ସାଵିତ୍ର୍ୟୁଵାଚ ।
ତପସା ଧର୍ମମାରାଧ୍ୟ ପୁଷ୍କରେ ଭାସ୍କରଃ ପୁରା ।
ଧର୍ମଂ ସୂର୍ୟଃସୁତଂ ପ୍ରାପ ଧର୍ମରାଜଂ ନମାମ୍ୟହମ୍ ॥ 1 ॥

ସମତା ସର୍ଵଭୂତେଷୁ ୟସ୍ୟ ସର୍ଵସ୍ୟ ସାକ୍ଷିଣଃ ।
ଅତୋ ୟନ୍ନାମ ଶମନମିତି ତଂ ପ୍ରଣମାମ୍ୟହମ୍ ॥ 2 ॥

ୟେନାଂତଶ୍ଚ କୃତୋ ଵିଶ୍ଵେ ସର୍ଵେଷାଂ ଜୀଵିନାଂ ପରମ୍ ।
କାମାନୁରୂପଂ କାଲେନ ତଂ କୃତାଂତଂ ନମାମ୍ୟହମ୍ ॥ 3 ॥

ବିଭର୍ତି ଦଂଡଂ ଦଂଡାୟ ପାପିନାଂ ଶୁଦ୍ଧିହେତଵେ ।
ନମାମି ତଂ ଦଂଡଧରଂ ୟଃ ଶାସ୍ତା ସର୍ଵଜୀଵିନାମ୍ ॥ 4 ॥

ଵିଶ୍ଵଂ ଚ କଲୟତ୍ୟେଵ ୟଃ ସର୍ଵେଷୁ ଚ ସଂତତମ୍ ।
ଅତୀଵ ଦୁର୍ନିଵାର୍ୟଂ ଚ ତଂ କାଲଂ ପ୍ରଣମାମ୍ୟହମ୍ ॥ 5 ॥

ତପସ୍ଵୀ ବ୍ରହ୍ମନିଷ୍ଠୋ ୟଃ ସଂୟମୀ ସଂଜିତେଂଦ୍ରିୟଃ ।
ଜୀଵାନାଂ କର୍ମଫଲଦସ୍ତଂ ୟମଂ ପ୍ରଣମାମ୍ୟହମ୍ ॥ 6 ॥

ସ୍ଵାତ୍ମାରାମଶ୍ଚ ସର୍ଵଜ୍ଞୋ ମିତ୍ରଂ ପୁଣ୍ୟକୃତାଂ ଭଵେତ୍ ।
ପାପିନାଂ କ୍ଲେଶଦୋ ୟସ୍ତଂ ପୁଣ୍ୟମିତ୍ରଂ ନମାମ୍ୟହମ୍ ॥ 7 ॥

ୟଜ୍ଜନ୍ମ ବ୍ରହ୍ମଣୋଂଽଶେନ ଜ୍ଵଲଂତଂ ବ୍ରହ୍ମତେଜସା ।
ୟୋ ଧ୍ୟାୟତି ପରଂ ବ୍ରହ୍ମ ତମୀଶଂ ପ୍ରଣମାମ୍ୟହମ୍ ॥ 8 ॥

ଇତ୍ୟୁକ୍ତ୍ଵା ସା ଚ ସାଵିତ୍ରୀ ପ୍ରଣନାମ ୟମଂ ମୁନେ ।
ୟମସ୍ତାଂ ଶକ୍ତିଭଜନଂ କର୍ମପାକମୁଵାଚ ହ ॥ 9 ॥

ଇଦଂ ୟମଷ୍ଟକଂ ନିତ୍ୟଂ ପ୍ରାତରୁତ୍ଥାୟ ୟଃ ପଠେତ୍ ।
ୟମାତ୍ତସ୍ୟ ଭୟଂ ନାସ୍ତି ସର୍ଵପାପାତ୍ପ୍ରମୁଚ୍ୟତେ ॥ 10 ॥

ମହାପାପୀ ୟଦି ପଠେନ୍ନିତ୍ୟଂ ଭକ୍ତିସମନ୍ଵିତଃ ।
ୟମଃ କରୋତି ସଂଶୁଦ୍ଧଂ କାୟଵ୍ୟୂହେନ ନିଶ୍ଚିତମ୍ ॥ 11 ॥

ଇତି ଶ୍ରୀମଦ୍ଦେଵୀଭାଗଵତେ ମହାପୁରାଣେ ନଵମସ୍କଂଧେ ଏକତ୍ରିଂଶୋଽଧ୍ୟାୟଃ ।