଧବ୍ରାହ୍ମଣ ଉଵାଚ ।
ସତ୍ୟନାରାୟଣୋ ଵିଷ୍ଣୁର୍ଵାଂଛିତାର୍ଥଫଲପ୍ରଦଃ ॥ 5॥

ତସ୍ୟ ତ୍ଵଂ ପୂଜନଂ ଵିପ୍ର କୁରୁଷ୍ଵ ଵ୍ରତମୁତ୍ତମମ । (ଵ୍ରତମୁତ୍ତମମ୍)
ୟତ୍କୃତ୍ଵା ସର୍ଵଦୁଃଖେଭ୍ୟୋ ମୁକ୍ତୋ ଭଵତି ମାନଵଃ ॥ 6॥

ଵିଧାନଂ ଚ ଵ୍ରତସ୍ୟାପି ଵିପ୍ରାୟାଭାଷ୍ୟ ୟତ୍ନତଃ ।
ସତ୍ୟନାରାୟଣୋ ଵୃଦ୍ଧସ୍ତତ୍ରୈଵାଂତରଧୀୟତ ॥ 7॥

ତଦ୍ ଵ୍ରତଂ ସଂକରିଷ୍ୟାମି ୟଦୁକ୍ତଂ ବ୍ରାହ୍ମଣେନ ଵୈ ।
ଇତି ସଂଚିଂତ୍ୟ ଵିପ୍ରୋଽସୌ ରାତ୍ରୌ ନିଦ୍ରା ନ ଲବ୍ଧଵାନ୍ ॥ 8॥ (ନିଦ୍ରାଂ)

ତତଃ ପ୍ରାତଃ ସମୁତ୍ଥାୟ ସତ୍ୟନାରାୟଣଵ୍ରତମ୍ ।
କରିଷ୍ୟ ଇତି ସଂକଲ୍ପ୍ୟ ଭିକ୍ଷାର୍ଥମଗମଦ୍ଵିଜଃ ॥ 9॥ (ଭିକ୍ଷାର୍ଥମଗମଦ୍ଦ୍ଵିଜଃ)

ତସ୍ମିନ୍ନେଵ ଦିନେ ଵିପ୍ରଃ ପ୍ରଚୁରଂ ଦ୍ରଵ୍ୟମାପ୍ତଵାନ୍ ।
ତେନୈଵ ବଂଧୁଭିଃ ସାର୍ଧଂ ସତ୍ୟସ୍ୟଵ୍ରତମାଚରତ୍ ॥ 10॥

ସର୍ଵଦୁଃଖଵିନିର୍ମୁକ୍ତଃ ସର୍ଵସଂପତ୍ସମନ୍ଵିତଃ ।
ବଭୂଵ ସ ଦ୍ଵିଜଶ୍ରେଷ୍ଠୋ ଵ୍ରତସ୍ୟାସ୍ୟ ପ୍ରଭାଵତଃ ॥ 11॥

ତତଃ ପ୍ରଭୃତି କାଲଂ ଚ ମାସି ମାସି ଵ୍ରତଂ କୃତମ୍ ।
ଏଵଂ ନାରାୟଣସ୍ୟେଦଂ ଵ୍ରତଂ କୃତ୍ଵା ଦ୍ଵିଜୋତ୍ତମଃ ॥ 12॥

ସର୍ଵପାପଵିନିର୍ମୁକ୍ତୋ ଦୁର୍ଲଭଂ ମୋକ୍ଷମାପ୍ତଵାନ୍ ।
ଵ୍ରତମସ୍ୟ ୟଦା ଵିପ୍ର ପୃଥିଵ୍ୟାଂ ସଂକରିଷ୍ୟତି ॥ 13॥ (ଵିପ୍ରାଃ)

ତଦୈଵ ସର୍ଵଦୁଃଖଂ ତୁ ମନୁଜସ୍ୟ ଵିନଶ୍ୟତି । (ଚ ମନୁଜସ୍ୟ)
ଏଵଂ ନାରାୟଣେନୋକ୍ତଂ ନାରଦାୟ ମହାତ୍ମନେ ॥ 14॥

ମୟା ତତ୍କଥିତଂ ଵିପ୍ରାଃ କିମନ୍ୟତ୍ କଥୟାମି ଵଃ ।
ଋଷୟ ଊଚୁଃ ।
ତସ୍ମାଦ୍ ଵିପ୍ରାଚ୍ଛ୍ରୁତଂ କେନ ପୃଥିଵ୍ୟାଂ ଚରିତଂ ମୁନେ ।
ତତ୍ସର୍ଵଂ ଶ୍ରୋତୁମିଚ୍ଛାମଃ ଶ୍ରଦ୍ଧାଽସ୍ମାକଂ ପ୍ରଜାୟତେ ॥ 15॥ (ଶ୍ରଦ୍ଧାସ୍ମାକଂ)

ସୂତ ଉଵାଚ ।
ଶ‍ଋଣୁଧ୍ଵଂ ମୁନୟଃ ସର୍ଵେ ଵ୍ରତଂ ୟେନ କୃତଂ ଭୁଵି ।
ଏକଦା ସ ଦ୍ଵିଜଵରୋ ୟଥାଵିଭଵ ଵିସ୍ତରୈଃ ॥ 16॥

ବଂଧୁଭିଃ ସ୍ଵଜନୈଃ ସାର୍ଧଂ ଵ୍ରତଂ କର୍ତୁଂ ସମୁଦ୍ୟତଃ ।
ଏତସ୍ମିନ୍ନଂତରେ କାଲେ କାଷ୍ଠକ୍ରେତା ସମାଗମତ୍ ॥ 17॥

ବହିଃ କାଷ୍ଠଂ ଚ ସଂସ୍ଥାପ୍ୟ ଵିପ୍ରସ୍ୟ ଗୃହମାୟୟୌ ।
ତୃଷ୍ଣାୟା ପୀଡିତାତ୍ମା ଚ ଦୃଷ୍ଟ୍ଵା ଵିପ୍ରଂ କୃତଂ ଵ୍ରତମ୍ ॥ 18॥ (କୃତ)

ପ୍ରଣିପତ୍ୟ ଦ୍ଵିଜଂ ପ୍ରାହ କିମିଦଂ କ୍ରିୟତେ ତ୍ଵୟା ।
କୃତେ କିଂ ଫଲମାପ୍ନୋତି ଵିସ୍ତରାଦ୍ ଵଦ ମେ ପ୍ରଭୋ ॥ 19॥ (ଵିସ୍ତାରାଦ୍)

ଵିପ୍ର ଉଵାଚ ।
ସତ୍ୟନାରାୟଣେସ୍ୟେଦଂ ଵ୍ରତଂ ସର୍ଵେପ୍ସିତପ୍ରଦମ୍ ।
ତସ୍ୟ ପ୍ରସାଦାନ୍ମେ ସର୍ଵଂ ଧନଧାନ୍ୟାଦିକଂ ମହତ୍ ॥ 20॥

ତସ୍ମାଦେତଦ୍ ଵ୍ରତଂ ଜ୍ଞାତ୍ଵା କାଷ୍ଠକ୍ରେତାଽତିହର୍ଷିତଃ ।
ପପୌ ଜଲଂ ପ୍ରସାଦଂ ଚ ଭୁକ୍ତ୍ଵା ସ ନଗରଂ ୟୟୌ ॥ 21॥

ସତ୍ୟନାରାୟଣଂ ଦେଵଂ ମନସା ଇତ୍ୟଚିଂତୟତ୍ ।
କାଷ୍ଠଂ ଵିକ୍ରୟତୋ ଗ୍ରାମେ ପ୍ରାପ୍ୟତେ ଚାଦ୍ୟ ୟଦ୍ ଧନମ୍ ॥ 22॥ (ପ୍ରାପ୍ୟତେମେଽଦ୍ୟ)

ତେନୈଵ ସତ୍ୟଦେଵସ୍ୟ କରିଷ୍ୟେ ଵ୍ରତମୁତ୍ତମମ୍ ।
ଇତି ସଂଚିଂତ୍ୟ ମନସା କାଷ୍ଠଂ ଧୃତ୍ଵା ତୁ ମସ୍ତକେ ॥ 23॥

ଜଗାମ ନଗରେ ରମ୍ୟେ ଧନିନାଂ ୟତ୍ର ସଂସ୍ଥିତିଃ ।
ତଦ୍ଦିନେ କାଷ୍ଠମୂଲ୍ୟଂ ଚ ଦ୍ଵିଗୁଣଂ ପ୍ରାପ୍ତଵାନସୌ ॥ 24॥

ତତଃ ପ୍ରସନ୍ନହୃଦୟଃ ସୁପକ୍ଵଂ କଦଲୀ ଫଲମ୍ ।
ଶର୍କରାଘୃତଦୁଗ୍ଧଂ ଚ ଗୋଧୂମସ୍ୟ ଚ ଚୂର୍ଣକମ୍ ॥ 25॥

କୃତ୍ଵୈକତ୍ର ସପାଦଂ ଚ ଗୃହୀତ୍ଵା ସ୍ଵଗୃହଂ ୟୟୌ ।
ତତୋ ବଂଧୂନ୍ ସମାହୂୟ ଚକାର ଵିଧିନା ଵ୍ରତମ୍ ॥ 26॥

ତଦ୍ ଵ୍ରତସ୍ୟ ପ୍ରଭାଵେଣ ଧନପୁତ୍ରାନ୍ଵିତୋଽଭଵତ୍ । (ଧନପୁତ୍ରାନ୍ଵିତୋଭଵତ୍)
ଇହଲୋକେ ସୁଖଂ ଭୁକ୍ତ୍ଵା ଚାଂତେ ସତ୍ୟପୁରଂ ୟୟୌ ॥ 27॥

॥ ଇତି ଶ୍ରୀସ୍କଂଦପୁରାଣେ ରେଵାଖଂଡେ ଶ୍ରୀସତ୍ୟନାରାୟଣ ଵ୍ରତକଥାୟାଂ ଦ୍ଵିତୀୟୋଽଧ୍ୟାୟଃ ॥ 2 ॥

ଅଥ ତୃତୀୟୋଽଧ୍ୟାୟଃ

ସୂତ ଉଵାଚ ।
ପୁନରଗ୍ରେ ପ୍ରଵକ୍ଷ୍ୟାମି ଶ‍ଋଣୁଧ୍ଵଂ ମୁନି ସତ୍ତମାଃ ।
ପୁରା ଚୋଲ୍କାମୁଖୋ ନାମ ନୃପଶ୍ଚାସୀନ୍ମହାମତିଃ ॥ 1॥

ଜିତେଂଦ୍ରିୟଃ ସତ୍ୟଵାଦୀ ୟୟୌ ଦେଵାଲୟଂ ପ୍ରତି ।
ଦିନେ ଦିନେ ଧନଂ ଦତ୍ତ୍ଵା ଦ୍ଵିଜାନ୍ ସଂତୋଷୟତ୍ ସୁଧୀଃ ॥ 2॥

ଭାର୍ୟା ତସ୍ୟ ପ୍ରମୁଗ୍ଧା ଚ ସରୋଜଵଦନା ସତୀ ।
ଭଦ୍ରଶୀଲାନଦୀ ତୀରେ ସତ୍ୟସ୍ୟଵ୍ରତମାଚରତ୍ ॥ 3॥

ଏତସ୍ମିନ୍ନଂତରେ ତତ୍ର ସାଧୁରେକଃ ସମାଗତଃ ।
ଵାଣିଜ୍ୟାର୍ଥଂ ବହୁଧନୈରନେକୈଃ ପରିପୂରିତଃ ॥ 4॥

ନାଵଂ ସଂସ୍ଥାପ୍ୟ ତତ୍ତୀରେ ଜଗାମ ନୃପତିଂ ପ୍ରତି ।
ଦୃଷ୍ଟ୍ଵା ସ ଵ୍ରତିନଂ ଭୂପଂ ପ୍ରପଚ୍ଛ ଵିନୟାନ୍ଵିତଃ ॥ 5॥

ସାଧୁରୁଵାଚ ।
କିମିଦଂ କୁରୁଷେ ରାଜନ୍ ଭକ୍ତିୟୁକ୍ତେନ ଚେତସା ।
ପ୍ରକାଶଂ କୁରୁ ତତ୍ସର୍ଵଂ ଶ୍ରୋତୁମିଚ୍ଛାମି ସାଂପ୍ରତମ୍ ॥ 6॥

ରାଜୋଵାଚ ।
ପୂଜନଂ କ୍ରିୟତେ ସାଧୋ ଵିଷ୍ଣୋରତୁଲତେଜସଃ ।
ଵ୍ରତଂ ଚ ସ୍ଵଜନୈଃ ସାର୍ଧଂ ପୁତ୍ରାଦ୍ୟାଵାପ୍ତି କାମ୍ୟୟା ॥ 7॥

ଭୂପସ୍ୟ ଵଚନଂ ଶ୍ରୁତ୍ଵା ସାଧୁଃ ପ୍ରୋଵାଚ ସାଦରମ୍ ।
ସର୍ଵଂ କଥୟ ମେ ରାଜନ୍ କରିଷ୍ୟେଽହଂ ତଵୋଦିତମ୍ ॥ 8॥

ମମାପି ସଂତତିର୍ନାସ୍ତି ହ୍ୟେତସ୍ମାଜ୍ଜାୟତେ ଧ୍ରୁଵମ୍ ।
ତତୋ ନିଵୃତ୍ତ୍ୟ ଵାଣିଜ୍ୟାତ୍ ସାନଂଦୋ ଗୃହମାଗତଃ ॥ 9॥

ଭାର୍ୟାୟୈ କଥିତଂ ସର୍ଵଂ ଵ୍ରତଂ ସଂତତି ଦାୟକମ୍ ।
ତଦା ଵ୍ରତଂ କରିଷ୍ୟାମି ୟଦା ମେ ସଂତତିର୍ଭଵେତ୍ ॥ 10॥

ଇତି ଲୀଲାଵତୀଂ ପ୍ରାହ ପତ୍ନୀଂ ସାଧୁଃ ସ ସତ୍ତମଃ ।
ଏକସ୍ମିନ୍ ଦିଵସେ ତସ୍ୟ ଭାର୍ୟା ଲୀଲାଵତୀ ସତୀ ॥ 11॥ (ଭାର୍ୟାଂ)

ଭର୍ତୃୟୁକ୍ତାନଂଦଚିତ୍ତାଽଭଵଦ୍ ଧର୍ମପରାୟଣା ।
ର୍ଗଭିଣୀ ସାଽଭଵତ୍ ତସ୍ୟ ଭାର୍ୟା ସତ୍ୟପ୍ରସାଦତଃ ॥ 12॥ (ସାଭଵତ୍)

ଦଶମେ ମାସି ଵୈ ତସ୍ୟାଃ କନ୍ୟାରତ୍ନମଜାୟତ ।
ଦିନେ ଦିନେ ସା ଵଵୃଧେ ଶୁକ୍ଲପକ୍ଷେ ୟଥା ଶଶୀ ॥ 13॥

ନାମ୍ନା କଲାଵତୀ ଚେତି ତନ୍ନାମକରଣଂ କୃତମ୍ ।
ତତୋ ଲୀଲାଵତୀ ପ୍ରାହ ସ୍ଵାମିନଂ ମଧୁରଂ ଵଚଃ ॥ 14॥

ନ କରୋଷି କିମର୍ଥଂ ଵୈ ପୁରା ସଂକଲ୍ପିତଂ ଵ୍ରତମ୍ ।
ସାଧୁରୁଵାଚ ।
ଵିଵାହ ସମୟେ ତ୍ଵସ୍ୟାଃ କରିଷ୍ୟାମି ଵ୍ରତଂ ପ୍ରିୟେ ॥ 15॥

ଇତି ଭାର୍ୟାଂ ସମାଶ୍ଵାସ୍ୟ ଜଗାମ ନଗରଂ ପ୍ରତି ।
ତତଃ କଲାଵତୀ କନ୍ୟା ଵଵୃଧେ ପିତୃଵେଶ୍ମନି ॥ 16॥

ଦୃଷ୍ଟ୍ଵା କନ୍ୟାଂ ତତଃ ସାଧୁର୍ନଗରେ ସଖିଭିଃ ସହ ।
ମଂତ୍ରୟିତ୍ଵା ଦ୍ରୁତଂ ଦୂତଂ ପ୍ରେଷୟାମାସ ଧର୍ମଵିତ୍ ॥ 17॥

ଵିଵାହାର୍ଥଂ ଚ କନ୍ୟାୟା ଵରଂ ଶ୍ରେଷ୍ଠଂ ଵିଚାରୟ ।
ତେନାଜ୍ଞପ୍ତଶ୍ଚ ଦୂତୋଽସୌ କାଂଚନଂ ନଗରଂ ୟୟୌ ॥ 18॥

ତସ୍ମାଦେକଂ ଵଣିକ୍ପୁତ୍ରଂ ସମାଦାୟାଗତୋ ହି ସଃ ।
ଦୃଷ୍ଟ୍ଵା ତୁ ସୁଂଦରଂ ବାଲଂ ଵଣିକ୍ପୁତ୍ରଂ ଗୁଣାନ୍ଵିତମ୍ ॥ 19॥

ଜ୍ଞାତିଭିର୍ବଂଧୁଭିଃ ସାର୍ଧଂ ପରିତୁଷ୍ଟେନ ଚେତସା ।
ଦତ୍ତାଵାନ୍ ସାଧୁପୁତ୍ରାୟ କନ୍ୟାଂ ଵିଧିଵିଧାନତଃ ॥ 20॥ (ସାଧୁଃପୁତ୍ରାୟ)

ତତୋଽଭାଗ୍ୟଵଶାତ୍ ତେନ ଵିସ୍ମୃତଂ ଵ୍ରତମୁତ୍ତମମ୍ । (ତତୋଭାଗ୍ୟଵଶାତ୍)
ଵିଵାହସମୟେ ତସ୍ୟାସ୍ତେନ ରୁଷ୍ଟୋ ଭଵତ୍ ପ୍ରଭୁଃ ॥ 21॥ (ରୁଷ୍ଟୋଽଭଵତ୍)

ତତଃ କାଲେନ ନିୟତୋ ନିଜକର୍ମ ଵିଶାରଦଃ ।
ଵାଣିଜ୍ୟାର୍ଥଂ ତତଃ ଶୀଘ୍ରଂ ଜାମାତୃ ସହିତୋ ଵଣିକ୍ ॥ 22॥

ରତ୍ନସାରପୁରେ ରମ୍ୟେ ଗତ୍ଵା ସିଂଧୁ ସମୀପତଃ ।
ଵାଣିଜ୍ୟମକରୋତ୍ ସାଧୁର୍ଜାମାତ୍ରା ଶ୍ରୀମତା ସହ ॥ 23॥

ତୌ ଗତୌ ନଗରେ ରମ୍ୟେ ଚଂଦ୍ରକେତୋର୍ନୃପସ୍ୟ ଚ । (ନଗରେତସ୍ୟ)
ଏତସ୍ମିନ୍ନେଵ କାଲେ ତୁ ସତ୍ୟନାରାୟଣଃ ପ୍ରଭୁଃ ॥ 24॥

ଭ୍ରଷ୍ଟପ୍ରତିଜ୍ଞମାଲୋକ୍ୟ ଶାପଂ ତସ୍ମୈ ପ୍ରଦତ୍ତଵାନ୍ ।
ଦାରୁଣଂ କଠିନଂ ଚାସ୍ୟ ମହଦ୍ ଦୁଃଖଂ ଭଵିଷ୍ୟତି ॥ 25॥

ଏକସ୍ମିଂଦିଵସେ ରାଜ୍ଞୋ ଧନମାଦାୟ ତସ୍କରଃ ।
ତତ୍ରୈଵ ଚାଗତ ଶ୍ଚୌରୋ ଵଣିଜୌ ୟତ୍ର ସଂସ୍ଥିତୌ ॥ 26॥

ତତ୍ପଶ୍ଚାଦ୍ ଧାଵକାନ୍ ଦୂତାନ୍ ଦୃଷ୍ଟଵା ଭୀତେନ ଚେତସା ।
ଧନଂ ସଂସ୍ଥାପ୍ୟ ତତ୍ରୈଵ ସ ତୁ ଶୀଘ୍ରମଲକ୍ଷିତଃ ॥ 27॥

ତତୋ ଦୂତାଃସମାୟାତା ୟତ୍ରାସ୍ତେ ସଜ୍ଜନୋ ଵଣିକ୍ ।
ଦୃଷ୍ଟ୍ଵା ନୃପଧନଂ ତତ୍ର ବଦ୍ଧ୍ଵାଽଽନୀତୌ ଵଣିକ୍ସୁତୌ ॥ 28॥ (ବଦ୍ଧ୍ଵାନୀତୌ)

ହର୍ଷେଣ ଧାଵମାନାଶ୍ଚ ପ୍ରୋଚୁର୍ନୃପସମୀପତଃ ।
ତସ୍କରୌ ଦ୍ଵୌ ସମାନୀତୌ ଵିଲୋକ୍ୟାଜ୍ଞାପୟ ପ୍ରଭୋ ॥ 29॥

ରାଜ୍ଞାଽଽଜ୍ଞପ୍ତାସ୍ତତଃ ଶୀଘ୍ରଂ ଦୃଢଂ ବଦ୍ଧ୍ଵା ତୁ ତା ଵୁଭୌ ।
ସ୍ଥାପିତୌ ଦ୍ଵୌ ମହାଦୁର୍ଗେ କାରାଗାରେଽଵିଚାରତଃ ॥ 30॥

ମାୟୟା ସତ୍ୟଦେଵସ୍ୟ ନ ଶ୍ରୁତଂ କୈସ୍ତୟୋର୍ଵଚଃ ।
ଅତସ୍ତୟୋର୍ଧନଂ ରାଜ୍ଞା ଗୃହୀତଂ ଚଂଦ୍ରକେତୁନା ॥ 31॥

ତଚ୍ଛାପାଚ୍ଚ ତୟୋର୍ଗେହେ ଭାର୍ୟା ଚୈଵାତି ଦୁଃଖିତା ।
ଚୌରେଣାପହୃତଂ ସର୍ଵଂ ଗୃହେ ୟଚ୍ଚ ସ୍ଥିତଂ ଧନମ୍ ॥ 32॥

ଆଧିଵ୍ୟାଧିସମାୟୁକ୍ତା କ୍ଷୁତ୍ପିପାଶାତି ଦୁଃଖିତା । (କ୍ଷୁତ୍ପିପାସାତି)
ଅନ୍ନଚିଂତାପରା ଭୂତ୍ଵା ବଭ୍ରାମ ଚ ଗୃହେ ଗୃହେ ।
କଲାଵତୀ ତୁ କନ୍ୟାପି ବଭ୍ରାମ ପ୍ରତିଵାସରମ୍ ॥ 33॥

ଏକସ୍ମିନ୍ ଦିଵସେ ୟାତା କ୍ଷୁଧାର୍ତା ଦ୍ଵିଜମଂଦିରମ୍ । (ଦିଵସେ ଜାତା)
ଗତ୍ଵାଽପଶ୍ୟଦ୍ ଵ୍ରତଂ ତତ୍ର ସତ୍ୟନାରାୟଣସ୍ୟ ଚ ॥ 34॥ (ଗତ୍ଵାପଶ୍ୟଦ୍)

ଉପଵିଶ୍ୟ କଥାଂ ଶ୍ରୁତ୍ଵା ଵରଂ ର୍ପ୍ରାଥିତଵତ୍ୟପି ।
ପ୍ରସାଦ ଭକ୍ଷଣଂ କୃତ୍ଵା ୟୟୌ ରାତ୍ରୌ ଗୃହଂ ପ୍ରତି ॥ 35॥

ମାତା କଲାଵତୀଂ କନ୍ୟାଂ କଥୟାମାସ ପ୍ରେମତଃ ।
ପୁତ୍ରି ରାତ୍ରୌ ସ୍ଥିତା କୁତ୍ର କିଂ ତେ ମନସି ଵର୍ତତେ ॥ 36॥

କନ୍ୟା କଲାଵତୀ ପ୍ରାହ ମାତରଂ ପ୍ରତି ସତ୍ଵରମ୍ ।
ଦ୍ଵିଜାଲୟେ ଵ୍ରତଂ ମାତର୍ଦୃଷ୍ଟଂ ଵାଂଛିତସିଦ୍ଧିଦମ୍ ॥ 37॥

ତଚ୍ଛ୍ରୁତ୍ଵା କନ୍ୟକା ଵାକ୍ୟଂ ଵ୍ରତଂ କର୍ତୁଂ ସମୁଦ୍ୟତା ।
ସା ମୁଦା ତୁ ଵଣିଗ୍ଭାର୍ୟା ସତ୍ୟନାରାୟଣସ୍ୟ ଚ ॥ 38॥

ଵ୍ରତଂ ଚକ୍ରେ ସୈଵ ସାଧ୍ଵୀ ବଂଧୁଭିଃ ସ୍ଵଜନୈଃ ସହ ।
ଭର୍ତୃଜାମାତରୌ କ୍ଷିପ୍ରମାଗଚ୍ଛେତାଂ ସ୍ଵମାଶ୍ରମମ୍ ॥ 39॥

ଅପରାଧଂ ଚ ମେ ଭର୍ତୁର୍ଜାମାତୁଃ କ୍ଷଂତୁମର୍ହସି ।
ଵ୍ରତେନାନେନ ତୁଷ୍ଟୋଽସୌ ସତ୍ୟନାରାୟଣଃ ପୁନଃ ॥ 40॥ (ତୁଷ୍ଟୋସୌ)

ଦର୍ଶୟାମାସ ସ୍ଵପ୍ନଂ ହୀ ଚଂଦ୍ରକେତୁଂ ନୃପୋତ୍ତମମ୍ ।
ବଂଦିନୌ ମୋଚୟ ପ୍ରାତର୍ଵଣିଜୌ ନୃପସତ୍ତମ ॥ 41॥

ଦେୟଂ ଧନଂ ଚ ତତ୍ସର୍ଵଂ ଗୃହୀତଂ ୟତ୍ ତ୍ଵୟାଽଧୁନା । (ତ୍ଵୟାଧୁନା)
ନୋ ଚେତ୍ ତ୍ଵାଂ ନାଶୟିଷ୍ୟାମି ସରାଜ୍ୟଧନପୁତ୍ରକମ୍ ॥ 42॥

ଏଵମାଭାଷ୍ୟ ରାଜାନଂ ଧ୍ୟାନଗମ୍ୟୋଽଭଵତ୍ ପ୍ରଭୁଃ । (ଧ୍ୟାନଗମ୍ୟୋଭଵତ୍)
ତତଃ ପ୍ରଭାତସମୟେ ରାଜା ଚ ସ୍ଵଜନୈଃ ସହ ॥ 43॥

ଉପଵିଶ୍ୟ ସଭାମଧ୍ୟେ ପ୍ରାହ ସ୍ଵପ୍ନଂ ଜନଂ ପ୍ରତି ।
ବଦ୍ଧୌ ମହାଜନୌ ଶୀଘ୍ରଂ ମୋଚୟ ଦ୍ଵୌ ଵଣିକ୍ସୁତୌ ॥ 44॥

ଇତି ରାଜ୍ଞୋ ଵଚଃ ଶ୍ରୁତ୍ଵା ମୋଚୟିତ୍ଵା ମହାଜନୌ ।
ସମାନୀୟ ନୃପସ୍ୟାଗ୍ରେ ପ୍ରାହୁସ୍ତେ ଵିନୟାନ୍ଵିତାଃ ॥ 45॥

ଆନୀତୌ ଦ୍ଵୌ ଵଣିକ୍ପୁତ୍ରୌ ମୁକ୍ତୌ ନିଗଡବଂଧନାତ୍ ।
ତତୋ ମହାଜନୌ ନତ୍ଵା ଚଂଦ୍ରକେତୁଂ ନୃପୋତ୍ତମମ୍ ॥ 46॥

ସ୍ମରଂତୌ ପୂର୍ଵ ଵୃତ୍ତାଂତଂ ନୋଚତୁର୍ଭୟଵିହ୍ଵଲୌ ।
ରାଜା ଵଣିକ୍ସୁତୌ ଵୀକ୍ଷ୍ୟ ଵଚଃ ପ୍ରୋଵାଚ ସାଦରମ୍ ॥ 47॥

ଦେଵାତ୍ ପ୍ରାପ୍ତଂ ମହଦ୍ଦୁଃଖମିଦାନୀଂ ନାସ୍ତି ଵୈ ଭୟମ୍ ।
ତଦା ନିଗଡସଂତ୍ୟାଗଂ କ୍ଷୌରକର୍ମାଦ୍ୟକାରୟତ୍ ॥ 48॥

ଵସ୍ତ୍ରାଲଂକାରକଂ ଦତ୍ତ୍ଵା ପରିତୋଷ୍ୟ ନୃପଶ୍ଚ ତୌ ।
ପୁରସ୍କୃତ୍ୟ ଵଣିକ୍ପୁତ୍ରୌ ଵଚସାଽତୋଷୟଦ୍ ଭୃଶମ୍ ॥ 49॥ (ଵଚସାତୋଷୟଦ୍ଭୃଶମ୍)

ପୁରାନୀତଂ ତୁ ୟଦ୍ ଦ୍ରଵ୍ୟଂ ଦ୍ଵିଗୁଣୀକୃତ୍ୟ ଦତ୍ତଵାନ୍ ।
ପ୍ରୋଵାଚ ଚ ତତୋ ରାଜା ଗଚ୍ଛ ସାଧୋ ନିଜାଶ୍ରମମ୍ ॥ 50॥ (ପ୍ରୋଵାଚତୌ)

ରାଜାନଂ ପ୍ରଣିପତ୍ୟାହ ଗଂତଵ୍ୟଂ ତ୍ଵତ୍ପ୍ରସାଦତଃ ।
ଇତ୍ୟୁକ୍ତ୍ଵା ତୌ ମହାଵୈଶ୍ୟୌ ଜଗ୍ମତୁଃ ସ୍ଵଗୃହଂ ପ୍ରତି ॥ 51॥ (ମହାଵୈଶ୍ୟୋ)

॥ ଇତି ଶ୍ରୀସ୍କଂଦ ପୁରାଣେ ରେଵାଖଂଡେ ଶ୍ରୀସତ୍ୟନାରାୟଣ ଵ୍ରତକଥାୟାଂ ତୃତୀୟୋଽଧ୍ୟାୟଃ ॥ 3 ॥

ଅଥ ଚତୁର୍ଥୋଽଧ୍ୟାୟଃ

ସୂତ ଉଵାଚ ।
ୟାତ୍ରାଂ ତୁ କୃତଵାନ୍ ସାଧୁର୍ମଂଗଲାୟନପୂର୍ଵିକାମ୍ ।
ବ୍ରାହ୍ମଣେଭ୍ୟୋ ଧନଂ ଦତ୍ତ୍ଵା ତଦା ତୁ ନଗରଂ ୟୟୌ ॥ 1॥

କିୟଦ୍ ଦୂରେ ଗତେ ସାଧୋ ସତ୍ୟନାରାୟଣଃ ପ୍ରଭୁଃ ।
ଜିଜ୍ଞାସାଂ କୃତଵାନ୍ ସାଧୌ କିମସ୍ତି ତଵ ନୌସ୍ଥିତମ୍ ॥ 2॥

ତତୋ ମହାଜନୌ ମତ୍ତୌ ହେଲୟା ଚ ପ୍ରହସ୍ୟ ଵୈ । (ମତୌ)
କଥଂ ପୃଚ୍ଛସି ଭୋ ଦଂଡିନ୍ ମୁଦ୍ରାଂ ନେତୁଂ କିମିଚ୍ଛସି ॥ 3॥

ଲତାପତ୍ରାଦିକଂ ଚୈଵ ଵର୍ତତେ ତରଣୌ ମମ ।
ନିଷ୍ଠୁରଂ ଚ ଵଚଃ ଶ୍ରୁତ୍ଵା ସତ୍ୟଂ ଭଵତୁ ତେ ଵଚଃ ॥ 4॥

ଏଵମୁକ୍ତ୍ଵା ଗତଃ ଶୀଘ୍ରଂ ଦଂଡୀ ତସ୍ୟ ସମୀପତଃ ।
କିୟଦ୍ ଦୂରେ ତତୋ ଗତ୍ଵା ସ୍ଥିତଃ ସିଂଧୁ ସମୀପତଃ ॥ 5॥

ଗତେ ଦଂଡିନି ସାଧୁଶ୍ଚ କୃତନିତ୍ୟକ୍ରିୟସ୍ତଦା ।
ଉତ୍ଥିତାଂ ତରଣୀଂ ଦୃଷ୍ଟ୍ଵା ଵିସ୍ମୟଂ ପରମଂ ୟୟୌ ॥ 6॥

ଦୃଷ୍ଟ୍ଵା ଲତାଦିକଂ ଚୈଵ ମୂର୍ଚ୍ଛିତୋ ନ୍ୟପତଦ୍ ଭୁଵି ।
ଲବ୍ଧସଂଜ୍ଞୋ ଵଣିକ୍ପୁତ୍ରସ୍ତତଶ୍ଚିଂତାନ୍ଵିତୋଽଭଵତ୍ ॥ 7॥ (ଵଣିକ୍ପୁତ୍ରସ୍ତତଶ୍ଚିଂତାନ୍ଵିତୋଭଵତ୍)

ତଦା ତୁ ଦୁହିତୁଃ କାଂତୋ ଵଚନଂ ଚେଦମବ୍ରଵୀତ୍ ।
କିମର୍ଥଂ କ୍ରିୟତେ ଶୋକଃ ଶାପୋ ଦତ୍ତଶ୍ଚ ଦଂଡିନା ॥ 8॥

ଶକ୍ୟତେ ତେନ ସର୍ଵଂ ହି କର୍ତୁଂ ଚାତ୍ର ନ ସଂଶୟଃ । (ଶକ୍ୟତେନେ ନ)
ଅତସ୍ତଚ୍ଛରଣଂ ୟାମୋ ଵାଂଛତାର୍ଥୋ ଭଵିଷ୍ୟତି ॥ 9॥ (ଵାଂଛିତାର୍ଥୋ)

ଜାମାତୁର୍ଵଚନଂ ଶ୍ରୁତ୍ଵା ତତ୍ସକାଶଂ ଗତସ୍ତଦା ।
ଦୃଷ୍ଟ୍ଵା ଚ ଦଂଡିନଂ ଭକ୍ତ୍ୟା ନତ୍ଵା ପ୍ରୋଵାଚ ସାଦରମ୍ ॥ 10॥

କ୍ଷମସ୍ଵ ଚାପରାଧଂ ମେ ୟଦୁକ୍ତଂ ତଵ ସନ୍ନିଧୌ ।
ଏଵଂ ପୁନଃ ପୁନର୍ନତ୍ଵା ମହାଶୋକାକୁଲୋଽଭଵତ୍ ॥ 11॥ (ମହାଶୋକାକୁଲୋଭଵତ୍)

ପ୍ରୋଵାଚ ଵଚନଂ ଦଂଡୀ ଵିଲପଂତଂ ଵିଲୋକ୍ୟ ଚ ।
ମା ରୋଦୀଃ ଶ‍ଋଣୁମଦ୍ଵାକ୍ୟଂ ମମ ପୂଜାବହିର୍ମୁଖଃ ॥ 12॥

ମମାଜ୍ଞୟା ଚ ଦୁର୍ବୁଦ୍ଧେ ଲବ୍ଧଂ ଦୁଃଖଂ ମୁହୁର୍ମୁହୁଃ ।
ତଚ୍ଛ୍ରୁତ୍ଵା ଭଗଵଦ୍ଵାକ୍ୟଂ ସ୍ତୁତିଂ କର୍ତୁଂ ସମୁଦ୍ୟତଃ ॥ 13॥

ସାଧୁରୁଵାଚ ।
ତ୍ଵନ୍ମାୟାମୋହିତାଃ ସର୍ଵେ ବ୍ରହ୍ମାଦ୍ୟାସ୍ତ୍ରିଦିଵୌକସଃ ।
ନ ଜାନଂତି ଗୁଣାନ୍ ରୂପଂ ତଵାଶ୍ଚର୍ୟମିଦଂ ପ୍ରଭୋ ॥ 14॥

ମୂଢୋଽହଂ ତ୍ଵାଂ କଥଂ ଜାନେ ମୋହିତସ୍ତଵମାୟୟା । (ମୂଢୋହଂ)
ପ୍ରସୀଦ ପୂଜୟିଷ୍ୟାମି ୟଥାଵିଭଵଵିସ୍ତରୈଃ ॥ 15॥

ପୁରା ଵିତ୍ତଂ ଚ ତତ୍ ସର୍ଵଂ ତ୍ରାହି ମାଂ ଶରଣାଗତମ୍ ।
ଶ୍ରୁତ୍ଵା ଭକ୍ତିୟୁତଂ ଵାକ୍ୟଂ ପରିତୁଷ୍ଟୋ ଜନାର୍ଦନଃ ॥ 16॥

ଵରଂ ଚ ଵାଂଛିତଂ ଦତ୍ତ୍ଵା ତତ୍ରୈଵାଂତର୍ଦଧେ ହରିଃ ।
ତତୋ ନାଵଂ ସମାରୂହ୍ୟ ଦୃଷ୍ଟ୍ଵା ଵିତ୍ତପ୍ରପୂରିତାମ୍ ॥ 17॥

କୃପୟା ସତ୍ୟଦେଵସ୍ୟ ସଫଲଂ ଵାଂଛିତଂ ମମ ।
ଇତ୍ୟୁକ୍ତ୍ଵା ସ୍ଵଜନୈଃ ସାର୍ଧଂ ପୂଜାଂ କୃତ୍ଵା ୟଥାଵିଧି ॥ 18॥

ହର୍ଷେଣ ଚାଭଵତ୍ ପୂର୍ଣଃସତ୍ୟଦେଵପ୍ରସାଦତଃ ।
ନାଵଂ ସଂୟୋଜ୍ୟ ୟତ୍ନେନ ସ୍ଵଦେଶଗମନଂ କୃତମ୍ ॥ 19॥

ସାଧୁର୍ଜାମାତରଂ ପ୍ରାହ ପଶ୍ୟ ରତ୍ନପୁରୀଂ ମମ ।
ଦୂତଂ ଚ ପ୍ରେଷୟାମାସ ନିଜଵିତ୍ତସ୍ୟ ରକ୍ଷକମ୍ ॥ 20॥

ତତୋଽସୌ ନଗରଂ ଗତ୍ଵା ସାଧୁଭାର୍ୟାଂ ଵିଲୋକ୍ୟ ଚ । (ଦୂତୋସୌ)
ପ୍ରୋଵାଚ ଵାଂଛିତଂ ଵାକ୍ୟଂ ନତ୍ଵା ବଦ୍ଧାଂଜଲିସ୍ତଦା ॥ 21॥

ନିକଟେ ନଗରସ୍ୟୈଵ ଜାମାତ୍ରା ସହିତୋ ଵଣିକ୍ ।
ଆଗତୋ ବଂଧୁଵର୍ଗୈଶ୍ଚ ଵିତ୍ତୈଶ୍ଚ ବହୁଭିର୍ୟୁତଃ ॥ 22॥

ଶ୍ରୁତ୍ଵା ଦୂତମୁଖାଦ୍ଵାକ୍ୟଂ ମହାହର୍ଷଵତୀ ସତୀ ।
ସତ୍ୟପୂଜାଂ ତତଃ କୃତ୍ଵା ପ୍ରୋଵାଚ ତନୁଜାଂ ପ୍ରତି ॥ 23॥

ଵ୍ରଜାମି ଶୀଘ୍ରମାଗଚ୍ଛ ସାଧୁସଂଦର୍ଶନାୟ ଚ ।
ଇତି ମାତୃଵଚଃ ଶ୍ରୁତ୍ଵା ଵ୍ରତଂ କୃତ୍ଵା ସମାପ୍ୟ ଚ ॥ 24॥

ପ୍ରସାଦଂ ଚ ପରିତ୍ୟଜ୍ୟ ଗତା ସାଽପି ପତିଂ ପ୍ରତି । (ସାପି)
ତେନ ରୁଷ୍ଟାଃ ସତ୍ୟଦେଵୋ ଭର୍ତାରଂ ତରଣିଂ ତଥା ॥ 25॥ (ରୁଷ୍ଟଃ, ତରଣୀଂ)

ସଂହୃତ୍ୟ ଚ ଧନୈଃ ସାର୍ଧଂ ଜଲେ ତସ୍ୟାଵମଜ୍ଜୟତ୍ ।
ତତଃ କଲାଵତୀ କନ୍ୟା ନ ଵିଲୋକ୍ୟ ନିଜଂ ପତିମ୍ ॥ 26॥

ଶୋକେନ ମହତା ତତ୍ର ରୁଦଂତୀ ଚାପତଦ୍ ଭୁଵି । (ରୁଦତୀ)
ଦୃଷ୍ଟ୍ଵା ତଥାଵିଧାଂ ନାଵଂ କନ୍ୟାଂ ଚ ବହୁଦୁଃଖିତାମ୍ ॥ 27॥

ଭୀତେନ ମନସା ସାଧୁଃ କିମାଶ୍ଚର୍ୟମିଦଂ ଭଵେତ୍ ।
ଚିଂତ୍ୟମାନାଶ୍ଚ ତେ ସର୍ଵେ ବଭୂଵୁସ୍ତରିଵାହକାଃ ॥ 28॥

ତତୋ ଲୀଲାଵତୀ କନ୍ୟାଂ ଦୃଷ୍ଟ୍ଵା ସା ଵିହ୍ଵଲାଽଭଵତ୍ ।
ଵିଲଲାପାତିଦୁଃଖେନ ଭର୍ତାରଂ ଚେଦମବ୍ରଵୀତ ॥ 29॥

ଇଦାନୀଂ ନୌକୟା ସାର୍ଧଂ କଥଂ ସୋଽଭୂଦଲକ୍ଷିତଃ ।
ନ ଜାନେ କସ୍ୟ ଦେଵସ୍ୟ ହେଲୟା ଚୈଵ ସା ହୃତା ॥ 30॥

ସତ୍ୟଦେଵସ୍ୟ ମାହାତ୍ମ୍ୟଂ ଜ୍ଞାତୁଂ ଵା କେନ ଶକ୍ୟତେ ।
ଇତ୍ୟୁକ୍ତ୍ଵା ଵିଲଲାପୈଵ ତତଶ୍ଚ ସ୍ଵଜନୈଃ ସହ ॥ 31॥

ତତୋ ଲୀଲାଵତୀ କନ୍ୟାଂ କ୍ରୌଡେ କୃତ୍ଵା ରୁରୋଦ ହ ।
ତତଃକଲାଵତୀ କନ୍ୟା ନଷ୍ଟେ ସ୍ଵାମିନି ଦୁଃଖିତା ॥ 32॥

ଗୃହୀତ୍ଵା ପାଦୁକେ ତସ୍ୟାନୁଗତୁଂ ଚ ମନୋଦଧେ । (ପାଦୁକାଂ)
କନ୍ୟାୟାଶ୍ଚରିତଂ ଦୃଷ୍ଟ୍ଵା ସଭାର୍ୟଃ ସଜ୍ଜନୋ ଵଣିକ୍ ॥ 33॥

ଅତିଶୋକେନ ସଂତପ୍ତଶ୍ଚିଂତୟାମାସ ଧର୍ମଵିତ୍ ।
ହୃତଂ ଵା ସତ୍ୟଦେଵେନ ଭ୍ରାଂତୋଽହଂ ସତ୍ୟମାୟୟା ॥ 34॥

ସତ୍ୟପୂଜାଂ କରିଷ୍ୟାମି ୟଥାଵିଭଵଵିସ୍ତରୈଃ ।
ଇତି ସର୍ଵାନ୍ ସମାହୂୟ କଥୟିତ୍ଵା ମନୋରଥମ୍ ॥ 35॥

ନତ୍ଵା ଚ ଦଂଡଵଦ୍ ଭୂମୌ ସତ୍ୟଦେଵଂ ପୁନଃ ପୁନଃ ।
ତତସ୍ତୁଷ୍ଟଃ ସତ୍ୟଦେଵୋ ଦୀନାନାଂ ପରିପାଲକଃ ॥ 36॥

ଜଗାଦ ଵଚନଂ ଚୈନଂ କୃପୟା ଭକ୍ତଵତ୍ସଲଃ ।
ତ୍ୟକ୍ତ୍ଵା ପ୍ରସାଦଂ ତେ କନ୍ୟା ପତିଂ ଦ୍ରଷ୍ଟୁଂ ସମାଗତା ॥ 37॥

ଅତୋଽଦୃଷ୍ଟୋଽଭଵତ୍ତସ୍ୟାଃ କନ୍ୟକାୟାଃ ପତିର୍ଧ୍ରୁଵମ୍ ।
ଗୃହଂ ଗତ୍ଵା ପ୍ରସାଦଂ ଚ ଭୁକ୍ତ୍ଵା ସାଽଽୟାତି ଚେତ୍ପୁନଃ ॥ 38॥ (ସାୟାତି)

ଲବ୍ଧଭର୍ତ୍ରୀ ସୁତା ସାଧୋ ଭଵିଷ୍ୟତି ନ ସଂଶୟଃ ।
କନ୍ୟକା ତାଦୃଶଂ ଵାକ୍ୟଂ ଶ୍ରୁତ୍ଵା ଗଗନମଂଡଲାତ୍ ॥ 39॥

କ୍ଷିପ୍ରଂ ତଦା ଗୃହଂ ଗତ୍ଵା ପ୍ରସାଦଂ ଚ ବୁଭୋଜ ସା ।
ପଶ୍ଚାତ୍ ସା ପୁନରାଗତ୍ୟ ଦଦର୍ଶ ସ୍ଵଜନଂ ପତିମ୍ ॥ 40॥ (ସାପଶ୍ଚାତ୍ପୁନରାଗତ୍ୟ, ସଜନଂ)

ତତଃ କଲାଵତୀ କନ୍ୟା ଜଗାଦ ପିତରଂ ପ୍ରତି ।
ଇଦାନୀଂ ଚ ଗୃହଂ ୟାହି ଵିଲଂବଂ କୁରୁଷେ କଥମ୍ ॥ 41॥

ତଚ୍ଛ୍ରୁତ୍ଵା କନ୍ୟକାଵାକ୍ୟଂ ସଂତୁଷ୍ଟୋଽଭୂଦ୍ଵଣିକ୍ସୁତଃ ।
ପୂଜନଂ ସତ୍ୟଦେଵସ୍ୟ କୃତ୍ଵା ଵିଧିଵିଧାନତଃ ॥ 42॥

ଧନୈର୍ବଂଧୁଗଣୈଃ ସାର୍ଧଂ ଜଗାମ ନିଜମଂଦିରମ୍ ।
ପୌର୍ଣମାସ୍ୟାଂ ଚ ସଂକ୍ରାଂତୌ କୃତଵାନ୍ ସତ୍ୟସ୍ୟ ପୂଜନମ୍ ॥ 43॥ (ସତ୍ୟପୂଜନମ୍)

ଇହଲୋକେ ସୁଖଂ ଭୁକ୍ତ୍ଵା ଚାଂତେ ସତ୍ୟପୁରଂ ୟୟୌ ॥ 44॥

॥ ଇତି ଶ୍ରୀସ୍କଂଦ ପୁରାଣେ ରେଵାଖଂଡେ ଶ୍ରୀସତ୍ୟନାରାୟଣ ଵ୍ରତକଥାୟାଂ ଚତୁର୍ଥୋଽଧ୍ୟାୟଃ ॥ 4 ॥

ଅଥ ପଂଚମୋଽଧ୍ୟାୟଃ

ସୂତ ଉଵାଚ ।
ଅଥାନ୍ୟଚ୍ଚ ପ୍ରଵକ୍ଷ୍ୟାମି ଶ୍ରୁଣୁଧ୍ଵଂ ମୁନିସତ୍ତମାଃ ।
ଆସୀତ୍ ତୁଂଗଧ୍ଵଜୋ ରାଜା ପ୍ରଜାପାଲନତତ୍ପରଃ ॥ 1॥

ପ୍ରସାଦଂ ସତ୍ୟଦେଵସ୍ୟ ତ୍ୟକ୍ତ୍ଵା ଦୁଃଖମଵାପ ସଃ ।
ଏକଦା ସ ଵନଂ ଗତ୍ଵା ହତ୍ଵା ବହୁଵିଧାନ୍ ପଶୂନ୍ ॥ 2॥

ଆଗତ୍ୟ ଵଟମୂଲଂ ଚ ଦୃଷ୍ଟ୍ଵା ସତ୍ୟସ୍ୟ ପୂଜନମ୍ । (ଚାପଶ୍ୟତ୍)
ଗୋପାଃ କୁର୍ଵଂତି ସଂତୁଷ୍ଟା ଭକ୍ତିୟୁକ୍ତାଃ ସ ବାଂଧଵାଃ ॥ 3॥

ରାଜା ଦୃଷ୍ଟ୍ଵା ତୁ ଦର୍ପେଣ ନ ଗତୋ ନ ନନାମ ସଃ ।
ତତୋ ଗୋପଗଣାଃ ସର୍ଵେ ପ୍ରସାଦଂ ନୃପସନ୍ନିଧୌ ॥ 4॥

ସଂସ୍ଥାପ୍ୟ ପୁନରାଗତ୍ୟ ଭୁକ୍ତତ୍ଵା ସର୍ଵେ ୟଥେପ୍ସିତମ୍ ।
ତତଃ ପ୍ରସାଦଂ ସଂତ୍ୟଜ୍ୟ ରାଜା ଦୁଃଖମଵାପ ସଃ ॥ 5॥

ତସ୍ୟ ପୁତ୍ରଶତଂ ନଷ୍ଟଂ ଧନଧାନ୍ୟାଦିକଂ ଚ ୟତ୍ ।
ସତ୍ୟଦେଵେନ ତତ୍ସର୍ଵଂ ନାଶିତଂ ମମ ନିଶ୍ଚିତମ୍ ॥ 6॥

ଅତସ୍ତତ୍ରୈଵ ଗଚ୍ଛାମି ୟତ୍ର ଦେଵସ୍ୟ ପୂଜନମ୍ ।
ମନସା ତୁ ଵିନିଶ୍ଚିତ୍ୟ ୟୟୌ ଗୋପାଲସନ୍ନିଧୌ ॥ 7॥

ତତୋଽସୌ ସତ୍ୟଦେଵସ୍ୟ ପୂଜାଂ ଗୋପଗଣୈଃସହ ।
ଭକ୍ତିଶ୍ରଦ୍ଧାନ୍ଵିତୋ ଭୂତ୍ଵା ଚକାର ଵିଧିନା ନୃପଃ ॥ 8॥

ସତ୍ୟଦେଵପ୍ରସାଦେନ ଧନପୁତ୍ରାନ୍ଵିତୋଽଭଵତ୍ ।
ଇହଲୋକେ ସୁଖଂ ଭୁକ୍ତତ୍ଵା ଚାଂତେ ସତ୍ୟପୁରଂ ୟୟୌ ॥ 9॥

ୟ ଇଦଂ କୁରୁତେ ସତ୍ୟଵ୍ରତଂ ପରମଦୁର୍ଲଭମ୍ ।
ଶ‍ଋଣୋତି ଚ କଥାଂ ପୁଣ୍ୟାଂ ଭକ୍ତିୟୁକ୍ତଃ ଫଲପ୍ରଦାମ୍ ॥ 10॥

ଧନଧାନ୍ୟାଦିକଂ ତସ୍ୟ ଭଵେତ୍ ସତ୍ୟପ୍ରସାଦତଃ ।
ଦରିଦ୍ରୋ ଲଭତେ ଵିତ୍ତଂ ବଦ୍ଧୋ ମୁଚ୍ୟେତ ବଂଧନାତ୍ ॥ 11॥

ଭୀତୋ ଭୟାତ୍ ପ୍ରମୁଚ୍ୟେତ ସତ୍ୟମେଵ ନ ସଂଶୟଃ ।
ଈପ୍ସିତଂ ଚ ଫଲଂ ଭୁକ୍ତ୍ଵା ଚାଂତେ ସତ୍ୟପୁରଂଵ୍ରଜେତ୍ ॥ 12॥

ଇତି ଵଃ କଥିତଂ ଵିପ୍ରାଃ ସତ୍ୟନାରାୟଣଵ୍ରତମ୍ ।
ୟତ୍ କୃତ୍ଵା ସର୍ଵଦୁଃଖେଭ୍ୟୋ ମୁକ୍ତୋ ଭଵତି ମାନଵଃ ॥ 13॥

ଵିଶେଷତଃ କଲିୟୁଗେ ସତ୍ୟପୂଜା ଫଲପ୍ରଦା ।
କେଚିତ୍ କାଲଂ ଵଦିଷ୍ୟଂତି ସତ୍ୟମୀଶଂ ତମେଵ ଚ ॥ 14॥

ସତ୍ୟନାରାୟଣଂ କେଚିତ୍ ସତ୍ୟଦେଵଂ ତଥାପରେ ।
ନାନାରୂପଧରୋ ଭୂତ୍ଵା ସର୍ଵେଷାମୀପ୍ସିତପ୍ରଦମ୍ ॥ 15॥ (ସର୍ଵେଷାମୀପ୍ସିତପ୍ରଦଃ)

ଭଵିଷ୍ୟତି କଲୌ ସତ୍ୟଵ୍ରତରୂପୀ ସନାତନଃ ।
ଶ୍ରୀଵିଷ୍ଣୁନା ଧୃତଂ ରୂପଂ ସର୍ଵେଷାମୀପ୍ସିତପ୍ରଦମ୍ ॥ 16॥

ୟ ଇଦଂ ପଠତେ ନିତ୍ୟଂ ଶ‍ଋଣୋତି ମୁନିସତ୍ତମାଃ ।
ତସ୍ୟ ନଶ୍ୟଂତି ପାପାନି ସତ୍ୟଦେଵପ୍ରସାଦତଃ ॥ 17॥

ଵ୍ରତଂ ୟୈସ୍ତୁ କୃତଂ ପୂର୍ଵଂ ସତ୍ୟନାରାୟଣସ୍ୟ ଚ ।
ତେଷାଂ ତ୍ଵପରଜନ୍ମାନି କଥୟାମି ମୁନୀଶ୍ଵରାଃ ॥ 18॥

ଶତାନଂଦୋମହାପ୍ରାଜ୍ଞଃସୁଦାମାବ୍ରାହ୍ମଣୋ ହ୍ୟଭୂତ୍ ।
ତସ୍ମିଂଜନ୍ମନି ଶ୍ରୀକୃଷ୍ଣଂ ଧ୍ୟାତ୍ଵା ମୋକ୍ଷମଵାପ ହ ॥ 19॥

କାଷ୍ଠଭାରଵହୋ ଭିଲ୍ଲୋ ଗୁହରାଜୋ ବଭୂଵ ହ ।
ତସ୍ମିଂଜନ୍ମନି ଶ୍ରୀରାମଂ ସେଵ୍ୟ ମୋକ୍ଷଂ ଜଗାମ ଵୈ ॥ 20॥

ଉଲ୍କାମୁଖୋ ମହାରାଜୋ ନୃପୋ ଦଶରଥୋଽଭଵତ୍ ।
ଶ୍ରୀରଂଗନାଥଂ ସଂପୂଜ୍ୟ ଶ୍ରୀଵୈକୁଂଠଂ ତଦାଗମତ୍ ॥ 21॥ (ଶ୍ରୀରାମଚଂଦ୍ରସଂପ୍ରାପ୍ୟ)

ର୍ଧାମିକଃ ସତ୍ୟସଂଧଶ୍ଚ ସାଧୁର୍ମୋରଧ୍ଵଜୋଽଭଵତ୍ । (ସାଧୁର୍ମୋରଧ୍ଵଜୋଭଵତ୍)
ଦେହାର୍ଧଂ କ୍ରକଚୈଶ୍ଛିତ୍ତ୍ଵା ଦତ୍ଵା ମୋକ୍ଷମଵାପ ହ ॥ 22॥

ତୁଂଗଧ୍ଵଜୋ ମହାରାଜଃ ସ୍ଵାୟଂଭୁଵୋଽଭଵତ୍ କିଲ । (ସ୍ଵାୟଂଭୂରଭଵତ୍)
ସର୍ଵାନ୍ ଭାଗଵତାନ୍ କୃତ୍ଵା ଶ୍ରୀଵୈକୁଂଠଂ ତଦାଽଗମତ୍ ॥ 23॥ (କୃତ୍ତ୍ଵା, ତଦାଗମତ୍)

ଭୂତ୍ଵା ଗୋପାଶ୍ଚ ତେ ସର୍ଵେ ଵ୍ରଜମଂଡଲଵାସିନଃ ।
ନିହତ୍ୟ ରାକ୍ଷସାନ୍ ସର୍ଵାନ୍ ଗୋଲୋକଂ ତୁ ତଦା ୟୟୁଃ ॥ 24॥

॥ ଇତି ଶ୍ରୀସ୍କଂଦପୁରାଣେ ରେଵାଖଂଡେ ଶ୍ରୀସତ୍ୟନାରାୟଣ ଵ୍ରତକଥାୟାଂ ପଂଚମୋଽଧ୍ୟାୟଃ ॥ 5 ॥