સાવિત્ર્યુવાચ ।
તપસા ધર્મમારાધ્ય પુષ્કરે ભાસ્કરઃ પુરા ।
ધર્મં સૂર્યઃસુતં પ્રાપ ધર્મરાજં નમામ્યહમ્ ॥ 1 ॥

સમતા સર્વભૂતેષુ યસ્ય સર્વસ્ય સાક્ષિણઃ ।
અતો યન્નામ શમનમિતિ તં પ્રણમામ્યહમ્ ॥ 2 ॥

યેનાંતશ્ચ કૃતો વિશ્વે સર્વેષાં જીવિનાં પરમ્ ।
કામાનુરૂપં કાલેન તં કૃતાંતં નમામ્યહમ્ ॥ 3 ॥

બિભર્તિ દંડં દંડાય પાપિનાં શુદ્ધિહેતવે ।
નમામિ તં દંડધરં યઃ શાસ્તા સર્વજીવિનામ્ ॥ 4 ॥

વિશ્વં ચ કલયત્યેવ યઃ સર્વેષુ ચ સંતતમ્ ।
અતીવ દુર્નિવાર્યં ચ તં કાલં પ્રણમામ્યહમ્ ॥ 5 ॥

તપસ્વી બ્રહ્મનિષ્ઠો યઃ સંયમી સંજિતેંદ્રિયઃ ।
જીવાનાં કર્મફલદસ્તં યમં પ્રણમામ્યહમ્ ॥ 6 ॥

સ્વાત્મારામશ્ચ સર્વજ્ઞો મિત્રં પુણ્યકૃતાં ભવેત્ ।
પાપિનાં ક્લેશદો યસ્તં પુણ્યમિત્રં નમામ્યહમ્ ॥ 7 ॥

યજ્જન્મ બ્રહ્મણોંઽશેન જ્વલંતં બ્રહ્મતેજસા ।
યો ધ્યાયતિ પરં બ્રહ્મ તમીશં પ્રણમામ્યહમ્ ॥ 8 ॥

ઇત્યુક્ત્વા સા ચ સાવિત્રી પ્રણનામ યમં મુને ।
યમસ્તાં શક્તિભજનં કર્મપાકમુવાચ હ ॥ 9 ॥

ઇદં યમષ્ટકં નિત્યં પ્રાતરુત્થાય યઃ પઠેત્ ।
યમાત્તસ્ય ભયં નાસ્તિ સર્વપાપાત્પ્રમુચ્યતે ॥ 10 ॥

મહાપાપી યદિ પઠેન્નિત્યં ભક્તિસમન્વિતઃ ।
યમઃ કરોતિ સંશુદ્ધં કાયવ્યૂહેન નિશ્ચિતમ્ ॥ 11 ॥

ઇતિ શ્રીમદ્દેવીભાગવતે મહાપુરાણે નવમસ્કંધે એકત્રિંશોઽધ્યાયઃ ।